Asokiyo Ovopange Oku Tunga, Osimbu Efengi ka Lia Fetikile

Anyamo osi kua siata oku papatisiwa olohuluwa viomanu. Omo liaco, tu sukila ovitumãlo vialua oco tu fendelelemo Yehova. Oco ku tambuluiwe esekoyo liaco, Oloseketa Viupange Woku Tunga vio Pocitumãlo/voluali luosi, ya lingile esokiyo lioku tunga ale oku semulũla eci ci pitahãla 2.700 kovitumãlo viefendelo vokuenda kunyamo wupange wo 2020a

Ci sumuisa ceci okuti, asokiyo aco a pongoloka omo liefengi lio COVID-19. Oco ci teyuile vamanjetu kuenda oku pokola olonumbi vioku liteyuila via eciwa lombiali, Ocisoko Coku Sandeka Cosungu Yolombangi Via Yehova, ya tateka onepa yalua yupange woku tunga u kasi oku lingiwa voluali luosi. Pole, vokuenda kunyamo 2020, ci pitahãla 1.700 kovitumãlo viefendelo via tungiwa ale via semuluiwa osimbu efengi ka lia fetikile. Handi vali, ci pitahãla 100 kolosapalalo vio filiale via malusuiwa. Tala ndomo ovopange avali oku tunga a mulusuiwa a kuatisa vamanjetu.

Ko Filiale yo Kamarões. O filiale yosimbu kolupale luo Duala, ya kala yitito calua kuenda ya sukilile oku mioñoluiwa. Ocisoko Coku Sandeka ya sokolola kesokiyo yoku semulula o filiale, pole, ondando yoku linga upange waco yaluile calua okuti ondonda yocitumãlo yi sule. Kua kũlĩhĩsiwavo esokiyo lioku landa osi yimue kuenda oku tungilako o Betele yokaliye ale oku landa osapalalo yimue ya kalako ale loku yi semulũla. Pole, lalimue pokati kesokiyo liaco lia tẽlisiwa.

Vamanji va limbuka okuti konano yo Duala, ombiali ya kala oku sokiya oku panga etapalo limue lia laikele oku pita ocipepi Lonjango yetu Violohongele Vinene. Oku pangiwa kuetapalo liaco nda ca kuatisa oku pĩtila lonjanga kocotumãlo caco kuenda nda ca kuatisa oku kuata olusu kuenda ovova lovina vikuavo. Emioñoloho liaco nda lia kuatisavo oku potolola lonjila ya suapo asukila ofiliale. Omo liaco, Osungu Yolombangi Via Yehova ya tava okuti ku tungiwa o Betele yo kaliye konepa yimue yocilua Yonjango Violohongele Vinene.

Vamanji kuenda olonalavayi viocisoko ca fetiwa va talavayela kumosi kupange waco. Esokiyo liaco lia tetelẽla otembo kuenda olombongo. Ocili okuti upange waco ka wa pesile olombongo vialua ndomo va ci simile: kua tetelĩwa eci cisoka olohuluwa vivali violondolale! Epata lio Betele lia ilukila kolosapalalo vio kaliye osimbu efengi lio koronaviru ka lia fetikile.

O Betele yo kaliye ya mioñolola ekalo liomuenyo lupange wa vamanji ko Betele yo Kamarões, kuenda ovo va ci tenda ndombajaile ya Yehova. Ohueli yimue ya popia hati: “tu yongola oku talavaya calua kuenda lalimue eteke tu siapo oku kapako ombanjaile yaco tua tambula.”

Oseketa yoku pongolola (RTO), yo tojolabal, ko Mexiku. Vokuenda kuanyamo alua ocimunga coku pongolola celimi lio tojolabal ca talavaya ko filiale yo Amérika Central, yi kasi ocipepi lolupale luo Mexiku. Pole, elimi lio tojolabal li vangiwa calua kalupale ndeci, ko Altamirano kuenda ko Las Margaritas, yi kasi ci panda ohulukãi kolokilometulu lo Betele. Omo liaco vakuakupongolola va kuatele ocitangi coku amamako oku mioñolola elimi lio tojolabal. Ka calelukilevo oku sanga vamanji ocipepi lo Betele va ponduile oku kuatisa kupange woku pongolola kuenda oku ngalavayala olovideo vioku yevelela kelimi liaco.

Eli olio esunga lieci Ocisoko ca Sonehi Cosungu Yolombangi Via Yehova ya yonguile okuti ocimunga coku pongolola kelimi lio tojolabal ci kala kocitumãlo cimue okuti ku vanguiwa elimi liaco. Kuenje, o filiale ya nõlapo oku landa kuenda oku semulũla osapalalo yimue ya kalako ale. Oku ci linga ondando yaco nda ya linga vali yitito okuti oku tunga ale oku fetela ocitumãlo cimue ci sule.

Manji umue ukuakupongolola wa lombolola ndomo a siata oku kuatisiwa lo RTO yo kaliye: “Anyamo ekũi nda talavaya kupange woku pongolola ko filiale, sia kũlĩhĩle epata lalimue lia kala ocipepi li vangula elimi liange. Cilo, o seketa yetu yi kasi muẽle kocitumãlo ku vanguiwa elimi tojolabal. Oloneke viosi ndi sapela lomanu va vangula elimi lio tojolabal. Eci ca vokiya oku mioñolola elaka liange kuenda upange wange.”

Ovopange a Sokiyiwa Wunyamo Wupange 2021

Kunyamo wupange 2021 kua sokiyiwa upange wuku tungiwa 75 ko lo RTO kuenda olosapalao violosikola Viembimbiliya, nda ekalo lia ecelela. Upange waco u kamamakovo loku tungiwa kuolosapalalo vinene vio lo filiale, oku kongelamo esokiyo liokaliye liombala lioluali luosi Ramapo, Nova York, ndeci apongoloko o filiale o Argentina kuenda yo Italia. Handi vali, tu sukila oku tunga ci pitahãla 1.000 Violonjango Viosoma, loku piñanya eci cisoka 6,000 kovitumãlo via siata oku lingiwilamo olohongele, pole, ka via sungulukile kuenda oku semulũla 4,000 Kolonjango Viusoma.

Pi kutunda olombongo oco ku lingiwe upange wosi owu woku tunga kuenda oku semulũla? Manji Lázaro González, okuti wa tiamẽla Kocimunga Cakulu vo Filiale yo Amerika Central, wa tambulula epulilo osimbu a kala oku vangula catiamẽla kupange woku tunga o RTO yelimi lio tojolabal. Eye hati, kocikanjo co filiale yetu, tu kuete olombongo vitito. Kuenje nda ka ca kaile le kuatiso lia vamanji voluali luosi, lalimue eteke nda tua kuata olombongo vioku tunga oloseketa vioku pongoluila vamanjetu kelimi lioku citiwa. Omo liolombanjaile via vamanji vosi kaliye vamaji va kuakupongolola va pondola oku kala ocipepi locitumãlo kuenda lomanu va vangula elimi liavo. Tu pandula lutima wosi vamanji voluali luosi omo lio liombanjaile viavo viocisola.” Ocili okuti ovopange aco oku kunda a tẽliwa lika omo liolombanjaile vi kuatisa kupange u lingiwa voluali luosi, olonjanja vialua vi eciwa pocakati conumbi, donate.jw.org..