Olohongele Viofeka, Epuluvi Limue Lioku Fendela Lesanju

1. Ovipito va Isareli va enda oku linga, vi sokisiwa ndati lolohongele vietu viofeka tua siata oku linga koloneke vilo?

¹ Yosefe la Maria, kumue lomãla vavo, kuenda omanu vakuavo, va kuatele ocituwa coku endaenda kocipito ca enda oku lingiwa unyamo lunyamo ko Yerusalãi. Vepuluvi liaco, ovo kumue lafendeli vakuavo, va enda oku yuvula oku sokolola ovitangi viavo. Pole, va tiamisila utima kovina viespiritu vi kuete esilivilo lia velapo komuenyo wavo. Ocipito caco, ca va ĩha epuluvi lioku sokolola loku sapela catiamẽla kohenda ya Yehova, kuenda oku kapako Ovihandeleko viaye. Ohongele yofeka tu ka kuata, yi ka tu ĩhavo epuluvi lioku fendela Yehova lesanju.

2. Eliangiliyo lipi tu sukila oku linga oco tu ende kohongele yofeka?

² Oku li Pongiya Ciwa ci Kuete Esilivilo: Epata lia Yesu poku tunda ko Nasara, lia sukilile oku linga ungende u soka 200 kolokilometulu. Ndaño ka tua kũlĩhĩle etendelo lia vamanji Yesu a kuatele, pole tu pondola oku limbuka okuti, Yosefe la Maria, va sukilile oku li kolisilako oku angiliya ovina vi sukiliwa. Ove hẽ, wa linga ale eliangiliyo lioku enda kohongele yofeka yi ka lingiwa voloneke vitatu? O sukila oku pinga oloneke viepuyuko kupange, oku sapela la cime cove kupange, ale oku sapela lulongisi wo mõla wove okuti, ka endi kosikola koloneke viaco. Ove hẽ, wa linga ale eliangiliyo liocitumãlo oku o ka sikĩla? O pondola hẽ, oku kuatisa umue vekongelo oco a ende kohongele yofeka?​—⁠1 Yoa. 3:​17, 18.

3. Ovipito via va Isareli via eca epuluvi lipi lioku linga ukamba?

³ Ukamba la Vamanji: Ovipito via va Yudea, via eca epuluvi lioku kuata ukamba la vakuavo! Epata lia Yesu, lia kuata epuluvi lioku li sanga lakamba vana va lisula osimbu. Ovo, va kuatavo epuluvi lioku linga ukamba la va Yudea, kuenda ovingendeleyi vana va kala kocipito caco, ale va lingila kumue ungende poku enda lo poku tiuka ko Yerusalãi.

4. Tu lekisa ndati okuti tua kapako ukamba wetu la vamanji?

⁴ Oco tu li kolise pokati la vakuetu, ukuenje wa kolelua haeye wa lunguka wa siata oku tu lingila eliangiliyo lioku kala kumosi oku yevelela olohundo kolohongele viofeka okuti, ulandu waco ka u sandekiwa lika valivulu. (Va Hev. 10:​24, 25) Omo liaco, linga esokiyo lioku pitila selo kohongele yofeka oloneke viosi, oco o kuate otembo yoku sapela la vamanji. Pole, eci manji o songola a popia hati, cilo tu yevelela ovisikilo, ci lekisa okuti, lia pitilapo epuluvi lioku tumãla polomangu vietu. Kelivala liepuyuko, tu sukila oku yuvula oku tunda posamua oku ka landa okulia. Omo liaco, tu vetiyiwa oku nena onanya oco tu kale pocitumãlo cohongele okuti, tu kuata otembo yoku sapela la vana va kasi ponele yetu. Ukamba wetu la vamanji, ombanjaile yimue ya tunda ku Yehova okuti, tu sukila oku yi sanjukila.​—⁠Mika 2:⁠12.

5. Nye ci tu kuatisa okupa esilivilo kovipama viohongele?

⁵ Epuluvi Lioku Lilongisa: Yesu tunde vutila, povipito wa enda oku sanda epuluvi lioku lilongisa catiamẽla ku Isiaye wokilu. (Luka 2:​41-​49) Nye ci ka tu kuatisa kumue lepata lietu, okupa esilivilo kovipama vi ka lingiwa kohongele yofeka? Vokuenda kuohongele, yuvula ocituwa coku ñuala ñuala loku sapela ovina ka vi kuete esilivilo. Nda o kuete otelefone, ku ka ecelele okuti, yi ku tateka ale yi lingila onjuela vakuene va kasi oku yevelela ovipama viohongele. Tiamisila utima ku manji o linga ohundo, kuenda soneha lika atosi amue. Tumãla pamosi lepata liove oco o kũlĩhĩse nda omãla va kasi okupa esilivilo kulandu wohongele. Koñolosi, sokiya otembo yoku sapela lepata atosi ana wa soli.

6. Nye tu sukila oku kapako catiamẽla kuwalo wetu, kuenda koku li posuisa ciwa?

⁶ Uwalo Kuenda Oku li Posuisa: Vakualomĩlu va tunda kolofeka vikuavo, poku linga ungende, va enda oku limbuka lonjanga epata lia Yesu, kumue la va Yudea vakuavo poku enda loku tiuka kovipito. Momo va enda oku tongela olonjenje kasũsu uwalo wavo, kuenda oku kapako ukolo wonoloti. (Ate. 15:​37-​41) Ndaño etu Tuakristão ka tu wala uwalo u likasi, pole, tua kũlĩhĩwa luwalo uwa haiwo wa sunguluka, kuenda wa yela. Tu sukila oku kũlĩhĩsa ciwa uwalo wetu poku enda kohongele yofeka kuenda poku tiuka, ale ceci tu kasi vimbo tua sikĩla. Ndaño tua pongolola uwalo wetu noke liohongele, tu sukila oku wala una weca esivayo ku Yehova, kuenda oku wala okokanda kohongele yofeka. Nda tua ci linga, tu litepa la vana okuti, Halombangiko Via Yehova, kuenda ceca uvangi uwa ku vana va tu mola.

7. Momo lie tu sukilila oku lieca olumue kupange u lingiwa kohongele yofeka?

⁷ Ku Sukiliwa Vamanji va Lieca Olumue: Oco ohongele yofeka yende ciwa, ku sukiliwa vamanji valua va lieca olumue kupange. Ove hẽ, o pondola oku lieca kupange waco? (Osa. 110:⁠3) Upange wa siata oku lingiwa kolohongele viofeka, u panga onepa kupange wetu u kola, kuenda weca uvangi uwa. Usongui umue wo pocitumãlo pa lingiwila ohongele yofeka, wa komoha calua poku mola ndomo vamanji va yelisa ciwa ocitumãlo caco. Eye wa soneha hati: “Ndeca olopandu kokuene omo liocipito ci komohĩsa nda mõla. Olonjanja vialua nda siata oku yeva okuti, Olombangi Via Yehova omanu vamue va lekisa ovituwa viwa pocitumãlo cetu. Momo olonjanja viosi eci va liongoluilamo, va siata oku ci yelisa ciwa okuti, ndomo va ci sanga ci sule. Ene kumue locisoko cene, wa posuisi ciwa ocitumãlo caco vimbo, kuenda upange waco wa lingiwa lomanu va sanjuka, kuenje, tua sola calua oku va kũlĩha.”

8. Epuluvi lipi tu ka kuata lioku eca uvangi osimbu tu kasi vimbo mu lingiwila ohongele yofeka?

⁸ Epuluvi Lioku Eca Uvangi: Omanu valua va kasi vimbo mu lingiwila ohongele yofeka, va pondola oku tu limbuka omo lioku wala uwalo wa sunguluka haiwo wa yela, kuenda oku wala okokanda kohongele yofeka. Kuenje, ci tu kuatisa oku kuata epuluvi lioku sapela lavo catiamẽla kohongele yofeka. Noke liohongele, kamõla umue o kuete anyamo akuãla, wa nena elivulu liaye liokaliye vonjo yoku landisila okulia kua pia, noke wa li lekisa ku vana va landisa okulia. Kuenje, ca ecelela okuti, olonjali viaye vi laleka ukãi oku enda lavo kohongele yofeka.

9. Tu pondola oku kuama ndati ongangu yepata lia Yesu yoku sola oku lilongisa ovina viatiamẽla ku Yehova?

⁹ Ovipito via enda oku lingiwa kosimbu, via nenele esanju lialua ku va Yudea, momo via va kuatisa oku lilongisa ovina vialua viatiamẽla ku Yehova. (Esin. 16:​15) Epata lia Yesu lia sanjukilile oku likolisilako oku enda kocipito, kuenda oku upako esilvilo lialua. Tua siatavo oku sola olohongele vietu viofeka, kuenda oku vi tenda ndombanjaile ya tunda ku Isietu wokilu. (Tia. 1:​17) Yilo oyo otembo yoku li pongiyila ohongele yofeka, ya siata oku lingiwa unyamo lunyamo, oco tu fendele Yehova lesanju!