Tava Oku Songuiwa Londaka Ya Suku
“Ondaka yove . . . oyo ocinyi conjila yange.”—OSAMO 119:105.
1, 2. Ondaka ya Suku yi tẽla ndati oku tu songuila?
ONDAKA ya Yehova yi tuila lika vonjila yetu, nda tua tava oku songuiwa layo. Nda tu yongola oku kuatisiwa lolonumbi via Yehova, tu sukila oku kuata ombili yoku tanga Ondaka yaye. Nda tua ci linga, tuka popia ndeci ukualosamo a popia hati: “Ondaka yove oyo ovela yolomahi viange, haiyo ocinyi conjila yange.”—Osamo 119:105.
2 Kaliye tu konomuisi Osamo 119:89-176. Vovinimbu evi, mu sangiwa 11 kovilala vi kuete esilivilo liavelapo. Ovio vi pondola oku tu kuatisa oku endela vonjila yi tuala komuenyo.—Mateo 7:13, 14.
Esunga Lioku Sanjukila Ondaka ya Suku
3. Osamo 119:89, 90, yi lekisa ndati esilivilo lioku pokola kondaka ya Suku?
3 Oku sanjukila ondaka ya Suku, ku pamisa ekalo lietu kespiritu. (Osamo 119:89-96) Ukualosamo wa popia hati: “A Yehova, ondaka yove yi tumãla hũ vovailu. . . . Ove wa [seveta] ongongo, kuenje yi kasi.” (Osamo 119:89, 90) Yehova wa lulika ekumbi, losãi kuenda olombungululu lonjila yimue yecelela okuti, vi ñuala ñuala ciwa kuenda ka vi li tusula. Oluali lua sevetiwa oco lu kalevo otembo ka yi pui. (Yovi 38:31-33; Osamo 104:5) Omo liaco, tu sukila oku pokola kondaka yosi yi tunda ku Yehova. Momo ovina viosi eye a popia vi tẽlisiwa.—Isaya 55:8-11.
4. Oku sanjukila ondaka ya Suku ku kuatisa ndati omanu vaye eci va tala ohali?
4 Nda ukualosamo ‘ka sanjukilile ovihandeleko via Yehova, nda wa nyolẽha lohali yaye.’ (Osamo 119:92) Eye, ka liyakele lesuvu liomanu vamue ka kũlĩhĩle. Pole, wa liyaka lesuvu lia va Isareli vana va lavisile ovihandeleko via Yehova. (Ovisila 19:17) Pole, esuvu liaco, ka lia tatekele ukualosamo oku endela vonjila ya Yehova, momo wa solele calua ovihandeleko viaye. Upostolo Paulu eci a kala ko Korindo, ‘wa suvukiwilevo la vamanji vesanda va kala vekongelo. Pokati kavo pa kala ‘ovapostolo vesanda vana va enda oku u lundila ovina vĩvi.’ (2 Va Korindo 11:5, 12-14, 26) Pole, Paulu wa pandikisa kovitangi viaco omo lioku sola ondaka ya Suku. Nda tua sola Ondaka ya Suku loku pokola kokuaye, tuka kuata ocisola la vamanji. (1 Yoano 3:15) Kuenda tuka amamako oku pokola kolonumbi via Suku ndaño loku suvukiwa loluali. Osimbu tu lavoka oluali luokaliye, tuamamiko oku linga ocipango ca Yehova kumue la vamanji.—Osamo 119:93.
5. Soma Asa wa sandiliya ndati Yehova?
5 Poku lekisa elitumbiko lietu ku Yehova tu likutilila kokuaye hati: “Ndu wove. Mopele, momo nda vanjiliya alungulo ove.” (Osamo 119:94) Soma Asa wa sandiliya Yehova kuenje wa imula efendelo liesanda lia kala vofeka yo Yuda. Kunyamo wekũi latãlo wuviali waye, va lingile ocipito cimue kuenje, olonungi via Yuda via “lisila oku sandiliya Yehova. Noke Yehova wa sangiwa lavo.” Omo liaco, “wa va muisa epuyuko kolonele viosi.” Ocipito caco ca lingiwa kunyamo wo 963, otembo handi Yesu keyile. (2 Asapulo 15:10-15) Ulandu owu u tu ĩha ekolelo lioku sanda Yehova nda tua tundisiwa vekongeko. Momo Yehova o sumũlũisa kuenda o teyuila omanu vana va yongola oku tiuka kokuaye.
6. Oco tu liteyuile kespiritu, tu sukila oku linga nye?
6 Vondaka ya Yehova mu sangiwa olonumbi vi tu teyuila kespiritu. (Osamo 119:97-104) Olonumbi viaco, vi tu ĩha ukũlĩhĩso umue ka u sokisiwa lowu wovanyali vetu. Oku pokola kolonumbi via Yehova, ci tu ĩhavo olondunge lelomboloko liovina vimue okuti ‘akulu vendamba ka va vikuete.’ (Osamo 119:98-100) Nda tua sola olonumbi via Yehova tuka yuvula ‘olonjila viosi viuhembi.’ (Osamo 119:103, 104) Kuenje, vi tu teyuila kespiritu lo komanu vana vakuakulituna haivo olongangala va kasi koloneke vilo via sulako.—2 Timoteo 3:1-5.
Ondaka ya Suku Oyo Ovela Yolomahi Vietu
7, 8. Nye tu sukila oku linga oco tu kuame onumbi Yosamo 119:105?
7 Ondaka ya Suku oyo ono yocinyi cespiritu. (Osamo 119:105-112) Ci kale okuti Tuakristão olombuavekua, ale tulomeme vikuavo, vosi yetu tu sukila oku popia ku Suku hati: “Ondaka yove oyo ovela yolomãhi viange, haiyo ocinyi cokonjila yange.” (Yoano 10:16; Osamo 119:105) Ondaka ya Suku yi kasi ndocinyi ci tuila onjila yetu. Momo yi tu teyuila kovitangi viosi vi nyola ekalo lietu kespiritu. (Olosapo 6:23) Omo liaco, tu sukila oku ecelela okuti ondaka yaco yi songuila olomãhi vietu.
8 Tu sukila oku kuama ongangu yusonehi Wosamo 119. Eye wa nõlelepo oku pandikisa loku endela vonjila ya Yehova. Omo liaco, wa popia hati: “Nda lisinga kuenje nda ci kolisa, cokuti ndingainga ovihõlo viove viesunga.” (Osamo 119:106) Lalimue eteke ka tuka ivaliko oku tanga Embimbiliya eteke leteke loku endaenda kolohongele.
9, 10. Tua kũlĩha ndati okuti omunu wa litumbika ku Yehova o pondolavo oku ‘lueya olonumbi viaye’? Oco a yuvule ocitangi caco o sukila oku linga nye?
9 Ukualosamo ka ‘lueyele olonumbi via Yehova.’ Pole, omunu una wa litumbika ku Yehova, citava okuti pamue o lueya olonumbi viaco. (Osamo 119:110) Soma Salomone kefitikilo liuviali waye, wa pokuile ku Yehova. Pole, noke weya oku lueya olonumbi viaye ndaño okuti watiamẽlele kepata limue lia litumbikile ku Yehova. Eye ‘wa yonjiwa lakãi vakualofeka, kuenje wa lingila ekandu Yehova.’—Nehemiya 13:26; 1 Olosoma 11:1-6.
10 Ocili okuti, Satana o kasi ndomunu ukuakuyeva olonjila. Momo o kuete ayonjo alua. (Osamo 91:3) Pamue omanu vana va siapo etavo liocili, va seteka oku tu yapula vonjila ya Yehova. Pokati Kakristão va kala volupale luo Tuatera, pa kala ukãi umue o tukuiwa hati, Isevele. Ukãi waco o lomboloka ocisoko cakãi vamue va enda oku longisa vakuavo oku fendela oviteka kuenda oku linga ukahonga. Yesu ka ecelele okuti evĩho liakãi vaco liamamako vekongelo. Omo liaco, tu sukilavo oku kuama ongangu yaye yoku yelisa ekongelo okuti ka mu kala evĩho. (Esituluilo 2:18-22; Yuda 3, 4) Tu sukila oku pinga ekuatiso ku Yehova oco tuamameko oku endela volonjila viaye.—Osamo 119:111, 112.
Tu Kuatisiwi Londaka ya Suku
11. Ndomo ca lekisiwa Kosamo 119:119, Yehova a tenda ndati olondingaĩvi?
11 Nda tua yuvula oku yapuka vonjila ya Yehova, eye oka tu kuatisa. (Osamo 119:113-120) Koloneke vilo, kuli Akristão valua vakuavitima vivali. Omo liaco, tu sukila oku yuvula omanu vaco ndeci Yesu a linga. (Osamo 119:113; Esituluilo 3:16) Omo okuti tu vumba Yehova lutima wetu wosi, Eye o linga ‘ocivundilo cetu.’ Kuenje o tu teyuila kuenda ‘o sepula vosi va lueya olonumbi viaye, omo liolonjila viavo viesanda.’ (Osamo 119:114, 117, 118; Olosapo 3:32) Yehova o tenda olondingaĩvi ndovisalakiti. Kuenje o vi tundisa pokati komanu vaye vana va kasi ndopalata kuenda ndulu wa yelisiwa. (Osamo 119:119; Olosapo 17:3) Omo liaco, tu sukila oku sola olonumbi via Yehova. Momo ka tu yongola oku nyoleha lolondingaĩvi.
12. Momo lie oku sumbila Yehova ku kuetele esilivilo?
12 Ukualosamo wa popia hati: “[A Yehova] etimba liange li kululumila lusumba.” (Osamo 119:120) Nda tu yongola oku kuatisiwa la Yehova, tu sukila oku lekisa esumbilo kokuaye poku yuvula ovina viosi vi u sumuisa. Yovi omo lioku lekisa esumbilo ku Yehova, weya oku linga ukuesunga. (Yovi 1:1; 23:15) Oku sumbila Yehova ku tu kuatisa oku pokola kokuaye loku pandikisa kovitangi. Pole, oco tu lekise epandi liaco, tu sukila oku likutilila kokuaye lekolelo.—Tiago 5:15.
Oku Likutilila Lekolelo
13-15. (a) Momo lie tu kuetele ekolelo liokuti Yehova o tambulula olohutililo vietu? (b) Nye tu sukila oku linga nda ka tua kũlĩhĩle eci tu pinga vohutililo? (c) Lombolola ndomo Osamo 119:121-128, yi tu kuatisa kahonguo etu.
13 Eci tu likutilila ku Yehova tu sukila oku kolela okuti eye o tu kuatisa. (Osamo 119:121-128) Tu sukilavo oku kuata ekolelo ndeli ukualosamo a lekisile oco Yehova a tambulule olohutililo vietu. Momo lie? Momo ‘tu sole calua ovihandeleko viaye okuti ulu u sule.’ Handi vali, tua kũlĩha okuti, ‘olonumbi via Yehova via sunguluka.’—Osamo 119:127, 128.
14 Yehova o yeva olohutililo vietu momo tu likutilila kokuaye lekolelo. Kuenda tu pokola kolonumbi viaye. (Osamo 65:2) Pole, olonjanja vimue tu liyaka lovitangi vimue okuti ka tua kũlĩhĩle eci tu pinga vohutililo. Oco hẽ, nye tu sukila oku linga? ‘Espiritu sandu, li tu kuatisa kahonguo aco.’ (Va Roma 8:26, 27) Olonjanja vimue, tu sukilavo oku tukula olondaka vi sangiwa Vembimbiliya. Momo, Yehova o sanjukilavo olohutililo viaco.
15 Vembimbiliya mu sangiwa olohutililo viomanu valua vo kosimbu va liyakele lovitangi ndevi vietu. Kũlĩhĩsa olondaka vi sangiwa Kosamo 119:121-128. Olondaka evi, via lisoka lovitangi tua siata oku liyaka lavio. Oco ka tuka yapuisiwe lolondingaĩvi, tu sukila oku pinga ekuatiso ku Yehova ndeci ukualosamo a lingile. (Ovinimbu 121-123) Olonjanja vimue tu liyaka locitangi coku nõla onjila yimue tu yongola oku kuama. Poku liyaka lovitangi viaco, tu sukila oku likutilila ku Yehova oco a tu songuile lespiritu liaye. Momo espiritu liaco, li tu kuatisa oku ivaluka olonumbi viaye kuenda oku pokola kokuavio. (Ovinimbu 124-125) Tu sukilavo oku yuvula olonjila viosi vĩvi. Pole, tu sukila oku pinga ku Yehova oco a tu kuatise oku tamãlala layonjo ana a tu tuala koku lueya ovihandeleko viaye. (Ovinimbu 126-128) Oku tanga Embimbiliya eteke leteke, ku tu kuatisa oku ivaluka ovinimbu evi eci tu likutilila ku Yehova.
Tu Kuatisiwi Lalungulo a Yehova
16, 17. (a) Momo lie tu sukilila olonumbi via Yehova? Anga hẽ tu sukila muẽle oku pokola kokuavio? (b) Nda tua pokola kolonumbi via Yehova, omanu vaka tu tenda ndati? Ekolelo lie tu sukila oku kuata?
16 Oco Yehova a tambulule olohutililo vietu, tu sukila oku pokola kolonumbi viaye. (Osamo 119:129-136) Omo okuti tu kuete ocituwa coku ivala, tu sukila alungulo aye. Momo alungulo aco a tu ivaluisa olonumbi lovihandeleko viaye. Tua siata oku sanjukila alomboluilo amue okaliye atiamẽla kondaka yaye. (Osamo 119:129, 130) Omo liaco, tu eca olopandu ku Yehova omo a siata oku ‘tuisila ocipala caye kokuetu poku sanjukila ovilinga vietu. Pole, ‘andunde ovava a siata oku sukumuhila vovaso etu omo liomanu vamue ka va pokola kovihandeleko Viaye.’—Osamo 119:135, 136; Atendelo 6:25.
17 Tua kũlĩha okuti, nda tua pokola kolonumbi Viembimbiliya, Yehova okamamako oku tu sumũlũisa. (Osamo 119:137-144) Tua kũlĩhavo okuti eye o kuete esunga lioku tu ivaluisa olonumbi viaye kuenda oku pokola kokuaye. Momo tumanu vaye. (Osamo 119:138) Ukualosamo wa enda oku pokola kovihandeleko via Yehova. Oco hẽ, momo lie a popela hati: ‘Ndutito, kuenda nda tombiwa?’ (Osamo 119:141) Eye wa kala oku lekisa ndomo a tendiwile lovanyali vaye. Nda tua pandikisa loku pokola kolonumbi via Yehova, omanu vaka tu sepulavo. Pole, tu sukila oku kuata ekolelo liokuti, Yehova oka sumũlũisa alikolisilo etu. Momo tua tiamẽla kokuaye.
Oku Kolapo Lombembua
18, 19. Oku pokola kolonumbi via Suku ku nena onima ye?
18 Oku pokola kolonumbi via Yehova ku tu kuatisa oku kuata ukamba laye. (Osamo 119:145-152) Omo liaco, tu likutilila kokuaye lutima wetu wosi. Kuenda tua kũlĩha okuti eye o tu yeva. Citava okuti pamue tu pasuka ociteketeke loku pinga ku Yehova oco a tu kuatise. (Osamo 119:145-147) Yehova o kasi ocipepi letu, momo tu yuvula ovituwa ka via sungulukile. Kuenda tu kuama ongangu ya Yesu yoku kũlĩha okuti, ondaka yaye oyo ocili. (Osamo 119:150, 151; Yoano 17:17) Ukamba wetu la Yehova u tu kuatisa oku pandikisa kovitangi violuali lulo lũvi. Handi vali, omo liukamba waco eye oka tu popela kesulilo lioluali lulo.—Esituluilo 7:9, 14; 16:13-16.
19 Omo lioku sumbila ondaka ya Yehova, etu tu kuete ekalo liwa. (Osamo 119:153-160) Tua litepa lolondingaĩvi, momo ‘ka tu yapuka volonumbi via Yehova.’ Tu sole calua olonumbi viaye via lipua. Kuenda tua siata oku kuatisiwa locisola caye. (Osamo 119:157-159) Eci tu liyaka lovitangi, olonumbi via Yehova vi tu kuatisa oku ivaluka eci tu sukila oku linga. Handi vali, alungulo a Yehova a pondola oku tu songuila. Kuenda tua kũlĩha okuti, eye o kuete omoko yoku ci linga, momo eye wa tu Lulika. Tua kũlĩhavo okuti, ‘Ondaka ya Yehova oyo ocili.’ Omo liaco, tu pokola kolonumbi viaye kuenda oku yuvula oku tiamẽla kolondunge vietu muẽle.—Osamo 119:160; Yeremiya 10:23.
20. Momo lie tu kuetele ‘ombembua yalua’?
20 Oku pokola kovindeleko via Yehova ku nena ombembua. (Osamo 119:161-168) Elambalalo ka li pondola oku tepulula ombembua tu kuete la Yehova. (Va Filipoi 4:6, 7) Omo lioku sola olonumbi via Yehova, tu ‘u sivaya olonjanja epanduvali veteke.’ (Osamo 119:161-164) Ukualosamo wa popia hati: “Ava va sole ovihandeleko via [Suku] va kasi lombembua ya lua. Ka kuli eci ci tẽla oku va londuisa.” (Osamo 119:165) Nda tua sola ovindaleko via Suku ka tuka yapuka vonjila yaye omo liovilinga vĩvi via vakuetu.
21. Ovolandu api Embimbiliya a lekisa okuti, ovitangi viekongeko ka citava okuti vi tu yapula vonjila ya Yehova?
21 Embimbiliya li lombolola ovolandu vomanu valua vo kosimbu okuti, ka va yapukile vonjila ya Yehova ndaño lovitangi. Ukristão umue kocita catete o tukuiwa hati, Gaiu wa endela vonjila ya Yehova ndaño lovituwa vĩvi via Deotrefe. Kuenda ka lueyele vovihandeleko viaye. (3 Yoano 1-3, 9, 10) Upostolo Paulu wa vetiya Akristão vamue vavali ndeci: Euodia la Suntuke, oco ‘va lisunguluisile vu Ñala.’ Momo pokati kavo pa kala ovitangi. Noke va tambula ekuatiso lioku tetulula ovitangi viavo kuenje vamamako oku vumba Yehova. (Va Filipoi 4:2, 3) Nda vekongelo lietu mueya ovitangi vimue, ka tuka yapuki vonjila ya Yehova. Tu sukila oku pokola kolonumbi viaye kuenda oku ivaluka okuti, ‘Yehova o lete ovina viosi.’ (Osamo 119:168; Olosapo 15:3) Omo liaco, lacimue ci tẽla oku nyõla ombembua yetu.
22. (a) Nda tua pokola ku Yehova, tu tambula esumũlũho lie? (b) Ndamupi tu tenda omanu vana va tunda vocisoko ca Yehova?
22 Nda tua pokola ku Yehova tuka kuata esumũlũho lioku u sivaya. (Osamo 119:169-176) Oku pokola kolonumbi via Yehova, ku tu pamisavo kespiritu. Kuenda ku tu kuatisa oku eca esivayo kokuaye. (Osamo 119:169-171, 174) Eli olio esumũlũho lia velapo tu kuete koloneke vilo via sulako. Ukualosamo wa yonguile oku amamako oku sivaya Yehova. Pole, olonjanja vimue wa enda loku ‘tungayala ndomeme ya nyelela.’ (Osamo 119:175, 176) Koloneke vilo, kuli vamanji vamue va tunda vocisoko ca Yehova. Pole, va kuete handi ocisola la Yehova kuenda va yongola oku amamako oku u fendela. Omo liaco, tu sukila oku kuatisa omanu vaco oco va pame vali kespiritu. Tu sukilavo oku va kuatisa oco va sange vali esanju lioku sivaya Yehova pokati komanu vaye.—Va Heveru 13:15; 1 Petulu 5:6, 7.
Ondaka ya Suku yi tu Songuila Otembo ka yi Pui
23, 24. Ekuatiso lie tu sanga Vosamo 119?
23 Osamo 119, yi pondola oku tu kuatisa kolonepa vialua viomuenyo wetu. Oyo yi tu vetiya oku kolela ku Yehova. Kuenda yi lekisa okuti, esumũlũho liavelapo li tunda lika koku ‘endela vonjila ya Yehova.’ (Osamo 119:1) Ukualosamo o tu ivaluisa okuti, ondaka ya Yehova yocili. (Osamo 119:160) Ukũlĩhĩso waco u tu kuatisa oku sola calua Ondanda ya Suku. Oku sokolola olondaka vi sangiwa Kosamo 119, ci tu vetiya oku kuata ombili yoku lilongisa Embimbiliya. Ukualosamo wa pinga ku Suku hati: “Ndongise ovisila viove.” (Osamo 119:12, 68, 135) Noke wamisako hati: “Ndongise olondunge viocili lukũlĩhĩso, momo nda kolela ovihandeleko viove.” (Osamo 119:66) Eci tu likutilila ku Suku, tu sukilavo oku kuama ongangu yukualosamo.
24 Elongiso lia Yehova li tu kuatisa oku kuata ukamba laye. Ukualosamo olonjanja vialua wa popia hati, ndukuenje wa Yehova. Eye wa likutilila ku Yehova hati: ‘Ndimunu wove.’ (Osamo 119:17, 65, 94, 122, 125; Va Roma 14:8) Etu Tulombangi via Yehova, tu kuete esumũlũho lioku linga ocipango caye kuenda oku u sivaya. (Osamo 119:7) Ove hẽ o kasi oku vumba Yehova poku kunda olondaka viwa Viusoma? Nda wa kolela kondaka ya Yehova loku pokola kolonumbi viaye, eye okamamako oku ku kuatisa. Kuenda oka sumũlũisavo upange wove.
Otambulula Ndati?
• Momo lie tu sukilila oku sola ondaka ya Suku?
• Tu kuatisiwa ndati londaka ya Suku?
• Ekuatiso lie tu tambula kolonumbi via Yehova?
• Momo lie omanu va Yehova va kuetele ombembua loku kolapo?
[Elitalatu kemẽla 9]
Ondaka ya Suku oyo ono yocinyi cespiritu
[Elitalatu kemẽla 10]
Nda tua sola olonumbi via Yehova, lalimue eteke aka tu sokisa ‘lovisalakiti’
[Elitalatu kemẽla 11]
Nda tua tanga Embimbiliya oloneke viosi, tuka ivaluka ovina tu pinga vohutililo