Lalimue Eteke tu Kasi Ulika

1-2. (a) Momo lie tu popela okuti lalimue eteke tu kasi ulika eci tu liyaka lovitangi? (b) Nye tu konomuisa vocipama cilo?

ECI tu liyaka lovitangi ka via lelukile, tu pondola oku liyeva ndu okuti, tu kasi ulika vusenge umue mua sitika calua kuenda ka tua kũlĩhĩle ndomo tu tundamo. Pole, ka tu kasi ulika. Isietu wokilu ukuacisola, o lete ovitangi vietu viosi kuenda o likuminyavo oku tu kuatisa. Yehova locisola calua o tu likuminya hati: “Ndi ka ku kuatisa.”—Isa. 41:10.

² Vocipama cilo, tu konomuisa ndomo Yehova a tu kuatisa (1) poku tu songuila, (2) poku tu ĩha ovina tu sukila, (3) poku tu teyuila kuenda (4) poku tu lembeleka. Yehova o tu likuminya okuti, ndaño tu liyaka lovitangi vialua komuenyo, lalimue eteke a ka tu ivala. Eye lalimue eteke a ka tu yanduluka. Omo liaco, lalimue eteke tu kala ulika.

YEHOVA O TU SONGUILA

3-4. Yehova wa siata oku tu songuila ndati? (Osamo 48:14)

³ Tanga Osamo 48:14. Yehova wa kũlĩha okuti, ka tu pondola oku lisonguila etu muẽle kuenda tu sukila ekuatiso liaye, oco a tu songuile. Eye o songuila ndati afendeli vaye koloneke vilo? Onjila yimue Yehova a siata oku kuama, pocakati Cembimbiliya. (Osa. 119:105) Lembimbiliya, Yehova o tu kuatisa oku nõla olonjila viwa, oku kuata ovituwa vi tu nenela esanju liocili kuenda omuenyo ka u pui kovaso yoloneke.a Ndeci, eye o tu longisa oku kala ukuacili kovina viosi, oku sola vakuetu lutima wosi kuenda oku yuvula ocikumbiti. (Osa. 37:8; Va Hev. 13:18; 1 Pet. 1:22) Eci tu lekisa ovituwa viaco viwa tu kala olonjali viwa, olohueli viwa kuenda akamba vawa.

⁴ Vembimbiliya, Yehova wa kongelamo ovolandu omanu va liyaka lovitangi kuenda ekalo ndeli lietu. (1 Va Kor. 10:13; Tia. 5:17) Eci tu tanga ovolandu omanu vaco, loku kapako ovina tua lilongisilako, tu kuatisiwa volonjila vivali. Catete, tu limbuka okuti hetuko lika tu liyaka lovitangi komuenyo. Omanu vakuavo va kuatavo ovitangi vimuamue ndevi vietu kuenda va tẽla oku pandikisa lekuatiso lia Yehova. (1 Pet. 5:9) Cavali, tu lilongisa eci ci tu kuatisa oku pandikisa kovitangi kuenda oku amamako lesanju.—Va Rom. 15:4.

5. Velie Yehova a siata oku vetiya oco va tu songuile?

⁵ Yehova wa siatavo oku tu songuila pocakati ca vamanji.b Ndeci, vamanji vakuakunyula akongelo, va linga apasu vekongelo oco va tu pamise. Olohundo viavo vi pamisa ekolelo lietu kuenda vi tu kuatisa oku amamako lomunga. (Ovil. 15:40–16:5) Akulu vekongelo va siatavo oku likolisilako calua oco va kuatise omunu lomunu pokati ketu, oku amamako oku kala ekamba lia Yehova. (1 Pet. 5:​2, 3) Olonjali vi longisa omãla vavo oku sola Yehova, oku nõla olonjila violondunge kuenda oku kuata ovituwa viwa. (Olosap. 22:6) Akãi akulu va pama konepa yespiritu, va pondolavo oku kuatisa akãi amalẽhe poku kala vakuangangu yiwa, oku eca alungulo awa kuenda oku va pamisa locisola.—Tito 2:​3-5.

6. Nye tu sukila oku linga oco tu kuatisiwe lolonumbi via Yehova?

⁶ Yehova wa tu ĩha olonumbi tu sukila oco tu kuate esanju komuenyo kuenda oku nõla olonjila viwa. Tu pondola oku lekisa ndati okuti, tua sanjukila ovina Yehova a tu lingila? Kolosapo 3:​5, 6 ku popia hati: “Kolela Yehova lutima wove wosi, kuenda ku ka kolele kelomboloko liove muẽle.” Nda tua ci linga ‘eye o ka suñamisa olonjila vietu’ loku tu kuatisa oku yuvula ovitangi vi pondola oku nyõla esanju lietu. Tu pandula calua Yehova omo lioku tu kũlĩha ciwa, loku tu sola kuenda oku tu ĩha olonumbi omunu lomunu a sukila!—Osa. 32:8.

YEHOVA O TU ĨHA OVINA TU SUKILA

7. Volonjila vipi Yehova a siata oku tu ĩha ovina tu sukila? (Va Filipoi 4:19)

⁷ Tanga Va Filipoi 4:19. Yehova ka tu songuila lika konepa yespiritu, eye o sumũlũisavo alikolisilo etu oco tu kuate eteku, uwalo kuenda onjo. (Mat. 6:33; 2 Va Tes. 3:12) Ndaño okuti, ca sunguluka oku sokolola ndomo tu kuata ovina viaco, Yehova ka yongola okuti tu sakalala calua lovina viaco. (Mat. 6:25) Momo lie? Momo Isietu wokilu, lalimue eteke a yanduluka afendeli vaye vakuekolelo vapuluvi va sukila ekuatiso. (Mat. 6:8; Va Hev. 13:5) Omo liaco, tu pondola oku kolela lutima wosi kueci eye a popia okuti, o ka tu ĩha ovina tu sukila.

8. Nye Yehova a lingila Daviti?

⁸ Sokolola ndomo Yehova a kuatisa Daviti. Vokuenda kuanyamo ka a lelukile Daviti a kala oku tila Saulu, Yehova wa eca kokuaye kuenda kalume vaye ovina va sukilile oco va kale lomuenyo. Daviti poku sokolola ndomo Yehova o kuatisa vokuenda kuanyamo, wa soneha ndoco: “Nda kala umalẽhe kuenje cilo nda kuka, pole, sia la mola ukuesunga okuti wa yandulukiwa, ndaño omãla vaye oku sanda okulia.” (Osa. 37:25) Ndeci ca lipita la Daviti, citava okuti wa mola ndomo Yehova a ku tata, ale ndomo a tata vamanji vakuavo kotembo yovitangi.

9. Koloneke vilo, Yehova eca ndati ovina vi sukiliwa kafendeli vaye eci ku pita ocilunga cimue? (Talavo oviluvialuvia.)

⁹ Yehova ecavo kafendeli vaye ovina va sukila eci ku pita ocilunga cimue. Ndeci, eci kua pita onjala yalua ko Yerusalãi kocita catete, Akristão vo kolonepa vikuavo va tuma ovina vamanji va sukilile. (Ovil. 11:​27-30; Va Rom. 15:​25, 26) Afendeli va Yehova koloneke vilo, va siatavo oku kuatisa vamanji kasukila avo. Eci ku pita ocilunga cimue, Yehova locisola, o vetiya afendeli vaye oco va ece ovina vi sukiliwa ndeci, okulia, ovava, uwalo kuenda ovihemba komanu va kasi kocitumãlo kua pita ocilunga. Ocimunga coku tunga, ci semulũla olonjo kuenda Olonjango Viusoma via nyõleha. Afendeli va Yehova vakuanjanga koku eca elembeleko kuenda epamiso li tunda Vembimbiliya, ku vana va pumba olonjo ale va fisa vangandiavo.

10-11. Nye ove o lilongisila kulandu wa Borys?

¹⁰ Yehova ecavo ovina vi sukiliwa ku vana ka vo fendela. Etu tu pondola oku setukula Yehova, eci tu sanda apuluvi oku linga ovina viwa ku vana ka vo vumbi. (Va Gal. 6:10) Nda tu ci linga, tu ka kuatisa omanu vaco oku kuata onjongole yoku lilongisa vali calua catiamẽla ku Yehova. Kũlĩhĩsa ulandu wa Borys usongui umue wo kosikola o kasi ko Ukrânia. Ndaño okuti eye ka kaile Ombangi ya Yehova, eye olonjanja viosi wa enda oku tata lesumbilo olondonge viaye vina via kala Olombangi Via Yehova. Omo liuyaki, Borys wa nõlapo oku siapo imbo eye a kala oco ande kocitumãlo cikuavo ca kolapo vofeka yaco kuenje vamanji vo kuatisa. Noke Borys wa enda Kocipito cimue Conjivaluko colofa via Kristu. Borys wa popia hati: “Olombangi Via Yehova, via ndi kuatela ohenda yalua loku ndi kuatisa. Ngeca olopandu vialua Kolombangi Via Yehova.”

¹¹ Vosi yetu, tu pondola oku setukula Isietu wokilu ukuahenda, poku lekisa ocisola ku vana va sukila ekuatiso, ci kale vana va vumba Yehova ale sio. (Luka 6:​31, 36) Tu lavoka okuti, ocisola tu lekisa komanu vaco, ci va vetiya oku lilongisa catiamẽla ku Yehova loku linga olondonge via Kristu. (1 Pet. 2:12) Omo liaco, ci kale okuti ovo va nõla oku vumba Yehova ale sio, tu ka kuata esanju omo lioku kũlĩha okuti, “esanju li tunda koku eca olio lia velapo.”—Ovil. 20:35.

YEHOVA O TU TEYUILA

12. Eteyuilo lipi Yehova a likuminya kafendeli vaye ndocimunga? (Osamo 91:​1, 2, 14)

¹² Tanga Osamo 91:​1, 2, 14. Koloneke vilo, Yehova o tu likuminya oku tu teyuila konepa yespiritu. Eye lalimue eteke a ka ecelela okuti, Satana o tateka efendelo liocili. (Yoa. 17:15) Vokuenda ‘kuohali ya piãla’ tu pondola oku kolela lutima wosi okuti, Yehova o ka tẽlisa ohuminyo yaye yoku teyuila afendeli vaye, konepa yespiritu kuenda yoketimba.—Esit. 7:​9, 14.

13. Volonepa vipi Yehova a teyuila omunu lomunu pokati ketu?

¹³ Yehova o teyuila ndati omunu lomunu pokati ketu? Yehova pocakati Cembimbiliya o tu kuatisa oku tepisa eci ciwa leci cĩvi. (Va Hev. 5:14) Eci tu kapako olonumbi tu lilongisa Vondaka ya Suku, tu liteyuila konepa yespiritu kuenda yoketimba. (Osa. 91:4) Handi vali, Yehova o tu ĩha ekuatiso tu sukila, oco tuamameko oku kakatela kokuaye. (Isa. 32:​1, 2) Omo lioku ñualiwa lomanu va sole Yehova haivo va kapako olonumbi via Suku, tu tambula elembeleko loku pamisiwa oco tu yuvule oku linga eci cĩvi.—Olosap. 13:20.

14. (a) Momo lie Yehova ka tu teyuilila kovitangi vietu viosi? (b) Ohuminyo yipi yi tu ĩha Osamo 9:10? (Talavo etosi.)

¹⁴ Kosimbu Yehova wa enda oku teyuila afendeli vaye kovina via ponduile oku va lemẽha, ale oku va kokela olofa. Pole, halonjanja viosiko a enda oku ci linga. Embimbiliya li lombolola okuti, ovitangi “viya ño ocipikipiki.” (Uku. 9:11) Handi vali, kosimbu Yehova wa enda oku ecelela okuti afendeli vamue vaye, va liyaka lelambalalo toke muẽle kolofa, oco ci ece uvangi wokuti Eliapu ohembi. (Yovi 2:​4-6; Mat. 23:34) Cimuamue haico ca siata oku lipita koloneke vilo lafendeli vamue va Yehova. Ndaño okuti Yehova ka maliko ovitangi viosi tu liyaka lavio, tua kolela okuti eye lalimue eteke a ka yanduluka vana vo sole.c—Osa. 9:10.

YEHOVA O TU LEMBELEKA

15. Tu lembelekiwa ndati pocakati cohutililo Cembimbiliya kuenda ca vamanji? (2 Va Korindo 1:​3, 4)

¹⁵ Tanga 2 Va Korindo 1:​3, 4. Olonjanja vimue tu yeva esumuo kuenda esakalalo. Citava okuti, o kasi oku liyaka locitangi cimue ci sumuisa, haico ci ku kokela oku liyeva ulika. Anga hẽ umue wa kapako ndomo ove o liyevite? Ocili okuti Yehova wa ku kapako. Eye ka yevi lika evalo lietu pole, “o tu lembeleka kohali yetu yosi.” Ndamupi? Eci tu likutilila lutima wosi ku Yehova, eye o tu ĩha ‘ombembua yaye yina ya piãla olondunge viosi.’ (Va Fil. 4:​6, 7) Tu sangavo elembeleko eci tu tanga olondaka via Yehova Vembimbiliya, vina vi tiamisiwila kokuetu. Vembimbiliya Yehova o tu sapuila ndomo eye a tu sole calua, o tu longisa oku kala vakualondunge kuenda o tu ĩha elembeleko. Olohongele viekongelo vi tu ĩhavo elembeleko, momo tu lilongisa ovina vi pamisa vi sangiwa Vembimbiliya, kuenda oku lembelekiwa la vamanji.

16. Nye wa lilongisila kulandu wa manji Nathan kuenda Priscilla?

¹⁶ Oco tu limbuke ndomo Yehova a tu lembeleka loku tu pamisa pocakati Cembimbiliya, kũlĩhĩsa ulandu wa manji Nathan kuenda Priscilla va kasi ko Estadus Unidus. Kanyamo apita va nõlelepo oku ilukila oku kuli esukila liakundi Vusoma. Manji Nathan wa popia hati: “Tua kolelele okuti Yehova wa laikele oku sumũlũisa alikolisilo etu. Pole, eci tua pitĩla kocikele cetu cokaliye, tua liyaka locitangi cimue coku vela ceya ocipikipiki kuenda ekambo liolombongo.” Kuenje ovo va sukilile oku tiukila konjo loku amamako oku liyaka lekambo liolombongo. Manji Nathan ivaluka ndoco: “Ame nda enda oku lipula esunga lieci Yehova ka tu sumũlũisilile ndomo tua yonguile. Toke muẽle nda fetika oku lipula nda nda linga cimue ka ca sungulukile.” Vokuenda kuotembo manji Nathan kuenda Priscilla va limbuka okuti Yehova ka va yandulukile kapuluvi ovo va sukilile ekuatiso. Manji Nathan wamisako hati: “Votembo yaco ka ya lelukile, tua tendele Embimbiliya ndekamba lietu ukualondunge li tu ĩha elembeleko kuenda olonumbi. Oku tiamisila utima konjila ndomo Yehova a tu kuatisa oku pandikisa kovitangi viaco okuti, ka tu luluvalela kovitangi vietu, ca tu kuatisa oku kolela okuti Yehova o kamamako oku tu kuatisa kovaso yoloneke.”

17. Manji umue ukãi o tukuiwa Helga wa lembelekiwa ndati? (Talavo ociluvialuvia.)

¹⁷ Vamanjetu va pondola oku tu ĩha elembeleko tu sukila. Ndamupi? Tu konomuisi ulandu wa manji Helga woko Hungria. Vokuenda kuanyamo alua, eye wa liyaka lovitangi vialua ka via lelukile, vina vio kokela oku yeva esakalalo kuenda esumuo. Pole, eci a sokolola kotembo yaco, o limbuka okuti Yehova wa kala vetiya va vamanji vekongelo oco vo lembeleke. Eye wa soneha ndoco: “Yehova olonjanja viosi wa ñuatisa eci nda sakalalele calua omo liupange woku sanda eteku, oku tata omõlange o vela kuenda oku liyaka loloseteko vikuavo. Oloneke viosi vokuenda 30 kanyamo, eye wa tẽlisa ohuminyo yaye yoku ndembeleka. Yehova olonjanja vialua wa ndi pamisa pocakati colondaka vi lembeleka via vakuetu. Nda endavo oku tambula asapulo ale olondaka viepandiyo vapuluvi nda sukilile calua.”

18. Tu pondola oku lembeleka ndati vakuetu?

¹⁸ Tu kuete esumũlũho lioku setukula Suku poku lembeleka vekuetu. Tu pondola oku ci linga ndati? Poku va yevelela lepandi, oku vangula lavo lonjila yimue yi lembeleka kuenda oku va kuatisa eci va sukila. (Olosap. 3:27) Tu likolisilako oku lembeleka vosi va kasi oku tala ohali oku kongelamo vana ka va vumbi Yehova. Eci vana tu lisungue lavo va yeva esumuo, va vela ale va kasi lesakalalo limue, tu va nyula loku va yevelela lutate kuenda oku va sapuila ovina vi lembeleka vi sangiwa Vembimbiliya. Eci tu setukula Yehova “Suku yelembeleko liosi,” ka tu kuatisa lika vamanji oku pandikisa kovitangi, tu kuatisavo vana ka va vumbi Suku oku kuata onjongole yoku lilongisa catiamẽla kokuaye.—Mat. 5:16.

YEHOVA OLONJANJA O TU KUATISA

19. Nye Yehova a siata oku tu lingila kuenda tu u setukula ndati?

¹⁹ Yehova wa kapako calua vosi vana vo sole. Eye ka tu yanduluka eci tu liyaka lovitangi. Ndeci isia umue a tata locisola omãla vaye, Yehova o tatavo afendeli vaye vakuekolelo. Eye o tu songuila, o tu ĩha ovina tu sukila, o tu teyuila kuenda o tu lembeleka. Tu setukula Isietu wokilu poku kuatisa vakuetu, loku va lembeleka eci va liyaka lovitangi. Voluali lulo, citava okuti tu liyaka lovitangi kuenda esumuo, pole, tu pondola oku kolela okuti Yehova o kasi letu. Momo eye wa likuminya hati: “Ku ka kuate usumba momo ndi kasi love.” (Isa. 41:10) Ohuminyo eyi yi tu ĩha ekolelo liokuti, la Yehova lalimue eteke tu kala ulika!