Kuatisa Omanu Oku Yevelela Suku
1. Olombrochura vipi via sandekiwa Kohongele Yofeka losapi hati “Usoma wa Suku Wiye!,” kuenda nye ci lekisa okuti ovio vi kuete esilivilo?
1 Kohongele Yofeka losapi hati “Usoma wa Suku Wiye!” kua sandekiwa olombrochura vivali losapi hati Yevelela Suku Kuenje o Kala Otembo ka yi Pui kuenda yikuavo ya leluka losapi, Yevelela Suku. Omo okuti olombrochura viaco ka vi kuete ovisonehua vialua, via leluka oku vi pongolola lonjanga. Eli olio esunga lieci okuti eci olombrochura evi vivali via sandekiwa via pongoluiwa kueci ci soka 431 kalimi.
2. Helie o ka kuatisiwa lolombrochura evi?
2 Helie o pondola oku kuatisiwa lolombrochura evi? Kũlĩhĩsa ovolandu amue a siata oku pita voluali luosi:
• Ukundi umue eci a sapela lomunu umue onjanja yatete ale poku linga epasu, wa limbuka okuti omunu a kala oku sapela laye ka tẽla oku tanga, ale ka tangi ciwa.
• Ukundi umue wa kundila omunu o vangula elimi lina okuti, kuli alivulu atito velimi liaye ale ka kuli alivulu a sandekiwa velimi a vangula. Kuenda wa sangavo omanu vakuavo vocikanjo ka va tẽla oku tanga alivulu velimi va vangula.
• Ukundi umue wa siata oku kunda kelimi lioku ilaika oco a kundile ovisitatũi vocikanjo caye.
• Olonjali vimue vi yongola oku longisa ocili komõlavo utito ka tẽla handi oku tanga.
3. Ombrochura Yevelela Suku ya pongiyiwa ndati?
3 Ndomo Ovipama Via Sokiyiwa: Ombrochura Yevelela Suku yi kuete olondaka vitito, lupopi wa leluka kuenda Ocisonehua cimosi Cembimbiliya ca tukuiwa vombuelo yemẽla yocipama locipama. Momo lie ya pangiwila ndoco? Sokolola okuti umue oku ĩha elivulu limue lia sonehiwa velimi ku tẽla oku tanga, pamue li kuete olomalaka kua la mola. Anga hẽ nda wa sanjukila oku li tanga ndaño li kuete oviluvialuvia via fina? Ci tava okuti ku li soli. Cimuamue haico, omanu vana ka va tẽla oku tanga ka va sanjuka nda elivulu limue li kuete olondaka vialua. Omo liaco, ombrochura Yevelela Suku yi kuete oviluvialuvia vialua via pongiyiwa ciwa. Oviluvialuvia viosi vi kuete ondimbukiso yevindi yi lekisa ociluvialuvia ci kuãimo.
4. Ovina vipi tu sanga vombrochura Yevelela Suku Kuenje o Kala Otembo ka yi Pui?
4 Ombrochura losapi Yevelela Suku Kuenje o Kala Otembo ka yi Pui, yi kuete oviluvialuvia vimuamue lombrochura Yevelela Suku. Ombrochura Yevelela Suku ya sandekiwila vana ka va tẽla oku tanga ciwa ale vana va kasi oku lilongisa oku tanga. Poku songola elilongiso, ci tava okuti ukundi o kala lombrochura Yevelela Suku Kuenje o Kala Otembo ka yi Pui osimbu ondonge yi kuama vombrochura Yevelela Suku. Konẽle yepĩli kilu liemẽla ku sangiwa epulilo okuti li tambuluiwa vokuenda kuelilongiso li sangiwa vamẽla avali. Mu sangiwavo oviluvialuvia kuenda ovisonehua via tukuiwa. Kesulilo liovipama vimue ku sangiwa okakasia latosi a vokiyiwako kuenda Ovisonehua via tukuiwa okuti, ci tava oku vi lombolola pole, catiamẽla ño koku loñoloha kuondonge.
5. Vepuluvi lipi tu eca olombrochura kuenda ci lingiwa ndati?
5 Ndomo tu Talavaya Lavio: Ci tava oku vi eca kupange woku kunda konjo lanjo nda wa limbuka okuti ci sukiliwa ndaño osãi yaco ka kua sokiyiwile oku eca olombrochura. (Tala okakasia “Ndomo Olombrochura vi Eciwa.”) Poku linga epasu o pondola oku sapuila omunu wa lekisa onjongole okuti ndi kuete cimue ndi yongola oku ku lekisa, kuenje u wĩha ombrochura.
6. Olonjila vipi vi kuamiwa poku songola elilongiso Liembimbiliya volombrochura evi?
6 Omo okuti ombrochura Yevelela Suku ka yi kuete apulilo, poku lilongisa ombrochura yaco, ka ci lingiwa lapulilo kuenda atambululo ndeci ci lingiwa lelivulu Embimbiliya li Longisa. Vapata alua, omanu va sanjukila oku yevele asapulo. Situlula ovolandu a sangiwa Vembimbiliya lekuatiso lioviluvialuvia. Lombolola oviluvialuvia. Lekisa esanju. Pinga kondonge oco a lombolole eci a lete. Tanga ovisonehua vi sangiwa pombuelo yemẽla kuenda konomuisili kumosi ovisonehua viaco. U kongele vombangulo poku linga apulilo oco o limbuke nda eci a kasi oku lilongisa co lomboloka. Nda eye o kasi lombrochura Yevelela Suku Kuenje o Kala Otembo ka yi Pui, tangeli kumosi ovinimbu viaco kuenda ovisonehua Viembimbiliya poku lombolola ociluvialuvia lociluvialuvia.
7. Tu kuatisa ndati omunu tu longisa Embimbiliya oku kula kespiritu?
7 Kuatisa Ondonge Oku Kula Kespiritu: Ci tava okuti elilongiso o linga londonge li vetiya onjongole yaye yoku lilongisa oku tanga oco eye muẽle a sande ukũlĩhĩso wa tiamẽla ku Yehova. (Mat. 5:3; Yoa. 17:3) Nda wa siati oku lilongisa vombrochura Yevelela Suku kuenje vokuenda kuotembo o limbuka okuti ondonge yi tẽla oku tanga, ci tava oku fetika elilongiso vombrochura Yevelela Suku Kuenje o Kala Otembo ka yi Pui. Ondonge ka ci tava okuti yi papatisiwa ndaño muẽle noke yoku mãla oku lilongisa olombrochura viaco vivali. O sukila oku fetika oku lilongisa laye elivulu Embimbiliya li Longisa ale elivulu likuavo liu kuatisa oku vokiya elomboloko lia suapo Liembimbiliya.
8. Momo lie wecela olopandu omo liolombrochura evi vi ku kuatisa kupange woku kunda?
8 Omanu va sukila oku yevelela Ñala Ukuonenewosi voluali oco va kale otembo ka yi pui. (Isa. 55:3) Ocipango ca Yehova ceci okuti “omanu vosi,” oku kongelamo vana ka va tẽla oku tanga, va lilongisa ndomo va pondola oku u yevelela. (1 Tim. 2:3, 4) Tu eca olopandu omo liolombrochura evi vi kuatisa oku longisa omanu ndomo va yevelela Suku!
[Okakasia kemẽla 3]
Ndomo Olombrochura vi Eciwa
Lekisa komunu wa sanga emẽla 2 kuenda 3, kuenje u pula ndoco: “O yongola oku kala voluali lumue ndolu o lete palo? [Ecelela etambululo.] Ovisonehua vi lekisa okuti [ale elivulu eli likola li lekisa okuti] Suku ndopo o pongolola oluali oco lu linge ocitumãlo cimue ca posoka okuti mu kala ombembua kuenda uhukũi ale oku vela ka vi kalako vali. Tu kũlĩhĩse eci tu sukila oku linga oco tu kale voluali luaco. [Tanga elivulu lia Isaya 55:3 lia tukuiwa kilu liemẽla 3.] Olio li tu sapuila okuti, ‘enjui’ ku Suku kuenda u ‘yeveleli.’ Pole, tu yevelela ndati Suku?” Tuvula kamẽla 4 kuenda 5 kuenje u lekisa etambululo. Nda ka kuete otembo, u sila ombrochura kuenda linga esokiyo lioku tiuka oco u lekise etambululo.