NDOMO TU MALAKO ESUVU

1 | Yuvula Ocame

Ceci Embimbiliya li Longisa:

“Suku hokuacameko, pole, kolofeka viosi omunu una u sumbila loku linga ovina via sunguluka, o taviwa laye.”—OVILINGA 10:34, 35.

Elomboloko Liocisonehua Eci:

Yehovaa Suku ka tu sombisa omo tua tiamẽla kofeka yimue, kepata limue, kevala liekova, ale kutuwa wetu. Pole, o tiamisila utima kocina ci kuete esilivilo lia velapo—cina tua tuwa vokati. Embimbiliya li popiavo okuti, “omunu o vanja lika eci ci molẽha kilu, pole, Yehova o vanja vutima.”—1 Samuele 16:7.

Ceci o Pondola Oku Linga:

Ocili okuti, ka tu pondola oku mola eci ci kasi vutima womunu, pole, tu pondola oku setukula Suku poku yuvula oku lekisa ocame kokuavo. Oco ka tu ka sime okuti omanu vovimunga vimue vosi yavo vamuamue, tu sukila oku kũlĩha omunu lomunu. Nda wa limbuka okuti o kuetele vakuene ovisimĩlo ka via sungulukile,—ndeci omanu vakuekova lia litepa, ale vakuafeka yikuavo,—likutilila ku Suku kuenda u pinga oco a ku kuatise oku upa vutima wove ovisimĩlo viaco. (Olosamo 139:23, 24) Nda wa likutilila lutima wosi ku Yehova loku pinga ongusu yi sukiliwa oco a ku kuatise oku yuvula ocame, ocili okuti Suku, o ka yeva ohutililo yove, loku ku kuatisa.—1 Petulu 3:12.

a Yehova onduko ya Suku.—Olosamo 83:18.

“Kosimbu, lalimue etekele nda lingile ukamba lomunu umue ukuekova liyela . . . Kaliye nda tiamẽla kongongela ya vamanji voluali luosi.”—TITUS

Ulandu Womuenyo—TITUS

Wa Tẽla Oku Yula Esuvu

Titus wa tẽla oku yula esuvu, wa tiamẽlele kocimunga cimue colongangala ca kuatele onyeño yalua omo liovihandeleko viocame viofeka yaye. Eye hati: “Tua endaenda kovitumãlo violupale kuna alume vakuekova litekãva va suvukiwile ndeci, kolowotele kuenda kolobar oco va sande ovama.” Titus wa limbuka okuti, wa kala ongangala calua omo liesuvu kuenje wa popia hati: “Nda nda fetika oku lihoya lomunu umue ci kaile ulume, ale ukãi, ame nda enda oku fetika oku u veta.”

Pole, Titus wa linga apongoloko eci a fetika oku lilongisa Embimbiliya Lolombangi Via Yehova. Ovina a lilongisa Vembimbiliya, vio kuatisa oku pongolola ovisimĩlo viaye. Ocina cimue co kuatisa calua, ohuminyo Yembimbiliya yokuti, “oku fa ka ku ka kalako vali, ndaño oku lila loku liyula levalo ka vi ka kalako vali.”—Esituluilo 21:3, 4.

Kefetikilo, ka ca lelukile ku Titus oku upa esuvu vutima waye. Eye hati: “Ca tĩlile calua oku pongolola ovisimĩlo kuenda ovituwa viange.” Pole, eye wa kuatisiwa calua poku tanga olondaka vielivulu Liovilinga 10:34, 35, ku lombolola okuti, Suku ka kuete ocame.

Onima yipi yeyililako? Titus hati: “Eci nda mola ocisola ci kasi pokati Kolombangi Via Yehova, ndaño vakuekova kuenda vakuavituwa via litepa, nda limbuka okuti, etavo liocili. Osimbu sia papatisiwile oco ndi linge Ombangi ya Yehova, manji umue ukuekova liyela, wa ndi laleka oku enda konjo yaye oku ka lia. Ca kala ndonjoyi kokuange. Kosimbu, lalimue eteke nda lingile ukamba lomunu umue ukuekova liyela, ca piãla enene oku enda konjo yaye oku ka lia cimue. Kaliye nda tiamẽla kongongela ya vamanji voluali luosi.”