Ukamba kuenda ocikembe

OCIKEMBE onepa yimue yi kuete esilivilo lialua vomuenyo womanu. Eci omunu a lekisa ocikembe, eye o lekisa eci ci kasi vutima waye, o lekisa ocituwa caye covutima, o lekisavo ndomo a liyevite kueci catiamẽla kocina cimue ale komanu. Omo lioku pita lacimue cĩvi vomuenyo wavo, kuenda ku vamue omo liocituwa cokofeka va citiwila, omanu valua ka va molehĩsa ocikembe cavo. Pole Yehova o tu vetiya oco tu kuate ovituwa viwa vutima wetu kuenda oku lekisa ovituwa viaco kapuluvi a sunguluka.​—Va Rom. 12:10; 1 Va Tes. 2:7, 8.

Eci tu vangula, olondaka tu popia vi pondola oku lekisa ocikembe cetu. Pole, nda olondaka ka via vanguiwile locikembe, ava va tu yevelela ci tava okuti va kala latatahãi nda tu kasi loku vangula muẽle ocili ale ndati. Handi vali, nda olondaka vi kasi loku vanguiwa locikembe ciwa, oku vangula kuetu kuka kala kueposo kuenda kuesilivilo. Kuenda kuka veta kutima wava va tu yevelela.

Oku Lekisa Ocisola. Ocisola olonjanja vialua ci linalĩsa lovisimĩlo viomunu. Omo liaco, eci tu vangula eci catiamẽla kovituwa via Yehova ale ceci tu vangula eci catiamẽla kesunga Liaye, ondaka yetu yomboke. (Isa. 63:7-9) Kuenda eci tu vangula lomanu, ocituwa cetu cikale coku lekisa ocisola ku vakuetu.

Umue ukuavilundu weya ku Yesu kuenje wo livondela oco o sakule. Sokolola ocileñi condaka ya Yesu eci a popia hati: “Ndi yongola oku kukayisa.” (Mar. 1:40, 41) Sokololavo, eci ca lipita lukãi umue wa kala locitangi coku pita osonde ci soka ekũi lianyamo kanyamo avali. Eci a pitila ponele ya Yesu, wa lamba kuwalo waye. Noke yoku limbuka okuti vomõla, ukãi wa fetika oku luluma, wa kekama kolomãhi via Yesu, kuenje wa lomboluila kovaso yomanu vosi esunga lieci o lambela kuenda ndomo a kaya. Sokolola ño ndomo ukãi a liyeva eci Yesu a popia laye hati: “Amõlange ekolelo liove lia ku kayisa. Kuende lombembua”. (Luka 8:42b–48) Ocikembe Yesu a lekisa kapuluvi aco, ci veta kovitima vietu toke etaili.

Eci tu linga ndeci Yesu a lingaile, okuti tu lekisa ohenda komanu kuenda tu va kuatisa, caco eci ci muiwila kocituwa tu lekisa poku vangula lomanu. Ocituwa cocisola, cocili kuenda hacokuluvikiyako. Ocisola cetu cika tepisa calua ndomo omanu vaka tu tambuluiya. Ovina viosi tu vangula vupange woku kunda, vi vanguiwe lonjila yimue okuti omanu va limbuka okuti tu va kuetele ocisola. Ca piãla enene poku konomuisa lavo cimue, poku va vetiya kuenda poku va lungula ale poku lekisa ohenda kokuavo.

Nda okuti ove o kuete ocisola cocili la vakuene, ci lekisila pupolo wove. Nda o lekisa ocisola kolonjeveleli, ovio vika mẽla kokuove nda cina omanu vamẽla kulienge wondalu vuteke umue wombambi. Nda ocisola ka ci kasi loku muiwila pupolo wove, olonjeveleli ka vi tava okuti ove wa sakalala muẽle lavo. Ocisola ka ci tava okuti ci waliwa nduwalo umue woku viaviaya, puãi te ci kala muẽle cocili.

Ocisola ci muiwilevo kondaka yove. Nda ocileñi condaka yove ca kõla, ale cĩvi, ci tava okuti ci tĩla oku lekisa ocikembe vohundo. Pole, vokuenda kuotembo kuenda lelikolisilo, oka ci tẽla. Ocina cimue ci pondola oku ku kuatisa ndomo o vangula, oku ivaluka okuti olondaka vimbumbulu vi lingisa okuti upopi u kamba ocikembe. Likisa oku vangula olondaka locileñi comboka. Nda wa ci linga cika ku kuatisa oku kuata vali ocikembe poku vangula.

Pole ca velapo vali handi, koku ku kasi ovisimĩlo viove. Nda ovisimĩlo viove via tekela muẽle ocili ku vana ove o kasi loku vangula lavo, kuenda nda o kuete muẽle onjongole yoku sapula cimue ciwa kokuavo, ocisola cove cika limolehĩsila konjongole o vangula layo.

Ondaka yimue yi sanjuisa, yi pondola oku vetiya, pole ocikembe ci sukiliwavo. Hakupindisako ño lika olondunge, pole te tua vetiyavo utima.

Oku Lekisa Ocikembe Mumue Muiñi. Ohele, usumba kuenda utima wateka ci tava okuti vi lekisiwa lomunu una o kasi loku tala ohali. Esanju ocina cimue ci pondola oku kala olonjanja viosi vomuenyo wetu, okuti limuiwila poku vangula la vakuetu. Pole, asanju amue te oku a yuvula, omo okuti ka a liendi locituwa Cakristão. (Va Efe. 4:31, 32; Va Fil. 4:4) Ocikembe ci lekisiwila kolondaka tu nõla poku vangula, kocileñi condaka yetu, kongusu tu vangula layo, ci mõlehisiwilavo pupolo wetu, kuenda koku ilaika kuetu.

Embimbiliya li lekisa ovolandu omanu valua. Olonjanja vimue li tukula esanju. Ale pamue li lombolola eci ca pita ale ci lekisa esanju. Eci o tanga onepa yaco lolukandi, nda ondaka yove yi lekisa esanju, cika ku vetiya kuenda cika vetiyavo ava va kasi loku ku yevelela. Oco o ci linge, te wa likapa pocitumãlo ca vana o kasi loku tangela. Omo liaco, ohundo hacina cimueko coku papala. Lunguka oco ku ka vokiyeko. Ecelela okuti ovipama vi kuata owuya, vovisimĩlo via vana va vi yevelela.

Oku Lekisa Ocikembe ci li Kuata Locipama. Ndesanju, ocisola o lekisa koku vangula kuenda asanju akuavo a lekisiwa, atiamẽla vali kueci o kasi loku vangula.

Vanja kelivulu lia Mateo 11:28-30, noke kũlĩhĩsa eci olio li lombolola. Noke tanga eci catiamẽla kolondaka via Yesu vioku pisa vakuavisonehua kuenda va Fariseo, li kasi kelivulu lia Mateo 23. Ca leluka oku limbuka okuti eye ka popele olondaka evi viepiso lowesi.

Ocikembe cipi o sima okuti oco ci sukila oku lekisiwa kulandu ndowu u sangiwa kelivulu Liefetikilo ko kapitulu 44 watiamẽla kepingilo liongecelo ya Yuda ku manjaye Benjamini? Sokolola ño ocikembe ca lekisiwa vocinimbu 13 kuenda vocinimbu 16 ndomo Yuda a liyeva catiamẽla kesunga liohali, kuenda ndomo Yosefe a liyeva, ndomo ca lomboluiwa kelivulu Liefetikilo 45:1.

Omo liaco, cikale okuti tu kasi loku tanga, ale tu kasi loku vangula, oco ci lingiwe ciwa, ka tu luluvalela lika kolondaka kuenda kovisimĩlo, pole te tua lekisavo ocikembe ci lekisiwa volondaka viaco.