Vepuluvi Lipi Akãi va Sukila Oku Futa Elesu Kuenda Momo Lie?

Vepuluvi lipi ukãi Ukristão a sukila oku futa elesu omo liovina viespiritu? Tu konomuisi eci Paulu a popia catiamẽla kondaka yaco. Eye o tu ĩha onumbi tu sukila oku kuama, okuti yi sivaya Suku. (1 Va Korindo 11:3-16) Paulu wa tukula ovina vitatu: (1) ovopange amue a kisika ukãi oku futa elesu, (2) kapuluvi eye a sukila oku ci linga, kuenda (3) esunga lieci eye a sukilila oku kapako onumbi yaco.

Kovopange. Paulu wa tukula ovina vivali: oku likutilila kuenda oku imba owanji. (Ovinimbu 4, 5) Oku likutilila ci lomboloka oku vangula la Yehova. Koloneke vilo, oku imba owanji ku tiamisiwila kupange Ukristão a linga poku longisa Embimbiliya. Olondaka evi via Paulu vi lomboloka hẽ okuti olonjanja viosi eci ukãi a likutilila ale a longisa o sukila oku futa elesu? Sio. Apuluvi ukãi a sukila oku futa elesu poku likutilila ale koku longisa, a litepa.

Apuluvi. Olondaka via Paulu vi lekisa apuluvi avali ukãi a sukila oku futa elesu, okuti poku linga ovopange amue konepa yespiritu, vepata kuenda vekongelo. Eye wa popia hati: “Utue wukãi ulume. . . Ukãi wosi o likutilila, pamue imba owanji wuprofeto, lo kutue ka futileko, o sepuisa utue waye.” (Ovinimbu 3, 5) Vesokiyo lia Yehova liatiamẽla kepata, ulume eye utue wukãi waye. Ukãi poku linga ovopange Yehova a eca kalume, o sepuisa ulume waye. Nda kuli ocitangi cimue cecelela ukãi oku songola elilongiso Liembimbiliya vepata okuti ulume waye haipo a kasi, ukãi o sukila oku futa elesu oco a lekise esumbilo kulume waye. Ukãi o sukilavo oku futa elesu ci kale okuti ulume waye wa papatisiwa ale sio momo eye utue wepata.a Nda ukãi o longisa ale o likutilila eci omõlaye ulume haeye wa papatisiwa o kasipo, ndaño ulume wa tunda, eye o sukila oku futa elesu, momo omõla ulume ndaño hayeko utue wepata, o pondola oku tambula ovikele vekongelo Liakristão.

Catiamẽla koku longisa vekongelo Paulu wa popia hati: “Nda kuli umue o yongola oku tamalãla, etu ka tu tava kocituwa ciñi, ndaño akongelo a Suku.” (Ocinimbu 16) Vekongelo Liakristão alume va papatisiwa ovo va kuete ocikele coku songola. (1 Timoteo 2:11-14; Va Heveru 13:17) Alume ovo lika va nõliwa oku kala akulu vekongelo kuenda oloñuatisi viavo oco va songuile olomeme via Suku. (Ovilinga 20:28) Olonjanja vimue ci sukila okuti ukãi o linga upange u sesamẽla oku lingiwa lulume wa papatisiwa. Pamue o songola ohongele yoku tunda kupange woku kunda omo ka pali ulume wa papatisiwa. Ale o songola elilongiso Liembimbiliya nda ka pali ulume wa papatisiwa. b Omo okuti ovina viaco viatiamẽla kovopange ekongelo, ukãi o sukila oku futa elesu, momo o kasi oku linga ovikele vialume.

Pole, kuli ovina vialua ukãi a pondola oku linga okuti ka sukila oku futa elesu. Eye ka sukila oku ci linga eci a enda kolohongele, kupange woku kunda konjo lanjo lulume waye ale manji ukuavo, kuenda poku lilongisa ale poku likutilila lomõlaye ulume ka papatisiwile. Catiamẽla kondaka eyi, nda manji umue ukãi handi o kuete atatahãi, o sukila oku konomuisa alivulu akuavo.c Nda utima waye u vetiya oku futa elesu vapuluvi osi, eye ka lueya, ndomo ci lekisiwa velitalatu.

Esunga lieci a sukilila oku ci linga. Vocinimbu 10, tu sangamo asunga avali a vetiya ukãi Ukristão oku pokola konumbi yaco: “Ukãi co sesamẽla oku futa ndokuti ovangelo va limbukilako omoko ya veyaye.” Catate, kũlĩhĩsa ondaka “omoko ya veyaye.” Ukãi eci a futa elesu, o kasi oku lekisa esumbilo kocikele Yehova a eca kalume vekongelo. Omo liaco, poku ci linga eye o lekisa ocisola kuenda epokolo ku Yehova Suku. Esunga liavali li sangiwa vondaka “ovangelo.” Ovangelo va vetiyiwa oku linga nye eci akãi va futa elesu?

Ovangelo poku mola elinga liaco, va limbuka okuti Yehova ka kasi oku viala lika kilu, pole, o kasivo oku viala palo posi. Ovo va kuatisiwa lepokolo liomanu ka va lipuile. Va vetiyiwa oku amamako oku pokola ku Yehova, momo kosimbu ovangelo valua va tokoka oku ci linga. (Yuda 6) Ovangelo va siata oku mola okuti ndaño vekongelo Liakristão muli akãi va loñoloha vali okuti alume vamue ci sule, va siata oku lekisa epokolo lesumbilo kalume vaco. Akãi vamue olombuavekua va ka kuata ovikele via velapo okuti ovangelo ci sule, momo va ka viala la Kristu kilu. Ovangelo va siata oku mola ongangu yiwa yakãi vaco! Akãi va kuete esumũlũho linene lioku pamisa olohuluwa viovangelo omo liepokolo kuenda esumbilo liavo!