Anga hẽ Oku Kapa Ovihandeleko vio Konjo ci Kuete Esilivilo?

O kasi hẽ locitangi coku pokola konumbi yimue yo konjo? Ocipama eci kuenda okakasia kesulilo liemẽla vi ka ku kuatisa oku sapela lolonjali viove catiamẽla kondaka yaco.

• Tenda ovihandeleko lonjila ya sunguluka

• Ndomo o sapela lolonjali viove catiamẽla kondaka yaco

• Ceci amalehe vakuavo va popia

Tenda ovihandeleko lonjila ya sunguluka

Ocili: Eci ove o tunda konjo, lalimue eteke o ka kisikiwa vali oku pokola kovihandeleko.

Uhembi: Ove handi o ka sukila ku kuama ovihandeleko vimue eci o tunda konjo. Ove handi o ka sukila oku pokola komunu umue ndeci, ku cime cove kupange, kusongui wove ale kolombiali. Umalehe umue ufeko o tukuiwa hati Danielle okuti o kuete 19 kanyamo wa popia hati: “Ndi sima okuti omu una ka tẽla oku pokola kolonumbi ale kovihandeleko vio konjo, eye o ka kuata ovitangi vialua eci a ka kala lika liaye.”

Ceci Embimbilliya li popia: ‘Pokoli kolombiali kuenda kolonguluvulu.’ (Tito 3:1) Oku lilongisa oku kapako ovihandeleko violonjali viove, epindiso limue li ka ku kuatisa oku liyaka lovitangi kovaso yoloneke eci o linga ukulu.

Ceci o sukila oku linga: Lilongisa oku limbuka esilivilo liocihandeleko. Umalehe umue o tukuiwa hati, Jeremy wa popia hati: “Ovihandeleko nda sukilile oku pokola konjo via ndi kuatisa oku nola ciwa akamba vange kuenda oku talavaya ciwa lotembo. Ovio via ndi kuatisavo oku yuvula oku pesela otembo loku imba ovideogame kuenda oku tala o televisão. Poku ci linga ca ndi kuatisa oku kuata otembo yalua yoku linga ovina via sunguluka kuenje toke koloneke vilo ndi sole oku linga ovina viaco.”

Ndomo o sapela lolonjali viove catiamẽla kondaka yaco

Nye o sukila oku linga nda wa limbuka okuti ku kuete elomboloko liocihandeleko caco? Umalẽhe umue ufeko o tukuiwa hati Tamara wa popia hati: “Olonjali viange via ngecelela okuti ndi linga ungende kofeka yikuavo. Eci ka ci ndi lomboloka ceci okuti cilo eci nda tiuka, ovo ka va ndi ecelela oku enda kocitumãlo cimue ci sangiwa vocinãla cambata 20 kakukutu lokonjo!”

Nda o kasivo oku liyaka locitangi caco, anga hẽ cĩvi oku sapela lolonjali viove catiamẽla kocihandeleko caco? Sio! Eci o sukila oku linga oku kũlĩha otembo kuenda ndomo o sukila oku sapela lavo catiamẽla kovina viaco.

Otembo: “Umalẽhe umue ufeko o tukuiwa hati Amanda wa popia hati: Ove o sukila lika oku sapela lolonjali viove oco va pongolole ovihandeleko nda ove wa lekisa ale ovituwa viukulu okuti ovo va pondola oku ku kolela.”

Umalẽhe umue o tukuiwa hati Daria wa limbuka okuti olondaka evi viocili. Eye wa popia hati: “Eci Ina yange a limbuka okuti ame olonjanja viosi nda enda oku likolisilako oku pokola, oco lika a fetika oku sokolola oku pongolola ocihandeleko.” Ivaluka okuti, ove ku pondola oku kisika omunu umue oco a kolele kokuove. Oco omunu a ku kolele ove o sukila oku vetiya omunu lovituwa viove.

Embimbiliya li popia hati: “Patekela ocihandeleko ca so. Ku ka tombe alungulo a nyoho.” (Olosapo 6:20) Nda wa kuama onumbi eyi, olonjali viove vi ka ku kolela vali calua. Kuenje ove o ka sapela lavo catiamẽla kovihandeleko.

Ndomo: Umalẽhe umue o tukuiwa hati, Steven wa popia hati: “Eci ove o sapela lolonjali viove, ca sunguluka oku vangula lesumbilo kuenda oku kuata epandi. Poku ci linga ci kuete esilivilo okuti oku hoya loku kaluka ci sule.”

Daria wa tukuiwa kefetikilo liocipama eci otavavo kolondaka evi. Eye wa popia hati: “Oku lihoya la ina yange ka ca kuataile onima. Eci nda enda oku lihoya laye eye wa enda oku tõlisa vali ocihandeleko.”

Embimbiliya li popia hati: “Eveke li lekisa onyeño yaye yosi, ukualondunge puãi o yi likandangiya.” (Olosapo 29:11) Oku lilongisa oku (li lava) ale oku (likandangiya) ka ci ku kuatisa lika konjo, pole, ci kuetevo esilivilo kosikola, kupange, kuenda volonepa vialitepa.

Ceci o sukila oku linga: Sokolola osimbu kua vanguile. Nda kua likandangiyile ovopange osi wa linga oco o lekise okuti wa koleliwa vi pondola oku nyõleha. Eli olio esunga lieci embimbiliya li popela okuti, “u o livala konyeño wa lunguka muẽle.”—Olosapo 14:29.

Onumbi: Kuama okakasia ka sangiwa kesulilo liocipama cilo, oco o sokolole eci catiamẽla kovihandeleko ove o sukila oku pokola. Nda o sukila oku kapako ocihandeleko cimue, sapela lolonjali viove catiamẽla kondaka yaco.