“Eteke Lioku Sola, Kuenda Eteke Lioku Suvuka”
“SUKU eye ocisola.” Kolofeka vimue, omanu va siata oku soneha vovimano violonjo viavo olondaka evi. Olondaka viaco vi situlula ekalo lia Suku ono yocisola.
Omanu valua ka va kũlĩhĩle okuti olondaka evi via tunda Vembimbiliya. Upostolo Yoano eye wa soneha olondaka viaco eci a popia hati: “U ka soli ka kũlĩhile Suku, momo Suku eye ocisola.” (1 Yoano 4:8) Yoano wa sonehavo catiamẽla kocisola Suku a kuetele omanu hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.”—Yoano 3:16.
Omo liolondaka evi, omanu valua va sima okuti Suku ka kapeleko ovina viosi tu linga. Omanu ndomo va ambata omuenyo wavo va sima okuti, lalimue eteke va pisiwa la Suku, ci kale okuti va kuete ovituwa viwa ale vĩvi. Anga hẽ ovisimĩlo evi viocili? Suku o sole muẽle omanu vosi ci kale olondingesunga kuenda olondingaĩvi? Anga hẽ Suku o kuete otembo yoku suvuka?
Ocisola ca Suku Kuenda Esuvu
Soma Salomone wa popia hati: “Ovina viosi vi kuete uvo wavio, ovina viosi vemẽhi lilu. . . . Eteke lioku sola, kuenda eteke lioku suvuka.” (Ukundi 3:1, 8) Ndomo ca lekisiwa vonumbi eyi, Suku ndaño okuti ukuacisola haeye ukuahenda, o kuete otembo yoku suvuka.
Nye ci lomboloka ondaka oku “suvuka” ndomo ya tukuiwa Vembimbiliya? Elivulu limue li popia hati: “Vovisonehua ondaka oku “suvuka” yi kuete alomboloko alua. Olonjanja vimue yi lomboloka ukuse u kuamiwa lonyeño. Esuvu liaco, li pondola oku kala onjongole yoku sandiliya oku linga cĩvi omunu waco wa suvukiwa.” Eli olio elomboloko tua kũlĩha ciwa, kuenda tu lete ovilinga viesuvu liaco kolonepa viosi violuali. Pole, elivulu liaco liamisako hati: “‘oku suvuka’ ku lombolokavo oku sepula ocina cimue, pole halonjongoleko yoku ci nyõla.”
Elomboloko eli liavali, olio tu konomuisa vocipama cilo. Esuvu li lomboloka oku nyala, loku sepula ocina cimue, pole, ka lilomboloka oku linga eci cĩvi, ale onjongole yoku yambula. Anga hẽ, Suku o pondola oku lekisa esuvu liaco? Kũlĩhĩsa olondaka vi sangiwa kelivulu Liolosapo 6:16-19, vi popia hati: “Kuli ovina epandu Yehova a suvuka, epanduvali muẽle a nyale, vievi: Ovaso epela, elimi liuhembi, ovaka a pesela osonde yu we lipua, utima u sokolola ovipango vĩvi, olomãi vi yolokela kevĩho, ombangi yesanda yi popia uhembi, kuenda u o sanomõla ovama pokati kava va situe.”
Ndomo tua ci mola, kuli ovituwa vimue Suku a suvuka. Pole, ka suvukile omunu o linga ovina viaco vĩvi. Eye o kũlĩhĩsa ovina vimue ndeci: ekalo liomunu waco, ehonguo lietimba, ocitumãlo a kasi, ovituwa viepata a kulila, kuenda ukũlĩhĩso a kuete. (Efetikilo 8:21; Va Roma 5:12) Usonehi welivulu Liolosapo poku lombolola ondaka yaco, wa eca ocindekaise cimue eci a popia hati: “Yehova o pokuisa u a sole, ndeci ci lingainga onjali lomõlaye a sanjukila.” (Olosapo 3:12) Ovilinga vĩvi viomõla citava okuti vi suvukiwa, pole omo okuti onjali yi sole omõlaye yi likolisilako oku u kuatisa poku u pindisa oco a siepo ovilinga vĩvi. Cimuamue haico Yehova a linga lomunu ukuakandu. Eye omo liocisola caye o sandiliya olonjila vioku kuatisa omunu waco nda kuli elavoko liokuti o pondola oku pongoloka.
Ceci ku Sukiliwa Esuvu
Nye ci popiwa nda omunu umue wa kũlĩha ocipango ca Suku, pole o likala oku ci linga? Omunu waco, ka sangi ohenda ya Suku loku tambula ocisola caye. Nda eye locipango o linga ovina Yehova a nyale, o suvukiwa Laye. Embimbiliya li popia hati: “Yehova o seteka vakuesunga kuenda vakuakandu. Utima waye u suvuka u o sole ungangala.” (Osamo 11:5) Omanu vaco, nda ka va likekembela ka va eceliwa, ndeci upostolo Paulu a ci lombolola vukanda a sonehela va Heveru hati: “Nda kovaso yoku kũlĩha onjila yocili tu linga vali akandu locipango, ka ku kala vali ocilumba cimula akandu. Ku kala lika elavoko li linga usumba lioku pisiwa, kuenda onyeño yi lia ovanyali va Suku ndondalu.” (Va Heveru 10:26, 27) Momo lie Suku yocisola a nõlelapo onjila yaco?
Eci omunu a linga ekandu locipango, evĩho li kakatela omunu waco okuti lacimue ci tẽla oku u tepa lalio. Eye o pondola oku vĩhisua, loku tindila vutima, okuti ka tẽliwa oku pongoluiwa. Embimbiliya li sokisa omunu waco ndongue ka yi tẽla oku pongolola avala ayo. (Yeremiya 13:23) Omo okuti, omunu waco ka likekembela, o linga cina Embimbiliya li tukula hati, “ekandu ka li pui,” okuti ka li kuete ongecelo.—Marko 3:29.
Eci oco ca pita la Adama la Heva kuenda Yuda Isikariote. Omo okuti, Adama la Heva va lulikiwa okuti va lipua kuenda ocihandeleko ca Suku kokuavo ca va lombolokele ciwa, ekandu liavo lia kala liocipango kuenda ka lia kuatele esunga. Suku ka va ĩhile vali epuluvi lioku likekembela. (Efetikilo 3:16-24) Yuda ndaño okuti ka li puile, wa kuatele ukamba uwa Lomõla a Suku, pole, noke wa linga omakuli. Yesu wo tukula hati, “omõla enyõleho.” (Yoano 17:12) Embimbiliya li lekisavo okuti, Eliapu lia siata oku linga akandu tunde kefetikilo, kuenda li lavoka oku nyõliwa. (1 Yoano 3:8; Esituluilo 12:12) Vosi va tukuiwa ndeti, va suvukiwa la Suku.
Ci sanjuisa calua oku kũlĩha okuti, havosiko va siata oku linga akandu vana ka va eceliwa. Yehova ukuepandi kuenda ka sanjukila oku yambula vana va linga ekandu omo liekambo liukũlĩhĩso. (Esekiele 33:11) Eye o laleka omanu vaco oco va likekembele okuti va eceliwa. Ondaka yaye yi popia hati: “Ukuakulinga cĩvi a sie ocituwa caye, u ka lingi esunga a liweke ovisimĩlo viaye, a tiukile ku Yehova, kuenje u linga ohenda, ku Suku yetu kuenje o wecela ca lua.”—Isaya 55:7.
Ocisimĩlo ca Sunguluka Catiamẽla Kocisola Kuenda Kesuvu
Akristão vocili omo okuti vakuakusetukula Suku, va sukila oku kũlĩha ‘otembo yoku sola, kuenda otembo yoku suvuka.’ Ocikembe, ci pondola oku nyõla ovisimĩlo via sunguluka viomunu viatiamẽla kocisola kuenda kohenda. Pole, olondaka viondonge Yuda vi tu kuatisa oku kũlĩha ndomo tu lekisa ohenda lesuvu. Eye wa popia hati: “Kuateli vamue ohenda lohele, loku suvuka uwalo wa vĩhisua lakandu etimba.” (Yuda 22, 23) Etu tu sukila oku suvuka ovina vĩvi, pole, ka tu suvuka omunu o linga ovina viaco.
Akristão va vetiyiwavo oku lekisa ocisola kovanyali vavo poku va lingila ovina viwa. Yesu wa popia hati: “Soli ovanyali vene, likutilili ava vo fũkĩlisa.” (Mateo 5:44) Eli olio esunga lieci Olombangi Via Yehova ka vi liwekelapo oku kunda olondaka viwa Viusoma wa Suku komanu, ndaño vamue ka va tava kesapulo liaco. (Mateo 24:14) Olombangi Via Yehova omo lioku kapako ocisimĩlo Cembimbiliya catiamẽla kondaka eyi, va tenda omanu vosi okuti va pondola oku kuatisiwa locisola ca Yehova kuenda ohenda yaye. Nda omanu ka va kapiko alikolisilo avo oku va kuatisa, kuenda ka va tava kesapulo liaco, ale va va lambalala, Olombangi Via Yehova vi kuama elungulo liupostolo Paulu wa popia hati: “Likutilili ava vo siliñinya, ko ka va siñali, te oku va likutilila. Ko ka fetuluinyi umue cĩvi leci cĩvi.” (Va Roma 12:14, 17) Ovo va kũlĩha okuti Yehova eye o kuete omoko yoku nõla omunu o sesamẽla ocisola caye kuenda una o sesamẽla oku suvukiwa laye. Catiamẽla komuenyo kuenda oku fa, Yehova eye Onganji ya Velapo.—Va Heveru 10:30.
Ocili okuti, “Suku eye ocisola.” Omo liaco, tu sukila oku lekisa olopandu omo liocisola caye loku likolisilako oku kũlĩha ocipango caye kuenda oku ci linga. Olombangi via Yehova pocitumãlo cove vi ka ku kuatisa Lembimbiliya oku kũlĩha ocipango ca Suku kuenda ndomo o pondola oku ci kapako komuenyo wove. Nda wa ci linga, o ka yuvula esuvu lia Suku kuenje o ka kuatisiwa locisola caye.
[Elomboluilo lielitalatu kemẽla 13]
“Ku li ovina epandu Yehova a suvuka, epanduvali muẽle a nyale, vievi: Ovaso epela, elimi liuhembi, ovaka a pesela osonde yu we lipua, utima u sokolola ovipango vĩvi, olomãi vi yolokela kevĩho, ombangi yesanda yi popia uhembi, kuenda u o sanomõla ovama pokati kava va situe.”—OLOSAPO 6:16-19
[Elomboluilo lielitalatu kemẽla 14]
“Nda kovaso yoku kũlĩha onjila yocili tu linga vali akandu locipango, ka ku kala vali ocilumba cimula akandu. Ku kala lika elavoko li linga usumba lioku pisiwa, kuenda onyeño yi lia ovanyali va Suku ndondalu.”—VA HEVERU 10:26, 27
[Elomboluilo lielitalatu kemẽla 14]
Onjali yosi ukuacisola o longa omõlaye oco o kuatise
[Elomboluilo lielitalatu kemẽla 15]
“Ukuakulinga cĩvi a sie ocituwa caye, u ka lingi esunga a liweke ovisimĩlo viaye, a tiukile ku Yehova, kuenje u linga ohenda, . . . kuenje o wecela ca lua.”—ISAYA 55:7
[Elomboluilo lielitalatu kemẽla 15]
Omanu valua volokayike va siata oku kuatisiwa locisola ca Suku kuenda ohenda yaye