Amamako Oku Kala Vocisola Ca Suku
“A vakuacisola, . . . Kali vocisola ca Suku, . . . [cu] neneli omuenyo ko pui.”—YUDA 20, 21.
1, 2. Tu kala ndati vocisola ca Suku?
YEHOVA o sole omanu vosi va kasi voluali. Omo liaco, wa eca Omõlaye wongunga okuti, wosi u kolela ka fi, pole, omola omuenyo ko pui. (Yoano 3:16) Oku kuatisiwa locisola ca Yehova, ci sanjuisa calua. Nda ove wa litumbika kokuaye, o yongola oku kuatisiwa locisola caye otembo ka yi pui.
2 Ndonge Yuda wa lombolola ndomo ove o tẽla oku kala vocisola ca Suku. Eye wa popia hati: “Lipamisi lekolelo liene li kola. Likutilili vespiritu sandu. Kali vocisola ca Suku. Feleveli ohenda ya Nãla yetu Yesu Kristu yu neneli omuenyo ko pui.” (Yuda 20, 21) Oku lilongisa Ondaka ya Suku loku kunda olondaka viwa viusoma, ci ku kuatisa oku pamisa ekolelo liove “li kola” kelongiso lia Suku. Oco o kale vocisola ca Suku, o sukila oku likutilila lekuatiso liespiritu sandu. Pole, oco o tambule esumũlũho liomuenyo ko pui, o sukila oku kuatela ekolelo vocilumba cocisembi ca Yesu Kristu.—1 Yoano 4:10.
3. Momo lie omanu vamue va silapo oku kala Olombangi via Yehova?
3 Omanu vamue okuti kosimbu va kuatele ekolelo, ka vameleko oku kala vocisola ca Suku. Omo lioku nõla onjila yekandu, va siapo oku kala Olombangi via Yehova. Ndamupi o yuvula onjila yaco? Oku kũlĩhĩsa atosi akuaĩmo, ci ku kuatisa oku yuvula ekandu, kuenda oku amamako oku kala vocisola ca Suku.
Lekisa Ocisola Cove ku Suku
4. Oku pokola ku Suku ku kuete esilivilo lie?
4 Lekisa ocisola cove ku Yehova poku pokola kokuaye. (Mateo 22:37) Upostolo Yoano wa popia hati: “Oku sola Suku kua lomboloka oku pokola kovihandeleko viaye. Ovihandeleko viaye ka vi lemi.” (1 Yoano 5:3) Oku pokola ku Suku, ku pamisa utima wove loku tamalãla layonjo, kuenje o kuata esanju. Ukualosamo wa popia hati: “Wa sumũlũa omunu ka endaenda lalungulo olondingaĩvi. . . . Te ovihandeleko via Yehova ovio a sanjukila.”—Osamo 1:1, 2.
5. Oku pokola ku Suku ku kuvetiya oku linga nye?
5 Ocisola cove ku Suku ci ku vetiya oku yuvula oku linga ekandu linene li sepula onduko Yaye. Aguri wa likutilila ku Suku hati: “Ku ka ngavele usuke ndaño ukuasi. Ndise okulia kua soka ño lame, sanga nda ñuta enene hu likala siti, Yehova helie? pamue nda ndinga osuke, njiva, kuenje membuisa onduko ya Suku yange.” (Olosapo 30:1, 8, 9) Omo liaco, ku ka linge ovina vi sepula onduko ya Suku. Likolisilako oku linga ovina vi nena esivayo kokuaye.—Osamo 86:12.
6. Nye ci pita love nda wa linga ekandu locipango?
6 Likutilila olonjanja viosi ku Yehova oco a ku kuatise oku tamãlala layonjo ekandu. (Mateo 6:13; Va Roma 12:12) Pokola kolonumbi via Yehova oco olohutililo viove ka vika tatekiwe. (1 Petulu 3:7) Nda wa linga ekandu locipango, o liyaka lovitangi vialua, momo Yehova ka kuata ukamba lolondingaĩvi. Noke vupopi wocindekaise, o sitika olohutililo viavo lelende okuti ka vi pitila kokuaye. (Asiõsuĩlo 3:42-44) Omo liaco, lekisa eliketiso loku likutilila okuti, lacimue ci ku tateka oku amẽla kokuaye.—2 Va Korindo 13:7.
Lekisa Ocisola ku Yesu
7, 8. Oku pokola kelungulo lia Yesu, ci kuatisa ndati omunu oku yuvula ekandu?
7 Oku sola Yesu ku lekisiwa poku pokola kovihandeleko viaye. Nda wa ci linga, o yuvula onjila yekandu. Yesu wa popia hati: “Nda vu pokola kovihandeleko viange, vu kala vocisola cange, ndeci ame nda pokola kovihandeleko via Tate, kuenje ñasi vocisola caye.” (Yoano 15:10) Oku pokola kolondaka via Yesu ci ku kuatisa ndati oku kala vocisola ca Suku?
8 Oku pokola kolondaka via Yesu, ci ku kuatisa oku tamãlala layonjo oku linga ekandu. Ocihandeleko Suku a ecele ku va Isareli, ca popele hati: “Ku ka pekelise.” (Etundilo 20:14) Pole, Yesu poku situlula onumbi ya kala vocihandeleko caco, wa popia hati: “U wa vanja ukãi ho liveli, vutima waye wo pekelisa ale.” (Mateo 5:27, 28) Upostolo Petulu wa lombolola okuti, vamanji vamue vekongelo lio kocita catete, va kala “lovaso eyuka uponji.” Kuenje, va enda oku yonja ‘omanu ka va pamele kespiritu.’ (2 Petulu 2:14) Omo liaco, kuka kuame ongangu yomanu vaco yoku linga ekandu liukahonga. Nda wa lekisa ocisola ku Suku la Yesu Kristu loku pokola kokuavo, oka nõlapo oku pamisa ukamba wove lavo.
Tava Oku Songuiwa Lespiritu Lia Yehova
9. Catiamẽla kespiritu sandu, nye ci pita lomunu nda wamamako oku linga ekandu?
9 Pinga espiritu sandu lia Suku vohutililo loku tava oku songuiwa lalio. (Luka 11:13; Va Galatia 5:19-25) Nda wamamako oku linga ekandu, Suku okupa espiritu liaye. Soma Daviti noke yoku linga ekandu la Batisieva, wa pinga ku Suku hati: “Ku ka nundise kovaso ove. Ku ka njupe espiritu liove li kola.” (Osamo 51:11) Soma Saulu omo okuti ka likekembelele ekandu liaye, wa pumba espiritu lia Suku. Eye wa lingile ekandu poku eca ovilumba ku Suku loku teyuila oviunda via va Amaleke kuenda soma yavo. Omo liaco, Yehova wo upa espiritu sandu liaye.—1 Samuele 13:1-14; 15:1-35; 16:14-23.
10. Momo lie o sukilila oku yuvula ovisimĩlo vi tuala kekandu?
10 Yuvula ovisimĩlo viosi vi tuala kekandu. Upostolo Paulu wa popia hati: “Nda kovaso yoku kũlĩha onjila yocili tu linga vali akandu locipango, ka ku kala vali ocilumba cimula akandu.” (Va Heveru 10:26-31) Ci nena esumuo lialua nda akandu ove a ku tuala koku pumba espiritu lia Yehova.
Lekisa Ocisola Kuvakuene
11, 12. Ocisola lesumbilo, vi kuatisa ndati omunu oku yuvula ukahonga?
11 Oku sola vakuetu ku tu kuatisa oku yuvula ekandu liukahonga. (Mateo 22:39) Ocisola caco ci ku kuatisa oku lava utima wove okuti, ku kuatela ocisola calua ukãi wamale ale ulume waye. Nda wa kuata ocisola caco, o wila vekandu liukahokolo. (Olosapo 4:23; Yeremiya 4:14; 17:9, 10) Kuama ongangu ya Yovi yoku yuvula oku sola ukãi wamale.—Yovi 31:1.
12 Oku sumbila olohuela, ku kuatisa oku yuvula ekandu. Suku wa sokiya okuti, olohuela vi sumbiwa kuenda oku lipekela kulume lukãi, oyo onjila yoku nena omuenyo womanu voluali. (Efetikilo 1:26-28) Ivaluka okuti, ovimatamata viuyali via sokiyiwila oku eca omuenyo una u kola ku Yehova. Omo liaco, vana va sole ukahonga kuenda vakahokolo, va lavisa Yehova locituwa cavo cĩvi coku lipekela. Omo okuti, ka va sumbilile oku kola kuolohuela, va lingila etimba liavo ekandu. (1 Va Korindo 6:18) Pole, oku sola Suku loku pokola kokuaye, kuenda oku sola omunu tua likuela laye, ci kuatisa oku yuvula ovituwa vi koka oku tundisiwa vekongelo.
13. Omunu una o linga ukahonga ‘onyõla ndati ovina vi kuete esilivilo’?
13 Tu sukila oku yuvula ovisimĩlo viekandu okuti, ka tu nenela ohali omanu vana tu sole. Elivulu Liolosapo 29:3, li popia hati: “U endaenda locipuepue o sandola ukuasi waye muẽle.” Ulume una o linga ukahokolo okuti, ka yongola oku likekembela, o nyõla ukamba waye la Yehova kuenda epata liaye. Ukãi waye o kuata esunga lioku tepa olohuela viavo. (Mateo 19:9) Nda pokati kolohueli pali umue wa linga ukahokolo okuti va tepa olohuela viavo, omãla va tala ohali. Kuenje ci sumuisavo omanu vakuavo. Oku kũlĩha ovitangi viyilila kukahonga, ci tu vetiya oku tamãlala layonjo aco. Ove hẽ, ku tava kondaka eyi?
14. Catiamẽla koku linga ekandu, nye tu lilongisa kelivulu Liolosapo 6:30-35?
14 Ocili okuti, ka kuli lacimue ci sitika ukahokolo. Oku kũlĩha ondaka yaco, ci vetiya omunu oku yuvula elinga liaco. Elivulu Liolosapo 6:30-35, li lekisa okuti, omanu va pondola oku kuata ukamba locimunu ci nyana omo lionjala. Pole, omunu o linga ukahonga, o suvukiwa omo liovisimĩlo viaye vĩvi. Momo ‘o nyõla omuenyo waye.’ Ocihandeleko Yehova a ecele ku Mose ca lekisile okuti, omunu wosi wa linga ukahonga o pondiwa. (Ovisila 20:10) Omunu wosi o linga ukahokolo o nena ohali ku vakuavo omo lioku tẽlisa olonjongole viaye vĩvi. Nda ka yongola oku likekembela, ka kala vocisola ca Suku. Omo liaco, o tundisiwa vekongelo liaye.
Kuata Utima wa Yela
15. Utima una wa momẽla “huti ño wa kakuiwa locivela ca sanya,” u kasi ndati?
15 Oco tu kale vocisola ca Suku, ka tu ka eceleli okuti, utima wetu u tindila loku linga akandu. Ka tuka kuami olonumbi violuali lulo lũvi. Tu sukila oku lunguka lakamba, lalivulu tu tanga, kuenda olomapalo tu nõla. Upostolo Paulu wa lungula hati: “Kotembo yesulilo vamue va konyoha ketavo ha va yevelela kaspiritu uhembi lo kovilongua Vieliapu. Ovilongua viaco vi longisiwa lomanu va popia ombambe luhembi, haivo ovitima viavo via momẽla huti ño via kakuiwa locivela ca sanya.” (1 Timoteo 4:1, 2) Utima una wa momẽla “huti ño wa kakuiwa locivela ca sanya,” u kasi ndepute lia sakuiwa. Ndaño okuti, omunu wa lamba pemome liaco, ka yevi vali evalo. Cimuamue haico catiamẽla kokuetu. Nda utima wetu wa tindila, ka u tu lungula vali ndomo tu yuvula omanu va tomba Suku, kuenje tu yapuka vekolelo lietu.
16. Momo lie ci kuetele esilivilo oku kuata utima wa yela?
16 Tu popeliwa lika nda tua kuata utima wa yela. (1 Petulu 3:21) Omo lioku kuatela ekolelo vosonde ya Yesu, utima wetu wa yelisua kovilinga viokufa okuti ‘tu vumba Suku o kasi lomuenyo.’ (Va Heveru 9:13, 14) Nda tu amamako oku linga ekandu, utima wetu u tindila, kuenje ka tu kala vali omanu va yelisiwa oco va vumbe Suku. (Tito 1:15) Pole, lekuatiso lia Yehova, tu pondola oku kuata utima wa yela.
Olonjila Vikuavo Vioku Yuvula Ovituwa Vĩvi
17. ‘Oku kuama Yehova lutima wosi,’ ku kuete esilivilo lie?
17 ‘Kuama Yehova lutima wosi’ ndeci Kalembe a linga. (Esinumuĩlo 1:34-36) Linga ovina Yehova a ku yonguila, kuenda oku yuvula “oku lia komesa yolondele.” (1 Va Korindo 10:21) Yuvulavo oku tomba Suku. Litekula lokulia kuespiritu kuna ku kasi komesa ya Yehova. Yuvula oku yapuisiwa lalongiso esanda. (Va Efeso 6:12; Yuda 3, 4) Tiamisila utima kovina viespiritu poku tanga Embimbiliya, loku endaenda kolohongele, kuenda kupange woku kunda. Nda wa kuama Yehova lutima wosi, loku lekisa ombili kupange wa Ñala, oka kuata esanju lialua.—1 Va Korindo 15:58.
18. Oku sumbila Yehova ku tiamisiwila ndati komuenyo wove?
18 Nõlapo oku vumba Suku “lefendelo lia sunguluka, kuenda lesumbilo loku liuvika.” (Va Heveru 12:28) Oku sumbila Yehova ku ku vetiya oku yuvula ovina viosi vĩvi, loku pokola konumbi Petulu a popia hati: “Nda vu likutilila hoti: A Isietu, ku o tetuluila vosi omunu omunu ndovilinga viaye, okuti, ka kuete ocame, oco, kali lesumbilo osimbu vu kasi olonungi kilu lieve.”—1 Petulu 1:17.
19. Momo lie o sukilila oku kapako ovina wa siata oku lilongisa Vondaka ya Suku?
19 Pokola kovina wa siata oku lilongisa Vondaka ya Suku. Nda wa cilinga, oka yuvula ekandu. Kuenje, oka kala pokati komanu “va tẽla oku tepisa pokati keci ciwa leci cĩvi, omo olondunge viavo via pindisua.” (Va Heveru 5:14) Kũlĩhĩsa olombangulo viove lovituwa viove okuti, wendaenda ndomunu ukualondunge loku ‘yukisa oloneke viove leci cesunga.’ Kuenje, o ‘limbuka ocipango ca Yehova,’ loku amamako oku ci linga.—Va Efeso 5:15-17; 2 Petulu 3:17.
20. Momo lie tu sukilila oku yuvula ocipululu?
20 Kuka kuate ocipululu ale oku livela ovina via vakuene. Pokati Kovihandeleko Ekũi Yehova a ecele ku va Isareli, pa kala cimue ci popia hati: “Ku ka livele onjo yukuẽle, ku ka livele ukãi wukuẽle, pamue upika waye, pamue ongombe yaye, pamue ocimbulu caye. Cosi cukuẽle ku ka ci livele.” (Etundilo 20:17) Ocihandeleko eci ca teyuilile olonjo viavo, lakãi, lapika vavo, kuenda ovina vikuavo. Handi vali, Yesu wa popia hati, ocipululu ci vĩhĩsa omunu.—Marko 7:20-23.
21, 22. Nye omunu a sukila oku linga oco a yuvule oku wila vekandu?
21 Lunguka lolonjongole viove okuti, ka vi ku tuala koku linga ekandu. Ndonge Tiago wa popia hati: “Omunu omunu o yonjaiwa eci a tambiwa loku kokiwa loloñeyi viaye muẽle. Oloñeyi, eci vi mina, vi cita ekandu, lekandu, eci li kula, li cita okufa.” (Tiago 1:14, 15) Nda omunu umue kosimbu wa kuatele ocitangi coku nyua calua ovina vi koluisa, o sukila oku yuvula ovina viaco vonjo yaye. Nda Ukristão kupange waye woku sanda eteku wa siata oku yonjiwa lalume ale lakãi oco a linge ukahonga, o sukila oku siapo upange waco.—Olosapo 6:23-28.
22 Kuka seteke oku linga ovina vi tuala kekandu. Oku lekisa onjongole yombambe komunu ku yongola oku kuela, kuenda ovisimĩlo vĩvi, ci tuala koku linga ukahonga ale ukahokolo. Oku popia uhembi kovina vitito, ci vetiya omunu oku kemba ovina vinene, kuenje o linga ohembi. Oku nyana ovina vitito, ci tuala omunu koku sina. Kuenje o fetika oku nyana ovina vinene. Oku kuata ovisimĩlo vioku tomba Suku, ku tuala omunu koku siapo ocisoko caye. —Olosapo 11:9; Esituluilo 21:8.
Nye o Sukila Oku Linga Nda wa Lueya?
23, 24. Elembeleko lie tu sanga kelivulu lia 2 Asapulo 6:29, 30; Olosapo 28:13?
23 Ka kuli omunu wa lipua. (Ukundi 7:20) Pole, nda wa linga ekandu, o sanga elembeleko poku kũlĩha ohutililo Soma Salomone a linga eci va tumbika ku Yehova onembele yoko Yerusalãi. Eye wa popia hati: “Nda omunu umue pamue omanu vove vosi va Isareli va likutilila ohutililo yimue loku lomba elombelo limue, omunu omunu loku kũlĩha ohali yaye muẽle lesumuo liaye muẽle loku oluĩla ovoko konjo yilo; oco ove, kilu, kocitumãlo cove, yevelela, ecela, kuenje muisa omunu omunu eci ca sesamẽla olonjila viaye viosi, momo ove wa kũlĩha utima waye (ale wa kũlĩha ovitima viomanu).”—2 Asapulo 6:29, 30.
24 Yehova wa kũlĩha ovitima viomanu vosi, kuenda ecela akandu. Pole, elivulu Liolosapo 28:13 li popia hati: “U o limbika akandu aye ka tẽla oku sumũlũha, puãi u o litavela kuenje o tindukako eye o sanga ohenda.” Nda tua likekembela loku siapo akandu etu, tu kuatisiwa lohenda ya Suku. Oco hẽ, nda wa hongua kespiritu nye o sukila oku linga oco o kale vocisola ca Suku?
O Tambulula Ndati?
• Tu tẽla ndati oku kala vocisola ca Yehova?
• Oku sola Yehova la Kristu, ci tu kuatisa ndati oku yuvula ekandu?
• Ocisola tu kuetele vakuetu, ci tu kuatisa ndati oku yuvula ukahonga?
• Olonjila vipi vi tu kuatisa oku yuvula eci cĩvi?
[Elitalatu kemẽla 8]
Yuda wa lekisa ndomo tu kala vocisola ca Suku
[Elitalatu kemẽla 9]
Oku nyõla olohuela ku nena ohali komunu tua likuela laye kuenda komãla
[Elitalatu kemẽla 10]
Ove hẽ wa nõlapo oku kuama Yehova ndeci Kalembe a linga?
[Elitalatu kemẽla 11]
Oku likutilila olonjanja viosi ku kuatisa oku tamalãla layonjo