Upange Woku Tunga Okuti u tu Kuatisa Kupange Woku Kunda

Osungu Yolombangi Via Yehova, yi sanjukila oku talavaya lolombanjaile oco ku tungiwe ovitumãlo vi tu kuatisa kupange woku kunda Usoma. Ndeci, vokuenda kunyamo wupange 2023, oloseketa vi talavaya lolo Betele Violombangi Via Yehova, via pesela eci ci pitahãla 500 kolohuluwa violondolale oco ku landiwe, ku tungiwe kuenda oku semulula Olonjango Viusoma kuenda Olonjango Violohongele Vinene voluali luosi.a Etendelo liaco, evokiyo lieci akongelo voluali luosi a pesela oco a tate Olonjango Viavo Viusoma.

Handi vali, olombanjaile vi kuatisavo koku tunga kuenda oku tata olo Betele, kuna ku lingiwila ovopange oku kuatisa kupange woku kunda voluali luosi. Tua tepulula ovopange a enda oku lingiwa kolo Betele oco okuti, olombongo viaco tu talavaya lavio koku kuatisa kupange woku tunga kuenda oku semũlula olonjango Viusoma, Lolonjango Violohongele Vinene. Pole, handi ku sukiliwa olombongo oco ku semũluiwe olo Betele. Momo lie ci sukilila oku linga ovopange aco? Olo filiale vi kuatisa ndati kupange wa velapo woku kunda? Tu ci kũlĩhĩsi.

“Ekuatiso Lioku Semũlula”

Olo filiale vimue tunde eci via tungiwa pa pita ale 30, ale 40 kanyamo! Manji umue o tukuiwa Nicholas o kasi kupange woku tunga, wa popia ndoco: “Ndaño muẽle osapalalo yimue ya tungiwa ciwa, vokuenda kuotembo yi pondola oku nyõleha. Upange woku semũlula u kuatisa koku amamako kuosapalalo liaco.” Oku vi semũlula ci tu kuatisa oku amamako oku talavayelamo.”

Olo Betele vi sukila oku semũluiwa oco vi tẽlise a sukila ocisoko voluali luosi. Etendelo liakundi li kasi oku livokiya calua tunde eci olo Betele via tungiwa. Omo lievokiyo liaco, ku sukiliwa omanu valua va lieca olumue oco va kuatise koloseketa viaco. Omo liaco, ndaño muẽle olo Betele vina okuti kosimbu via kala ndu vinene, cilo via linga vitito!

Kuli ocina cikuavo ci kuete esilivilo tu sukila oku sokolola. Omo okuti tu kasi koloneke via sulako violuali lulo, kua siata oku pita ovilunga vialua. (Luka 21:11) Nda kua kuamiwa ovoloño okaliye oku tunga poku semũlula, ci ka kuatisa vana va talavaya kovitumãlo viaco oku kolapo. Ovopange aco oku semũlula, ci kuatisa vamanji va talavaya kovitumãlo viaco oku sokiya ciwa alikolisilo avo oku eca ekuatiso kuenda oku amamako oku kuatisa kupange woku kunda noke lioku pita ocilunga cimue.

“Yehova wa Siata Oku Sumũluisa Onjila Yaco”

Lekuatiso lionumbi yi tunda Kosungu Yolombangi Via Yehova, kua lingiwa upange umue uwa woku tunga kueci ci soka 43 kolo filiale, vokuenda kunyamo upange 2023. Eci ci lomboloka okuti, olo Betele viosi voluali vi ka tungiwa lonjila yimuamue. Cilo tala ovolandu amue a lekisa esivilo liupange waco woku semũlula.

Vongola. Manji Matt, o pange onepa Kocimunga Cakulu vo Betele, wa popia ndoco: “Etu tu kuete esumũluho lioku mõla oku telisiwa kuocitumasuku ca Hagai 2:7 lonjila yimue yilikasi. Vanyamo ekũi tua mõla evokiyo lieci ci soka 60 kolopulusendu viakundi! Oco akundi vaco va kuatisiwe, ku sukiliwa omanu valua oco va talavaye ko Betele. Omo okuti o Betele yetu yitito, ka ca tavele oku vilikiya omanu valua oco va talavaye kulo. Eci ca koka okuti vamanji va kasi ko Betele va talavaya olowola vialua veteke.”

Kua nõliwa vamanji oco va kũlĩhĩse ndomo ku potoluiwa ocitangi caco. Kefetikilo va simile okuti oku semũlula o Betele, nda ca kuatisa oku potolola ocitangi caco. Pole noke liekonomuiso liwa, ovo va limbuka okuti, oku semũlula o Betele, nda ka ca kaile onjila yiwa yoku talavaya lolombanjaile. Omo liaco, ovo va eca ocisimĩlo coku landa osapalalo yimue yi kasi ocipepi loku yi semũlula. Manji Matt wamisako hati: “Eci ocisimĩlo coku landa kuenda oku semũlula osapalalo yimue ya tungiwa ale ca lekisiwa Kocimunga Cakulu vo Betele, tua kuata ohele yokuti, nda ka ca kuatisile calua ndocitumãlo cimue etu muẽle tua tunga. Pole, cilo tua limbuka okuti onjila yaco ya potolola ocitangi cetu. Yehova wa siata oku sumũluisa onjila yaco.”

Citava okuti o Betele Yongola yi ka sukila ocitumãlo cikuavo kovaso yoloneke. Omo liaco, osapalalo yokaliye, olonjo via vokiyiwa ko Betele kuenda olonjo vikuavo o Betele ya fetela, ca kuatisa o Betele oku kuata ovitumãlo vi sukiliwa vioku kuatisa kupange woku kunda.

Ko Japão. Tunde eci o Betele yatete ya tungiwa, pa pita ale 40 kanyamo kuenda lalimue eteke ya semũluiwile. Ndaño vamanji va likolisilako oku yi tata, pole, pa pita ale anyamo alua. Eli olio esunga lieci okuti, ku kasi oku lingiwa upange woku yi semũlula.

Omuenyo ko Betele wa siatavo oku pongoloka vokuenda kuanyamo. Toke kunyamo 2015, kua kala ocimunga cimue ca enda oku pongiya okulia kuepata liosi lio Betele. Vamanji ko Betele yo Jopão, volohondo viavo mua kala ocitumãlo cimue citito “coku telekelako.” Cilo, vamanji ko Betele va pondola oku pongiya okulia kuavo. Upange woku semũlula wa kuatisa oku vokiya ocitumãlo coku telekela volohondo vio Betele loku ecelela okuti vamanji va lianja poku teleka okulia kuavo. Manji Kumiko, o kasi ko Betele yo Jopão, wa popia hati: “Ocitumãlo coku teleka ci ñuatisa oku lianja kuenda oku kuatisa kasokiyo okaliye o Betele.”

Upange u lingiwila ko Betele yo Jopão u kuatisa calua kupange woku kunda voluali luosi. (Mat. 28:19, 20) O Betele yo ko Jopão yimue pokati kolo Betele vivali vi pondola oku upa olokopia Viembimbiliya liosi. Omo liaco, onepa yimue yupange woku tunga yi kasi oku lingiwa, oku kapa ocimãleho cimue ci teta kuenda ci puẽla onukuvila oco ci teyuile vosi va talavaya Vocitumãlo caco. Poku landa kuenda oku kapa ocimalẽho caco, kua pesiwa eci ci soka ohulukãi yimosi kolondolale, pole, ci ka kuatisa okuti o Filiale yi amamako oku upa olokopia vialivulu vi kuatisa oku pamisa ekolelo lietu.

Ndaño lupange waco woku semũlula, vamanji ka va liwekelepo oku upa olokopia Viembimbiliya. Manji Trey, o panga onepa Kocimunga Cakulu vo Betele wa popia hati: “Vokuenda kupange woku tunga, ocisoko cetu camamako oku sandeka Ambimbiliya kalimi akuavo momo omanu valua voluali va sukilila Embimbiliya. Oku sokiya, oku kapa ovimãleho viokaliye kuenda oku panga alivulu, ca sukilile ekuatiso lioloseketa vialua kuenda omanu vakuavo va kuatisa.” Ndaño lovitangi viaco, kuopiwa olokopia vieci ci soka 220.000 Kambimbiliya vokuenda kuosãi Yelombo toke Yeyenye 2023 osimbu kua kala oku kapiwa omakina yinene. Ndaño lupange waco, ka ca sukilile oku vokiya olombongo.

Oku tetẽlela olusu, ocina cimue cikuavo ca kuata esilivilo kupange woku semũlula. Kua kapiwa ovimãleho viokaliye vieca ocinyi, vi ka kuatisa oku tetẽlela 120.000 kolondolale vokuenda kunyamo, vina nda via fetiwa olusu. Ku ka kapiwa olonjanela vi kuete ovindalasa vitatu, okuti vi ka kuatisa oku tetẽlela 10.000 kolondolale vokuenda kunyamo. Ndaño okuti poku kapa ovimalẽho viaco kua pesiwa olombongo vialua, pole, tu sima okuti vi ka tu kuatisa oku tetẽlela ci soka 3.5 kolohuluwa violondolale osimbu tu talavaya lovimalẽho viaco vi eca olusu kuenda olonjanela. Vi ka teyuilavo ekalo liofela.

“Handi Kuli Upange Walua Woku Linga”

Ovopange a kasi oku lingiwa kolo Betele viaco vivali, a kuatisa kupange woku kunda. Pole, upange waco handi ka wa puile. Manji Aaron o panga onepa kupange woku tunga Kombala Yolombangi Via Yehova, wa popia hati: “Kua lingiwa ale upange walua, pole handi pa kamba calua.” Upange waco u ka malusuiwa ndati? Eye wamisako hati: “Ndaño tua siata oku tambula olombanjaile vi kuatisa kovopange aco a kuete esilivilo, tu pandulavo vamanji va lieca olumue kuenda vana va kasi oku linga esokiyo lioku ci linga kovaso yoloneke. Ocituwa ca vamanji coku lieca olumue kuenda olombanjaile va siata oku eca, ci situlula okuti, Yehova wa siata oku sumũluisa upange wetu.”—Osamo 110:3.

Ovopange etu osi oku tunga kuenda woku semũlula, a siata oku kuatisiwa lombanjaile okuti, vialua pokati kavio vi eciwa pocakati co donate.jw.org. Tu pandula calua omo liocali wa siata oku lekisa.