Ndomo tu Limbuka Etavo Liocili
ATAVO alua a siata oku popia hati, elongiso liavo li tunda ku Suku. Pole, tu sukila oku kapako olondaka upostolo Yoano a popia hati: “A vakuacisola, ko ka tavi kaspiritu osi, puãi seteki aspiritu nda a Suku nda ndati. Momo ovaprofeto vesanda va lua va sandukila voluali.” (1 Yoano 4:1) Ndamupi tu kũlĩhĩsa ovina vi tunda ku Suku?
Ovina viosi vi tunda ku Suku, vi situlula ovituwa viaye, capiãla enene ocisola. Kũlĩhĩsa epondolo lietu lioku yeva alemba. Olio, li tu kuatisa oku lehũla alemba awa oloneleho, ale olombolo via yokiwa ndopo. Epondolo liaco li situlula ocisola ca Yehova. Epondolo lietu lioku vanja oku iñila kuekumbi, ocimbiambiulu, ale ocinjola comõla, li lekisavo ocisola Suku a tu kuetele. Cimuamue haico catiamẽla kepondolo lietu lioku yevelela ovisikilo viwa, oku imba kuolonjila, ale ondaka yomunu umue tu sole. Ekalo lietu ndomo tua lulikiwa, li situlula ocisola ca Yehova ndaño okuti, ka tua lipuile. Eli olio esunga lieci Yesu a popela hati: “Esumũlũho li tunda koku eca olio lia lua, eli li tunda koku tambula li sule.” (Ovilinga 20:35) Etu tua siatavo oku lekisa ocisola ku vakuetu, momo tua lulikiwa ‘lesetahãlo lia Suku.’ (Efetikilo 1:27) Yehova ndaño okuti o kuete ovituwa vialua, pole, ekalo liaye liosi liatiamẽla lika kocisola.
Ovisonehua viosi vi tunda ku Suku vi situlula ocisola caye. Atavo oluali a kuete ovisonehua vialua viosimbu. Anga hẽ, ovisonehua viaco via siata oku vetiya atavo oku lekisa ocisola ca Suku?
Kuli ovisonehua vialua viatiamẽla ketavo, pole ka vi lombolola ndomo Suku a lekisa ocisola kokuetu, kuenda ndomo tu pondola oku u sola. Handi vali, omanu valua ka va siatelevo oku sanga etambululo kepulilo liokuti: ‘Ocisola ca Yehova ci limbukiwa ndati kovina a lulika, nda ohali levĩho vi kasi oku amamako?’ Embimbiliya olio lika elivulu liosimbu liatiamẽla ketavo li tu lomboluila ocisola ca Suku. Olio li tu longisa ndomo tu lekisa ocisola.
Elivulu li Lombolola Eci Catiamẽla Kocisola
Embimbiliya li popia hati, Yehova eye “Suku yocisola.” (2 Va Korindo 13:11) Olio li lombolola ndomo ocisola ca vetiya Yehova oku eca ku Adama la Heva omuenyo wa lipua una okuti, ka va vela ndaño okufa. Pole, omo lioku sinila uviali wa Suku va nena ohali komanu. (Esinumuĩlo 32:4,5 Va Roma 5:13) Noke Yehova wa linga eliangilio lioku tumbulula ovina Adama la Eva va nyelisa. Ondaka yaye yi popia hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.” (Yoano 3:16) Ovisonehua vi Kola ovio lika vi tu sapuila catiamẽla kocisola ca Suku. Momo vi lekisa okuti, Suku wa pongiya uviali umue u kasi peka lia Yesu, okuti owo uka nena ombembua komanu vakuesunga.—Daniele 7:13, 14; 2 Petulu 3:13.
Embimbiliya poku lombolola ocikele comunu lia popia hati: “Sola Ñala Suku yove lutima wove wosi lomuenyo wove wosi lolondunge viove viosi. Eci oco ocihandeleko cinene, haico catete. Kuenje cavali ca lisoka laco, ceci, okuti: Sola u o lisungue love ndeci o lisole ove muẽle. Ovihandeleko viosi kuenda cosi ca longisa ovaprofeto ca tunda kovihandeleko evi vivali.” (Mateo 22:37-40) Embimbiliya li lekisa okuti, olio Ondaka ya Suku. Omo okuti, li situlula ovituwa viaye, tua kolela okuti lia tunda ku ‘Suku yocisola.’—2 Timoteo 3:16.
Poku kapako onumbi eyi, tu pondola oku limbuka ovisonehua vi tunda ku Suku. Afendeli vocili va limbukiwilavo kocisola, momo va kuama ongangu ya Suku yoku lekisa ocisola.
Ndomo tu Limbuka Omanu va Sole Suku
Omanu vana va sole Yehova, va limbukiwa ciwa ‘koloneke vilo via sulako.’ Cilo omanu va linga “vakuakulisola, vakuakusola olombongo, haivo . . . vakuakusola calua esanju, [okuti] Suku ci sule.”—2 Timoteo 3:1-4.
Ndamupi o limbuka omanu va sole Yehova? Embimbiliya li popia hati: “Oku sola Suku ku lomboloka oku pokola kovihandeleko viaye. Ovihandeleko viaye ka vi lemi.” (1 Yoano 5:3) Oku sola Suku ku vetiya omanu oku sumbila olonumbi Viembimbiliya. Ondaka ya Suku yi kuete ovihandeleko viatiamẽla koku lipekela kuenda kolohuela. Oyo yi lekisa okuti, omanu vana va tokekisa olohuela, ovo lika va kuete omoko yoku lipekela. Handi vali, va sukila oku amamako oku kala pamosi momo olohuela ka ci tava okuti vi tepiwa. (Mateo 19:9; Va Heveru 13:4) Ukãi umue kofeka yo Espanya okuti wa pita kosikola yo Teologia, eci a endele kohongele Yolombangi via Yehova wa yeva olonumbi Viembimbiliya viatiamẽla kovituwa viomanu. Eye popia hati: ‘Nda pamisiwa calua. Momo kua lingiwa olohundo vi lombolola ciwa olonumbi Viembimbiliya. Nda pamisiwavo lomunga yi kasi pokati kavo, kuenda ovituwa viavo viwa.’
Akristão vocili ka va limbukiwila lika kocisola va lekisa ku Suku. Pole, va limbukiwilavo kocisola va lekisa ku vakuavo. Upange wavo wa velapo, oku sapuila omanu catiamẽla Kusoma wa Suku okuti, owo elavoko liomanu vosi. (Mateo 24:14) Oku longisa omanu oco va kuate ukũlĩhĩso wocili, oco ci nena asumũluho ka a pui. (Yoano 17:3) Akristão vocili va lekisavo ocisola volonepa vikuavo. Ovo va eca ekuatiso ku vana va tala ohali. Otembo yimue eci kofeka yo Italia kua pitile ocilemawe cimue, ukanda umue wasapulo wa lombolola okuti, Olombangi via Yehova kofeka yaco, ‘via eca ekuatiso komanu valua va pesela ovina viavo. Pole, ekuatiso liaco ka va liecele lika komanu vakuetavo liavo. Va liecavo komanu vakuatavo akuavo.’
Akristão vocili, ka va lekisa lika ocisola ku Suku kuenda komanu va lisungue lavo. Ovo, va lekisavo ocisola pokati kavo. Yesu wa popia hati: “Ndu wihi ocihandeleko cokaliye cokuti, lisoli pokati. Ndeci ame ndo soli, haico ene, lisolivo pokati. Kokulisola kuene pokati oko omanu vosi va limbukila okuti vulondonge viange.”—Yoano 13:34, 35.
Anga hẽ, ocisola Akristão vocili va likuetele pokati ca litepa leci ca siata pokati komanu vakuavo? Ukãi umue Kofeka yo Bolivia o tukuiwa hati Ema, wa limbuka ocili caco. Eye o talavaya volupale luo La Paz muna okuti, apata olohuasi ka va litengi lolohukũi. Eye wa popia hati: ‘Eci nda endele onjanja yatete kohongele Yolombangi via Yehova, nda mola ulume umue wa wala ciwa okuti wa tumãla lukãi umue wo kofeka yo India, kuenda va kala oku sapela. Lalimue eteke nda muile ocituwa caco. Keteke liaco nda limbuka okuti, ava ovo omanu va Suku.’ Cimuamue haico ca pita lufeko ukukavo kofeka yo Brasil o tukuiwa hati, Miriam. Eye wa popia hati: ‘Komuenyo wange sia kũlĩhĩle eci ci ndi kuatisa oku kuata esanju vepata liange. Pole, pokati Kolombangi via Yehova, opo nda limbukila ndomo ocisola ci lekisiwa.’ Usongui umue wovingungu vio Televisãu kofeka yo Estados Unidos wa popia hati: ‘Nda omanu vosi va pokuile kolonumbi vietavo liene, vofeka nda ka muli ovitangi. Cilo nda limbuka okuti, vakuetavo liene va likuetele ocisola pokati kuenda va kolela lika Kululiki.’
Sanda Efendelo Liocili
Ocisola oco ondimbukiso yefendelo liocili. Yesu oku sanda efendelo liocili, wa ku sokisa loku sanda onjila yiwa kuenda oku nõla oku endelamo. Onjila yaco oyo lika yi tuala komuenyo ko pui. Eye wa popia hati: “Iñilili vombundi ya sukatela, momo ombundi yoku iñila koku nyoleha ya tanda, kuenda onjila yendako ya sanjavala, kuenje va lua va iñililamo. Puãi ombundi yoku iñila komuenyo ya sukatela, lonjila yaco ya tĩla, kuenje vañamiñami va yi sanga.” (Mateo 7:13, 14) Voluali muli lika ocisoko cimosi Cakristão vocili va kasi oku enda la Suku vonjila yefendelo liocili. Omo liaco, ci kuete esilivilo oku kũlĩhĩsa etavo wa nõla. Nda onjila yocili wa yi sanga kuenda wa nõla oku endelamo, oka kuata omuenyo wa velapo. Momo etavo liaco liatiamẽla kocisola.—Va Efeso 4:1-4.
Sokolola ño esanju o pondola oku kuata osimbu wamamako oku endela vonjila yefendelo liocili. Efendelo liaco, li lomboloka oku endaenda la Suku. Ku Yehova o li longisako olondunge, kuenda ocisola osimbu wamamako oku kala ciwa lavakuene. Handi vali, o lilongisavo eci catiamẽla kesilivilo liomuenyo, kuenda oku kuata elomboloko liolohumiyo Viaye lelavoko lio kovaso. Kuenje, lalimue eteke oka livela omo lioku kuama efendelo liocili.
[Elitalatu kemẽla 3]
Pokati kalivulu osi osimbu atiamẽla ketavo, Embimbiliya olio lika li situlula ocisola ca Suku
[Elitalatu kemẽla 5]
Akristão vocili va limbukiwila kocisola cavo