Lava Oku Longisa Kuove Olonjanja Viosi

“Lilava ove muẽle. Lavavo okulongisa kuove. Pandikisa lovina evi, omo, nda o ci linga o lipopela ove muẽle o popelavo ava va ku yeva.”−1 TIMOTEO 4:16.

1, 2.Momo lie alongisi vakuambili vasukiliwila oloneke vilo?

“KUENDI, ka tavisi olofeka viosi oco va linge olondonge. . . . Va longisi oku linga ovina viosi ndo kundiki.” (Mateo 28:19, 20) Omo liocihandeleko eci ca Yesu Kristu, Akristão vosi te valikolisilako oku kala alongisi. Alongisi vakuambili vasukiliwa oco vakuatise vakuotima wasunguluka okuiya kukulihiso wa Suku, osimbu handi kuli otembo. (Yoano 17:3; Va Roma 13:11) Upostolo Paulu wavetiya hati: “Kunda ondaka. Kolisako, ndaño kotembo yaco, ndaño hakotembo yacoko.” Evetiyo eli liokulongisa likapiwako, cikale vokati ale kosamua yekongelo. Ocili okuti, vocikundi cokukunda mukongela calua, hokusapulako lika ondaka ya Suku. Cisukila ulongisi umue waloñoloha nda ukuanjongole iya okala ondonge.

² Etu tukasi “[k]otembo yohali.” (2 Timoteo 3:1) Omanu vasiata okusindiliyiwa kuloño woluali kuenda kalongiso esanda. Valua okuti “olondunge viavo vikasi vo welema.” kuenje “vatilisiwa ovitima” viavo. (Va Efeso 4:18, 19) Vamue vakuete apute esumuo kutima. Ocili muẽle omanu “va pekengua kuenda va sakalaisua ndolomeme ka vi kuete ungombo.” (Mateo 9:36) Pole ndaño ndoco, nda tuamisako uloño wetu wokulongisa, citava okuti tukuatisa vakuotima wasunguluka oku linga apongoloko asukiliwa.

Alongisi Vokati Kekongelo

3. (a) Vocikundi cokulongisa Yesu asia mukongela nye? (b) Helie tete okuete ocikele cokulongisa vokati kekongelo?

³ Pokati keliangiliyo lielilongiso Liembimbiliya konjo, olohulukãi vialua vikasi okulongisiwa. Pole noke yepapatiso liavo, handi Lopo vasukila ekuatiso likuavo oco ‘vatuamele kuenda okusevetiwa.’ (Va Efeso 3:17) Osimbu tutẽlisa ocikundi Yesu asia casonehiwa kelivulu lia Mateo 28:19, 20 kuenda tusindikila ava vafetika ndopo kocisoko ca Yehova, ovo vakopa ekuatiso kelongiso likasi okulongisiwa vokati kekongelo. Ndomo casonehiwa ko Va Efeso 4:11–13, alume vaihiwa ocikele cokukala ‘angombo kuenda alongisi. Calingiwila oku kolisa olosandu havilingi upange woku longisa loku tunga etimba lia Kristu.’ Olonjanja vimue, uloño wavo wokulongisa ukongela ‘okutamalala lava va . . . pengisa [ondaka]. Okulemela, okulungula kuenda ka va tepuluka kepandi.’ (2 Timoteo 4:2) Upange walongisi wakala lesilivilo liocili okuti pokusonehela va Korindo, Paulu noke yokutukula ovapostolo lovaprofeto haico atukula alongisi.−1 Va Korindo 12:28.

4. Uloño wokulongisa wutukuatisa ndati okupokola kelungulo lia Paulu liasonehiwa ko Va Heveru 10:24, 25?

⁴ Ocili okuti, Akristão havosiko vatalavaya ndakulu vekongelo, ale ndolomitavaso. Pole, vosi vasiata okuvetiyiwa oco valivetiye pokati “oku kala locisola lovilinga viwa.” (Va Heveru 10:24, 25) Okucilinga volohongele, cisukila okulipongiya ciwa, kuenda okueca atambululo asunguluka okuti akolisa kuenda avetiya vakuetu. Akundi Vusoma valoñolohapo vali citava okuti ‘vavetiya ovilinga viwa’ lokusapula ukulihiso wavo kuenda eloñoloho liavo kuava vafetika ndopo eci vatalavayela kumosi lavo vupange wokukunda. Kapuluvi aco kuenda kotembo yimue yiñi, elongiso lisilivila citava okuti lisapuiwavo. Ndeci, akãi vana okuti akulu vasiata okuvetiyiwa oco vakale “alongisi vovina viwa.”−Tito 2:3.

Okuvetiyiwa Okutava

5, 6. (a) Etavo lia Kristão vocili lialitepa ndati lefendelo liesanda? (b) Akulu vekongelo vakuatisa ndati ava vafetika ndopo, okunõla lolondunge eci valinga?

⁵ Etavo Liakristão vocili, lialitepa calua latavo esanda, valua pokati kavo vasandiliya okupokuisa ovisimilo vio vimatamata vietavo liavo. Eci Yesu akala kulo kilu lieve, asongui vetavo vaenda lokulavulula olonepa viosi viomuenyo womanu lokuvasiliha ovisila viatila viasokiyiwa lomanu. (Luka 11:46) Asongui vetavo Liakristão vesanda vasiata okulingavo cimuamue.

⁶ Puãi, efendelo liocili, ‘upange ukola’ okuti ulingiwa “lolondunge, [NW].” (Va Roma 12:1) Ava va vumba Yehova va “vetiyiwa okutava, [NM].” (2 Timoteo 3:14) Olonjanja vimue, vana vapita kovaso vayeva ekisika liokueca vimue olonumbi kuenda ovikundi oco ovina viosi vekongelo vilingiwe lombembua. Pole akulu vekongelo kavanõlelako vakuavo Akristão, puãi va valongisa “oku tepisa pokati keci ciwa leci civi.” (Va Heveru 5:14) Akulu vekongelo vacilinga tete lokutekula ekongelo ‘lolondaka viekolelo kumosi lelongiso liwa.’−1 Timoteo 4:6.

Lava Okulongisa Kuove

7, 8. (a) Omanu vakuete ño uloño wasokamo vatẽla ndati okukala alongisi? (b) Nye cilekisa okuti cisukila elikolisilo liocili oco omunu akale ulongisi waloñoloha?

⁷ Puãi, tutiukili kocikundi cetu cokulongisa. Cisukila uloño umue ulikasi, elongiso limue liapiãla, ale eloñoloho lialua oco tukuate onepa kupange owu? Sio. Onepa yalua yupange owu wokulongisa, voluali luosi, ukasi lokulingiwa lomanu vaño, vakuete ño uloño wasokamo. (1 Va Korindo 1:26–29) Paulu walombolola hati: “Ukuasi ulo [upange wokukunda] . . . , tu kasi lawo volombia viotuma [atimba ka alipuile], oku lekisa okuti unene wa piãla wa Suku, hawetuko.” (2 Va Korindo 4:7) Asuliyo alua awa upange wokukunda Usoma voluali luosi usole okukuata, aeca uvangi wekuatiso liongusu yespiritu lia Yehova!

⁸ Pole, eci cisukila okulikolisilako kuetu omunu lomunu oco tukale “ndondingupange ka yi kuete eci ci yi kutisa osõi, haiyo yi kunda lesunga ondaka yocili.” (2 Timoteo 2:15) Paulu wavetiya Timoteo hati: “Lilava ove muẽle. Lavavo okulongisa kuove. Pandikisa lovina evi, omo, nda o ci linga, o lipopela ove muẽle, o popelavo ava va ku yeva.” (1 Timoteo 4:16) Ndamupi omunu a lava okulongisa kuaye, cikale vokati ale kosamua yekongelo? Okucilinga cisukila okukuata uloño umue ale ukulihiso wokulongisa?

9. Nye cavelapo vali okuti okukuata eloñoloho cisule?

⁹ Yesu wa lekisa uloño umue ukomõhisa wokulongisa Kohundo yo Komunda. Eci eye a mala okuvangula, “owiñi womanu wa komoha okulongisa kuaye.” (Mateo 7:28) Ocili okuti, lomue pokati ketu opondola okulongisa calua ciwa ndeci Yesu alinga. Puãi, oco tukale alongisi vawa kacisukila okuti tukala olohundi vieyuka owanji walua. Momo, ndomo casonehiwa kelivulu lia Yovi 12:7, ndaño muẽle ‘ovinyama’ ale ‘olonjila’ citava okuti vilongisa lokuha! Cavelapo vali okuti okukuata eloñoloho ale elunguko cisule, okukulihisa okuti “tuatuwa ndati, [NW]−ocituwa cipi tukuete kuenda ekalo lipi liespiritu tukuete okuti olondonge viupako ongangu.−2 Petulu 3:11, Luka 6:40.

Vakuakulilongisa Ondaka ya Suku

10. Yesu walekisa ndati ongangu yiwa yokulilongisa Ondaka ya Suku?

¹⁰ Ulongisi wocili Covisonehua te walinga ukuakulilongisa Ondaka ya Suku. (Va Roma 2:21) Yesu Kristu waeca ongangu yikomõhisa konepa eyi. Vokuenda kupange waye wokukunda, Yesu watukula kuenda walombolola alongiso alienda leci cisoka onepa yalivulu Ovisonehua via va Heveru.a Okukuliha kuaye ciwa Ondaka ya Suku kuamuiwa eci akala lanyamo 12, eci asangiwa okuti “wa tumala pokati kalongisi oku va yevelela loku va pula pula.” (Luka 2:46) Eci alinga ukulu, Yesu wakala locituwa cokuendaenda vosunangonga, omu vaenda lokutangela Ondaka ya Suku.−Luka 4:16.

11. Ocituwa cipi cokulilongisa ulongisi uwa asukila okulikolisilako okukuata?

¹¹ Anga hẽ ove ukuambili kokutanga Ondaka ya Suku? Lokufẽla muẽle toke kosi oco “o kuliha oku sumbila Yehova, kuenje o sanga ukulihiso wa Suku.” (Olosapo 2:4, 5) Omo liaco kala locituwa ciwa cokulilongisa. Seteka okutanga ovinimbu vimue Viondaka ya Suku eteke leteke. (Osamo 1:2) Cikale ocituwa cove okutanga etendelo letendelo liu Utala Wondavululi lo Despertai! vonjanja yaco muẽle eci ovitambula. Eci enda kolohongele viekongelo yevelela lutate. Lilongisa okukulihisa lutate Ovisonehua lekuatiso lialivulu akuavo. Nda walilongisa oku “kulihisa ovina viosi lutate,” okayuvula okumamõha ale okulueya eci olongisa.−Luka 1:3.

Ocisola Kuenda Esumbilo la Vana Vakasi Okulongisiwa

12. Ekalo lipi liakala pokati ka Yesu lolondonge viaye?

¹² Ocituwa cikuavo cikuete esilivilo liocili okusunguluka la vana okasi okulongisa. Va Fariseo Vanda lokusepula ava vayevalaele Yesu. Vapopaile hati “Owiñi [ow]u ka wa kulihile ovihandeleko, wa siñaliwa.” (Yoano 7:49) Pole Yesu wakala locisola calua kuenda esumbilo lolondonge viaye. Eye wapopia hati: “Siu tukuli vali akuenje, momo ukuenje ka kulihile eci ñala yaye a lingainga, puãi ndo tukuli akamba, momo ndo sapuili ovina viosi nda yeva ku Tate.” (Yoano 15:15) Eci calekisa ndomo olondonge via Yesu visukila okulingavo upange wavo wokulongisa.

13. Paulu waenda lokuliyeva ndati kueci catiamẽla ku vana eye a longisa?

¹³ Ndeci, Paulu kandaile lokulekisa ekalo limue lienyumãlo lolondonge viaye. Eye wapopisa va Korindo hati: “Ndaño wu kasi lohuluwa yovalongisi vu Kristu, haimo . . . , vaisiene ka va luile. Ame nda linga isiene vu Kristu Yesu eci ndo yevisi ondaka yiwa.” (1 Va Korindo 4:15) Olonjanja vimue, Paulu toke muẽle waenda lokulola asuelẽla pokulungula vana eye a longisa! (Ovilinga 20:31) Eye layevo walekasaile epandi likomõhisa lohenda. Omo liaco, eye watẽla okupopisa va Tesalonike hati: “Tuombokele pokati kene ndeci cilelamãla a lela omãla vaye.”−1 Va Tesalonike 2:7.

14. Momo lie onjongole yocili tulekisa kolondonge vietu tukasi okulongisa Embimbiliya yikuetele esilivilo liocili? Cilombolola.

¹⁴ Ove wasiata okusetukula Yesu la Paulu? Onjongole yocili tulekisa kolondonge vietu yipondola okupitãhala ekambo liosi tukuete keloñoloho lietu. Anga hẽ olondonge vietu tukasi okulongisa Embimbiliya vilimbuka okuti tuvayonguila uwa? Tuasiata okulimuisa epuluvi liokupula ndomo vakasi? Eci Ukristão umue ukãi akala lekatanga liokukuatisa yimue ondonge yukãi okuamako kespiritu, eye lumbombe walua wapula hati: “Kuli cimue kacikasi ciwa love?” Ukãi wafetika okupa cosi cakala vutima waye, lokulombolola akatanga lasakalalo akahandangalala. Ombangulo yaco yocisola yaeca evetiyo kukãi. Konepa eyi ovilembeleko lekoliso citava okuti vieciwa. (Va Roma 15:4) Haimo, tusukila ondaka yimue yelungulo: Yimue ondonge yikasi okulilongisa Embimbiliya citava okuti yamamako lonjanga, pole, pamue handi yikuete vimue ovilinga haviakristãoko asukila okusiapo. Omo liaco halondungeko okulivala ukamba walua lomunu waco. Ulilo Wukristão te wakuamiwa.−1 Va Korindo 15:33.

15. Ndamupi tulekisa esumbilo kolondonge vietu tukasi okulongisa Embimbiliya?

¹⁵ Vokusumbila olondonge vietu mukongela okuti katuseteka okulava ovimuenyo viavo. (1 Va Tesalonike 4:11) Ndeci, pamue tukasi okulongisa ukãi umue okasi pamosi lulume umue pole kavatokekisile olohuela viavo. Pamue ovo vakuete omãla. Omo okuti wapitila ale kukulihiso wasuapo wa Suku, ukãi waco pamue oyongola okutetulula ondaka yaco lokukuama ovihandeleko via Yehova. (Va Heveru 13:4) Olikuela lulume waco ale usiapo? Etu pamue tulekisa okuti okukuela ulume umue okuti olekisa onjongole yitito ale kalekisa layimue onjongole kovina viespiritu cikatateka okuamamako kuaye kovaso. Ale, omo liohele yokuti omãla vaye ka va kakala ciwa mbi hise okuti eye olikuelaño laye. Eci hesumbiloko kuenda hakulekisako ocisola okulikapa vomuenyo wo ndonge loku seteka okusindiliya ovisimilo vietu kondaka eyi. Kesulilo liovina viosi, eye, te eye muẽle oliyaka lovitangi viyilila kokunõla kuaye. Omo liaco ha hiseko hẽ okulongisa ondonge yaco okukuama “olondunge” viaye okuti otẽla okunõla eye muẽle eci alinga?−Va Heveru 5:14.

16. Akulu vekongelo valekisa ndati ocisola lesumbilo kolomeme via Suku?

¹⁶ Capiãla vali enene akulu vekongelo, vasukila okutata olomeme locisola kuenda esumbilo. Pokusonehela Filemone, Paulu wapopia hati: “Ndaño vu Kristu ñuete utõi woku ku handeleka okuti o linga eci ca sesamela, haimo, omo tua kolela ocisola, oco nda nolapo oku ku livondela.” (Filemone 8, 9) Olonjanja vimue, vekongelo pamue muiya vimue ovitangi. Cisukila utõi okuvitetulula. Paulu wavetiya Tito hati, “veta evelo liapiãla [vakuakulueya], okuti vakuata etavo liocili.” (Tito 1:13) Puãi Lopo, olomitavaso visukila okukuata utate okuti lalimue eteke va vangula kekongelo lekambo liumbombe. “Okuyaka ka kua sungulukilile ukuenje wa Ñala,” oco casoneha Paulu, “te oku omboka la vosi, loku linga ulongisi uwa, loku pandikisa la vakualonamalala.”−2 Timoteo 2:24; Osamo 141:3.

17. Nye Mose alueyele, kuenda elongiso lipi akulu vekongelo vasukila okupako?

¹⁷ Olomitavaso otembo yosi te via ivaluka okuti ovo asongui “[v]ocunda ca Suku.” (1 Petulu 5:2) Mose, ndaño wakala embombe, vokatembo kaño wasiapo ekalo liaco eli. Va Isareli “vo wengula kutima, eye yu wa popia eci ca tatama.” (Osamo 106:33) Suku kasolele okutata ndoco lãvi olomeme Viaye, ndaño wakulihile okuti ovo vakalavo lekandu. (Atendelo 20:2–12) Eci tupita lovitangi ndevi oloneke vilo, akulu vekongelo te valikolisilako okulongisa luloño kuenda lumbombe. Vamanjetu vapokola vali ciwa nda va tatiwa lesumbilo ndomanu vasukila ekuatiso, handomanuko vasina. Akulu vekongelo vasukila okukala lovisimilo viasunguluka ndevi Paulu akala lavio eci apopia hati: “Tua kolela Ñala okuti vu kasi ale loku linga ovina tuo sapuili, kuenje vu vi lingainga.”−2 Va Tesalonike 3:4.

Okutambuluiya Asukila Avo

18, 19. (a) Tusukila okutambuluiya ndati asukila olondonge Viembimbiliya vina okuti eloñoloho liavo litito? (b) Tupondola okukuatisa ndati olondonge vina okuti vikueteño atãtãhai kovipama vimue?

¹⁸ Ulongisi uwa otava okutiamisila elongiso liaye keloñoloho kuenda apa pasulila elomboloko liondonge yaye. (Cisokisa la Yoano 16:12.) Volusapo lua Yesu luolokondu, ulongisi waeca ovopange “u ndeci a tẽla, u ndeci a tẽla.” (Mateo 25:15) Etu tusukila okukuamavo ongangu eyi eci tusongola alilongiso Embimbiliya. Pole, ciwa okuti tumãla elivulu liatiamẽla Vembimbilya votembo yimue yitito. Eci te catava, ndaño okuti havosiko valoñoloha ciwa kokutanga kuenda kokukuata lonjanga elomboloko liovisimilo viokaliye. Pole, cisukila okukulihisa ciwa osimbu handi katualombokelele kondaka yikuavo velilongiso pamue umue okuete ekatanga liokukuama ongendo yonjanga. Cavelapo vali hakumalako lika ovipama vielilongiso votembo yasokiyiwa, puãi okukuatisa olondonge okukuata elomboloko lieci vakasi okulilongisa.−Mateo 13:51.

¹⁹ Cimuamue haico cipopiwa, catiamẽla kolondonge vikasi okulilongisa Embimbiliya okuti vikuete atãtãhai kovipama vimue, ndeci viatiamẽla kondotilina Yutatusandu ale vievi viatiamẽla kovipito viatavo. Ndaño okuti olonjanja vialua kacisukila okukongela valilongiso etu ovipama Viembimbiliya tuakulihisa valivulu akuavo, olonjanja vimue citava okuti tucilinga nda okuti cikakuatisa olondonge okukuata elomboloko. Cisukila okukulihisa ciwa lutate ondaka eyi oco tuyuvule okutateka okuamako kuondonge.

Kala Ukuesanju!

20. Paulu waeca ndati ongangu yiwa yokulekisa esanju kuenda ekolelo kokulongisa kuaye?

²⁰ “Kuati owuya we Espiritu,” oco capopia Paulu. (Va Roma 12:11) Oco muẽle, cikale eci tusongola elilongiso Liembimbiliya konjo ale ceci tulinga onepa yimue volohongele viekongelo, tusukila okucilinga lombili kuenda esanju. Paulu wapopisa va Tesalonike hati: “Ondaka yiwa tuo kundili ka yeyile kokuene loku popiwa lomẽla lika, puãi yeyavo longusu, le Espiritu Sandu, kuenda lekolelo lia lua.” (1 Va Tesalonike 1:5) Paulu lakamba vaye kavaeceleño lika “ondaka yiwa ya Suku, puãi . . . lovimuenyo [viavo]le.”−1 Va Tesalonike 2:8.

21. Tupondola okukuamẽlela ndati lokulekisa esanju kocikele cetu cokulongisa?

²¹ Esanju liocili litunda kokukuata ekolelo liokuti eci tulaika okupopia oco olondonge vietu Viembimbiliya visukila okuyeva. Lalimue eteke katukatendi ocikele cetu cokulongisa ndocina cimue tuaka ale okulinga. Kondaka eyi, usonehi Esera walavulula lutate okulongisa kuaye. Eye ‘walitumbikile ocili kokulongisa ondaka ya Suku loku yi pokola loku longisa va Isareli.’ (Esera 7:10) Etu tusukila okulingavo ndoco, lokulipongiya ciwa kuenda lokukulihisa ciwa esilivilo liocipama tukasi okulilongisa. Tulikutilila ku Yehova oco atuvokiyeko ekolelo kuenda utõi. (Luka 17:5) Esanju lietu citava okuti likuatisa olondonge tukasi okulongisa Embimbiliya okusola ocili. Ocili okuti, okulava okulongisa kuetu kukongela okukuama ovoloño amue okulongisa. Ocipama cetu cikakuamamo cikalombolola amue pokati kovoloño aco.

Ove Ocivaluka?

◻ Momo lie alongisi Akristão valoñoloha vasukiliwila calua oloneke vilo?

◻ Ovituwa vipi viwa viokulilongisa tusukila okukuata?

◻ Momo lie ocisola kuenda esumbilo la vana tukasi okulongisa vikuetele esilivilo liocili?

◻ Tutambuluiya ndati asukila olondonge vietu tukasi okulongisa Embimbiliya?

◻ Momo lie esanju kuenda ekolelo vikuetele esilivilo liocili eci tulongisa vakuetu?

[Elitalatu kemela 8]

Alongisi vawa vana okuti ovo muẽle valilongisa Ondaka ya Suku

[Elitalatu kemela 8]

Lekisa onjongole yocili kolondonge vikasi okulilongisa Embimbiliya