Yehova O Yevelela Epingilo Lietu Liekuatiso
“Ovaso a Yehova a vanja vakuesunga, o vonguila ovatui aye kevilikiyo liavo.” —OSA. 34:15.
1, 2. (a) Omanu valua koloneke vilo va siata oku yeva nye vutima? (b) Momo lie ka tu komõhela ovitangi viaco?
OVE hẽ, o kasi oku liyaka lovitangi? Nda oco, kũlĩha okuti haveko lika o kasi oku liyaka lavio. Momo omanu valua voluali, va kasivo oku liyaka lovitangi viaco. Komanu vamue, ka ca lelukile oku pandikisa kovitangi viaco. Vutima wavo va yevite ndeci ukualosamo Daviti a soneha hati: “Nda hongua, nda sasoha enene. Ndi liyula momo utima wa tokotelua. Utima wange u tukoka, ongusu ya mua. Ocinyi covaso ange lacovo ca nunda.”—Osa. 38:8, 10.
2 Etu Tuakristão ka tu komõha eci tu liyaka lovitangi viomuenyo. Momo tua kũlĩha okuti, ovitangi viaco vi lomboloka ‘efetikilo liolongembia,’ viatiamẽla kondimbukiso yoku tukuluka kua Yesu. (Mar. 13:8; Mat. 24:3) Kelimi Liohelasi, ondaka ‘efetikilo liolongembia,’ yi tiamisiwila kevalo lioku cita oñaña. Ondaka yaco ya sunguluka calua oku yi tiamisila kohali omanu va kasi oku tala koloneke vilo via ‘tĩla’!—2 Tim. 3:1.
Yehova wa Kũlĩha Ovitangi Vietu
3. Nye omanu va Suku va kũlĩha catiamẽla kovitangi?
3 Omanu va Yehova va kũlĩha okuti, va pondolavo oku liyaka lovitangi via siata voluali. Momo, osimbu oloneke viamamako, ovitangi viaco vi livokiyavo. Etu tumanu va Suku ka tu liyaki lika lovitangi via siata komanu vosi, pole, tu liyakavo ‘lunyali wetu Eliapu’ una o yongola oku nyõla ekolelo lietu. (1 Pet. 5:8) Omo liaco, ca leluka oku kuata ovisimĩlo ndevi via Daviti wa popia hati: “Efuki lia neya utima, kuenje nda sakalala enene. Nda vanjiliya ohenda, puãi ka kua kaile. Nda sandiliya ava va ndembeleka, puãi lomue nda sanga”!—Osa. 69:20.
4. Nye ci pondola oku tu lembeleka eci tu liyaka lovitangi?
4 Anga hẽ, Daviti wa lekisa okuti, ka kuatele vali elavoko? Sio hacoko. Kũlĩhĩsa olondaka vikuavo viosamo yaco vi popia hati: “Yehova o yeva olosuke, ka tombi omanu vaye va kasi kumandekua.” (Osa. 69:33) Olonjanja vimue eci tu liyaka lovitangi tu kala ndu okuti tu kasi kumandekua. Vakuetu citava okuti ka va kuata elomboloko liovitangi vietu kuenda pamue ka va liyaki lovitangi viaco. Pole, tu pondola oku lembelekiwa poku ivaluka okuti, Yehova wa kũlĩha ovitangi vietu ndeci Daviti a linga.—Osa. 34:15.
5. Soma Salomone wa kuatele ekolelo lie?
5 Salomone omõla a Daviti wa lombolola ondaka yaco eci a tumbika onembele ko Yerusalãi. (Tanga 2 Asapulo 6:29-31.) Eye wa pinga ku Yehova oco a yevelele olohutililo viomanu vosi vakuavitima via sunguluka vamela Kokuaye oku pinga ekuatiso liatiamẽla ‘kohali yavo kuenda kesumuo liavo.’ Suku wa tendele ndati olohutililo viomanu vaco vakuahali? Salomone wa lekisa ekolelo liokuti, Suku ka yevi lika olohutililo viavo, pole, o va kuatisavo. Momo lie? Momo wa kũlĩha “ovitima viomãla vomanu.”
6. Tu liyaka ndati lasakalalo omuenyo, kuenda momo lie?
6 Tu pondolavo oku amẽla ku Yehova loku pinga ekuatiso liatiamẽla ‘kohali kuenda kesumuo lietu.’ Eci tu ivaluka okuti Yehova wa kũlĩha ovitangi vietu kuenda o tu kuatisa, tu lembelekiwa. Upostolo Petulu wa limbuka ocili caco eci a soneha hati: “Ohele yene yosi yi yeki kokuaye momo eye o vu lava.” (1 Pet. 5:7) Yehova wa kapako ovitangi viosi tu liyaka lavio. Yesu poku lombolola ocisola ca Yehova coku tata omanu, wa popia hati: “Olongungu vivali hẽ, ka vi landiwa lolusendu? [Pole] layimue yavio yi lokila posi te Isiene wa ci panga. Puãi ndaño esinga liovovitue viene lia tendiwa. Oco ko ka kuati ohele, momo wa velipo olongungu via lua.”—Mat. 10:29-31.
Kolela Kekuatiso Lia Yehova
7. Ekuatiso lipi tu pondola oku tambula?
7 Tu sukila oku kolela okuti, Yehova wa kũlĩha ovitangi viosi tu liyaka lavio kuenda o pondola oku tu kuatisa. “Suku eye ocikolo cetu haeye ongusu yetu. Eye oñuatisi, kohali o moleha lombili.” (Osa. 34:15-18; 46:1) Suku o tu ĩha ndati ekuatiso liaco? Kũlĩhĩsa olondaka vi sangiwa kelivulu lia 1 Va Korindo 10:13 vi popia hati: “Suku wa kolelua, kuenje ka tava okuti wu yonjiwa te leli wu tela, puãi kumuamue leyonjo u muisavo evelo lioku puluka okuti vu soka lalio.” Yehova o pondola oku pongolola ovina oco a imũle ovitangi ale o tu ĩha ongusu yoku pandikisa. Omo liaco, tu kuete ekuatiso li tunda kokuaye.
8. Tu pondola ndati oku kuatisiwa la Suku?
8 Tu tambula ndati ekuatiso lia Yehova? Kũlĩhĩsa eci tua vetiyiwa oku linga. Embimbiliya li popia hati: “Ohele yene yosi yi yeki kokuaye.” Eci ci lomboloka okuti ovitangi viosi tu liyaka lavio tu sukila oku vieca ku Yehova. Tu sukilavo oku yuvula oku sakalala calua, pole tu kolela okuti, eye o tu ĩha ovina tu sukila komuenyo. (Mat. 6:25-32) Oco tu lekise ekolelo liaco, tu sukila oku kuata umbombe okuti, ka tu kolela kongusu yetu ale kolondunge vietu muẽle. Nda tua ‘lisepuisa vemehi lieka lia pama lia Suku,’ tu eca uvangi wokuti, ka tua velelepo. (Tanga 1 Petulu 5:6.) Ocituwa caco ci tu kuatisa oku pandikisa kovitangi viosi Suku a ecelela okuti, tu liyaka lavio. Ndaño pamue tu yongola ekavuluko lionjanga, pole, tua kolela okuti, Yehova wa kũlĩha otembo yoku tu yovola kuenda ndomo a pondola oku ci linga.—Osa. 54:7; Isa. 41:10.
9. Ocitele cipi Daviti a sukilile oku eca ku Yehova?
9 Ivaluka olondaka via Daviti vi sangiwa Kosamo 55:22, vi popia hati: “Tuika Yehova ocitele cove kuenje eye o ku kuatisa. Lalimue eteke a tava okuti ukuesunga o sengiwa.” Eci Daviti a soneha olondaka evi, wa kala oku liyaka lovitangi vialua. (Osa. 55:4) Osamo eyi citava okuti ya sonehiwa eci omõlaye Avisalome a linga usuanji woku u tambula uviali. Ondunguli yaye a kolelele o tukuiwa hati Ahitofele, wa li kongelavo kusuanji waco. Omo liaco, Daviti wa tilila ko Yerusalãi oco a popele omuenyo waye. (2 Sam. 15:12-14) Ndaño wa liyaka lovitangi vialua, pole, wamamako oku kolela Suku kuenje wa tambula ekuatiso.
10. Nye tu sukila oku linga eci tu liyaka lovitangi?
10 Vosi yetu tu sukila oku amẽla ku Yehova vohutililo poku pinga ekuatiso liatiamẽla kovitangi vietu ndeci Daviti a linga. Tu konomuisi eci upostolo Paulu a tu vetiya oku linga catiamẽla kondaka eyi. (Tanga Va Filipoi 4:6, 7.) Onima yipi yi tunda kolohutililo viaco? Onima yaco, “ombembua ya Suku, yina ya piãla olondunge viosi, yi lava ovitima [vietu] lovisimilo [vietu] vu Kristu Yesu.”
11. “Ombembua ya Suku” yi teyuila ndati ovitima vietu kuenda olondunge vietu?
11 Anga hẽ, ohutililo yi pondola oku pongolola ekalo lietu? Citava okuti, yi pongolola. Pole, tu sukila oku ivaluka okuti, Yehova ka tambulula olonjanja viosi olohutililo vietu ndomo tu yongola. Ohutililo yi tu kuatisa oku tula utima okuti ka tu sakalala calua lovitangi vietu. “Ombembua ya Suku” yi tu kuatisa oku tulumuha eci tu lemiwa lesumuo omo liovitangi. Ndeci ocisoko cimue casualali ci nõliwa oco ci teyuile olupale kovanyali, haico ci kasi “ombembua ya Suku.” Momo yi teyuila ovitima vietu kuenda olondunge vietu. Oyo yi tu kuatisa oku yuvula atatahãi, lusumba, lovisimĩlo vĩvi kuenda yi tu teyuila koku linga ovina ka via sungulukile.—Osa. 145:18.
12. Lombolola ndomo omunu a pondola oku kuata ombembua yovutima.
12 Eci tu liyaka lovitangi tu kuata ndati ombembua yovutima? Kũlĩhĩsa ocindekaise cimue catiamẽla kekalo lietu. Omunu umue citava okuti kupange waye woku sanda eteku o lavisiwa calua lamitavaso yaye. Pole, o kuete epuluvi lioku lombolola ovitangi viaye ku cimue caye ukuacisola haeye wa sunguluka. Cime caye omo lioku kuata elomboloko liovitangi viaye, u sapuila hati mitavaso yaco ndopo upiwa ocikele caye. Nye omunu waco a yeva vutima? Omo lioku tava kohuminyo yaco loku kũlĩha eci cika pita lamitavaso yaye, o lembelekiwa calua kuenje o nõlapo oku kala kupange waco ndaño lovitangi. Cimuamue haico catiamẽla kokuetu. Tua kũlĩha okuti, Yehova o lete ovitangi viosi tu liyaka lavio kuenda wa tu likuminya okuti, ndopo “ombiali yoluali lulo yi tundisua.” (Yoa. 12:31) Ohuminyo eyi yi tu lembeleka calua!
13. Nye tu sukila oku linga noke yoku likutilila catiamẽla kovitangi vietu?
13 Anga hẽ, tu sukila lika oku sapula ovitangi vietu ku Yehova vohutililo? Sio, kuli ovina vikuavo tu kuete oku linga. Tu sukila oku linga ovina tua pinga vohutililo. Eci Soma Saulu a tumile alume konjo ya Daviti oco vo ponde, Daviti wa likutilila hati: “Mopele kovanyali vange, a Suku yange. Mbindikiye kuava va ñatukila. Silamẽle kolondingaĩvi. Mopele komanu vakuakupesela osonde.” (Osa. 59:1, 2) Handi vali, Daviti wa tava kelungulo liukãi waye kuenje wa sanda onjila yoku tila. (1 Sam. 19:11, 12) Cimuamue haico catiamẽla kokuetu. Tu sukila oku pinga vohutililo olondunge vi tu kuatisa oku pandikisa kovitangi ale oku pongolola ekalo liomuenyo wetu.—Tia. 1:5.
Ndomo tu Kuata Ongusu Yoku Pandikisa
14. Nye ci tu kuatisa oku pandikisa kovitangi?
14 Ovitangi vietu pamue, ka vipui lonjanga. Citava okuti vi amamako vokuenda kuotembo yimue. Nye ci tu kuatisa oku pandikisa eci tu liyaka lovitangi? Catete tu sukila oku ivaluka okuti, nda tu amamako oku vumba Yehova ndaño lovitangi, tu lekisa ocisola cetu kokuaye. (Ovil. 14:22) Ivaluka elundi Satana a lingile ku Yovi eci a popia hati: “Yovi hẽ, wa ku sumbila ño ocali, ove u Suku? Haveko hẽ, wo vindikiya kolonele viosi oku vindikiya onjo yaye la cosi a kuete? Wa sumũlũisa upange wovaka aye, kuenje ovipako viaye via lua vofeka. Puãi imba eka liove okuti o lamba cosi a kuete kuenje eye o ku likalela kovaso ove”! (Yovi 1:9-11) Yovi omo liepandi liaye wa lekisa okuti, Satana ohembi. Eci tu pandikisa kovitangi, tu kuatavo epuluvi lioku lekisa okuti, Satana ohembi. Epandi lietu li pamisavo elavoko lietu kuenda ekolelo.—Tia. 1:4.
15. Ovolandu api a pondola oku tu pamisa?
15 Cavali, ivaluka okuti ‘vakuetu voluali luosi va kasi oku talavo ohali ndove.’ (1 Pet. 5:9) Ocili okuti, “lalimue eyonjo [liu ku sanga], te eli lia siata pokati komanu.” (1 Va Kor. 10:13) Poku sokolola ovolandu vomanu va kasi oku liyaka lovitangi okuti, ku sokolola lika ovitangi viove muẽle, ci pamisa ekolelo liove kuenda ci ku ĩha utõi woku pandikisa. (1 Va Tes. 1:5-7; Va Hev. 12:1) Sanda otembo yoku konomuisa ovolandu omanu vamue wa kũlĩha okuti, va kasi oku pandikisa kohali. Anga hẽ, wa siata oku tanga ovolandu a sandekiwa valivulu ukuenje wa lunguka atiamẽla komanu vamue va liyaka lovitangi ndevi o kasi oku liyaka lavio? Ovolandu aco a pondola oku ku lembeleka.
16. Suku o tu ĩha ndati ongusu yoku pandikisa eci tu liyaka lovitangi?
16 Catatu, ivaluka okuti Yehova eye “Isia yohenda, haeye Suku ukuakulembeleka pokati kovina viosi. O tu lembeleka kohali yetu yosi, okuti tu tẽlavo oku lembeleka ava va tala ohali lelembeleko Suku a tu lembeleka lalio.” (2 Va Kor. 1:3, 4) Eci ci lomboloka okuti Suku o kasi konele yetu oku tu kolisa okuti ka tu ĩha lika ongusu yoku pandikisa kovitangi, pole, o tu kuatisa “kovitangi viosi” tu liyaka lavio. Kuenje tu kuatavo uloño woku lembeleka vakuetu ‘kovitangi viosi’ va liyaka lavio. Paulu wa limbuka ocili colondaka evi.—2 Va Kor. 4:8, 9; 11:23-27.
17. Embimbiliya li tu kuatisa ndati oku liyaka lovitangi viomuenyo?
17 Cakuãla, tu kuete Ondaka ya Suku yi sangiwa Vembimbiliya, okuti yi “silivila oku longisa, loku lungula, loku pindisa, loku ikisa esunga, okuti omunu wa Suku o loñoloha, haeye angiliyiwila ovopange osi awa.” (2 Tim. 3:16, 17) Ondaka ya Suku ka yi tu kuatisa lika koku “loñoloha” kuenda oku tu “angiliyiwila ovopange osi awa.” Pole, yi tu longisavo ndomo tu liyaka lovitangi viomuenyo. Oyo yi tu kuatisa oku “loñoloha” kuenda ‘oku angiliyiwa ciwa.’ Kosimbu ondaka eyi va enda oku yi popia poku tukula ocimbaluku ca tungiwa ciwa okuti, ca pongiyiwila oku linga ovongende, ale omakina yimue ya pangiwila oku linga ovina viosi va yi sokiyila. Cimuamue haico catiamẽla kokuetu. Yehova lekuatiso Liondaka yaye o tu ĩha ovina viosi tu sukila eci tu liyaka lovitangi. Omo liaco, tu pondola oku popia hati: “Nda Yehova wa ecelela okuti, ndi liyaka lovitangi, ndi tẽla oku pandikisa lavio lekuatiso liaye.”
Oku Yovoka Kovitangi Vietu Viosi
18. Pi tu sukila oku tiamisila utima oco tu pandikise kovitangi?
18 Etosi liatãlo lieli okuti, olonjanja viosi tu sukila oku tiamisila utima kocipango ca Yehova coku yovola omanu kovitangi. (Osa. 34:19; 37:9-11; 2 Pet. 2:9) Oku yovuiwa kuetu la Suku ka ku lomboloka lika oku popeliwa kovitangi tu liyaka lavio cilo, pole, ku lombolokavo oku kuata epuluvi lioku tambula omuenyo ko pui, ci kale kilu kumue la Yesu ale voluali luokaliye palo posi.
19. Tu pondola ndati oku pandikisa lekolelo?
19 Osimbu otembo yaco ka yeyile, tu amamiko oku liyaka lovitangi violuali lulo lũvi. Pole, tu lavoka otembo yimue okuti, ovitangi viaco, ka vika kalako vali! (Osa. 55:6-8) Tu sukila oku ivaluka okuti, oku pandikisa kuetu lekolelo, kueca uvangi wokuti, Eliapu ohembi. Tu kuatisiwa lolohutililo kuenda ovolandu a vamanji poku ivaluka okuti, va kasivo oku liyaka lovitangi ndevi vietu. Omo liaco, amamako oku loñoloha loku angiliyiwa poku kuatisiwa Londaka ya Suku. Kuka ecelele okuti, ekolelo liove lioku tatiwa locisola ca “Suku ukuakulembeleka pokati kovina viosi” li pola. Ivaluka okuti, “ovaso a Yehova a vanja vakuesunga, o vonguila ovatui aye kevilikiyo liavo.”—Osa. 34:15.
O Tambulula Ndati?
• Nye Daviti a yeva vutima eci a liyaka lovitangi?
• Ekolelo lipi Soma Salomone a lekisa?
• Nye ci tu kuatisa oku liyaka lovitangi Yehova a ecelela?
[Elitalatu kemẽla 13]
Salomone wa kuatele ekolelo liokuti, Yehova o kuatisa omanu Vaye eci va liyaka lovitangi
[Elitalatu kemẽla 15]
Daviti wa eca ovitangi viaye ku Yehova vohutililo kuenje wa likolisiko oku linga ovina a pinga