Vangula Eci ci Lomboloka Komanu

ECI o vangula, linga vali calua okuti haku lekisako lika alomboluilo. Likolisilako oku lingisa okuti eci o vangula ci lomboloka kuava va ku yevelela. Eci ci pondola oku ku kuatisa oku li vanguisa ciwa la vakuene, cikale eci o vanguila vekongelo ale ceci o vangula la vana okuti Halombangiko via Yehova.

Kuli olonumbi vialua viatiamẽla koku vangula eci ci lomboloka. Vimue pokati kolonumbi evi vi sangiwa Kelilongiso 26, losapi ya linga hati, “Oku Lombolola Ciwa Ocipama.” Vikuavo via lomboluiwa Kelilongiso 30, losapi ya linga hati, “Oku Lekisa Onjongole Kolonjeveleli.” Kelilongiso lilo, tuka lombolola atosi amue akuavo atiamẽlako.

Olondaka Via Leluka Haivio Via Sokiyiwa Lulelu. Olondaka via leluka haivio vimbumbulu, ovio viwa koku li vanguisa. Ohundo ya Yesu yo Komunda oyo ongangu ya velapo yohundo yi lomboloka ciwa komanu vosi, okuti ka yi tepisa ekalo liavo ndaño kocitumãlo va sangiwa. Ocisimĩlo caco pamue cokaliye kokuavo. Pole, va tẽla oku kuata elomboloko lieci Yesu a popia omo wa vangula ovina vi sakalaisa vosi yetu, poku lekisa ndomo ku tẽliwa oku kuata esanju, ndomo tu kala ciwa la vakuetu, ndomo tu liyaka lasakalalo, kuenda ndomo ku sangiwa omuenyo uwa. Eye wa lombolola ovisimĩlo viaye vupopi umue wa leluka. (Mat. ovip. 5-7) Ocili okuti, Embimbiliya li lekisa ongangu yolohundo via litepa kunene kuenda kesokiyo liolondaka. Ocimãho cove ca velapo te ci kala coku sapula ovisimĩlo viove lulelu kuenda lelomboloko.

Ndaño muẽle ceci okuti ocipama cika lomboluiwa ca tĩla, oku ci sokiya lulelu ku kuatisa oku lingisa okuti ci leluka oku kuata elomboloko liaco. Oku leluisa ku tẽliwa hẽ ndati? Ku ka silĩhe olonjeveleli viove lalomboluilo ka a sukiliwa. Sokiya ocipama cove lonjila yimue okuti atosi osi akuavo oka lombolola a tiamisiwila katosi a velapo. Nõla lutate ovisonehua via velapo oka tanga. Poku vi tanga, ku ka tunde ño kocisonehua cimue oku enda kukuavo. Puãi, vi tanga kuenje noke vi lombolola. Ku ka sitike ocisimĩlo cimue ciwa loku lombolola olondaka vialua.

Poku songola elilongiso limue Liembimbiliya, kuamavo olonumbi evi. Ku ka lombolole enene atosi osi. Kuatisa ondonge oku kuata elomboloko liwa liovisimĩlo via velapo. Noke, kelilongiso liaye liopokolika kuenda kolohongele viekongelo, eye oka lilongisa atosi akuavo ondongosi.

Oco o lombolole ocipama cove lulelu, ci sukila oku lipongiya ciwa. Ocipama caco te ove muẽle ca ku lomboloka ciwa oco oka ci lombololevo ciwa ku vakuene okuti ci va lomboloka. Nda cimue ca ku lomboloka muẽle ciwa, o tẽla oku lekisa esunga lieci ci kasilili ndoco. Kuendavo o tẽla oku ci lombolola volondaka viove muẽle.

Oku Situlula Upopi ka wa Kũlĩhĩwile. Olonjanja vimue, oku lingisa okuti cimue ci lomboloka ciwa, ci sukila oku situlula elomboloko liupopi umue okuti ka wa kũlĩhĩwile lolonjeveleli viove. Ku ka sime okuti olonjeveleli vi kuete ale ukũlĩhĩso walua, polevo ku ka va sokise okuti eloñoloho liavo litito. Omo lioku lilongisa kuove Embimbiliya, ove pamue o vangula upopi umue okuti ka wa kũlĩhĩwile lomanu vakuavo. Nda kua situluile eci upopi waco u lomboloka, omanu vana ka va siatele oku likongela Lolombangi via Yehova ka vaka kuata elomboloko liupopi wa linga hati, “ocisupe,” “ukuenje wa kolelua haeye wa lunguka,” “olomeme vikuavo,” kuenda “owiñi wakahandangala” viatiamẽla kovimunga vimue viomanu. (Va Rom. 11:5; Mat. 24:45; Yoa. 10:16; Esit. 7:⁠9) Cimuamue haico, nda omunu ka kũlĩhĩle ciwa ocisoko Colombangi via Yehova, olondaka “ukundi,” “ukundi wotembo yosi,” “mitavaso onyula akongelo,” kuenda “Onjivaluko,” pamue ka vi kolomboloka.

Olondaka vimue Viembimbiliya okuti via siata calua oku tukuiwa ndaño muẽle la vana okuti Halombangiko via Yehova, pamue vi sukila oku lomboluiwa. Komanu valua, “Harmagedo” yi lomboloka uyaki uka lingiwa lomanu okuti va imba atenda amue anene a ponda omanu va lua. Ovo pamue va tiamisila “Usoma wa Suku” kekalo liovutima womunu ale kocina cimue cokilu, pole ka ca va lombolokele okuti uviali. Oku tukula “ocendalomuenyo”ci kokisa vamue oku sima okuti ocina cimue cespiritu ci sangiwa vokati komanu, okuti eci omunu a fa ci puluka kolofa vietimba. Ndomo olohuluwa vialua viomanu via siata oku longisiwa, “espiritu sandu” omunu, okuti onepa yimue yeci va siata oku tukula hati suku umosi muvatatu. Omo okuti omanu valua va siapo oku kuama ovihandeleko Viembimbiliya viatiamẽla koku litata ketimba, ovo pamue va sukila oku va kuatisa oku kuata elomboloko lieci Embimbiliya li popia hati, “Tili ukahonga.”​—1 Va Kor. 6:18.

Nda omanu ka va siatele oku tanga Embimbiliya, ovo pamue ka va kuata elomboloko nda ove o popia ño hati, “Paulu wa soneha hati. . . ale “Luka wa popia hati. . . ” Ovo pamue va kuete akamba vavo ale ava va lisungue lavo va kuete olonduko evi. Ove o sesamẽla oku vokiyako elomboluilo limue li lekisa okuti omunu waco wa kala upostolo Ukristão ale usonehi Wembimbiliya.

Olonjeveleli violoneke vilo, vi sukila ekuatiso koku kuata elomboloko liovisonehua mua kongela atendelo o kosimbu atiamẽla koku sokisa cimue ale ovituwa viokosimbu. Ndongangu, oku linga hati ocimbaluku Noha a tungile usõvi waco wa kala 300 kovikeya, upati waco 50 kovikeya, oku lepa kuaco kuovilu 30 kovikeya, pamue ka ci va lomboloka. (Efet. 6:15) Pole nda wa sokisa ovina viaco loku tukula atendelo amuamue vupopi ovo va kũlĩha, olonjeveleli vika tẽla oku limbuka unene wocimbaluku.

Oku Eca Alomboluilo a Sukiliwa. Oco olonjeveleli vi kuate elomboloko liwa lieci o popia, pamue ci sukila vali calua okuti haku sitululako lika eci ondaka yimue yi lomboloka. Ko Yerusalãi koloneke via Esera, oku tangiwa kuovihandeleko kua enda loku kuamiwa lalomboluilo. Oco va kuatise omanu oku kuata elomboloko liovihandeleko, va Lewi va lekisa eci ovio vi lomboloka kuenda va lekisavo ndomo vi kapiwako vekalo liokotembo yaco. (Neh. 8:8, 12) Cimuamue haico, kuata otembo yoku lombolola ovisonehua o tanga kuenda oku lekisa ndomo vi kapiwako.

Noke yoku fa kua Yesu kuenda epinduko liaye, eye wa lomboluila olondonge viaye okuti eci ca pita, oku tẽlisiwa kuovisonehua. Eye wa lekisavo ocikele cavo omo lioku kala olombangi viocipito caco. (Luka 24:44-48) Eci o kuatisa omanu oku limbuka ndomo eci ca va longisiwa ci kuete oku tiamisiwila kovimuenyo viavo, ovo vaka limbuka vali lonjanga eci olondaka viaco vi lomboloka.

Ocikele Cutima. Ocili okuti, ndaño elomboluilo liove liwa, kuli ovina vikuavo vika lingisa nda njeveleli ciko lomboloka ale nda ndati. Nda utima womunu wa siva, eci ci kala ocitangi komunu waco oku kuata elomboloko lieci ci popiwa. (Mat. 13:13-15) Komanu vana va nõlapo muẽle oku tenda ovina ndomo omanu va vi tenda, ovina viespiritu kokuavo via va lingila nduveke. (1 Va Kor. 2:14) Eci omunu a lekisa ocituwa caco, ciwa oku sulako lombangulo veteke liaco.

Pole, olonjanja vimue utima womunu wa siva omo liohali a pita layo vomuenyo waye. Nda eye wa ihĩwa epuluvi lioku yeva ocili Cembimbiliya vokuenda kuotembo yimue, utima waye uka leñela kuenje oka tava kocili. Eci Yesu a sapuila ovapostolo vaye okuti eye iya o tipuiwa kuenje vo wipa, ovo ka ca va lombolokele. Momo lie? Momo hacoko va lavokaile kuendavo hacoko va yonguile! (Luka 18:​31-34) Pole, vokuenda kuotembo, ovapostolo 11 ceya oku va lomboloka, kuenda va ci lekisila koku linga kuavo eci Yesu a va longisile.

Elinga Liongangu Yiwa. Eci ci kuatisa omanu oku kuata elomboloko halondakako lika vietu, pole va kuatisiwavo lovilinga vietu. Catiamẽla komanu veya onjanja yatete Vonjango Yusoma, valua va siata oku popia hati, ocina va ivaluka vali okuti oco va mõla vali enene, ocisola, haceciko ca popiwa. Cimuamue haico, esanju tua siata oku lekisa li kasi loku kuatisa omanu valua oku yuluila utima wavo kocili Cembimbiliya. Poku tala ocisola omanu va Yehova va likuetele pokati kuenda ohenda va kuetele vana va kasi loku tala ohali, vamue va limbuka okuti Olombangi via Yehova vi kuete etavo liocili. Omo liaco, poku kuatisa omanu oku kuata elomboloko liocili Cembimbiliya, kũlĩhĩsa ndomo o ci lombololola kuenda kũlĩhĩsavo ongangu ove wa siata oku eca.