Oku Longisa Lombrochura Olondaka Viwa
1. Ombrochura Olondaka Viwa ya pongiyiwa locimãho cipi?
1 Vupange Wetu Wusoma wosãi Yevambi Linene, mu sangiwa ocimãleho cimue coku longisa ocili komanu okuti ombrochura Olondaka Viwa vi Tunda ku Suku! Ovinimbu vimue Viembimbiliya olondaka viaco ka via tukuiwile vocinimbu, oco omunu tua sanga a vi tange muẽle Vembimbiliya. Alua pokati kalivulu etu oku longisa, a sonehiwa lonjila yimue okuti omunu o pondola oku a tanga lika liaye loku lilongisa ovina vialua, pole, ombrochura eyi ya pangiwa locimãho cokuti omunu o yi lilongisa lekuatiso liulongisi umue. Omo liaco, poku eca ombrochura yaco, tu lekisa komunu tua sanga ndomo ku lingiwa elilongiso liaco oco a lilongise olondaka viwa vi tunda Vembimbiliya.—Mateo 13:44.
2. Tu talavaya ndati lombrochura Olondaka Viwa poku kundila omunu onjanja yatete?
2 Poku Kundila Omunu Onjanja Yatete: O pondola oku popia ndoco: “Ndeya kulo momo omanu va sakalala lekalo lioluali lulo. O tava hẽ okuti ekalo liaco li ka pongoloka? [Ecelela etambululo.] Vembimbiliya mu sangiwa olondaka viwa vi tu ĩha elavoko. Tala apulilo amue okuti atambulo aco a sangiwa Vembimbiliya.” Eca ombrochura komunu waco kuenda u lekisa apulilo a sangiwa kemẽla liasulako loku u pinga oco a nõle eli a yongola oku kũlĩhĩsa. Noke, u lekisa ndomo elilongiso Liembimbiliya li lingiwa poku tanga ocinimbu catete cocipama caco. O pondolavo oku linga epulilo limue ove wa ñola vocipama okuti li vetiya onjongole yaye, kuenda lekisa ndomo ombrochura yi pondola oku u kuatisa oku kũlĩha atambululo a sangiwa Vembimbiliya. Nda okuti ocipama caco ci likuata lovideo yimue yi sangiwa vo jw.org, akundi vamue poku kunda va lekisa ovideo yaco.
3. Lombolola ndomo elilongiso Liembimbiliya li lingiwa poku kuama ombrochura Olondaka Viwa.
3 Ndomo Elilongiso Liembimbiliya li Lingiwa: (1) Tanga epulilo li tekãvelua oco o kuatise omunu oku kuata elomboloko liatosi a velapo. (2) Tanga ocinimbu ci kuãimo. (3) Tanga ovisonehua vina via yendukila kovaso, kuenda lutate linga apulilo oco o kuatise omunu wa sanga oku limbuka ndomo ovisonehua vi eca etambululo liepulilo lia tukuiwa. (4) Nda vemi liepulilo mu sangiwa ocinimbu cikuavo, pitulula atosi 2 kuenda 3. Nda ovideo yimue yi likuata lepulilo kuenje handi kua yi lekisile komunu wa sanga, citava okuti o yi lekisa osimbu u sapela. (5) Noke, pinga komunu waco oku eca etambululo liepulilo lia tukuiwa vocipama, oco o limbuke nda co lomboloka.
4. Nye ci tu kuatisa oku loñoloha poku talavaya lombrochura eyi?
4 Kũlĩha ciwa ocimãleho caco. Talavaya locimãleho caco kapuluvi osi. Osimbu kua fetikile elilongiso Liembimbiliya, sokolola kondonge loku kũlĩhĩsa ovisimĩlo viaye, poku kuama ovinimbu Viembimbiliya vi sangiwa vocipama caco. (Olosap. 15:28; Ovil. 17:2, 3) Osimbu o loñoloha poku talavaya lombrochura yaco, o ka yi tenda okuti oyo ocimãleho cove ca velapo coku longisa ocili komanu!