Anga hẽ Olombongo Olumbombo Luovina Viosi Vĩvi?

Etambululo Liembimbiliya

Sio. Embimbiliya ka li popi okuti olombongo ocina cimue cĩvi. Olio ka li popivo okuti olombongo ovio ono yovina viosi vĩvi vi kasi oku pita voluali. Vamue va popia okuti “olombongo olumbombo luovina viosi vĩvi.” Pole, hacoko Embimbiliya li longisa. Ocili okuti, Embimbiliya li popia hati, “ocisola coku sola olombongo oco olumbombo luavĩho osi.”a—1 Timoteo 6:10, Embimbiliya li Kola; ondaka yi tekãveluapo etu tua yi taya.

Nye Embimbiliya li popia catiamẽla kolombongo?

Embimbiliya li lekisa okuti, oku talavaya ciwa lolombongo ci kuete esilivilo. Olio li popiavo okuti “olombongo vi teyuila.” (Ukundi 7:12) Handi vali, Embimbiliya li pandiya vana va lekisa ocali ku vakuavo okuti, mua kongela oku eca ombanjaile yimue yolombongo.—Olosapo 11:25.

Pole, Embimbiliya li tu lungula oco ka tu ka tende olombongo ndocina cimue ca velapo komuenyo wetu. Olio liti: “Ko ka soli olombongo, pole, sanjukili ovina vu kuete cilo.” (Va Heveru 13:5) Nye tu li longisilako? Tu sukila oku kapa olombongo pocitumãlo cavio kuenda ka tu ka eceleli okuti ovio vi tu viala. Tu sukila oku sanjukila ovina vi sukiliwa ndeci, okulia, uwalo kuenda onjo.—1 Timoteo 6:8.

**Momo lie Embimbiliya li tu lunguila catiamẽla koku sola olombongo?**

Omanu vakuacipululu ka va ka kuata omuenyo ko pui. (Va Efeso 5:5) Catete ceci okuti, ocipululu onjila yimue yatiamẽla kefendelo lioviteka, ale kefendelo liesanda. (Va Kolosai 3:5) Cavali ceci okuti, omanu vakuacipululu olonjanja vialua va linga ovina vĩvi oco va kuate eci va yongola. Olosapo 28:20 hati: “Wosi o yayulako oco a linge ohuasi ka kamamako oku pua eko.” Omunu wosi o sole olombongo, o pondola oku linga ovilinga viungangala ndeci, oku saluisa omunu umue, oku nyana, undiandia, oku nyaniwa kuomunu, ale oku ponda.

Ndaño okuti pamue omunu ka pĩtila petosi lioku linga ovina viaco, oku sola olombongo ku pondola oku koka ovitangi vikuavo. Embimbiliya li popia okuti: “Vana va nõlapo oku kala olohuasi, va wila veyonjo lo vonjanjo kuenda voloñeyi vĩvi haivio viuveke vi tuala omanu kenyõleho.”—1 Timoteo 6:9.

Momo lie ci kuetele esilivilo oku kapako alungulo Embimbiliya atiamẽla kolombongo?

Embimbiliya li longisa eci ca sanguluka kuenda eci ci sanjuisa Suku. Ka tu yongola oku linga ovina ka via sungulukile oco tu kuate olombongo vialua. Nda tu tiamisila utima koku sanjuisa Suku, tu ka sanjuka omo lioku linga eci ca sunguluka. Handi vali, tu ka taviwa la Suku loku kuatisiwa laye. Suku wa likuminya hati: “Ame lalimue eteke hu sia, ale oku ku yanduluka.” (Va Heveru 13:5, 6) Eye o tu likuminyavo hati, “omunu wa koleliwa o ka tambula asumũlũho alua.”—Olosapo 28:20.

Ovinimbu Viembimbiliya vi popia catiamẽla kolombongo

Ukundi 7:12: “Olombongo vi teyuila.”

Elomboloko liocinimbu eci: Konepa yimue olombongo vi kuete esilivilo, momo vi tu kuatisa oku landa ovina tu sukila.

Luka 12:15: “Ndaño omunu o kuete calua, omuenyo waye ka u tundi kovina a kuete.”

Elomboloko liocinimbu eci: Olombongo havioko ocina ca velapo komuenyo wetu kuenda ka vi tu ĩha epopelo.

1 Timoteo 6:10: “Momo ocisola coku sola olombongo oco olumbombo luovina viosi vĩvi kuenje vamue poku sandiliya ocisola caco, va yapuisiwa vekolelo kuenda va litoma lohali yalua.”

Elomboloko liocinimbu eci: Ka cĩviko oku kuata olombongo. Pole, omanu vamue va sole olombongo kuenda va vi tenda ndocina ca velapo komuenyo wavo. Omanu vaco va pondola oku kuata ovitangi ndeci, oku lisandola kuapata kuenda oku hongua ketimba omo lioku talavaya calua.

Va Heveru 13:5: “Ko ka soli olombongo, pole, sanjukili ovina vu kuete cilo.”

Elomboloko liocinimbu eci: Haciwako oku sakalala calua oco tu kuate ukuasi, ocina ca velapo oku sanjukila ovina vi sukiliwa.

Mateo 19:24: “Ci leluka ongamelo oku iñila venyulu lionguya, pole, ohuasi oku iñila Vusoma wa Suku, ca tĩla.”

Elomboloko liocinimbu eci: Vepuluvi eli Yesu wa malele oku laleka ulume umue ohuasi oco a linge ondonge yaye. Pole, ulume ka tavele kelaleko liaco omo okuti, wa kakatelele calua kovina a kuatele. Eli olio esunga lieci Yesu a ecela elungulo eli. Omunu o pitisa kovaso ovokuasi okuti Suku ci sule, o pondola oku kala kohele yoku pumba omuenyo ko pui.

a Embimbiliya likuavo li pongolola ocinimbu eci ndoco: “Ocisola coku sola olombongo oco olumbombo luovina viosi vĩvi.”