Kuli hẽ Umue o Kuete Ocikembe Lame?
Anga hẽ eteke limue wa simĩle okuti o kasi ulika, kuenje lomue wa limbuka ovitangi o liyaka lavio? Ndaño okuti kuli umue o lete ovitangi viove, pamue ove o sima okuti eye ka kuete ocikembe love.
ECI tu pita lovitangi, omuenyo wetu u kala soketi ondalu ka yi tava oku ima. Olonjanja vimue tu sima okuti ovitangi via piãla enene kuenda ka tu tẽla oku vi potolola. Pamue tu pita lohali yalua, esumuo, uvei umue ka u kayi kuenda ovina vikuavo. Kapuluvi aco, tu pua elavoko loku sima okuti lomue o pondola vali oku tu ĩha elembeleko. Anga hẽ kuli umue o kuete ocikembe love?
“Suku Ukuakulembeleka”
Embimbiliya li tukula Suku okuti “Isia yohenda, haeye Suku ukuakulembeleka pokati kovina viosi.” (2 Va Korindo 1:3) Suku una o tukuiwa hati Yehova, wa kũlĩha okuti tu sukila elembeleko. Omo Vembimbiliya ondaka ‘elembeleko,’ yi molẽha eci ci pitahãla ocita kolonjanja, eci ci lekisa okuti Suku wa kũlĩha ovitangi vietu kuenda o yongola muẽle oku tu lembeleka. Ukũlĩhĩso waco, u tu kuatisa oku kolela okuti ndaño omanu ka va lete ovitangi vietu kuenda ka va tẽla oku tu lembeleka, Yehova Suku o tu lembeleka.
Ovisonehua vi lekisa okuti Yehova o kuete ocikembe kuenda o tata omunu lomunu. Embimbiliya li popia hati: “Ovaso a Yehova a lete kuosi, a lavulula olondingaĩvi lolondingesunga.” (Olosapo 15:3) Handi vali, kelivulu lia Yovi 34:21, tu tangako ndoco: ‘Ovaso a Suku a lete ovilinga viomanu vosi. Eye wa kũlĩha olonjila viavo viosi.’ Yehova o lete ovina viosi tu lingainga, ci kale evi viwa levi vĩvi. Eye wa kũlĩha ciwa ekalo lietu kuenda o pondola oku linga cosi a panga. Eci ci limbukiwila kolondaka uprofeto Hanani a sapuila Asa, Soma ya Yuda hati: “Ovaso a Yehova a vanja vanja kuosi kilu lieve a lekisa unene waye kuvakuavitima vio sungulukila.”—2 Asapulo 16:7, 9.
Kuli vali esunga likuavo Yehova a tu lavuluila. Yesu wa popia hati: “Lomue o tẽla oku iya kokuange, te Isia wa numa u koka.” (Yoano 6:44) Yehova o sandiliya omanu va kuete utima woku u vumba. Omo liaco, Suku o kuatisa omanu vana va yongola oku u kũlĩha ciwa. Kũlĩhĩsa ulandu wa pita lukãi umue wa pelaliwa uvei wo kanser, kofeka yo Republica Dominicana. Osimbu a kala kosipitali, eye wa pinga ku Suku vohutililo oco o kuatise oku sanga etavo liocili. Kuenje eteke liaco lomẽle, ulume waye wo nenela ombrochura losapi hati, Suku Oyongola Nye Kokuetu?a a tambula kukãi umue Ombangi ya Yehova wo pasuisa konjo yaye. Eci ukãi a tanga ombrochura yaco, wa limbuka okuti Suku wa tambulula ohutililo yaye. Eye wa tava oku lilongisa Embimbiliya Lolombangi Via Yehova, kuenje noke yolosãi epandu, wa papatisiwa.
Vembimbiliya mu sangiwa olondaka violopandu via sonehiwa la Vakualosamo, ndeci Soma Daviti, vi lekisa ndomo Yehova a tata afendeli vaye locisola. Kosamo 56:8, Soma Daviti wa pinga ku Suku hati: “Kapa asuẽlela ange vongalafa yove. Velivulu liove hẽ hamoko a sonehiwa?” Ndomo ca lekisiwa volondaka evi, Daviti wa kũlĩhĩle ciwa okuti Yehova o lete ohali yaye kuenda u lembeleka kapuluvi esumuo. Yehova wa mola ohali ya kokela Daviti oku lila. Ocili okuti ovaso Ululiki wetu, a lete ‘vakuavitima vio sungulukila.’
Onepa yikuavo Yembimbiliya yi lekisa ndomo Suku a tata omanu locisola, yi sangiwa Kosamo 23. Olondaka viatete vi sokisa Suku lungombo umue ukuacisola, poku popia ndoco: “Yehova eye ungombo wange, ame si suki.” Ungombo umue wo Kutundilo o tata ciwa olomeme viaye, o tukula omeme lomeme konduko. Eteke leteke eye o vilikiya omeme loku yi kuata kuata kuenda o kũlĩhĩsa nda yi kuete apute. Eci a mola okuti omeme yimue yi kuete epute, o yi waveka ulela oco li kaye. Nda yimue yi vela o yi nyuisa ovihemba oco ka yi ka fe. Olondaka evi, vi lekisa ndomo Yehova a tata ciwa vana va kuete utima woku u vumba.
Ohutililo Lepinduko, Ocindekaise Cocikembe ca Suku
Ocindekaise eci kuenda olondaka vi sangiwa vosamo yikuavo ka via sonehiwile lika Vembimbiliya oco vi tu sanjuise poku vi tanga. Ovio vi lekisa ndomo afendeli va Suku kosimbu va lekisa olopandu ku Yehova lutima wavo wosi omo liolonumbi kuenda asumũlũho va tambula kokuaye. Olondaka viaco, vi lekisa ciwa okuti omanu vakuekolelo kosimbu va kũlĩhĩle okuti Suku o va kuetele ocikembe. Oku sokolola kolondaka viaco, ci tu kuatisa oku kuata ovisimĩlo viwa viatiamẽla ku Suku. Ohutililo eliangiliyo limue linene liocisola ca Suku.
Olonjanja vimue, tu lemelelua lovitangi vialua okuti ka tu kũlĩha ndomo tu likutilila oco tu kuatisiwe. Anga hẽ eci ci tateka Yehova oku limbuka ovitangi vietu? Kelivulu lia va Roma 8:26, tu sangako etambululo liokuti: ‘Espiritu li tu kuatisa pokati kokuleñela kuetu, momo ka tua kũlĩhile oku likutilila ndeci ca tu sesamela, puãi espiritu li tu livondelelako laleñoleño ka a popiwa.’ Olondaka evi vi tu kuatisa oku limbuka okuti ndeci Suku a yeva olohutililo viafendeli vaye kosimbu, Yehova layevo ‘Ukuakuyeva olohutililo’ vietu.—Osamo 65:2.
Epinduko eliangiliyo likuavo li tu kuatisa oku limbuka onjongole Suku a kuetele omunu lomunu. Yesu wa popia hati: “Ola yiya eci vosi va kasi vayambo va yeva ondaka yaye, [ya Yesu] yu va tundamo.” (Yoano 5:28, 29) Kelimi lio Helasi ondaka ya tukuiwa palo okuti, “vayambo” ka yi lomboloka lika ‘ayambo’ ana mua kendiwa omanu. Ondaka yaco yi lomboloka okuti omunu una wa fa, o kasi vonjivaluko ya Suku.
Ku Suku ka ca tĩlile oku nena vali umue komuenyo, momo eye wa kũlĩha ciwa ovina viosi viatiamẽla kekalo liomunu waco, oku kongelamo ovisimĩlo viaye. (Marko 10:27) Owoño wa Suku ka u kavi ndaño muẽle vokuenda kuolohulukãi vianyamo. (Yovi 14:13-15; Luka 20:38) Oku limbuka okuti Yehova Suku o kuete unene woku ivaluka omanu vosi va fa, ci tu kuatisa oku kolela okuti Suku o kuetele ocikembe omunu lomunu.
Yehova Ukuakueca Onima
Oco Suku a tu tate locisola kuenda ocikembe, tu sukila oku linga nye? Catete, tu sukila oku kolela loku pokola kokuaye. Upostolo Paulu wa lekisa elitokeko li kasi pokati kekolelo loku tambula asumũlũho a Suku. Eye wa soneha hati: ‘Wosi o yongola oku amẽla ku Suku, co sesamela oku kolela okuti kuli Suku, kuenda okuti Suku eca onima kuava vo sanda.’—Va Heveru 11:6.
Kũlĩhĩsa okuti voku kuata ekolelo lina li sanjuisa Suku, mua kongela ovina vivali. Catete, tu sukila oku “kolela” okuti kuli Suku kuenda oku tava okuti eye Ombiali yetu ya Velapo, haeye o sesamẽla epokolo loku u fendela. Cavali, tu sukila oku kolela okuti eye “eca onima kuava vo sanda.” Voku kuata ekolelo liocili mua kongela oku tava okuti Suku o yongola eci ciwa komanu vosi va likolisilako oku linga ocipango caye oco va tambule onima. Poku lilongisa Ondaka ya Suku loku liongolola la vana va pokola kokuaye, ove o ka kolela Suku kuenje o ka tambula onima kuenda o ka tatiwa locikembe.
Koloneke vilo, omanu valua va sima okuti Suku ka kapeleko ovopange avo. Pole, Embimbiliya li lekisa okuti Suku o kuetele ocikembe vana va lekisa ekolelo liocili kokuaye. Ndaño okuti koloneke vilo tua siata oku pita lasakalalo añi añi, esumuo kuenda ovitangi vikuavo, ka tu sukila oku pua elavoko. Momo Yehova Suku o kuete ocikembe letu. Eye o tu laleka locisola oku amẽla kokuaye. Ukualosamo wa popia hati: “Tuika Yehova ocitele cove kuenje eye o ku kuatisa. Lalimue eteke o tava okuti ukuesunga o sengiwa.”—Osamo 55:22.
[Etosi pombuelo yemẽla]
a Ya sandekiwa Lolombangi Via Yehova.
[Okakasia Lelitalatu kemẽla 23]
Ovisonehua vi Kuatisa Oku Pamisa Ekolelo Liove Kocisola ca Suku
“Ovaso a Yehova a vanja vanja kuosi kilu lieve ha lekisa unene waye kuvakuavitima vio sungulukila.”—2 ASAPULO 16:9
“Kapa asuẽlela ange vongalafa yove. Velivulu liove hẽ hamoko a sonehiwa?”—OSAMO 56:8
“Yehova eye ungombo wange, ame si suki.”—OSAMO 23:1
“Ove, okuakuyeva ohutililo, kokuove ku kokela omanu vosi.”—OSAMO 65:2
“Nda wa mbilikiya, lame nda nda ku kumbulula. Nda oco, ove nda wa kuatela upange wovaka ove ongeva.”—YOVI 14:15
‘Wosi o yongola oku amẽla ku Suku, co sesamẽla oku kolela okuti kuli Suku, kuenda eye eca onima kuava vo sanda.’—Va HEVERU 11:6
“Tuika Yehova ocitele cove kuenje eye o ku kuatisa. Lalimue eteke o tava okuti ukuesunga o sengiwa.”—OSAMO 55:22