Nye O Sukila Oku Linga Oco O Kuate Omuenyo Ko Pui?

“Nye omunu a pondola oku linga oco a popele omuenyo waye?”​—⁠MAT. 16:​26, NW.

1. Momo lie Yesu ka tavelele kolondaka Petulu o sapuila?

UPOSTOLO PETULU ka tavele kolondaka a yeva. Yesu Kristu Usongui waye, wa popia ‘lutõi’ hati, ndopo O ka talisiwa ohali kuenda oka fa! Petulu poku tambulula wa sapuila Yesu hati: “A Ñala! . . . Eci ka ci keya kokuove.” Yesu wa imba onyima Petulu, kuenje wa imba ovaso kolondonge vikuavo. Olondonge via kuata ovisimĩlo via litepa. Kuenje, Yesu wa sapuila Petulu hati: “A Satana, pita konyima yange. Ove wa ndingila ocilondokua momo ovisimĩlo viove havia Sukuko, viomanu.”​—⁠Mar. 8:​32, 33; Mat. 16:​21-23.

2. Ovina vipi Yesu a tukula okuti ovio omunu a sukila oku tẽlisa oco a linge ondonge yocili?

² Olondaka vi kuãimo, via kuatisa Petulu oku limbuka esunga lieci Yesu ka tavelele kovisimĩlo viaye. Yesu wa “pañinya owiñi kumue lolondonge viaye,” kuenje wa popia hati: “Umue, nda o yongola oku ñuama, ka ka litende vali eye muẽle, a tikule [uti] waye a ñuame. Momo u o seteka oku popela omuenyo waye u pesela ño; u o mesila ame londaka yiwa omuenyo waye, u popela.” (Mar. 8:​34, 35) Yesu wa eca omuenyo waye ndocilumba, kuenda wa lekisa okuti, vana va yongola oku u kuama, va sukila oku lieca lutima wosi kupange wa Suku. Nda va ci linga, va tambula asumũlũho alua.​—⁠Tanga Mateo 16:⁠27.

3. (a) Apulilo api Yesu a linga kolonjeveleli viaye? (b) Epulilo liavali Yesu a linga, lia ivaluisa nye kolonjeveleli viaye?

³ Vepuluvi liaco, Yesu wa linga apulilo avali a kuete esilivilo poku popia hati: “Ci kuatisa ndati omunu, nda o nganyala oluali luosi kuenje o takisa omuenyo waye?” Kuenda ‘nye omunu a pondola oku linga oco a popele omuenyo waye?’ (Mar. 8:​36, 37) Omunu lomunu o pondola oku eca etambululo kepulilo liatete. Nda omunu o nganyala oluali luosi kuenje o takisa omuenyo waye, ka tambula onima yiwa. Momo omunu o sanjukila lika ovokuasi otembo a kasi lomuenyo. Yesu wa linga epulilo liavali hati: ‘Nye omunu a pondola oku linga oco a popele omuenyo waye?’ Epulilo eli, lia ivaluisa olonjeveleli viaye olondaka Satana a popele koloneke via Yovi hati: “Cosi omunu a kasi laco o ci ecela omuenyo waye.” (Yovi 2:⁠4) Komanu vana ka va fendela Yehova, olondaka via Satana viocili. Vamue, va siata oku lueya olonumbi via Suku oco va seteke oku popela omuenyo wavo. Pole, Akristão va kuete ovisimĩlo via litepa.

4. Momo lie apulilo Yesu a linga a kuetele esilivilo Kakristão?

⁴ Tua kũlĩha okuti, Yesu keyilile palo posi oco a tu ĩhe uhayele, ukuasi, kuenda omuenyo ko pui voluali lulo lua vĩha. Pole, weyilila oku yulula onjila yoku kuata omuenyo ko pui voluali luokaliye. Kuenje, elavoko liaco, li kuete esilivilo liavelapo. (Yoa. 3:​16) Ukristão o pondola oku kuata elomboloko liepulilo Yesu a linga poku popia hati: “Ci kuatisa ndati omunu, nda o nganyala oluali luosi kuenje o takisa omuenyo waye?” Ocili okuti, ka ci kuatisa. (1 Yoa. 2:​15-​17) Oco tu tambulule epulilo liavali Yesu a linga, tu sukila oku li pula ndoco: ‘Nye ndi sukila oku linga oco ndi kuate elavoko liomuenyo ko pui voluali luokaliye?’ Ekalo liomuenyo wetu, olio li eca etambululo kepulilo eli, oco tu pamise elavoko lietu.​—⁠Sokisa lelivulu lia Yoano 12:⁠25.

5. Tu pondola ndati oku tambula ombanjaile yomuenyo ko pui?

⁵ Yesu ka popele hati, omunu o sesamẽla omuenyo ko pui. Momo omuenyo tu kuete voluali lulo, ombanjaile yimue tua tambula. Ka tu pondola oku sandiliya omuenyo waco. Pole, tu pondola lika oku tambula ombanjaile yomuenyo ko pui, nda tua “kolela Yesu Kristu,” la Yehova una wa siata oku “eca onima kuava vo sanda.” (Va Gal. 2:16; Va Hev. 11:⁠6) Pole, tu sukila oku lekisa ekolelo kovilinga vietu, momo “ekolelo ka li kuete ovilinga laliovo lia fa.” (Tia. 2:​26) Epulilo lia Yesu, li tu kuatisa oku kũlĩhĩsa ndomo tu pondola oku puluka voluali lulo. Kuenda li tu kuatisavo oku limbuka ovina tu sukila oku linga kupange wa Yehova, oco tu lekise okuti, tu kuete ekolelo liocili.

“Kristu ka Lisokoluile Eye Muẽle”

6. Ovina vipi Yesu a velisilepo?

⁶ Yesu ka velisilepo ovina violuali koloneke viaye. Pole, wa pitisile kovaso ovina vi kuete esilivilo kuenda wa yuvula onjanjo yoku yapuisiwa lovokuasi. Eye wa pandikisa loku pokola ku Suku. Yesu ka lisokoluile eye muẽle, kuenda wa popia hati: ‘Ndingainga ño-o ovina vi sanjuisa Suku.’ (Yoa. 8:​29) Onjongole yipi Yesu a kuata yoku sanjuisa Suku?

7, 8. (a) Epandi lipi Yesu a lekisa, kuenda onima yipi a tambula? (b) Epulilo lipi tu sukila oku linga?

⁷ Onjanja yimue Yesu wa sapuilile olondonge viaye hati: “Mõlomanu keyilile oku vumbiwa, te oku vumba, loku eca omuenyo waye ndocimuenyo coku yovola va lua.” (Mat. 20:​28) Eci Yesu a fetika oku sapuila olondonge viaye hati, “eca omuenyo waye,” Petulu wo vetiya oku li kuatela ohenda. Pole, Yesu ka tavele kondaka yaco. Eye wa eca omuenyo waye wa lipua, oco a yovole omanu. Omo lionjila Yesu a nõlapo, wa kuata elavoko liomuenyo wocili. Eye wa pinduiwa kuenda wa “yeluiwa londio ya Suku.” (Ovil. 2:​32, 33) Omo liaco, tu sukila oku kuama ongangu yaye.

⁸ Upostolo Paulu wa vetiya vamanji voko Roma oco ka vaka ‘lisokolole lika ovo muẽle’ kuenda wa va ivaluisa okuti, “Kristu ka lisokoluile eye muẽle.” (Va Rom. 15:​1-3) Tu kapako ndati elungulo liupostolo kuenda tu kuama ndati ongangu ya Kristu?

Yehova o Yongola Okuti tu u Lingila Eci Ciwa

9. Nye Ukristão a sukila oku linga poku litumbika ku Suku?

⁹ Kotembo ya va Isareli Ocihandeleko Suku a ecele ku Mose ca lekisile okuti, eci apika voko Heveru va tẽlisa anyamo epanduvali kupange va kuata elianjo. Pole, va kuatelevo elianjo lioku nõla onjila va yongola oku kuama. Nda upika wa sola cime caye, o pondola oku nõla oku amamako oku kala laye vokuenda kuomuenyo waye wosi. (Tanga Esinumuĩlo 15:​12, 16, 17.) Cimuamue haico tu sukila oku linga eci tu nõlapo oku litumbika ku Suku. Tu ci linga poku tẽlisa ocipango ca Suku okuti ka tu kuama olonjongole vietu. Nda tua ci linga, ci lekisa okuti, tu sole Yehova kuenda tu yongola oku u vumba otembo ka yi pui.

10. Tua linga ndati omanu vatiamẽla ku Suku, kuenda ci tu kuatisa ndati oku lekisa ovituwa viwa lovisimĩlo via sunguluka?

¹⁰ Nda o kasi oku lilongisa Embimbiliya Lolombangi Via Yehova, loku kunda olondaka viwa, kuenda wa siata oku endaenda kolohongele, o sesamẽla epandiyo. Tu lavoka okuti ndopo oka kuata onjongole yoku litumbika ku Yehova, kuenda oka linga epulilo lina Kalei a lingile ku Filipu hati: “Nye ci nateka oku papatisiwa?” (Ovil. 8:​35, 36) Ukamba wove la Yehova u pondola oku kala ndowu Wakristão vana Paulu a sonehela hati: “Ka wa lifukili ene muẽle, wa landiwi londando ya lua.” (1 Va Kor. 6:​19, 20) Nda tu kuete elavoko lioku enda kilu ale lioku kala palo posi, tu sukila oku litumbika ku Yehova Cime cetu. Omo liaco, tu yuvuli olonjongole vietimba okuti, ‘ka tu lingi a pika vomanu.’ (1 Va Kor. 7:​23) Tua sanjuka calua omo lioku kala afendeli va Yehova okuti, tu u lingila upange una a yongola!

11. Ovilumba vipi Akristão va vetiyiwa oku eca, kuenda vi lomboloka nye ndomo ca lekisiwa Vocihandeleko Suku a ecele ku Mose?

¹¹ Paulu wa vetiya vamanji hati: “[Eci] atimba ene ndocilumba ci kasi lomuenyo, haico ci kola, kuenje ci sanjuisa Suku. Oco efendelo liene liocili.” (Va Rom. 12:⁠1) Olondaka evi via ivaluisa Akristão voko Yudea ovilumba va enda oku eca ndondimbukiso yefendelo liavo osimbu ka va lingile olondonge via Yesu. Ovo va kũlĩhĩle onumbi Yocihandeleko Suku a ecele ku Mose yi lekisa okuti, va sukilile oku eca kutala wa Yehova ovinyama vi kuete uhayele. (Mal. 1:​8, 13) Cimuamue haico tu linga poku eca ‘atimba etu ndocilumba,’ poku pitisa kovaso ocipango ca Yehova okuti olonjongole vietu vi sule. Eci tu li tumbika ku Suku, tu eca “omuenyo” wetu kokuaye, oku kongelamo ovokuasi etu, kuenda uloño wetu. (Va Kol. 3:​23) Oku kapako olondaka evi ci lomboloka nye?

Pesila Otembo Yove Kovina vi Kuete Esilivilo

12, 13. Onjila yipi tu sukila oku kuama oco tu lingile Yehova upange uwa?

¹² Oco tu lingile Yehova upange uwa, tu sukila oku pesila otembo kovina vi kuete esilivilo. (Tanga Va Efeso 5:​15, 16.) Tu sukila oku likandangiya kovina viaco. Omo okuti, tu kasi voluali lua vĩha kuenda ka tua lipuile, tu sukila oku lavulula kovina tu pesila otembo. ‘Ovina viosi vi kuete otembo vi sukila oku lingiwa,’ oku kongelamo upange woku sanda eteku, kuenda ovitalukilo, oco tu tẽlise ovikele vietu vekongelo. (Uku. 3:⁠1) Pole, Ukristão o sukila oku lekisa olondunge kovina a pesila otembo yaye.

¹³ Eci Paulu a nyula olupale luo Atenai wa limbuka okuti, “va Atenai kuenda vakualofeka viñi va tungamo, lacimue vali va sakalala laco, te oku sapula pamue oku yeva cimue cokaliye.” (Ovil. 17:​21) Koloneke vilo, omanu valua va siata oku pesila otembo yavo kovina ka vi kuete esilivilo. Vovina viaco, mua kongela oku tala o televisãu kuenda ovina vikuavo. Kuli ovina vialua ka vi kuete esilivilo, tu pondola oku pesila otembo yetu. Nda tua ci linga, tu kuata owesi lovina viespiritu. Pole, tu sukila oku ivaluka okuti, tu kuete ‘ovina vialua via velapo’ viatiamẽla koku vumba Yehova.​—⁠Va Fil. 1:​9, 10.

14. Apulilo api tu sukila oku konomuisa?

¹⁴ Omo okuti, wa litumbika ku Yehova, o sukila oku lipula ndoco: ‘Anga hẽ, vesokiyo liovina ndi yongola oku linga nda kongelamo oku tanga Embimbiliya, oku sokolola ovina nda tanga, kuenda oku likutilila? (Osa. 77:12; 119:97; 1 Va Tes. 5:​17) ‘Nda siata hẽ oku sokiya otembo yoku pongiya ovipama violohongele? Atambululo ndeca kolohongele a siata hẽ oku vetiya vakuetu?’ (Osa. 122:1; Va Hev. 2:​12) Ondaka ya Suku yi lekisa okuti, Paulu kumue lakamba vaye va pesela otembo yalua koku “longisa ondaka ya [Yehova] lutõi.” (Ovil. 14:⁠3) Anga hẽ, o pondola oku linga esokiyo lioku ‘kala’ ukundi wotembo yosi oco o pesile otembo yalua kupange woku kunda?​—⁠Tanga Ovilinga 14:⁠3.

15. Kovina vipi akulu vekongelo va siata oku pesila otembo yavo?

¹⁵ Eci upostolo Paulu kumue lakamba vaye, va nyula ekongelo lio Antiokea, ‘va kala kumue loloñame otembo yalua,’ loku va vetiya. (Ovil. 14:​28) Koloneke vilo, akulu vekongelo va siatavo oku pesila otembo yavo koku pamisa vakuavo. Ndaño va siata oku kunda olondaka viwa, pole, va kuetevo ocikele coku pasuisa vamanji, oku pamisa vana va hongua kespiritu, loku kuatisa vana va vela, kuenda oku tẽlisa ovikele vikuavo vekongelo. Nda wa papatisiwa, o pondola hẽ oku likolisilako oco o tambule ovikele viaco?

16. Olonjila vipi tu sukila oku kuama oco ‘tu lingile eci ciwa vakuetu’?

¹⁶ Vamanji valua va siata oku sanjukila oku kuatisa vana va pita lovilunga. Omo liaco, manji umue ohueli okuete ci pitahãla 60 kanyamo okuti watiamẽla kepata lio Betele, wa linga ovongende olonjanja vialua kupange woku kuatisa vana va pita lovilunga. Momo lie a pesilila otembo yaye yepuyuko kupange waco? Eye wa popia hati: “Ndaño si kuete uloño woku linga ovina, nda kuata esumũlũho lioku eca ekuatiso liange. Evetiyo nda eca ku vamanji va pesela ovina viavo, lia pamisa ekolelo liavo.” Vamanji valua va siata oku kuatisa kupange woku tunga Olonjango Viusoma levi vioku lingila olohongele Vimbo kuenda Viofeka. Nda tua kuatisa kupange waco, ‘tu linga eci ciwa ku vakuetu vakuetavo.’​—⁠Va Gal. 6:⁠10.

“Ñasi Lene Kumue Oloneke Viosi”

17. Nye o sukila oku linga oco o kuate omuenyo ko pui?

¹⁷ Oluali luomanu ka va pokola ku Suku lu kasi oku pita, kuenda ka tua kũlĩhĩle eteke liesulilo. Pole, tua kũlĩha okuti, “oloneke via tu tukuiwila via linga vimbumbulu,” kuenda ‘oluali lulo lu kasi oku pita.’ (Tanga 1 Va Korindo 7:​29-31.) Omo okuti, otembo ya kambako yitito, tu sukila oku kapako olondaka via Yesu wa pula hati: “Nye omunu a pondola oku linga oco a popele omuenyo waye?” Tu sukila oku tẽlisa ovina viosi Yehova a yongola kokuetu oco tu kuate “omuenyo wocili.” (1 Tim. 6:​19) Omo liaco, tu sukila oku pokola kelungulo lia Yesu lioku ‘u kuama’ kuenda oku ‘sandiliya tete usoma.’​—⁠Mat. 6:​31-33; 24:⁠13.

18. Ekolelo lie tu kuete, kuenda momo lie?

¹⁸ Ka ca lelukile oku kuama Yesu, loku pokola kelungulo liaye, momo vamue va siata oku sakalala lovina violuali lulo. Omo liaco, tu sukila oku kuama ongangu ya Yesu yoku yuvula ‘oku likuatela ohenda.’ Tua kolela kohuminyo a linga kolombuavekua viaye viatete hati: “Ñasi lene kumue oloneke viosi toke kesulilo lioluali.” (Mat. 28:​20) Tu pesili otembo yetu luloño wetu kupange u kola. Nda tua ci linga, Yehova oka tu popela kohali yapiãla kuenda tuka kuata omuenyo ko pui voluali luokaliye. (Va Hev. 6:​10) Kuenje, tuka limbuka ndomo tua velisapo ombanjaile yomuenyo.

O Tambulula Ndati?

• Yesu wa lekisa ndati onjongole yoku vumba Suku loku kuatisa omanu?

• Omunu o yuvula ndati oku linga ocipango caye muẽle, kuenda o ci linga ndati?

• Kotembo ya va Isareli, ovilumba vipi via taviwile la Yehova, kuenda ulandu waco u tu kuatisa ndati koloneke vilo?

• Tu lekisa ndati olondunge kovina tu pesila otembo yetu?

[Elitalatu kemẽla 26]

Yesu wa enda oku linga ovina vi sanjuisa Suku

[Elitalatu kemẽla 28]

Va Isareli va enda oku eca olombanjaile vioku kuatisa kefendelo liocili

[Elitalatu kemẽla 29]

Tu sanjuisi Suku poku pesila otembo yetu kovina vi kuete esilivilo