Ove Hẽ O Tava Oku Kuatisiwa La Yehova?

“Yehova eye oñuatisi yange, si kuata usumba.”—VA HEVERU 13:6.

1, 2. Momo lie ci kuetele esilivilo oku tava kekuatiso lia Yehova?

SOKOLOLA okuti o kasi oku lamana omunda yimue yinene. Pole, ku kasi lika liove. Omunu umue o lieca kokuove oco a ku songuile. Eye wa loñoloha vali calua okuti ove ci sule. Kuenda o kuete ongusu yalua okuti yove yi sule. Kuenje lepandi, eye endela ponele yove. Eye o limbuka okuti ove olonjanja vimue wa siata oku lilondoyoka. Pole, omo okuti oku yonguila uwa, eye o nyanyumũla eka liaye kuenje oku yakela. Ca piãla enene, pocinãla cina pali ohele. Anga hẽ ove nda wa likala ekuatiso liaco? Ocili okuti, nda kua likalele. Momo omuenyo wove u kasi kohele.

² Etu Tuakristão tu kasivo vonjila yimue yeyuka ovilondokua. Anga hẽ tu sukila oku endela vonjila yaco ya sukatela lika lietu? (Mateo 7:14) Sio, momo Embimbiliya li lekisa okuti tu kuete Usongui umue wa velapo o pondola oku tu songuila. Usongui waco Yehova Suku. Eye oyongola okuti omanu va endela kumue laye. (Efetikilo 5:24; 6:9) Anga Yehova wa siata muẽle oku kuatisa omanu vaye? Eye o tu sapuila hati: “Ame Yehova, Suku yove, hu kuata peka liondio. Ame muẽle mopia love siti, Ku ka kuate usumba, hu kuatisa.” (Isaya 41:13) Yehova o kasi ndusongui una wa tukuiwa konano. Momo eca eka liaye kuenda o lekisa ukamba komunu wosi o likolisilako oku endela kumue laye. Ocili okuti, lomue pokati ketu o likala ekuatiso liaco.

3. Apulilo api tuka konomuisa vocipama cilo?

³ Vocipama catete, tua lilongisa olonjila vikuãla Yehova a kuatisa lavio omanu vaye kosimbu. Anga hẽ koloneke vilo eye wa siatavo oku kuama olonjila viaco poku kuatisa omanu vaye? Ndamupi tu limbuka okuti tu kasi oku tava kekuatiso liaco? Tu konomuisi apulilo ava. Nda tua ci linga, tuka kuata ekolelo liokuti Yehova eye Oñuatisi yetu.—Va Heveru 13:6.

Ekuatiso Liovangelo

4. Momo lie omanu va Suku koloneke vilo va sukilila oku kuata ekolelo lioku kuatisiwa lovangelo?

⁴ Anga koloneke vilo ovangelo va siata muẽle oku kuatisavo omanu va Yehova? Oco muẽle, va siata. Ocili okuti, koloneke vilo ovo ka va limõlehĩsa poku yovola afendeli va Yehova kovitangi. Ndaño kosimbu, ovangelo va enda oku limõlehisa ño olonjanja vimue. Ovina vialua ovo va lingaile kosimbu, ka via limbokawaile lomanu vosi. Cimuamue haico etaili. Pole, omanu va Yehova, vana va limbokaile ekuatiso liovangelo, va enda oku kolisiwa calua. (2 Olosoma 6:14-17) Etu tu kuetevo esunga lioku yeva ekoliso liaco.

5. Embimbiliya li lekisa ndati okuti ovangelo va kongeliwavo vupange woku kunda koloneke vilo?

⁵ Ovangelo va Yehova va sakalala vali enene lupange tu kasi oku linga koloneke vilo. Upange waco hẽ upi? Tu pondola oku sanga etambululo kelivulu Liesituluilo 14:6, oku tu tanga hati: “Oco nda mola ungelo ukuavo. Wa kala loku palala vokati kilu. Wambata esapulo liwa liotembo ka yi pui oku sapula komanu va tunga kilu lieve, lo kolofeka viosi, lo kapata osi, lo ku vakualimi aiñi aiñi osi, lo komanu vosi.” “Esapulo [liaco] liwa liotembo ka yi pui” hailio limuamue ‘londaka yiwa yusoma.’ Yesu wa popele hati, ondaka yaco “yi kundilua kuoha koluali, ha yi lingi uvangi kolofeka viosi” oco esulilo liya noke. (Mateo 24:14) Ocili okuti, ovangelo havoko va kasi oku kundila omanu olondaka viwa. Yesu wa eca ocikele caco komanu. (Mateo 28:19, 20) Anga hẽ ka ci sanjuisa oku kũlĩha okuti osimbu tu tẽlisa ocikele caco tu kuatisiwa lovangelo va Suku?

6, 7. (a) Nye ci lekisa okuti ovangelo va kasi oku kuatisa kupange woku kunda? (b) Ndamupi tu pondola oku kuatisiwa lovangelo va Yehova?

⁶ Kuli ovovangi alua a lekisa okuti tua siata oku kuatisiwa lovangelo kupange wetu. Olonjanja vimue tua siata oku yeva okuti, Olombangi via Yehova kupange wavo woku kunda, via li sanga lomunu umue okuti ndopo a likutilila ku Suku oku pinga ekuatiso lioku sanga ocili Cembimbiliya. Ovolandu aco a siata oku yeviwa olonjanja vialua. Omo liaco, ka ci tava oku a sokisa ndocina cimue ka ca songuiwile. Lekuatiso liovangelo vaco, omanu valua va kasi oku lilongisa oku linga eci ‘ungelo una o kasi oku palala vokati kilu’ a popia hati: “Sumbili Suku. U wihi ulamba.”—Esituluilo 14:7.

⁷ Ove hẽ o yongola oku kuatisiwa lovangelo va Yehova? Nda oco, likolisilako oku talavaya kupange woku kunda. (1 Va  Korindo 15:58) Nda tua likolisilako oku tẽlisa ocikele cetu cupange tua tambula ku Yehova, tuka kuatisiwa lovangelo.

Ekuatiso Lia Kesongo Kovangelo

8. Ocikele cipi Yesu a kuete kilu? Kuenda eci ci tu ĩha ekolelo lia nye?

⁸ Yehova wa tu ĩhavo ekuatiso liungelo ukuavo. Elivulu Liesituluilo 10:1, li tukula “ungelo ukuavo wa pama” okuti “ocipala caye ca soka ndekumbi.” Ungelo waco, Yesu Kristu kulamba waye wokilu. (Esituluilo 1:13, 16) Anga Yesu ungelo muẽle? Oco muẽle. Eye o tukuiwa hati, “ungelo unene” haeye “usongui wovangelo” vakuavo. (1 Va Tesalonike 4:16) Yesu eye wa velapo pokati komãla va Yehova vokilu. Yehova wo wĩha ocikele coku songuila olohoka Viaye viovangelo. Omo liaco, o pondola oku eca ekuatiso liocili komanu va Yehova. Oco hẽ ndamupi eye a ci linga?

9, 10. (a) Ndamupi Yesu alinga “oñutisi yetu” eci tu lueya? (b) Ekuatiso lipi tu upa kongangu ya Yesu?

⁹ Upostolo Yoano wa soneha hati: “Nda umue o linga ekandu tu kuete oñuatisi yi tu livondelela kovaso a Isia, eye Yesu Kristu ukuesunga.” (1 Yoano 2:1) Momo lie Yoano a popela okuti, Yesu eye “oñuatisi” yetu, ca piãla enene nda tua “linga ekandu”? Ocili okuti, vosi yetu tua siata oku lueya eteke leteke. Kuenda ekandu lituala koku fa. (Ukundi 7:20; Va Roma 6:23) Omo liaco, Yesu wa eca omuenyo waye oco a tu yovole kakandu etu. Kuenda eye o kasi kovaso a Isietu ukuahenda oku tu livondelelako. Vosi yetu tu sukila ekuatiso liaco. Pole tu tava hẽ ndati kekuatiso liaco? Tu sukila oku likekembela akandu etu kuenda oku sandiliya ongecelo ku Yehova vonduko yocisembi ca Yesu. Tu sukilavo oku yuvula oku pitulula akandu etu.

¹⁰ Yesu wa tu fila. Pole, wa tu silavo ongangu tu sukila oku kuama. (1 Petulu 2:21) Ongangu yaye yi tu kuatisa oku suñamisa olongenda vietu oco tu yuvule oku linga ekandu linene. Kuenda oku amamako oku sanjuisa Yehova Suku. Anga hẽ ka tua sanjukile omo liekuatiso liaco? Yesu wa likuminyilevo olondonge viaye okuti oka va tumisa oñuatisi yikuavo.

Ekuatiso Liespiritu Sandu

11, 12. Espiritu lia Yehova nye? Kuenda unene wespiritu liaco wa soka ndati? Anga hẽ tu sukila ekuatiso liaco koloneke vilo?

¹¹ Yesu wa likuminyile hati: ‘Ndi pinga ku Isia okuti o wihi Oñuatisi yikuavo yi kala ño-o hũ lene. Oñuatisi yaco, espiritu liocili lina okuti oluali ka lu tẽla oku li tambula.’ (Yoano 14:16, 17) “Espiritu [liaco] liocili” espiritu sandu. Olio hamunuko, pole ongusu ya pama ya Yehova. Ongusu yespiritu liaco ka yi sulila. Ongusu yaco, oyo Yehova a lulika layo oluali lovina viosi vi kasimo. Haiyo a linga layo ovikomo kuenda oku situlula ovinjonde viatiamẽla kocipango caye. Koloneke vilo, Yehova ka kasi vali oku tuma espiritu liaye oku linga ovina via soka ndevi. Eci hẽ ci lekisa okuti ka tu li sukila?

¹² Ocili okuti ‘koloneke vilo viohali’ tu sukila vali enene espiritu lia Yehova okuti kosimbu ci sule. (2 Timoteo 3:1) Olio li tu kuatisa oku pandikisa kovitangi. Li tu kuatisavo oku kuata ovituwa viwa vi tu ecelela oku kuata ukamba la Yehova. Kuenda oku kuata ukamba la vamanji. (Va Galatia 5:22, 23) Ndamupi tu pondola oku tambula ekuatiso liaco ku Yehova?

13, 14. (a) Momo lie tu kuetele ekolelo liokuti Yehova eca espiritu sandu kuava vo pinga? (b) Ovilinga vipi vika lekisa okuti ka tu kasi oku tava kekuatiso liespiritu sandu?

¹³ Catete, tu sukila oku likutilila ku Suku oku pinga espiritu sandu liaco. Yesu wa popia hati: “Nda ene wa tuwi . . . oku linga cĩvi, wa kũlĩhi oku eca oviali viwa komãla vene, Isiene ukuailu hẽ, ka velipo oku avela espiritu sandu kuava vo pinga?” (Luka 11:13) Yehova eye Isia yetu wa velapo. Nda tua pinga kokuaye espiritu sandu lekolelo, eye oka tu lĩha. Pole, ciwa okuti tu lipula ndoco: Anga hẽ tua siata oku pinga espiritu liaco? Tu kuete esunga lialua lioku pinga espiritu sandu volohutililo vietu.

¹⁴ Cavali, etu tu tava kekuatiso liespiritu sandu nda tua pokola kokualio. Oco ci tu lomboloke ciwa, tu sokololi ndoco: Ukristão umue o kasi oku liyaka locitangi coku tala omanu va kasi epolõla. Eye wa likutilila oku pinga ekuatiso liespiritu sandu oco a siepo ocituwa caco cĩvi. Noke wa pinga ekuatiso kakulu vekongelo. Kuenje ovo vo sapuila okuti o sukila oku kuata ongusu yoku siapo ocituwa caco. Kuenda vowimbavo onumbi oco a yuvule olokasete ale alivulu a lekisa ovina viaco vĩvi. (Mateo 5:29) Oco hẽ nye ci pita lomunu waco nda ka tavele kolonumbi viaco, kuenje amamako oku tala ovina viaco? Anga hẽ o kasi oku linga ndeci a pinga vohutililo yaye? Ale o kasi kohele yoku sumuisa espiritu sandu lia Suku, okuti noke ka tambula vali ekuatiso lialio? (Va Efeso 4:30) Ocili okuti, vosi yetu tu sukila oku likolisilako oco tu amameko oku tambula ekuatiso liespiritu lia Yehova.

Ekuatiso Liondaka ya Suku

15. Ndamupi tu lekisa okuti tua kapako Embimbiliya?

¹⁵ Embimbiliya lia siata oku kuatisa omanu valua va Yehova tunde kosimbu. Ka tu ka tendi Embimbiliya ndocina cimue ka ci silivila. Tu sukila oku limbuka unene Walio vomuenyo wetu. Voku tambula ekuatiso liaco, mua kongela oku li kolisilako. Omo liaco, tu sukila oku kuata ocituwa coku li tanga olonjanja viosi.

16, 17. (a) Osamo 1:2, 3 yi lekisa ndati onima yi iyilila koku tanga Ondaka ya Suku? (b) Osamo 1:3 yi lekisa ndati okuti tu sukila oku likolisilako?

¹⁶ Catiamẽla komunu wa sumba Suku, Osamo 1:2, 3 yi popia hati: “Te ovihandeleko via Yehova ovio a sanjukila. O sokolola ovihandeleko viaye utanya luteke. Wa linga nduti wa kũliwa kolondui viovava, haiwo wimaima epako liawo kuvo waco. Lemela liawo ka li uwuka. Cosi a linga o sumũlũha laco.” Ove hẽ o tẽla oku limbuka etosi lia velapo vovinimbu evi? Ca leluka oku tanga olondaka evi loku sima okuti vi tu ivaluisa oku tumãla vulembo wuti umue wa kũliwa konele yolui. Oku puyukila vulembo waco vekalasoko liutanya, ci kavuluisa etimba. Pole osamo eyi ka yi kasi oku tu vetiya oku puyuka. Oyo yi tu vetiya oku likolisilako. Ndamupi hẽ?

¹⁷ Kũlĩhĩsa okuti, uti waco ka wa li tundilile ño owo muẽle konẽle yolui. Kuli omunu wa wu ‘kũlako.’ Kuenda uti waco, hutiko ño wulembo. Pole uti wapako’ “wa kũliwa kolondui viovava.” Oco hẽ uti umosi u kũliwa ndati kolondui vialua viovava? Omunu una okuete ocumbo capako, pamue o fẽla ololekua vialua vi tapela oviti viaye viapako. Cimuamue haico konepa yespiritu. Nda tu kasi oku ima apako, momo okuti kua lingiwa elikolisilo lialua lioku tu kuatisa. Ca sukila oku likongela locisoko ca Yehova cina ca siata oku tu ĩha okulia kualua kuespiritu. Okulia kuaco kua soka ndovava ana a tapela uti. Pole, oco tu kuatisiwe, tu sukila oku likolisilako oku litekula lokulia kuaco. Velikolisilo liaco mua kongela oku tanga Ondaka ya Suku loku konomuisa ovina tua tanga. Kuenda oku vi sokolola loku vi kapako komuenyo wetu. Nda tua ci linga, tu pondola oku ima apako alua espiritu.

18. Nye tu sukila oku linga oco tu kuatisiwe lolonumbi Viembimbiliya?

¹⁸ Embimbiliya li tu kuatisa lika nda tua li tanga. Embimbiliya ka li kasi ndocina cimue celumbu okuti li lituvula olio muẽle, kuenje lieca atambululo kapulilo etu. Nda tu kuete cimue ca tu tatama, tu sukila oku sanda “ukũlĩhiso wa Suku” ndacina va sanda sanda ukuasi wa solekiwa. (Olosapo 2:1-5) Tu sukilavo oku konomuisa lutate Ovisonehua oco tu sange olonumbi tu sukila. Etu tu kuete alivulu alua a tu kuatisa oku linga ekonomuiso liaco. Nda tua sandiliya ukũlĩhĩso wasuapo Vondaka ya Suku, tuka sanga ekuatiso lia Yehova.

Ekuatiso Lia Vamanji

19. (a) Momo lie Utala Wondavululi lo Despertai! vi tendiwila ndekuatiso li tunda ku vamanji? (b) Anga wa kuatisiwile ale locipama cimue Cutala Wondavululu ale co Despertai!?

¹⁹ Omanu va Yehova otembo yosi va siata oku likuatisa pokati. Anga hẽ Yehova wa pongoloka? Sio, ka pongolokele. Ocili okuti omunu lomunu pokati ketu, o tẽla oku ivaluka ekuatiso limue a tambuile ku vamanji. Kuenda ekuatiso liaco wa li tambula muẽle kotembo a lisukilile. Ove hẽ o tẽla oku ivaluka ovipama vimue Viutala Wondavululi ale vio Despertai! okuti via ku ĩha elembeleko wa sukilile? Kuenda wa sangelemo ovipama vimue via ku kuatisa kocitangi cimue wa kala oku liyaka laco ale oku pandikisa kekolelo? Yehova eye wa ku ĩha ekuatiso liaco poku vetiya “ukuenje wa kolelua haeye wa lunguka” oco a ece ‘okulia kuaco kotembo ya tukuiwa.’—Mateo 24:45-47.

20. Ndamupi akulu vekongelo va tendiwa ‘ndolongavelo’ via eciwa la Yehova?

²⁰ Pole, olonjanja vimue tu tambula ekuatiso li tunda muẽle povaka a vamanji. Pamue umue ukulu wekongelo o linga ohundo yi vetiya utima wetu. Ale pamue o tu pasuisa konjo yetu oku tu ĩha ekoliso eci tu pita lovitangi. Ale pamue o tu ĩha elungulo li tu kuatisa oku limbuka kuenda oku yula ehonguo limue. Manji umue ukãi wa pandula calua ekuatiso a tambuile kukulu wekongelo. Eye wa soneha hati: “Eteke limue luteke, nda likutilila ku Yehova oco a numise umue ndi pondola oku vangula laye. Omẽle yaco, nda tunda kupange woku kunda lukulu umue wekongelo. Osimbu tua kala loku enda, eye wa ndi vetiya oku vangula cosi ca kala vutima wange. Eye wa vangula lame locikembe. Kuenda wa ñuatisa oku limbuka ndomo Yehova a siata oku ndi kuatisa vokuenda kuanyamo. Ndi pandula calua Yehova omo a numisa ukulu waco wekongelo.” Poku linga ndoco, akulu vekongelo va lekisa okuti ovo “olongavelo” via eciwa la Yehova kuenda la Yesu Kristu oco va tu kuatise oku pandikisa vonjila yomuenyo.—Va Efeso 4:8.

21, 22. (a) Eci vosi vekongelo va kapako olondaka vi sangiwa kelivulu lia Va Filipoi 2:​4, ku iyilila onima ye? (b) Momo lie ovilinga vitito viocisola vi kuetelevo esilivilo?

²¹ Akulu vekongelo havoko lika va sesamẽla oku ci linga. Omunu lomunu vekongelo o sukila oku kapako olondaka vi sangiwa Vembimbiliya via linga hati: “Lomue ka ka sokolole ovina viaye lika, puãi omunu omunu a sokolole ovina via vakuavo.” (Va Filipoi 2:4) Eci omunu lomunu vekongelo a likolisilako oku kapako olonumbi evi, ku iyilila ovilinga vialua viwa. Konomuisa ocitangi cimue manji umue lukãi waye, va pita laco. Eteke limue manji wa endele lomõlaye ufeko kovenda. Poku tiuka, va tusuiwa lekãlu. Omõlaye ufeko haipo a fila. Manji wa lemẽhĩwa calua kuenje vo tuala kosipitali. Eci a tunda kosipitali, ka kuatele vali ongusu yoku litata eye muẽle. Ukãi waye wa sumuile calua, okuti ka tẽlele vali oku tata ulume lika liaye. Omo liaco, vamanji vamue vekongelo, va va kovonga oco va kale lavo konjo yavo olosemana vimue.

²² Ocili okuti, ovilinga viohenda ka vi lekisiwa lika kovitangi vinene ndevi via tukuiwa ndeti. Olonjanja vimue tua siatavo oku tambula ekuatiso liatiamẽla kovitangi vitito. Ndaño okuti, ekuatiso tua tambula litito, lopo tu sukila oku li panduila. Ove hẽ o tẽla oku ivaluka elembeleko wa tambuile kumanji umue? Ale elinga limue liocisola okuti lia ku kuatisa? Yehova eye wa vetiya manji yaco oku ku ĩha ekuatiso.—Olosapo 17:17; 18:24.

23. Yehova o tenda ndati ekuatiso tu eca ku vamanjetu?

²³ Anga hẽ ove wa yonguilevo oku vetiyiwa la Yehova oco o kuatise vakuene? Ove o kuete epuluvi lioku ci linga. Kuenda Yehova o ka sola calua elikolisilo liove. Vondaka Yaye tu sangamo olondaka via popia hati: “U o linga olosuke ohenda wondika Yehova, kuenje Yehova u tiuwila oviali viaye.” (Olosapo 19:17) Oku likolisilako oku kuatisa vamanji, ci nena esanju lialua. (Ovilinga 20:35) Pole, ci kale esanju li tunda koku eca, ci kale elembeleko li tunda koku tambula, ka liya komanu vana va liamuha la vakuavo. (Olosapo 18:1) Omo liaco, tu sukila oku likolisilako oku kala kolohongele viekongelo oco tu likolise pokati la vamanji.—Va Heveru 10:24, 25.

24. Koloneke vilo Yehova ka siatele vali oku linga ovikomo ndevi a lingaile kosimbu. Eci hẽ ci lekisa okuti ka tu tambula vali ekuatiso liaye?

²⁴ Ci sanjuisa calua oku limbuka ndomo Yehova a siata oku tu kuatisa. Ocili okuti, ka tu kasi vali kotembo yimue okuti Yehova o linga ovikomo vioku tẽlisa ocipango caye. Pole, Yehova wa siata oku tu ĩha ekuatiso liosi tu sukila oco tu amameko lekolelo. Nda tua pandikisa kumosi la vamanji, tuka mõla ovilinga vi komõhisa via Yehova. Omo liaco, tu amamiko oku tava kekuatiso lia Yehova. Oco tu kapiko olondaka viocisonehua cunyamo ulo wo 2005, ci popia hati: “Okukuatisiwa kuange ku tunda ku Yehova.”—Osamo 121:2.

Cipi Ocisimĩlo Cove?

Ndamupi Yehova a siata oku tu ĩha ekuatiso tu sukila koloneke vilo

• loku tuma ovangelo?

• lespiritu sandu?

• Londaka yaye yi kola?

• loku vetiya vamanji?

[Elitalatu kemẽla 15]

Ci sanjuisa calua oku kũlĩha okuti ovangelo va kasi oku tu kuatisa kupange woku kunda

[Elitalatu kemẽla 17]

Yehova pamue o vetiya manji umue oco a tu ĩhe elembeleko