Momo Lie ci Kuetele Esilivilo Oku Vetiya Omãla Oku Tanga?—Onepa 2: Vocimalẽho Cimue, ale Vopapelo?

Omõlove o sole vali oku tangela pi—vocimalẽho cimue ale vopapelo?

Amalẽhe valua va sole vali oku tangela vocimalẽho cimue. Ondotolo yi tukuiwa okuti Jean M. Twenge, ya soneha ndoco: “Catiamẽla kocitumbulukila ca citiwa vepuluvi lioku tioka vonumbi yi kuãimo, ale oku yikula kemẽla li kuãimo volosengundu vimue, kokuavo, alivulu ka a va vetiya vali.”a

Ocili okuti, oku tangela vocimalẽho cimue ci kuetepo vali esilivilo. John o kuete 20 kanyamo wa popia hati: “Kosikola nda tangela, va enda oku longisa lalivulu a kasi volokomputador ale vovimalẽho vikuavo. Ondimbukiso yoku sandiliya, ya ndi kuatisa oku sanga lonjanga yalua olonumbi nda sukilile.”

Omanu vana va tangela vocimalẽho cimue, va kuete ovina vialua vi va kuatisa haivio vi sangiwa lulelu. Ndeci, poku tioka ño, ale oku lamba pondimbukiso yimue, vakuakutanga va sanga elomboloko liondaka yimue, oku sika ocipama cimue ca ngalavaliwa, oku lekisa ovideo yimue, oku tala ovideo yimue, ale olonumbi vikuavo vi kuete elitokeko la vikuavo pocakati conumbi yimue. Anga hẽ eci ci lomboloka okuti, oku tanga valivulu ovopapelo ka ci kuatisa calua?

Omanu valua poku lilongisa ovina via longa, va nõlapo oku tanga alivulu ovopapelo. Momo lie?

• Oku tiamisila utima. Umalẽhe umue o tukuiwa Nathan wa popia hati: “Eci ndi tangela vocimalẽho cimue, ovipama vimue vi li yikula ovio muẽle kuenda asapulo a molẽha ocipikipiki, olonjanja vialua vi yapuisa utima wange kueci nãsi oku tanga.”

  Karen o kuete 20 kanyamo, o kuetevo ocitangi cimuamue. Eye wa popia hati: “Eci ndi tangela votelefone ale votablete yimue, ci leluka kokuange oku yapuisiwa lo aplikativo yimue, ale oku setekiwa oku linga omapalo yimue.”

  Onumbi Yembimbiliya: “Talavaya ciwa lotembo.”—Va Kolosai 4:5, Phillips.

  Sokolola kapulilo a kuãimo: Omõlove o tẽla hẽ oku likandangiya oco a yuvule ovina vi taluisa poku tangela, ale oku lilongisila vocimalẽho cimue? Nda ka ci tẽla, nye o sukila oku linga oco o kuatise omõlove oku tiamisila utima kovina a tanga?

  Onumbi: Kuatisa omõlove oku kuata elomboloko liokuti, ovina vi taluisa okuti vi sangiwa vocimalẽho, vi pesela otembo nda a linga kovopange o vonjo kuenda otembo eye nda a pesila kovopange akuavo.

• Kuata elomboloko. “Elivulu limue liti: “Ovolandu alua a lekisa okuti, vakuakutanga ka va kuata elomboloko limuamue poku tangela vocimalẽho cimue oku ci sokisa loku tangela velivulu liopapelo.”

  Esunga limue lieli okuti, omanu va tangela vovimalẽho, va tanga lonjanga yalua okuti, ka va sokolola vali lutate kueci va tanga. Nicholas Carr vocipama cimue co internet wa popia hati: “Tu yongola oku kuata olonumbi vialua lonjanga yalua vina tu mola lovaso etu kuenda oku senga senga lovimuine vietu.”b

  Ocili okuti olonjanja vimue oku tanga lonjanga ku nena onima. Carr hati, ocitangi ceci okuti, “ci kasi oku linga onjila yetu ya velapo yoku tanga.” Kuenje omõlove o kuata ocituwa coku tanga lonjanga, pole, ka kuata elomboloko lieci a tanga.

  Onumbi Yembimbiliya: “Kovina viosi o kuete, vokiyako elomboloko.”—Olosapo 4:7.

  Sokolola kepulilo eli: O kuatisa ndati omõlove oku lilongisa oku konomuisa ondongosi osapi yimue, ci kaile vocimalẽho cimue, ale velivulu liopapelo?

  Onumbi: Lekisa esunguluko. Ku sukila oku talavaya lika locimalẽho cimue, ale lelivulu liopapelo. Ovina evi vivali vi kuete esilivilo. Ocili okuti, ovimalẽho vimue vi pondola oku kuatisa oku kuata elomboloko. Omo liaco, lekisa esunguluko poku sapela lomãla vove catiamẽla kesilivilo liolonjila evi vivali vioku tanga. Limbukavo okuti, omõla lomõla ka lisokele lukuavo.

• Patekela eci o tanga. Ferris Jabr vocipama cimue ca sandekiwa vo Scientific American wa popia okuti, oku sokisa oku tangela velivulu liovopapelo lo vocimalẽho cimue, ca li tepa momo oku tangela vocimalẽho ci “kavisa calua owoño wetu . . . kuenda ka ci leluka oku patekela eci ca tangiwa.”

  Ndeci oku tangela velivulu limue liopapelo, ci ku kuatisa oku ivaluka etosi limue omo okuti, ove wivaluka kemẽla li sangiwa. Kuenje ci pondola oku kala “ndondimbukiso yocitayo” ci ku kuatisa oku sanga etosi liaco onjanja yikuavo.

  Handi vali, vakuakukonomuisa va limbuka okuti, vana va siata oku tanga valivulu olopapelo olonjanja vialua va ivaluka ovina viaco lonjila ya velapo. Ovo va ivaluka ovina va tanga omo okuti, vi va vetiya lonjila ya velapo.

  Onumbi Yembimbiliya: “Lava olondunge kuenda uloño woku sokolola.”—Olosapo 3:21.

  Sokolola kapulilo a kuãimo: Ca tĩla hẽ komõlove oku ivaluka ovina a tanga, ale a lilongisa? Nda oco, o kuatisa ndati omõlove oku mioñolola ocituwa caye coku lilongisa? Oku tanga velivulu liopapelo, ci pondola hẽ oku u kuatisa?

  Onumbi: Tiamisila utima konjila ndomo omõlove a kasi oku lilongisa okuti, kocina a sole hacoko. Omanu va seteka oku velisapo calua oku tanga vocimalẽho cimue.