Lisuluvika Oco o Tambule Onima!
“[Omunu] wosi iñila kolomapalo vioku litunda o [lisuluvika] kovina viosi.”—1 VA KORINDO 9:25.
1. Ndamupi olohuluwa viomanu va siata oku nõlapo oku pokola kolonumbi via Yehova, ndomo elivulu lia Va Efeso 4:22-24 li lombolola?
NDA ove wa papatisiwa ale okuti wa linga Ombangi ya Yehova, wa lilekisa komanu kuenda wa sanjukila oku kuata onima yomuenyo ko pui. Ove wa tava oku litumbika koku linga ocipango ca Yehova. Valua pokati ketu okuti osimbu handi ka tua litumbikile ku Yehova, tua sukila tete oku linga apongoloko alua oco elitumbiko lietu li kuate esilivilo liocili okuti li taviwa la Suku. Etu tua pokola kelungulo lina upostolo Paulu a eca Kakristão vo ko Efeso eci a popia hati: “Luli omunu wale una wa tiama komuenyo wale, haiwo wa vĩha loloñeyi vieliaño, ... wali omunu wokaliye una wa tungiwa lesetahãlo lia Suku lesunga kuenda oku kola.” (Va Efeso 4:22-24) Eci ci lomboloka okuti, osimbu handi ka tua nõlelepo onjila yoku litumbika ku Suku, tua sukilile oku yuvula ovituwa viosi vĩvi tua kuamẽle tete komuenyo wetu.
2, 3. Ndamupi elivulu lia 1 Va Korindo 6:9-12 li lekisa apongoloko avali omunu a sukila oku linga oco a taviwe la Suku?
2 Omunu wosi o yongola oku linga Ombangi ya Yehova o sukila oku yuvula ovituwa vina vi pisiwa Vondaka ya Suku. Eci upostolo Paulu a sonehela ukanda waye ku va Korindo, eye wa tukula ovituwa vimue vĩvi poku popia hati: “Ndaño vakuokahonga, ndaño vakuaviteka, ndaño vava va lala lakãi vamãle, lalume va lisokisa lakãi, lalume vakuakulala lalume, lovimunu, la vakuacipululu, loloholua, la vakuakuimbula, lolondiandia, ka [vaka] piñala usoma wa Suku.” Eye noke wa lombolola okuti, Akristão vo kocita catete, va linga apongoloko a sukiliwa poku amisako oku popia hati: “Ene puãi, vamue pokati kene, osimbu, wa kaili lovituwa viaco.” Limbuka okuti ovo tete va kala lovituwa vĩvi, pole cilo va pongoloka.—1 Va Korindo 6:9-11.
3 Upostolo Paulu wa lombololavo okuti, omunu o sukila oku amamako oku linga apongoloko poku popia hati: “Nẽla oku linga ovina viosi, puãi ha viosiko vi kuatisa.” (1 Va Korindo 6:12) Koloneke vilo, omanu vana va yongola oku kala Olombangi via Yehova, va litumbika okuti va sukila oku yuvula oku linga ovina viosi okuti ndaño vi kasi soketi vi kuete esilivilo, pole ka vieci ekuatiso lalimue cikale cilo muẽle ale kotembo yo kovaso. Ovina viaco, ci tava okuti vi pesela otembo yalua poku vi sandiliya kuenje vi pondola oku va tateka oku sandiliya ovina vi kuete esilivilo lia velapo.
4. Ndamupi elitumbiko Liakristão lilitavela lolondaka viupostolo Paulu?
4 Oku litumbika ku Suku ku lingiwa lutima wosi, ka ku lingiwa lekisika, kuenda ka ku sokisiwa locilumba cimue ca tĩla oku ceca. Akristão vana va litumbika ku Suku va tava kolondaka vina upostolo Paulu a popia eci a linga ondonge ya Kristu hati: “[Yesu,] ndo pesila ovina viosi. Ovina viosi ndi vi tenda ño ndovipelekese hã si nganyala Kristu.” (Va Filipoi 3:8) Upostolo Paulu wa likala oku kapako ovina viosi ka vi kuete esilivilo poku nõlapo lika oku kuama ovina vi kuete esilivilo ku Suku.
5. Esakalalo lipi upostolo Paulu a kuatele liatiamẽla kovina a yonguile oku tẽlisa kuenda ndamupi tu pondola oku kuama ongangu yaye?
5 Upostolo Paulu wa lekisa esuluviko kolupesi luaye luatiamẽla kespiritu kuenje wa tẽla oku popia hati: “Nda yaka uyaki uwa. Oku yoloka nda mala. Koku tata ekolelo nde lipua. Pa siala [lika] ekolowa liesunga lia solekiwila. Ñala onganji yesunga o li eca kokuange keteke liaco, hakokuangeko lika puãi ku vosi va sola etukuluko liaye.” (2 Timoteo 4:7, 8) Anga hẽ eteke limue tuka tẽlavo oku vangula olondaka ndevi upostolo Paulu a popia? Etu tuka tẽla oku ci linga nda tua kuata ekolelo poku lekisa esuluviko osimbu tu amamako lolupesi wetu Tuakristão woku sakalala lovina viespiritu toke eci tu pitĩla kesulilo.
Oco tu Litunde Ciwa tu Sukila Oku Lekisa Esuluviko
6. Esuluviko lilomboloka nye? Kuenda kovina vipi vivali tu sukila oku lekisa esuluviko?
6 Ondaka yo Heveru kuenda yo Helasi ya pongoluiwa hati “esuluviko,” Vembimbiliya yi lomboloka okuti omunu o kuete epondolo ale o tẽla oku likandangiya eye muẽle kovina vimue. Olondaka viaco vi kuete elomboloko liomunu o likolisilako oku yuvula oku linga eci cĩvi. Pole, nda tu yongola oku linga ovopange awa tu sukilavo oku lekisa esuluviko. Omo okuti omanu ka va lipuile va yongola lika oku linga eci ka ca sungulukile, etu tu kuete ovoyaki avali. (Ukundi 7:29; 8:11) Osimbu tu likolisilako oku yuvula oku linga eci cĩvi, tu sukilavo oku likolisilako oku linga eci ciwa. Omo liaco, oku lilava etu muẽle oco tu linge eci ciwa, oyo onjila ya sunguluka yoku yuvula oku linga eci cĩvi.
7. (a) Kovina vipi tu sukila oku likutilila ndeci Daviti a linga? (b) Ovina vipi okuti oku vi sokolola vika tu kuatisa koku lekisa esuluviko?
7 Ocili okuti, esuluviko li kuete esilivilo nda tu yongola oku tẽlisa elitumbiko lietu ku Suku. Tu sukila oku kuama ongangu ya Daviti yoku likutilila eci eye a popia hati: “Sovuile utima u yela, a Suku. Kapa vokati kange espiritu liokaliye liesunga.” (Osamo 51:10) Etu tu pondola oku sokolola ekuatiso li tunda koku yuvula ovina viosi vĩvi ale vievi vi nyõla etimba lietu. Sokolola ovitangi via siata oku pita lomanu vana ka va yongola oku yuvula oku linga eci cĩvi ndeci: Ekambo liuhayele, oku litepa lakamba kuenda okufa kuiya ocipikipiki. Pole, sokolola asumũlũho a tunda koku kuama onjila yomuenyo yina ya lekisiwa la Yehova. Etu tu sukila oku ivaluka okuti, utima wetu wa piãla kelimbi. (Yeremiya 17:9) Omo liaco, tu sukila oku nõlapo oku tamalãla kayonjo ana a pondola oku yapuisa utima wetu koku amamako oku pokola kolonumbi via Yehova.
8. Ekalo liomuenyo wetu li tu longisa nye? Ci lombolola.
8 Valua pokati ketu tua siata oku limbuka okuti olonjanja vimue olonjongole vina ka via sungulukile viatiamẽla ketimba vi pondola oku tepulula ombili yomunu. Konomuisa eci catiamẽla kupange wetu woku kunda Usoma. Yehova o sanjukila omanu vana vakuanjongole yoku kuata onepa kupange woku yovola omanu. (Osamo 110:3; Mateo 24:14) Valua pokati ketu, tua kũlĩha okuti poku fetika oku kunda konjanja yatete ka ca lelukile komuenyo wetu. Ci tava okuti tua sukilile oku likolisilako kuenda toke cilo ci sukila oku pindisa ciwa etimba lietu, ‘poku liveta,’ loku “li pokuisa ndupika,” okuti ka tu liecelela oku endisiwa lolonjongole vialio.—1 Va Korindo 9:16, 27; 1 Va Tesalonike 2:2.
Lisuluvika “Kovina Viosi”?
9, 10. Nye ca kongeliwa voku “[lisuluvika] kovina viosi”?
9 Elungulo Liembimbiliya liatiamẽla koku “[lisuluvika] kovina viosi” li lekisa okuti, voku lisuluvika kuaco mua kongela ovina vialua okuti oku likandangiya lika konyeño kuenda kovituwa via vĩha ci sule. Nda tua limbuka okuti tu kasi oku lisuluvika kovina evi, tu sukila oku eca olopandu. Oco hẽ nye tu pondola oku linga nda tua limbuka okuti ka tu kasi oku lekisa esuluviko kovina vikuavo viatiamẽla komuenyo wetu? Sokolola ndeci okuti tu kasi vofeka yimue okuti muli ovokuasi alua kuenda omanu vaco veyuka ovokuasi alua. Anga hẽ ka ca sungulukile oku lilongisa oku yuvula oku pesila olombongo kovina vimue ka vi sukiliwa? Olonjali vi sukila oku longisa omãla vavo oku yuvula oku landa ovina viosi va lete ndaño okuti pamue ovina viaco via siata, ale vi soliwe calua kuenda ovo va kuete epondolo lioku vi landa. Oco omãla va pokole kolonumbi viaco, olonjali vi sukila oku lekisa ongangu yiwa kueci catiamẽla kondaka eyi.—Luka 10:38-42.
10 Oku leluisa omuenyo wetu, ku pondola oku pamisa ekalo lietu. Handi vali, ci tu kuatisa oku sanjukila ovina tu kuete kuenda oku kuatela ohenda omanu vana ka va kuete cimue okuti havoko va nõlapo ekalo liaco liuhukũi. Pole, oku ambata omuenyo waco wa leluka kua litepa lovituwa viomanu va siata oku popia hati: “Sanjuisa lika omuenyo wove muẽle” ale “ove, o sesamẽla ovina via velapo.” Oluali lulo lua siata oku vetiya omanu oco va kuate onjongole yoku lisanjuisa ovo muẽle. Pole, evetiyo liaco li lingiwila oco omanu va tekele lika koku sandiliya onganyu yolomĩlu viavo. Ovituwa viaco evi violuali, vi pondola oku tateka elikolisilo lietu lioku lekisa esuluviko. Orevista yimue yokaliye ya sandekiwa kolofeka vina vieyuka ovokuasi ko Europa ya popia ndoco: ‘Ci sukila oku pandikisa calua oku tutuiya olonjongole vina ka via sungulukile viatiamẽla koku kuata ovokuasi, ca piãla vali enene komanu vana va kasi vusuke walua. Pole, komanu vana va kasi kolofeka vina okuti vi kuete ovokuasi alua onjongole yaco ya tĩla vali calua oku yi tutuiya!’
11. Momo lie ci kuetele esilivilo oku ambata omuenyo umue wa leluka? Pole, nye ca siata oku tateka omanu oku ambata omuenyo waco?
11 Nda tu kuete ocitangi coku tepisa pokati keci tu yongola kuenda eci tu sukila, tu pondola oku kuama olonumbi vina vi tu kuatisa oku limbuka nda tu kuete ocituwa ca sunguluka. Nda tu yongola oku likandangiya kocituwa coku pesila olombongo vietu kovina ka tu sukila, tu kuete oku yuvula ocituwa coku levala ovina vimue ale oku yuvula oku ambata olombongo vialua eci tu enda kocitanda. Ivaluka olondaka viupostolo Paulu wa popia hati, “oku sanjukila oku vumba Suku,” oyo “onganyu ya piãla.” Eye wamisako lolondaka viaye hati: “Ka tua nenele cimue voluali, kuenje, oku ambata cimue eci tu tunda, ka tu ci tẽla. Nda tu kuete okulia leci tu lisikilĩla ci tu tẽla kuenje tu sanjuka laco.” (1 Timoteo 6:6-8) Tua siata hẽ oku sanjukila eci tu kuete? Tu sukila oku pandikisa calua loku lekisa esuluviko nda tu yongola oku ambata omuenyo umue wa leluka loku yuvula ovina viosi vi sanjuisa utima wetu muẽle okuti ka tu vi sukila haivio vi tu tateka oku velisapo ovina vi kuete esilivilo liocili. Omo liaco, eyi oyo onjila ya sunguluka tu sesamẽla oku lilongisa.
12, 13. (a) Ndamupi esuluviko li pondola oku kuatisa Akristão oco va endaende kolohongele? (b) Kovina vipi vikuavo tu sukila oku lekisa esuluviko?
12 Oku endaenda kolohongele viekongelo, vimbo, kuenda viofeka ci sukilavo oku lekisa esuluviko. Ocituwa eci ci kuete esilivilo liocili, momo ci pondola oku tu kuatisa oku yevelela lutate kovipama viosi vieciwa kolohongele. (Olosapo 1:5) Esuluviko li pondolavo oku tu kuatisa oku yuvula oku sapela la vakuetu vokuenda kuohongele osimbu hundi a kasi oku linga ohundo. Tu sukilavo oku kuata esuluviko poku sokiya ovopange etu oco tu pitĩle selo kolohongele. Handi vali, esuluviko li sukiliwavo koku sokiya otembo yoku pongiya ovipama violohongele kuenda oku eca atambululo etu.
13 Oku lekisa esuluviko kovina vitito ci pamisa epondolo lietu lioku lekisa esuluviko kovina vinene. (Luka 16:10) Omo liaco, ciwa oku lipindisa etu muẽle oco tu kuate ocituwa coku tanga Ondaka ya Suku olonjanja viosi kuenda alivulu ana a lombolola eci ci kasi Vembimbiliya loku sokolola ovina viosi tua lilongisa! Ciwa okuti tu lipindisa etu muẽle kovina ndeci: oku sandiliya ovopange ana ka a sungulukile, akamba, ovituwa, kuenda oku yuvula ekalo lietu lĩvi, ale oku lipindisa koku yuvula ovina viosi vi pondola oku tateka otembo tu pondola oku pesila kupange wetu woku kunda usoma! Oku kuatela ombili kupange wa Yehova ci kuete esilivilo momo ci pondola oku tu teyuila kovina vi tu yapuisa kekalo liwa liespiritu lina li kasi vakongelo a Yehova a sangiwa voluali luosi.
Lekisa Esuluviko Oco Amameko Kespiritu
14. (a) Ndamupi omãla va pondola oku lilongisa oku kuata esuluviko? (b) Ekuatiso lipi omãla va pondola oku tambula nda vutila wavo va lilongisa oku lekisa esuluviko?
14 Oñaña ya citiwa ndopo ka yi lekisa esuluviko. Okokanda kamue ka sonehiwa lolonoño vimue via lilongisa eci catiamẽla kovituwa viomãla ka lombolola ndoco: “Esuluviko ka li ya ño olio muẽle ale ocipikipiki. Oloñaña kuenda omãla vatito, va sukila oku tambula epindiso liolonjali viavo kuenda ekuatiso oco va lilongise oku lekisa esuluviko. ... Nda olonjali viavo viamamako oku va kuatisa, ovo vaka tẽla oku lekisa esuluviko vokuenda kuanyamo osi vaka kala kosikola oku lilongisa.” Elilongiso limue lia lingiwa liatiamẽla komãla va kuete anyamo akuãla lia lekisa okuti, omãla vana va lilongisa oku lekisa esuluviko, “va siata oku kula lesunguluko, oku lekisa ukamba, utõi, loku kolapo kuenda va kala amalẽhe vamue vakuacili.” Omãla vosi okuti ka va lilongisile ovituwa viaco, “va yongola lika oku kala likaliavo, haivo va sumua haivo vakualonamalãla. Ovo va kuete asakalalo alua kuenda va tila koku vi potolola.” Omo liaco, oco omãla va linge akulu vamue va sunguluka, va sukila oku lilongisa oku kuata esuluviko.
15. Ekambo liesuluviko li lekisa nye, kuenda ocimãho cipi catiamẽla Kembimbiliya tu sukila oku kuata?
15 Handi vali, nda tu yongola oku kala Akristão va loñolõha, tu sukila oku lekisa esuluviko. Nda ka tu lekisa esuluviko, eci ci lekisa okuti handi tumãla kespiritu. Embimbiliya li tu vetiya oco ‘kolondunge tu linge ndakulu vendamba.’ (1 Va Korindo 14:20) Etu tu kuete ocimãho coku “pitila kongongela yekolelo, leyi yoku kũlĩha Mõla a Suku, ... toke tu linga [akulu] vendamba va soka loseteko yutunga wokuyuka kua Kristu.” Momo lie? Momo ka tu yongola ‘oku kala vali ndomãla va punguaiwa lolofela viosi viokulongisa lokulunguka kuomanu, latutu avo oku wengula esanda.’ (Va Efeso 4:13, 14) Omo liaco, esuluviko li kuete esilivilo liocili kekalo lietu kespiritu.
Tu Lekisi Esuluviko
16. Ndamupi Yehova a siata oku eca ekuatiso?
16 Oco tu kuate esuluviko, tu sukila ekuatiso lia Suku okuti li kasilili omanu vosi. Ondaka ya Suku yi kasi ndolumuĩlo lua lipua, yi tu lekisa apongoloko osi tu sukila oku linga komuenyo wetu kuenda yi tu ĩha olonumbi vi tu kuatisa ndomo tu pondola oku ci linga. (Tiago 1:22-25) Vamanji vakuacisola va yongolavo oku eca ekuatiso liavo. Akulu vekongelo va kuete onjongole yoku eca ekuatiso komunu lomunu. Yehova o pondolavo oku tu ĩha espiritu sandu liaye nda tuo li pinga vohutililo. (Luka 11:13; Va Roma 8:26) Omo liaco, tu lekisi onjongole yoku kuatisiwa leliangiliyo liaco eli. Olonumbi vi sangiwa pokakasia kemẽla 21, vi pondolavo oku tu kuatisa.
17. Olondaka vipi viekoliso tu sanga kelivulu Liolosapo 24:16?
17 Tua sanjuka omo lioku kũlĩha okuti Yehova wa kapako alikolisilo etu poku seteka oku u sanjuisa! Eci ci pondola oku tu vetiya oku amamako loku likolisilako oku lekisa esuluviko. Ndaño okuti pamue tua siata oku wila vekandu, pole lalimue eteke ka tuka liwekipo oku likolisilako. Embimbiliya li lombolola okuti: “Ukuesunga o kupuka olonjanja epanduvali, kuenje o votoka vali.” (Olosapo 24:16) Olonjanja viosi tu litunda ciwa koku sanjuisa Yehova, tu kuete esunga lioku kuata esanju. Etu tu pondolavo oku kolela okuti Yehova o lekisa esanju kokuetu. Umue Ombangi ya Yehova wa popia hati, osimbu handi ka tumbikile omuenyo waye ku Yehova, wa enda oku likolisilako oku yuvula oku sipa vokuenda kuosemana. Kuenje, esuluviko lio kuatisa calua koku soleka olombongo vina nda a pesila koku landa olosikalu.
18. (a) Nye ca kongela vuyaki wetu woku lekisa esuluviko? (b) Ekuatiso lipi Yehova a tu likuminya?
18 Tu sukila oku ivaluka okuti, voku lekisa esuluviko mua kongela utima kuenda ovisimĩlo vietu. Etu tu pondola oku ci limbukila volondaka via Yesu wa popia hati: “[Omunu wosi] wa vanja ukãi ho liveli, vutima waye wo pekelisa ale.” (Mateo 5:28; Tiago 1:14, 15) Omunu wosi o tẽla oku lava utima lovisimĩlo viaye, cu lelukila oku lava ciwa etimba liaye liosi. Omo liaco, tu nõlipo onjila yoku yuvula oku linga eci cĩvi kuenda ovisimĩlo viosi vĩvi. Nda tua kuatiwa lovisimĩlo viaco vĩvi, tu sukila oku vi yuvula lonjanga. Tu pondola oku tila ayonjo poku likutilila olonjanja viosi kuenda oku ivaluka Yesu. (1 Timoteo 6:11; 2 Timoteo 2:22; Va Heveru 4:15, 16) Osimbu tu likolisilako oku linga cosi ciwa, tuka tẽla oku kuama elungulo Liosamo 55:22 yi popia ndoco: “Tuika Yehova ocitele cove kuenje eye o ku kuatisa. Lalimue eteke [eye a] tava okuti ukuesunga o sengiwa.”
Handi Ocivaluka?
• Kovina vipi vivali tu sukila oku lekisa esuluviko?
• Oku “[lisuluvika] kovina viosi” ci lomboloka nye?
• Olonumbi vipi via sunguluka vioku lekisa esuluviko ove wa limbuka vokuenda kuocipama cilo celilongiso?
• Esuluviko li fetikila pi?
[Okakasia Lelitalatu kemẽla 21]
Ndomo tu Pondola Oku Kuatisiwa Lesuluviko
• Lekisa esuluviko ndaño kovina vimue vitito
• Sokolola asumũlũho eyilila kocituwa caco kotembo yilo muẽle kuenda kueyi yi laika okuiya kovaso
• Ovina viosi Suku a nyãle vi piñainyiwa levi vi kolisa utima
• Yuvula lonjanga ovisimĩlo viosi vina vĩvi
• Yukisa utima wove lovina viespiritu vi kolisa
• Tava kekuatiso lina lieciwa Lakristão va loñolõha kespiritu
• Yuvula ayonjo osi
• Likutilila oku pinga ekuatiso lia Suku eci o sangiwa vayonjo
[Elitalatu kemẽla 18, 19]
Esuluviko li tu vetiya oku linga eci ciwa