Tu Amamiko Oku Kuata Uloño Kupange Woku Kunda Oco tu Tẽle Oku Tambulula Vana va tu Teta Kondaka

Esunga Lieci ci Kuetele Esilivilo: Sokolola ndeci okuti ku kasi oku iya ocilunga cimue. Pole, nda omanu ka va tilile, va fa. Ove enda konjo yomunu o lisungue laye, oco u sapuileko, pole, eye o ku tambulula hati, ndi kuete upange. Omo liaco, ku liwekapo oku u kuatisa! Omanu valua va kasi vocikanjo cetu va siatavo oku ci linga, momo ka va limbuka esilivilo liesapulo tu kunda okuti, li popela omanu. Eci tu va nyula kolonjo viavo, va sakalala lika loku linga ovina vikuavo. (Mat. 24:37-39) Pamue tu sanga omanu va sumua omo liolondaka ka via sungulukile va yeva. (Mat. 11:18, 19) Ovo va sima okuti ka tua li tepele latavo akuavo a lekisa ovituwa ka via sungulukile. (2 Pet. 2:1, 2) Nda omunu tua sanga o tu sapuila hati ka yongola oku tu yevelela, ka tu ka liwekipo oku sapela laye.

Ndomo tu ci Linga:

Osimbu kua endele kupange woku kunda konjo lanjo, o sukila oku sandiliya akukutu amue oco o kũlĩhĩse ndomo o tambulula omanu va ku teta kondaka.
Nda omunu wa sanga o ku teta kondaka, o sukila oku sapela laye lutate. O pondola oku ci linga poku u pandiya. Nda omunu waco o ku sapuila hati o kuete ale etavo liaye, o pondola oku tambulula ndoco: “Ndi sanjukila oku sanga omunu umue ndove okuti o kuete ale etavo liaye.” Olonjanja vimue, nda wa kũlĩhĩsa ovisimĩlo viomunu wa sanga, kuenda ekalo liaye, ci leluka oku amamako oku u kundila. Nda eye wa popia hati o kuete upange, u tambulula ndoco: “Ciwa. Pole, osimbu sia endele, ndi yongola oku ku ĩha orevista eyi.” Onjila yikuavo yoku tambulula omunu o ku teta kondaka loku popia hati, si yongola oku ku yevelela, oku linga epulilo limue kokuaye. O pondola oku u pula ndoco: “Anga hẽ eci ci lomboloka okuti ku yongola oku yevelela eci Embimbiliya li popia, ale ku yongola oku yevelela ovina viatiamẽla ketavo?”
Lekisa esunguluko. Ivaluka okuti, Yehova ka kisika omanu oku u yevelela. (Esin. 30:19) Omunu lomunu o kuete ocikele coku lava ekalo liaye konepa yespiritu. (Va Gal. 6:5) Nda omunu wa sanga, ka lekisa esunguluko, citava okuti u siapo. Momo nda tua kapako ovisimĩlo viaye, ci ka ecelela okuti o ka tava kovina ukundi ukuavo o ko sapuila.—1 Pet. 3:15.

Vokuenda Kuosãi Seteka Ndoco:

Eci o sanga omunu umue o ku teta kondaka, poku tunda konjo yaye, sapela la manji wa tunda laye kupange woku kunda oco a ku lomboluile ndomo wa sukilile oku tambulula lonjila ya sunguluka.