Talavaya Layo Olonjanja Viosi
1. Otratadu losapi Oku Kũlĩha Ocili, yi ka tu kuatisa oku linga nye?
1 Otratadu losapi Ove hẽ o Yongola Oku Kũlĩha Ocili?, ya pongiyiwila oku tu kuatisa oku fetika alilongiso Embimbiliya. Tu pondolavo oku talavaya locimãleho caco poku waya ombuto yocili Cembimbiliya. (Uku. 11:6) Olonumbi vi kuãimo vi pondola oku tu kuatisa oku talavaya lotratadu yaco.
2. Tu talavaya ndati lotratadu oco tu fetike ombangulo?
2 Oku Fetika Ombangulo: Eca otratadu komunu, noke u lekisa apulilo epandu a sangiwa kemẽla liatete, kuenje u pulisa ndoco: “Pokati kapulilo a-a, lipi ove o yongola oku kũlĩha etambululo liaco?” Noke lietambululo liaye, konomuisa etambululo Liembimbiliya li sangiwa votratadu yaco, kuenda tanga cimue pokati kovisonehua vi sangiwamo. Tanga, ale lombolola olondaka vi kasi kemẽla lia sulako kuenda fetika elilongiso velivulu Embimbiliya li Longisa. Nda omunu waco ka tavele oku tambula elivulu, otratadu a tambula, yi pondola oku waya ombuto yocili vutima waye.—Mat. 13:23.
3. Nda omunu tua sanga ka kuete otembo, nye tu sukila oku linga?
3 Ceci Omunu ka Kuete Otembo: O pondola oku popia ndoco: “Omo okuti ku kuete otembo, linga hu sile otratadu yilo. Omu mu sangiwa apulilo epandu a velapo okuti valua pokati ketu tua siata oku a linga kuenda atambululo aco a kunamẽla Vembimbiliya. Eci ndi ka lisanga vali love, o ka ndi sapuilako ocisimĩlo cove catiamẽla kondaka eyi.”
4. Nye tu pondola oku popia poku talavaya lotratadu volokololo?
4 Ceci tu Kundila Volokololo: O pondola oku popia ndoco: “Kalungi! Eteke limue wa li lingile ale apulilo a-a? [Ecelela etambululo.] Otratadu yilo, yi eca atambululo a suapo a sangiwa Vembimbiliya.” Nda omunu ka kasi lonjanga, ci tava oku u lomboluila limue pokati katambululo a sangiwa votratadu kuenda u wĩha elivulu Embimbiliya li Longisa.
5. Tu talavaya ndati lotratadu nda ka tua sangele omunu konjo?
5 Ceci ka tu Sangi Omanu Kolonjo: Akundi vamue poku talavaya vovikanjo, va siata oku sia alivulu volonjo vina ka va sangi omanu. Nda oco vu lingainga vekongelo liene, momo lie ku sila otratadu Oku Kũlĩha Ocili? Poku linga epasu popia ndoco: “Eteke tueyile konjo yove ka tua ku sangeleko, kuenje tua sia otratadu ndeyi pepito liove. Lipi pokati kapulilo a-a, o yongola oku kũlĩha etambululo liaco?”
6. Nye ci lekisa okuti otratadu Oku Kũlĩha Ocili ocimãleho cimue ciwa kupange woku kunda?
6 Poku eca otratadu Oku Kũlĩha Ocili, kuama onjila ya leluka haiyo yi teta onimbu. Otratadu yaco yi vetiya omanu vakuatavo osi kuenda vakuapata añi añi. Oyo ya leluka oku yi eca, ndaño muẽle amalẽhe kuenda akundi vokaliye va pondola oku ci linga. Ove wa siata hẽ oku talavaya layo olonjanja viosi?