Etavo kuenda Uyaki ko Ukrania—Nye Embimbiliya li Popia?

Kũlĩhĩsa eci ci kuãimo catiamẽla kasongui vetavo va kemãla kuenda uyaki ko Ukrania.

• “Usongui Cirilo, Wetavo lio Ortodoxo ko Russia, ka popele ondaka layimue yoku pisa ovina vĩvi ombiali yo Russia yi kasi oku linga. . . . Kua siata oku kuamiwa olonumbi vietavo liaco viatiamẽla ko Ukrania, oco vi teyuile esunga lieci Putin a kasilili oku linga uyaki.”—EUobserver, keteke 7 Yelombo, 2022.

• “Handi vali, Usongui Cirilo . . . wa tumisa ondimbukiso yikuavo yoku lisandela esunga lieci ofeka yaye yi kasi oku linga kofeka yo Ukrania poku popia okuti—ku kasi oku lingiwa uyaki waco oco va imũle ekandu.”—AP News, keteke 8 Yelombo, 2022.

• “Epifanio I u metropoli, usongui Wetavo lio Ortodoxo ko Ukrania volupale luo Kiev, Vosengunda wa sumũlũisa omanu oco va ka yake ‘lasualali vo ko Russia.’ . . . [Eye] wa popiavo okuti, oku ponda asualali vo ko Russia, hekanduko.”—The Jerusalem Post, keteke 16 Yelombo, 2022.

• “Etu [tu panga onepa Kocimunga Colondunguli Vietavo lio Ukrania kuenda Kocisoko Catavo okuti (UCCRO)], tu kuatisa Olohoka Viasualali vio Ukrania la vosi vana va tu teyuila, kuenje tu va sumũlũisa oco va teyuiwe kovanyãli vo Ukrania, loku va likutililako.”—UCCROa Statement, keteke 24 ya Kayovo, 2022.

Nye o sima? Atavo ana a litukula okuti a kuãi Yesu Kristu citava hẽ okuti a tuma oloñame viavo kuyaki? Nye Embimbiliya li popia?

Ulandu wetavo vuyaki

Ulandu u lekisa okuti, olonjanja vialua etavo lia ecelela, lia sanda esunga kuenda lia kuatisa kuyaki osimbu lia likembisa oku sanda ombembua. Vokuenda kuotembo yalua, Olombangi Via Yehova via siata oku sandeka ombambe yatavo aco. Kũlĩhĩsa amue pokati kovolandu a sandekiwa valivulu etu.

• “Ocipama As Cruzadas: uma ‘trágica ilusão,’” ci lekisa okuti Etavo Lio Katolika ko Roma, olio lia kuata eko lioku pondiwa kuomanu vonduko ya Suku kuenda ya Kristu.

• Ocipama “A igreja católica na África (Etavo Lio Katolika vo Afrika),” ca lekisa okuti etavo ka lia tatekele uyaki pokati kovikoti kuenda umondi.

• Ovipama “A culpa é da religião? (Anga hẽ Etavo li Kuete Eko?),” “O papel da religião nas guerras humanas (Ocikele Cetavo Kovoyaki Omanu)” kuenda “A religião toma partido (Etavo li Eca Ekuatiso),” vi lombolola ndomo etavo lio Katolika, lio Ortodoxo kuenda asongui vetavo lio Postande va kuatisa kolonẽle vivali kovoyaki alua.

Atavo Akristão citava hẽ okuti a kuatisa kuyaki?

Ceci Yesu a longisa: “Sola u o lisungue love ndeci o lisole ove muẽle.” (Mateo 22:39) “Amamiko oku sola ovanyãli vene.”—Mateo 5:44-47.

Ceci Yesu a popia: ‘Usoma wange ka u pangi onepa koluali lulo. Nda Usoma wange wa pangele onepa koluali lulo, akuenje vange nda ka va ecelele oku ngambata.’ (Yoano 18:36) “Vosi va yaka losipata, va ka nyõleha losipata.”—Mateo 26:47-52.

Kũlĩhĩsa epulilo li kuãimo: Nda okuti Akristão ka va yakele oco va teyuile Yesu, citava hẽ oku yaka omo liesunga likuavo? Tanga ocipama, “A guerra é compatível com o cristianismo? (Uyaki u Likuata hẽ Letavo Liakristão?)” oco o kũlĩhe ndomo Akristão vo kocita catete va kuama lutima wosi ongangu kuenda alongiso a Yesu.

Nye ci ka pita latavo a kuatisa kuyaki?

Embimbiliya li longisa okuti, Suku ka tava atavo a litukula okuti oloñame via Yesu pole, ka a kuama alongiso aye.—Mateo 7:21-23; Tito 1:16.

• Elivulu Liesituluilo li lekisa okuti, Suku o kapa eko katavo ana a siata oku koka olofa ‘viomanu vosi va pondiwa kilu lieve.’ (Esituluilo 18:21, 24) Oco o lilongise esunga liaco, tanga ocipama, “O Bavulono Yinene yi Lomboloka Nye?”

• Yesu wa popia okuti, atavo osi ka a taviwa la Suku, a ka nyõliwa omo liovilinga viavo vĩvi ndeci uti ũvi ka wimi apako awa “u tetiwa kuenje wimbiwa vondalu.” (Mateo 7:15-20) Oco o kũlĩhe ndomo ovina viaco vi ka pita, tanga ocipama, “O fim da religião falsa está próximo! (Esulilo Lietavo Liesanda li Kasi Ocipepi!)”

Ono yalitalatu, oku upisa kepĩli toke kondio: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images