Ondaka ya Yehova yi Kasi Lomuenyo
Atosi Avelepo Vonepa Yatãlo Yelivulu Liolosamo
OHUASI yi pondola oku popia hati: “Omãla vetu valume vutila wavo va linge ndovikũla via kula ciwa. Lomãla vetu vakãi va linge ndovawe avindi a songiwila onjo yosoma. Olosila vietu vi yuke olomema [ale ovikulia] viovaima osi. . . . Olomeme vietu vi citile kovisenge vietu olohũlũkãi lolohuluwa.” Omo liaco, eye o popia hati: “Ava va kasi ndoco va sumũlũha.” Pole ukualosamo wa popia hati: ‘Omanu vana okuti, Yehova eye Suku yavo, ovo va sumũlũha.’ (Osamo 144:12-15) Ocili okuti, omanu vana vatiamẽla ku Yehova va sumũlũha. Momo Yehova eye Suku yesanju. (1 Timoteo 1:11) Uvangi waco wa lekisiwa konepa ya sulako yelivulu Liolosamo okupisa Kosamo 107 toke Kosamo 150.
Onepa Yatãlo yelivulu Liolosamo, yi sitululavo ovituwa via velapo via Yehova oku kongelamo ocisola, ocili caye, kuenda ohenda. Osimbu tu amamako oku kuata elomboloko liovituwa viaco, tu vetiyiwa oku lekisa ocisola Kokuaye kuenda oku u sumbila. Kuenje tu kuata esanju lialua. Owu owo ulandu wa velapo u sangiwa vonepa Yatãlo Yelivulu Liolosamo.—Va Heveru 4:12.
VA SUMŨLŨHA OMO LIOCISOLA CA YEHOVA
Eci va Yudea va tunda kumandekua ko Bavulono, va imba ocisungo hati: “Va panduile Yehova ocisola caye ka ci pui. Vo panduile ovikomo a lingila omãla vomanu.” (Osamo 107:8, 15, 21, 31) Daviti poku sivaya Yehova wa imba ocisungo hati: “Ocili cove cenda [toke] kalende.” (Olosamo 108:4) Vocisungo cikuavo, wa imba hati: “A Yehova Suku yange, [ñuatise]. Mopele [locisola] cove ka ci pui.” (Osamo 109:18, 19, 26) Osamo 110, yatiamẽla kocitumasuku cusoma wa Mesiya. Osamo 111:10, yi popia hati: “Oku sumbila Yehova oko efetikilo liolondunge.” Osamo yi kuãimo yi popia hati: “Omunu o sumbila Yehova . . . eye wa sumũlũha.”—Osamo 112:1.
Olosamo 113 toke 118, vi tukuiwa hati, Ovisungo Vioku Sivaya Yehova. Momo olosamo viaco, vi tukula calua ondaka yokuti, “sivayi Yehova.” Elivulu limue lio kocita catatu, lia lombolola okuti, ovisungo viaco, ovio va Yudea va enda oku imba kocipito Copaskua, kuenda kovipito vitatu viunyamo. Pokati kolosamo viosi, Osamo 119 oyo lika yinene. Momo yi kuete ovinimbu vialua. Kuenda oyo lika yinene pokati kalivulu osi a sangiwa Vembimbiliya. Osamo yaco yi situlula ciwa ondaka ya Yehova.
Atambululo Kapulilo Embimbiliya:
109:23—Olondaka via Daviti vioku popia hati: ‘Nda takata ndulembo koñolosi,’ vi lomboloka nye? Daviti wa tukula upopi wocindekaise coku lekisa okuti, olofa viaye via kala ocipepi.—Osamo 102:11.
110:1, 2—Yesu Kristu okuti, eye ‘Ñala ya Daviti’ eci a tumãla kondio ya Suku, wa kala oku linga nye? Eci Yesu a pinduiwa, wa enda kilu. Kuenje wa tumãla kondio ya Suku oku talamẽla toke kunyamo wo 1914, oco a vialekiwe komangu Yusoma. Vokuenda kuotembo yaco, Yesu wa viala lika Akristão olombuavekua poku songuila upange wavo woku kunda. Kuenje, wa va pongiya oco vaka viale laye kilu Vusoma waye.—Mateo 24:14; 28:18-20; Luka 22:28-30.
110:4—Yehova ‘wa lisinga oku linga nye okuti, ka pongoloka’? Ohuminyo yaco, yatiamẽla kocisila a linga la Yesu Kristu okuti o linga Osoma haeye Ocitunda Cinene.—Luka 22:29.
113:3—Onduko ya Yehova yi sivayiwa ndati “tunde poku tunda kuekumbi toke poku iñila kualio”? Vesivayo liaco, ka mua kongelele lika ocimunga comanu va sivaya Suku eteke leteke. Ocili okuti, tunde poku tunda kuekumbi toke poku iñila kualio, olosongo vialio vi mihila oluali luosi. Cimuamue haico catiamẽla ku Yehova. Eye o kasi oku sivayiwa koluali luosi. Pole, esivayo liaco li kasi oku lingiwa omo liomanu vaye va likuete omunga. Etu Tulombangi via Yehova, tua sanjukila esumũlũho lietu lioku sivaya Yehova kuenda oku kuatisa kupange woku kunda Usoma.
116:15—Yehova ‘wa velisapo ndati okufa kuomanu vaye’? Yehova wa velisapo calua omanu vaye. Omo liaco, ka ca lelukile kokuaye oku ecelela okuti, va pondiwa vosi. Nda Yehova wa ecelela okuti omanu vaye va pondiwa vosi, ci lekisa okuti ovanyali vaye va kuete unene walua okuti, waye u sule. Kuenje lomue o siala voluali okuti oka linga ociseveto coluali luokaliye.
119:71—Ohali yi kuatisa ndati omunu? Ohali yi tu longisa oku kolela ku Yehova, loku likutilila kokuaye lutima wosi. Yi tu longisavo esilivilo lioku tanga Ondaka yaye, kuenda oku pokola kolonumbi viaco. Ohali citava okuti, yi situlula ovituwa vimue vĩvi tu sukila oku siapo. Pole, yi tu kuatisa lika nda tua ecelela oku pindisiwa layo.
119:96—Nye ci lomboloka ‘esulilo lioku loñoloha ale oku lipua kuovina viosi’? Ukualosamo wa tukula oku lipua kuovisimĩlo viomanu. Eye wa kũlĩhĩle okuti, omanu ka va kuete elomboloko lia suapo liatiamẽla koku lipua. Pole, ovihandeleko via Suku ovio lika via lipua. Momo olonumbi viaco, vi tiamisiwila kolonepa viosi viomuenyo wetu.
119:164—Nye ci lomboloka oku sivaya Suku “olonjanja epanduvali veteke”? Etendelo liepanduvali, li lomboloka cimue ca suapo. Omo liaco, olondaka evi viukualosamo, vi lomboloka okuti, Yehova o sesamẽla esivayo lieciwa lutima wosi.
Ceci tu Lilongisilako:
107:27-31. Keteke lio Harmagedo, olondunge violuali lulo ka vika kuata esilivilo. (Esituluilo 16:14, 16) Ovio ka vi pondola oku popela omunu kenyoleho. Pole, omanu vana va kolela Yehova ovo lika vaka popeliwa. Kuenje vaka eca olopandu omo ‘liohenda yaye ka yi pui.’
109:30, 31; 110:5. Esualali olonjanja vimue okuokuo kuaye kuondio, ka ku kuete eteyuilo omo lioku kuata osipata. Yehova vupopi wocindekaise, o kasi “kondio” yomanu vaye omo lioku va yakelako. Eye o va teyuila loku va kuatisa. Omo liaco, tu kuete esunga lioku amamako oku u sivaya.
113:4-9. Yehova ndaño okuti wa velapo, ‘o petamẽla oku vanja ovina vi kasi kilu lieve.’ Pole, o kuetele ohenda olosiwe, kuenda olohukũi, lakãi olosiũle. Eye omo okuti embombe, o yongola okuti omanu vaye va lekisavo umbombe.—Tiago 4:6.
114:3-7. Oku lilongisa ovilinga vi komõhisa Yehova a lingila omanu vaye kosimbu ndeci: Vokalunga Kakusuka, Volui Yordão, kuenda Komunda Sinai, ci tu kuatisa calua. Omanu okuti, ovo ocindekaise ‘congongo’ va sukila oku ‘lulumila kovaso a Yehova.’
119:97-101. Oku kuata olondunge, luloño, kuenda elomboloko Liondaka ya Suku, ci tu kuatisa kovina viosi vi nyõla ekalo lietu kespiritu.
119:105. Ondaka ya Suku okuti, oyo ocinyi colomãhi vietu yi tu kuatisa oku pandikisa kovitangi. Oyo yi kasi ndocinyi ci mihĩla onjila yetu. Momo yi tu sapuila ovina Yehova aka linga kovaso.
VA SUMŨLŨLA NDAÑO LOVITANGI
Ndamupi tu puluka kovitangi? Okupisa Kosamo 120 toke 134, ku eca etambululo kepulilo eli. Tu puluka lika kovitangi loku amamako lesanju nda tua kolela kekuatiso lia Yehova. Olosamo evi via tukuiwa hati, ovisungo vioku lamana. Momo va Isareli va enda oku vimba poku lamana ko Yerusalãi kovipito viavo viunyamo.
Osamo 135 kuenda 136, vi tukula Yehova hati, Ululiki wovina viosi vi u sanjuisa. Eye wa litepa loviñumañuma ka vi eci ekuatiso. Osamo 136, ya sonehiwa lolonjimbi viaco. Ovilala via sulako viovisungo viaco, via imbiwa loku taviya ovilala viatete. Osamo yi kuãimo yi lombolola esumuo lia va Yudea eci va kala kumandekua ko Bavulono. Momo va yonguile oku fendela Yehova ko Siono. Olosamo 138 toke 145, via sonehiwa la Daviti. Eye wa yonguile oku ‘pandula Yehova lutima waye wosi.’ Momo lie? Eye wa popia hati: “Hu sivayaila ocikomo como wa ndulika.” (Osamo 138:1; 139:14) Volosomo vitãlo vikuãimo, Daviti wa likutilila oku pinga ekuatiso kovina vimue ndeci: Oku yovuiwa kolondingaĩvi, oku lunguiwa lesunga, kuenda oku yovuiwa kelambalalo. Wa pingavo olonumbi vioku songuila omuenyo waye. Daviti wa situlula ciwa esumũlũho liomanu va Yehova. (Osamo 144:15) Noke yoku sokolola ovilinga vinene via Yehova kuenda ocisola caye, wa popia hati: “Omẽla wange u sapula esivayo lia Yehova. Vosi vakuetimba va pandole ño hũ onduko yaye yi kola.”—Osamo 145:21.
Atambululo Kapulilo Embimbiliya:
122:3—O Yerusalãi ya kala ndati “ndimbo lia likongela kumosi”? Olonjo violupale luo Yerusalãi via kala pamosi ndeci ca kala ovaimbo osi kotembo yaco. Omanu vaco va likuatele omunga. Kuenje ca lelukile oku teyuila olupale luaco. Handi vali, omo okuti olonjo viaco via kala pamosi, omanu vaco ca lelukile oku likolela pokati loku likuatisa. Ulandu owu u lekisa okuti, apata 12 a va Isareli va kala lelitokeko konepa yespiritu eci va enda oku fendela Yehova.
123:2—Olusapo lua tiamẽla kovaso akuenje ndomo lua tukuiwa vocinimbu eci, lu lomboloka nye? Upika o tulukila kucime caye omo liovina vivali: Catete, oku kũlĩhĩsa onjongole ya cime caye. Cavali, oku tambula kokuaye eteyuilo lekuatiso liatiamẽla kovina a sukila. Cimuamue haico catiamẽla kokuetu. Tu sukilavo oku tulukila ku Yehova loku limbuka ocipango caye kuenda oku sanda ohenda kokuaye.
131:1-3—Daviti ‘wohĩle ndati loku tula utima ndomõla o kasi kavele a inaye’? Ndeci omõla a lilongisa oku lembelekiwa la inaye, haico Daviti a linga. Eye, wa lilongisa oku liuhĩla kuenda oku tula utima ‘ndomõla o kasi kavele a inaye.’ Wa cilinga ndati? Eye wa cilinga poku yuvula epela locipululu vutima waye. Kuenje ka kuatele utima woku sandiliya ovina via velapo komuenyo waye. Daviti wa yuvulavo oku sandiliya ekemãlo. Momo wa kũlĩhĩle okuti, ka lipuile. Kuenje wa lekisa eliketiso. Etu tu sukilavo oku kuama ongangu yaye. Capiãla enene poku sanda oku kuata ovikele vekongelo.
Ceci tu Lilongisilako:
120:1, 2, 6, 7. Oku lundila loku vangula olondaka vĩvi, ku sumuisa vakuetu. Oku lava elimi lietu poku vangula, owo uvangi u lekisa okuti, ‘tuakuambembua.’
120:3, 4. Nda tu kuete ocitangi cimue lomunu ‘ukuelimi lĩvi,’ tu sanga elembeleko poku kũlĩha okuti, Yehova oka tetulula ocitangi caco kotembo a sokiya. Omanu vakualundi, vaka yambuiwa la Yehova. Ovo vaka kala ovikuata vionyeño ya Yehova yi sokisiwa “lakala ocinendele.”
127:1, 2. Kovina viosi tu linga, tu sukila oku likolisilako oku sanda olonumbi via Yehova.
133:1-3. Elitokeko liomanu va Yehova, li kavuluisa utima. Omo liaco, ka tuka seteki oku nyõla elitokeko liaco poku kala vakualombonde loku lisiõsiõla.
137:1, 5, 6. Omanu va Yehova va kala kumandekua, va kuatisiwa lo Siono. Momo kotembo yaco, o Siono, oyo ya kala ocindekaise cocisoko ca Yehova ca palo posi. Nye ci popiwa catiamẽla kokuetu? Anga hẽ tua siatavo oku pokola kolonumbi viocisoko ca Yehova koloneke vilo?
138:2. Yehova ‘o kemãlisa ondaka yaye kilu lionduko yaye.’ Momo oku tẽlisiwa kuolohuminyo a linga vonduko yaye, kuka velapo ovina viosi tu lavoka. Omo liaco, tuka tambula ovina vialua viwa.
139:1-6, 15, 16. Yehova wa kũlĩha ovilinga vietu, lovisimĩlo vietu kuenda olondaka vietu osimbu ka tua vi popele. Eye wa tu kũlĩha ciwa tunde vimo lia ina yetu osimbu ovimatamata vietimba lietu ka via tokekisiwile. Ukũlĩhĩso wa Yehova watiamẽla kokuetu, ‘u komõhisa calua.’ Oku kũlĩha okuti, Yehova o lete ovitangi vietu, ci tu lembeleka. Momo eye wa kũlĩhavo ohali yi tunda kovitangi viaco.
139:7-12. Ka kuli kocitumãlo tu enda okuti, Yehova ka tẽla oku tu kuatisa.
139:17-18. Anga hẽ, tua siata oku sola ukũlĩhĩso wa Yehova? (Olosapo 2:10) Nda tua sola ukũlĩhĩso waco, tuka kuata esanju komuenyo wetu. Ovisimĩlo via Yehova, ‘vialua okuti, eseke li sule.’ Omo liaco, tu kuete ovina vialua tu sukila oku lilongisa viatiamẽla ku Yehova.
139:23, 24. Tu sukila oku pinga ku Yehova oco a kũlĩhĩse vutima wetu nda muli ovisimĩlo vĩvi, lolonjongole vĩvi. Kuenje tu likutilila oco a tu kuatise okuti tu vi yuvula.
143:4-7. Ndamupi tu pandikisa kovitangi? Ukualosamo o tu sapuila eci tu sukila oku linga: Tu sukila oku ivaluka ovilinga vi komõhisa via Yehova, loku pitisa kovaso ocipango caye, kuenda oku pinga ekuatiso kokuaye vohutililo.
‘Ene Amanu, Sivayi Yehova!’
Ovipama viosi violonepa viatete vikuãla vielivulu Liolosamo, vi malusula lolondaka vioku sivaya Yehova. (Osamo 41:13; 72:19, 20; 89:52; 106:48) Onepa yatãlo okuti oyo yasulako yelivulu liolosamo, yi malusulavo lolondaka vimuamue. Osamo 150:6, yi popia hati: “Cosi ci fuima ci sivaye Yehova. [Ene amanu] sivayi Yehova.” Esivayo liaco, lika tẽlisiwa lika voluali luokaliye lua Suku.
Osimbu tu lavoka asumũlũho aco, tu kuete esunga lioku sivaya Suku yocili kuenda oku kemanya onduko yaye. Etu tu kuete esumũlũho lialua omo lioku kũlĩha Yehova kuenda oku kuata ukamba laye. Esumũlũho liaco, li tu vetiya oku amamako oku u sivaya lutima wosi.
[Elitalatu kemẽla 31]
Ovilinga via Yehova vi komõhisa
[Elitalatu kemẽla 32]
Ovisimĩlo via Yehova ‘via lua okuti, eseke li sule’