Oku Pongiya Olohundo Viowiñi

OSEMANA losemana, vakongelo alua Olombangi via Yehova, mua siata oku sokiyiwa oku lingiwa kuohundo yowiñi ya kunamẽla Vembimbiliya. Nda okuti wukulu wekongelo ale wuñuatisi yakulu vekongelo, wa siata hẽ oku eca uvangi u lekisa okuti, u hundi yiwa, kuenda ulongisi muẽle? Nda oco, ci tava okuti pamue o lalekiwa oco o linge ohundo yowiñi. Osikola Yupange Wakristão, ya siata oku kuatisa olohũlũkãi vialua via vamanji alume oco va loñolohele kocikele eci cupange. Eci o nõliwila oku linga ohundo yowiñi, pi o sukila oku fetikila?

Oku Lilongisa Ohundo

Osimbu handi kua lingile ekonomuiso, tanga ohundo yaco yosi. Noke yi sokolola lutate toke eci yi ku lomboloka ciwa. Patekela osapi, okuti oyo onduko yohundo yaco. Nye oka longisa kolonjeveleli viove? Ocimãho cove hẽ ce?

Kũlĩhĩsa ciwa olonepa via velapo viohundo yaco. Konomuisa ciwa atosi aco. Ndamupi onepa lonepa ya li tokeka losapi yohundo? Vemẽhi liatosi a velapo, mu sangiwa otuatosi tumue tua sonehiwamo, pole ka tua iñilile ño enene. Olonepa viatiamẽla kotuatosi tuaco, via sonehiwa vombuelo yaco. Kũlĩhĩsa ndomo onepa lonepa yohundo ya li tokeka leyi ya lingiwa ale, kuenda ndomo yi tuala konepa yikuavo yi kuãimo. Kũlĩhĩsavo ndomo yi kuatisa koku tẽlisa ocimãho cohundo. Pana okuti osapi yohundo ya ku lomboloka ciwa, locimãho cohundo yaco ca ku lombolokavo, kuenda ndomo atosi a velapo a tẽlisa ocimãho cohundo yaco, ci tava okuti o fetika oku yi pongiya.

Tete, pamue cika ku kuatisa vali nda wa sokisa ohundo yove ndolohundo vikuãla ale vitãlo vitito, okuti ohundo lohundo yi kuete etosi limue lia velapo. Olonepa viaco, vi pongiya yimue yimue.

Ohundo yina ya siata oku eciwa, ocimalẽho ño celiangiliyo. Ka ci lomboloka okuti, oyo yi kala muẽle ohundo yove, okuti oko o kopisila oku linga ohundo. Oyo yi kasi ño ndondunda yakepa. Ove o sesamẽla oku yi kapa ositu, oku yĩha utima kuenda oku eca omuenyo kokuayo.

Oku Tanga Ovisonehua

Yesu Kristu lolondonge viaye, va enda loku tiamisila elongiso liavo Vovisonehua. (Luka 4:16-21; 24:27; Ovil. 17:2, 3) Ove ci tava okuti o ci lingavo. Ovisonehua te ovio via linga ociseveto cohundo yove. Ku ka lombolole ño atosi a sangiwa vohundo wa tambula, loku lekisa ndomo a kapiwako. Puãi, kũlĩhĩsa ndomo atosi aco a likuata leci ci sangiwa Vovisonehua vi Kola. kuenje poku longisa upisila kueci ci sangiwa Vembimbiliya.

Poku angiliya ohundo yove, konomuisa ovinimbu viosi Viembimbiliya via tukuiwamo. Kũlĩhĩsa ciwa ulandu waco. Ovisonehua vimue via kapiwilamo ño oco vi ku kuatise oku kũlĩha ono yesapulo liaco. Haviosiko okuti vi sukila oku vi tanga ale oku vi lombolola voku lingiwa kuohundo yove. Nõlamo ño vina okuti viwa oku vi lomboluila olonjeveleli viove. Nda wa luluvalela Kovisonehua vi kasi ale vohundo, kuka sukila oku vokiyako vali oku tanga Ovisonehua vimue vikuavo.

Oku tunda ciwa kuohundo yove ka kua tiamẽlele ketendelo liovisonehua oka tanga, pole kua tiamẽla enene koku longisa kuove. Eci o tukula ocisonehua cimue, lekisa esunga lieci ocisonehua caco ci tangiwila. Sokiya otembo yoku lombolola ndomo ocisonehua caco ci kapiwako. Noke yoku tanga ocisonehua cimue, poku lombolola ulandu waco, Embimbiliya liove ku ka li tuvike. Ci tava okuti, olonjeveleli viove pamue vika ci lingavo. Ndamupi o vetiya onjongole yolonjeveleli viove loku va kuatisa okupa esilivilo lia velapo Kondaka ya Suku? (Neh. 8:8, 12) O pondola oku ci linga poku lombolola, loku setahãisa eci wa lombolola leci omanu va kũlĩha, kuenda poku lekisa ndomo eci wa lombolola ci kapiwako.

Oku Lombolola. Poku liangiliyila oku ka lombolola ocisonehua cimue okuti oco osapi yondaka, lipula ove muẽle okuti: ‘Ocisonehua caco eci hẽ ci kuete elomboloko lie? Momo lie ñasilili loku ci kongela vohundo yange? Olonjeveleli vi kasi hẽ oku lipula nye kueci catiamẽla kocinimbu eci?’ Ove o sukila oku konomuisa ulandu waco wosi, lono yesapulo liaco, kuenda vekalo ocinimbu caco ca sonehiwila, longusu yolondaka viaco, kumue loku konomuisavo ocisimĩlo cusonehi. Eci ci sukila oku konomuisa. Oka sanga alomboluilo alua a silivila valivulu angiliyiwa “[L]ukuenje wa kolelua haeye wa lunguka.” (Mat. 24:45-47) Kuka lombolole cosi catiamẽla kocinimbu caco. Lombolola ño esunga lieci wa pingila kolonjeveleli viove oku tanga ocinimbu caco poku ci tiamisila kueci ci kasi loku lomboluiwa. Elomboluilo liove li lomboloke ciwa.

Ovindekaise. Esunga lieci ovindekaise vi lingiwila, oku kuatisa olonjeveleli viove oco vi kuate elomboloko liwa. Ale oku va kuatisa oku patekela etosi limue lia velapo ove o kasi loku lombolola. Ovindekaise vi kuatisa omanu oku kuata elomboloko lieci o kasi loku va sapuila. Ku va kuatisavo oku ci setahãisa locina cimue ovo va kũlĩha ale. Eci oco Yesu a lingile, eci a linga Ohundo yaye ya kemãla yo Komunda. Oku tukula “Olonjila,” “oloneleho vi[ov]usenge,” ‘ombundi ya sukatela,’ ‘onjo ya tungiwila vohanda,’ kuenda olondaka viñi viñi vikuavo, kua lingisa okuti elongiso liaye li vetiya utima, li lomboloka kuenda li patekeliwa.—Mat. ocipama 5–7.

Oku Lekisa Ndomo ci Kapiwako. Oku lombolola loku setahãisa ocisonehua cimue, ku pitiya ukũlĩhĩso, puãi oku sinumula ndomo ukũlĩhĩso waco u kapiwako oco cika nena onima yiwa. Ocili okuti, ocikele colonjeveleli oku linga eci Embimbiliya li va sapuila. Pole, ove ci tava okuti o va kuatisa oku limbuka eci va sesamẽla oku linga. Pana okuti wa kolela muẽle okuti olonjeveleli viove via tẽla oku kuata elomboloko liocinimbu ca tangiwa, kuenda va tẽlavo oku limbuka esilivilo liocinimbu caco kueci catiamẽla kondaka yi kasi loku lomboluiwa, sokiya otembo yoku lekisa esilivilo liocinimbu caco kueci catiamẽla ketavo kuenda kovilinga vietu. Velisapo oku tukula asumũlũho eyilila koku siapo ovisimĩlo vĩvi lovituwa vina ka vi litava locili ci kasi loku lomboluiwa.

Poku sokolola ndomo oka tiamisila ovisonehua komuenyo wolonjeveleli viove, ivaluka okuti olonjeveleli viove via tunda kapata añi añi kuenda va kasi loku liyaka lakatanga a litepa. Ci tava okuti, pamue muli ava va fetika ño ndopo oku lilongisa Embimbiliya, ale pamue muli amalẽhe, lakulu kuenda vana okuti va kasi oku liyaka lovitangi viñi viñi vomuenyo wavo. Linga okuti ohundo yove yi kala lesilivilo kuenda yi kapiwako vomuenyo womunu lomunu. Yuvula oku eca elungulo lina li molẽha soketi o kasi loku litiamisila ño komanu vamue.

Ovina Okuti Hundi Eye Okuete Oku vi Nõla

Vimue viatiamẽla kohundo yove, va ku vi ñolela ale. Atosi a velapo a ilikiwa ale, kuenda otembo o kuete oku pesila koku lombolola ocinimbu locinimbu ya lekisiwa ale ciwa. Ovina vikuavo viatiamẽla kohundo yove, ove muẽle o kuete oku vi nõla. Ove, ci tava okuti pamue o nõlapo oku pesila otembo yaluapo vali kovinimbu vimue, kuenje kovinimbu vikuavo o pesilako ño otembo yimue yitito. Ku ka sime okuti kovinimbu viosi o pesilako otembo yimuamue. Oku linga ndoco, cika ku kokela oku lupuka lohundo kuenje olonjeveleli viove oka vi sukilisa omuenyo lalomboluilo. Ndamupi o nõla eci oka lombolola vali ciwa lutate leci oka lombolola ño loku teta onimbu? Lipula ove muẽle ndoco: ‘Atosi api aka ndi kuatisa oku lombolola ocisimĩlo ca velapo cohundo? Atosi api a kuete ongusu ya velapo koku kuatisa olonjeveleli viange? Anga hẽ nda okuti nda tẽhapo ocisonehua cimue ca tukuiwa ale pamue etosi limue lia tiamẽlako, cika tepulula ongusu kuvangi u kasi loku lekisiwa?’

Luloño walua, yuvula oku kongelamo atosi ana okuti, ka a konomuisiwile handi ciwa. Yuvulavo oku kongelamo ovisimĩlo viove muẽle. Ndaño muẽle omõla a Suku, Yesu Kristu, wa yuvula oku popia ovina ‘locipango caye muẽle.’ (Yoa. 14:10) Ivaluka okuti, esunga lieci omanu veyalaila kolohongele Violombangi via Yehova, oku yevelela elomboluilo lieci ci kasi Vembimbiliya. Nda weya oku limbuka okuti u hundi yiwa, eci pamue, momo lioku tiamisila kuove ovisimĩlo violonjeveleli Kondaka ya Suku, okuti kokuove muẽle hakoko. Nda wa ci linga, olohundo viove vika soliwa calua.—Va Fil. 1:10, 11.

Pana okuti ohundo ya kala ño ndatosi onimbu wa yi lingisa ndonepa yimue yelomboluilo Liembimbiliya, kaliye o sukila oku pitololamo. Ci kuatisa vali oku ci linga lolukandi. Ocina ca velapo, oku kuata ekolelo liokuti kua ivaleleko etosi lalimue. Ove o sukila oku eca ongusu kuenda omuenyo kohundo yove loku lombolola ocili lesanju. Osimbu handi kua lingile ohundo yove, lipula ndoco: ‘Nye ndi yongola oku tẽlisa? Anga hẽ atosi a velapo a nõliwa ale? ‘Anga hẽ Embimbiliya olio lia linga muẽle ociseveto cohundo yange? Anga hẽ etosi lia velapo li tuala ketosi likuaĩmo lulelu? Anga hẽ ohundo yi vetiya oku kuatela ocisola Yehova kuenda oku solavo aliangiliyo aye? Anga hẽ olondaka vioku sulako, via litokeka losapi yohundo, okuti vi lekisa kolonjeveleli eci va sukila oku linga, kuenda vi va vetiya oku ci linga?’ Nda wa tambulula okuti oco kapulilo ava, ci tava okuti o “sandeka ukũlĩhĩso” oco ekongelo liupeko ekuatiso kuenda oco Yehova a sivayiwe!—Olosap. 15:2, NW.

CECI OHUNDO YOVE YI YEVALISIWA LA UMUE KAPITIYA

Ca siata okuti vofeka yimosi mu kala vakualimi alua. Omo liaco, pamue ohundi yimue yowiñi yi pingiwa oco yi linge ohundo ya kunamẽla Vembimbiliya okuti yi yevalisiwa la umue kapitiya. Nda okuti weya oku lalekiwa oco o linge ohundo ndeyi, olonumbi vikuãimo vi ka ku kuatisa kuenda vika kuatisivo kapitiya kove.

Oku tunda ciwa kuohundo yove kuatiamẽla vali enene kupange wa kapitiya kove. Ndaño yuna okuti konepa eyi yoku pitiya olohundo wa loñoloha ale ciwa, eye oka linga upange uwapo vali nda wo kuatisako oku lipongiya.
Ndomo ca siata, ove o sukila oku tepulula cimue ci soka onepa yatatu kohundo yove oco ecelele epuluvi lioku yi pitiya. (Catiamẽla kupopi woku ilaika, eci ka ci kapiwako, momo owo ci tava okuti u pitiyiwa muẽle vonjanja yimuamue leci ci kasi loku vanguiwa.)
Osimbu handi ohundo yaco ka ya lingiwile, pitamo la kapitiya kuenda konomuisi pamosi esunga lieci ohundo yaco yi lingiwila. Nda onepa va ku ilikila, ohundo yina yoku tanga cosi ca sonehiwamo (manuscrito), okuti yika lingiwila kohongele yofeka, ecelela okuti kapitiya kove o yi tala cina okuti handi selo.
Likunda la kapitiya kove ovinimbu viovisonehua uka tanga. Kũlĩhĩsa ciwa okuti Embimbiliya velimi li vanguiwa, lieca ocisimĩlo cimuamue Lembimbiliya ove o kuete. Lekisa ku kapitiya kove olondaka Viembimbiliya vika velisiwapo vali oku tukuiwa ale vievi vika lomboluiwa.
Nõla ovinimbu viovisonehua vika tangiwa valimi aco avali, ale vievi vika tangiwa lika velimi limosi. Oku tanga velimi li lomboloka kolonjeveleli, ci tava okuti ci tẽla.
Oku tukula lonjanga yalua oloneke, atendelo, ale ovinimbu Viembimbiliya, cika katangisa kapitiya kove. Talayama, pku vi tukula. Nda okuti ka kuli etendelo lia suapo, tukula ño etendelo li kasi ocipepi lalio.
Lomboluila kapitiya kove alusapo, upopi, kuenda olondaka vina ka via siatele, ove wa sokiya oku ka vangula. Kũlĩhĩsa okuti kapitiya kove, vio lomboloka ciwa, kuenda kũlĩhĩsavo okuti ci tava oku pitiya ocisimilo cavio velimi li lomboloka kolonjeveleli.
Poku vangula teta onimbu. Vangula ocisimĩlo cosi, osimbu handi kua tulile, oco kapitiya kove a pitiye noke kowiñi. (Eye o pitiya ovisimĩlo pole ka pitiya ondaka londaka.) Catiamẽla koku pitiya kuna ku lingiwa vonjanja yaco muele, okuti ove o vangula eye o pitiya, ecelela okuti kapitiya o mala, oco vamiseko noke.
Upange wa kapitiya, watiamẽla vali enene koku votola kuove ondaka kuenda koku tumbika kuove ciwa elaka.