Momo Lie Evĩho Kuenda Ohali vi Kasililiko?

Nda ku pita ovina vimue vĩvi, ka cĩviko oku pula ndoco: “Momo lie ku pitila ovina viaco?” Tu kuete esanju omo okuti, Embimbiliya li tambulula apulilo aco!

1. Nye Satana a linga oco voluali mu pite ovina vĩvi?

Satana Eliapu wa sinĩla Suku. Satana wa yonguile oku viala vakuavo, kuenje wa yapuisa omanu vatete okuti Adama la Eva oco va likongele kesino liaye. Satana wa ci linga poku kemba Eva. (Efetikilo 3:1-5) Eye wa vetiya Eva oku kuata ovisimĩlo viokuti, Yehova wa kala oku u limbika ocina cimue ciwa. Wa popiavo okuti, omanu va pondola oku kuata vali esanju nda ka va pokola ku Suku. Satana wa popia uhembi watete poku sapuila Eva okuti, eye ka laikele oku fa. Omo liaco, Embimbiliya li tukula Satana okuti, “ohembi haeye isia yuhembi.”—Yoano 8:44.

2. Adama la Eva va nõlapo oku linga nye?

Yehova, wa ecele ovina vialua ku Adama la Eva. Eye wa va sapuilile okuti, ovo va ponduile oku lia koviti viosi vio vocumbu, pole, umosi lika owo ka ca tavele oku liako. (Efetikilo 2:15-17) Pole, ovo va nõlapo oku lia epako liuti waco. Eva “wa kuata epako liayo kuenda wa fetika oku li lia.” Noke Adama “wa fetika oku li lia.” (Efetikilo 3:6) Kavali kavo ka va pokuile ku Suku. Omo okuti Adama la Eva va lipuile, ca lelukile kokuavo oku linga eci ca sunguluka. Pole, poku sinĩla Suku kocipango, va linga ekandu loku likala omoko yaye yoku viala. Onjila va nõla ya va kokela ohali yalua.—Efetikilo 3:16-19.

3. Onjila Adama la Eva va nõla ya tu kokela ovitangi vipi?

Eci Adama la Eva va lueya, va linga omanu ka va lipuile kuenje ovitumbulukila viosi viavo via lingavo omanu ka va lipuile. Catiamẽla ku Adama Embimbiliya liti: “Ekandu lia iñilila voluali omo liomunu umosi kuenda oku fa omo liekandu kuenje oku fa, kua li sanduila komanu vosi.”—Va Roma 5:12.

Tua siata oku tala ohali omo liasunga alua. Pamue tu tala ohali omo liolonjila vĩvi tu nõla. Pamue tu tala ohali omo liolonjila vĩvi omanu vakuavo va nõla. Pamue tu tala ohali omo tu kasi pocitumãlo ka ca sungulukile kuenda velivala ka lia sungulukile.—Tanga Ukundi 9:11.

LILONGISA ONDONGOSI

4. Kuli umue wa koka ohali yetu

Omanu valua va tava okuti, Suku eye o kasi oku viala oluali. Eci ocili? Tala OVIDEO.

OVIDEO: Helie o Kasi Oku Viala Oluali?(1:24)

Tanga Tiago 1:13 kuenda 1 Yoano 5:19, noke konomuisa epulilo li kuãimo:

• Anga hẽ Suku eye wa koka ohali kuenda evĩho?

5. Kũlĩhĩsa onima yi tunda kuviali wa Satana

OVIDEO: Momo Lie Suku a Kasi Oku Ecelela Ohali?—Onepa Yimue (3:07)

Tanga Efetikilo 3:1-6, noke konomuisa apulilo a kuãimo:

• Uhembi upi Satana a vangula?—Tala ocinimbu 4 kuenda 5.

• Satana wa lundila ndati Yehova okuti wa kala oku limbika cimue ciwa komanu?

• Ndomo ca lekisiwa la Satana, omanu va sukila hẽ Uviali wa Yehova oco va kuate esanju?

Tanga Ukundi 8:9, noke konomuisa epulilo li kuãimo:

• Omo okuti Yehova haeyeko Ombiali yoluali lulo, nye ca siata oku pita?

1. Adama la Eva va lipuile kuenda va kala Vocumbo Celau. Pole, va yevelela Satana kuenje va sinĩla Yehova

2. Noke liesino, voluali mueyuka ekandu, ohali kuenda olofa

3. Yehova o ka malako ekandu, ohali kuenda olofa. Omanu va ka lipua vali loku kala Vocumbo Celau

6. Yehova wa kapako ohali yetu

Suku wa kapako hẽ ohali yetu? Kũlĩhĩsa eci Soma Daviti kuenda upostolo Petulu va soneha. Tanga Olosamo 31:7 kuenda 1 Petulu 5:7, noke konomuisa epulilo li kuãimo:

• O liyeva ndati poku kũlĩha okuti, Yehova o lete kuenda wa kapako ohali yetu?

NYE WA LILONGISA?

Satana Eliapu kuenda omanu vavali vatete, ovo va koka evĩho voluali. Yehova wa kapako calua ohali yetu kuenda ndopo o ka yi malako.

Oku Pitulula

• Uhembi upi Satana Eliapu a sapuila Eva?

• Esino lia Adama la Eva lia tu kokela ndati ovitangi?

• Tua kũlĩha ndati okuti, Yehova wa kapako ohali yetu?

OCO O KŨLĨHE OVINA VIKUAVO

Lilongisa Vembimbiliya elomboloko liekandu.

“Ekandu li Lomboloka Nye?” (Ocipama ci sangiwa lika vo Internet)

Tangavo catiamẽla kocitangi Satana Eliapu a votola vocumbo Cedene.

“Momo Lie Suku a Ecelela Ohali?” (Utala Wondavululi 1 wa Susu 2014)

Tala atambululo a suapo liepulilo lia tĩla.

“Momo Lie Suku a Ecelela Okuti ku Pita Ovilunga? Momo Lie Suku ka Tatekela Ovilunga?” (Ocipama ci sangiwa lika vo Internet)

Tala eci ulume umue a lilongisa catiamẽla kohali a tala.

Si Yevite Vali Ulika (5:09)