Ukanda wa Tunda ko Gana Eteke Lioku Lula Uvia u Tekãva

SIA lavokaile okuti omunu wa soka ndu o linga apongoloko ava. Momo ulume waco, ndo sanga okuti wa wala ocimoni ci yela kuenda wa itika uvia u tekãva vombunda, ovaka aye a pama calua, kuenda wa talama njiti posi. Pupolo waye pa kala anyõle. Oku vanja vovaso aye ca lingile usumba, kuenda wa molẽha ndu okuti ka kuete ohenda.

Eye wa kaluka lolukandi hati, “Yaaah!” kuenje wa ñualisa lonjanga eka liaye vilu. Noke nda yeva onjuela, Wuuuh! Lonjanga yalua wa veta eka liaye kevaya kuenje lia teka teka. Oku ñualapo, wa tehẽla vilu kuenje ovaka lolomahi viaye via veta volondangu viomunu wa kala oku yaka laye. Anga hẽ omunu wa soka ndu citava oku pinga elilongiso Liembimbiliya?

Ame nda amẽla kokuaye kuenje, ndo lama. Noke ndo pulisa siti, “‘Ove Kojo?’ Nda yeva okuti o yongola oku lilongisa Embimbiliya.” Eye wa ñuata peka yu wa memenako. Ndaño okuti ocipala caye ca lingile usumba, ovaso aye a lekisa esanju kuenda wa tambulula hati: “Oco, ndi yongola oku lilongisa muẽle.” Kuenje wa ndi pulisa hati, “Eteke lipi tu fetika?”

Tua enda toke pocimbimbi conjo yaye yu tua tumãla, kuenje tua fetika oku lilongisa Embimbiliya. Pocitumãlo caco põha, kuenda ofela ya kala oku sika ciwa. Tua kala katatu: ame, la Kojo, kuenda okamõla kosima. Okasima kaco ka kuata utunga u soka 35 centimetro, ponumbutue yako ka kuata esinga li kusuka lolonjele viyela, kuenda ka kala oku linga ovinjembe. Ka kala oku papala lolopapelo vietu, oku senga senga ovitayo vietu, kuenda oku kuata kuata volonjipẽla vietu. Kojo ka sakalelele lombuanja yosima, momo kokuaye ca kala ndomõla utito. Apulilo a linga a ñuatisa oku limbuka onjongole yaye yoku lilongisa. Citava okuti omo liuloño waye woku yaka wa lilongisa oku konomuisa lutate, kuenje eci co kuatisa oku tava lika kovina vi sangiwa Vovisonehua.

Elilongiso lietu lia kala oku enda ciwa. Vokuenda kuotembo nda limbuka okuti vokati kaye mua kala uyaki umue unene. Eye wa ndi sapuila hati, “Olomapalo ndi sole calua voluali lulo, o karate.” Ame nda limbuka esunga lieci a solele olomapalo viaco, momo wa loñolohele calua koku li yaka. Eci a tẽlisa 26 kanyamo, wa tambula uvia u tekãva, okuti havosiko va kuate epondolo lioku pitĩla pomangu yaco.

Sia kũlĩhĩle eci Kojo a laikele oku linga. Pole nda kolelele okuti eye wa limbuka okuti oku lemeha vakuavo loku yaka ka ci litava lovituwa vi sangiwa pokati Kakristão, ndeci ohenda, kuenda ocisola. Ame nda kolelelevo okuti Embimbiliya li kuete unene woku pongolola ovitima viomanu. Puãi nda lavokaile okuti nda Kojo o kuete utima wa sunguluka, Ondaka ya Suku yika tẽla oku pongolola utima waye. Pole, nda sukilile epandi.

Eteke limue kekumbi, eci tua malusula elilongiso lietu la Kojo, tua tanga ovinimbu vimue Vembimbiliya via tuñunya kutima waye ndomunu va puma posi poku liyaka. Noke eye wa tanga olondaka viokuti: “Yehova o seteka vakuesunga kuenda vakuakandu. Utima waye u suvuka u o sole ungangala.” (Osamo 11:⁠5) Eye wa pitulula olondaka viaco hati, “o suvuka u o sole ungangala.” Eye wa nõlapo oku kala embombe. Yu wa vanja vovaso ange loku memenako. Kuenje wa popia hati, “Nda nõla ale onjila ndi kuama.”

Cilo, ame la Kojo tua li tumbika koku longisa Embimbiliya omanu vana va tu yevelela, momo owu upange wa velapo. Etaili lomẽle kavali ketu, tua ka pasuisile umalẽhe umue o tukuiwa hati, Luke.

Eci tua kala oku enda konjo yaye, tua pita vonjila yimue ya sukatela toke pocitanda. Pocitanda caco, tua sangapo omanu va landisa ovina viñi viñi ndeci: olondungu via pia levi ka via pile, olohumba viamatia, ocingombo, olo radio, olosapilinyu, onjapãu, olonjo vioku livinda, ovikuata vioku teleka, kuenda olosapato luwalo. Afeko va ñuala ñuala latiyela kutue oku landisa okulia kua sanya. Ovo va pita vowiñi oku pilisa loku peya omanu oku mãha osopa, ombisi yoku yoka, olohale kuenda ahotio. Olombua, olohombo, kuenda olosanji via ñuala ñuala vovolu omanu. Tua yeva olo radio vi sika calua kuenda onjuela yanguena akãlu.

Tua pita vonjila mue yuka oneketela toke vimbo mua kala onjo yimue ya kuka calua mua sonehiwa hati: “Kesulilo Liungende.” Luke, o kuete 20 kanyamo, wa kala puvelo yu wa tu laleka oku tumãla vocimbimbi conjo yaye pulembo. Vonjo yaco mua kala ovinjangatela vialua ndeci, olonjeke lolokasia mue yuka olombombo lamẽla a kutiwa, kuenda ovinjula vioviti. Ovina viaco via sohayi ya Luke. Eye o kuete uloño walua woku sakula ovovei añi añi lovihemba vio posi. Luke wa kala oku tu kevelela osimbu yalua. Eye wopa ovinjangatela via kala kilu liomesa kuenje tua tumãla kolomangu vitatu viocalo. Noke tua fetika oku lilongisa Embimbiliya pocitumãlo cimue ca sukatela calua.

Kojo eye ulongisi wa Luke. Ame nda tumãla konẽle oku yevelela ndomo eye lekuatiso Liembimbiliya a konomuisa kumue la Luke esunga lieci voluali mu kasilili ohali yalua. Eci Kojo a kala oku kuatisa Luke oku sandiliya ovinimbu Vembimbiliya, ame nda kala oku vanja ovaka aye a pama ndomo a tuvula amẽla Embimbiliya. Kuenje nda sokolola okuti, ovaka ava, o-o a enda oku veta lao vakuavo. Ondaka ya Suku yi kuete unene woku pongolola ovituwa vĩvi violuali lulo, kuenje vi piñanyiwa lovituwa viwa ndeci ohenda kuenda ocisola. Eli epongoloko limue linene.

Eci tua kala oku tiukila konjo, tua vangula lulume umue wa tumãla pemehi liuti womanga. Osimbu Kojo a kala oku tanga Embimbiliya eye wa yevelela. Noke lioku limbuka okuti etu Tulombangi Via Yehova, wa votoka yu wa popia hati, “Ame si vu sole!” Kojo wa si oku tema. Pole wa likandangiya. Kuenje tuo siapo.

Eci tua kala vonjila Kojo wa ñuñuna hati: “Olondaka eye a popia via si oku ndi temisa. Wa kũlĩha eci nda nda linga ulume una?” Ndo tambulula loku memena siti “Nda ci kũlĩha.” Eye wa yolako kuenje tua enda lonjila yetu.