OCIPAMA 11

Ndomo o Kuatisiwa Poku Tanga Embimbiliya

Ci Kuete Atosi

Anga hẽ wa yonguile ale oku fetika oku linga upange umue kuenje wa u tenda okuti wa tĩla calua? Oco o leluise upange waco, citava okuti, wa u linga kamue kamue. Haicovo o sukila oku linga poku fetika oku tanga Embimbiliya. Pamue o lipula ndoco: ‘Pi ndi fetikila?’ Vocipama cilo, tu ka kũlĩhĩsa ovina vimue via leluka o pondola oku linga oco vi ku kuatise oku sola oku tanga loku lilongisa Embimbiliya.

1. Momo lie tu sukilila oku tanga Embimbiliya oloneke viosi?

Omunu o tanga oloneke viosi Embimbiliya, ale “ocihandeleko ca Yehova,” o ka sanjuka loku sumũlũisiwa. (Tanga Olosamo 1:1-3.) Poku fetika, tanga lika vakukutu amue eteke leteke. Osimbu o kũlĩha ciwa Ondaka ya Suku, o ka sola oku tanga Embimbiliya.

2. Nye ci tu kuatisa oku upa esilivilo poku tanga Embimbiliya?

Oco tu upe esilivilo poku tanga Embimbiliya, tu sukila oku talamapo kamue, loku sokolola kueci tu kasi oku tanga. Tu sukila oku tanga Embimbiliya kuenda oku “sokolola.” (Yehosua 1:8) Osimbu o tanga, lipula ndoco: ‘Eci ci ndi longisa nye catiamẽla ku Yehova Suku? Ndi ci kapako ndati komuenyo wange? Ndi talavaya ndati lovinimbu evi oco ndi kuatise lavio vakuetu?’

3. O sokiya ndati otembo yoku tanga Embimbiliya?

Ca tĩla kokuove oku sokiya otembo yoku tanga Embimbiliya? Haicovo ci pita la valua pokati ketu. Seteka ‘oku talavaya ciwa lotembo yove.’ (Va Efeso 5:16) O ci linga poku sokiya otembo yimue oco o tange Embimbiliya eteke leteke. Omanu vamue va nõlapo oku tanga Embimbiliya komẽle. Vakuavo va nõlapo kekumbi okuti, pamue vepuluvi lionanya. Handi vali vakuavo, va tanga Embimbiliya luteke osimbu ka va pekelele. Lipi elivala lia ku sungulukila?

LILONGISA ONDONGOSI

Lilongisa ndomo o sanjukila oku tanga Embimbiliya. Limbuka ndomo o lipongiya ciwa oco o kuatisiwe lelilongiso liove Liembimbiliya.

Alitalatu: Umalẽhe o lilongisa oku lia okulia kumue votembo yimue. 1. Kakuenje o papala lokulia. 2. Noke lioku kula, o lia okulia. 3. Ca litepa lelitalatu liavali, umalẽhe o sola okulia. — Ndeci tu lilongisa oku sola ovikulia via litepa, tu pondola oku lilongisa oku sola oku tanga Embimbiliya

4. Lilongisa oku sanjukila oku tanga Embimbiliya

Pamue, ka ci lelua oku fetika oku tanga Embimbiliya. Pole, tu pondola “oku lekisa onjongole” yoku ci linga ndeci omunu umue a lilongisa oku sola okulia kumue ka la lia. Tanga 1 Petulu 2:2, noke konomuisa epulilo li kuãimo:

O sima hẽ okuti oku tanga Embimbiliya eteke leteke, ci ku kuatisa oku sola oku ci linga?

Tala OVIDEO oco o limbuke eci omanu vamue va linga oco va sole oku tanga Embimbiliya. Kuenje konomuisa apulilo a kuãimo.

OVIDEO: Amalẽhe va Sole Ondaka ya Suku (5:33)

Ndomo ca lekisiwa vovideo, ovitangi vipi amalẽhe va liyaka lavio?
Nye ca va kuatisa oku tẽlisa ocimãho cavo coku tanga Embimbiliya eteke leteke?
Nye va linga oco va sanjukile oku tanga Embimbiliya?

Olonumbi vi ku kuatisa oku fetika:

Nõla Embimbiliya limue lia koleliwa li kuete upopi wo koloneke vilo. Seteka Embimbiliya li Kola—Epongoluilo Lioluali Luokaliye nda lia sandekiwa kelimi liove.
Fetikila oku tanga olonepa o sole calua. Oco o kuate ovisimĩlo vimue, tala vokakasia “Fetika Oku Tanga Embimbiliya.”
Taya eci wa tanga ale. Oco o ci linge kuama olonumbi viokakasia “Ivaluka Apa wa Sulila?” ka sangiwa velivulu lilo.
Talavaya lo aplikativo JW Library^®. Pocakati co aplikativo yaco, o pondola oku tanga loku yevelela oku tangiwa Kuembimbiliya kuosi o sangiwa lekuatiso liotelefone yimue ale liocimalẽho cikuavo.
Talavaya lalomboluilo a sangiwa Vembimbiliya li Kola—Epongoluilo Lioluali Luokaliye. Valomboluilo aco mua kongela olomapa, otulokasia kuenda elomboluilo liolondaka vi ku kuatisa oku sola oku tanga.

5. Pongiya elilongiso liove Liembimbiliya

Tanga Olosamo 119:34, noke konomuisa epulilo li kuãimo:

Momo lie ca sungulukila oku likutilila osimbu kua fetikile oku tanga Embimbiliya ale oku pongiya elilongiso liove Liembimbiliya?

O kuatisiwa ndati vocipama locipama celivulu lilo? Osimbu o lipongiyila elilongiso liove, seteka oku kuama onjila eyi:

Tanga ovinimbu viatete viocipama cilo.
Sandiliya kuenda tanga ovisonehua kuenje seteka oku kuata elomboloko ndomo vi likuata locipama.
Taya atosi ale olondaka via velapo vi tambulula epulilo lepulilo; eci ci ka ku kuatisa oku sapela lulongisi wove catiamẽla kocipama.

Alitalatu: Ukãi umue o pongiya onepa yelilongiso liaye Liembimbiliya. A. Eye o tanga onepa yatete yocipama. B. Eye o tanga ovisonehua via tukuiwa Vembimbiliya. C. Eye o taya atosi kuenda olondaka via velapo vocipama.

Wa ci kũlĩha?

Olombangi Via Yehova via siata oku lilongisa Lambimbiliya a litepa. Pole, tu solevo calua Embimbiliya li Kola—Epongoluilo Lioluali Luokaliye omo okuti, lia koleliwa, lia leluka kuenda li tukula onduko ya Suku.—Tala ocipama ci sangiwa vo Internet “Anga hẽ Olombangi Via Yehova vi Kuete Embimbiliya Limue Lia Litepa?”

OMANU VAMUE VA POPIA VATI: “Oku lilongisa Embimbiliya ca tĩla calua. Si kuete otembo, ndi kava calua.”