Mose Wa Kala Ukuekolelo

EKOLELO LI LOMBOLOKA NYE? Ndomo ca lekisiwa Vembimbiliya, voku kuata “ekolelo” mua kongela oku tava kovovangi ka a letiwe. Omunu wa kolela Suku, o tava okuti, Eye o ka tẽlisa olohuminyo viaye viosi.

MOSE WA LEKISA NDATI EKOLELO? Mose wa tiamisilile utima waye kolohuminyo via Suku. (Efetikilo 22:15-18) Eye wa kuatele epuluvi lioku kala velau lio Kegito, pole wa siapo elau liaco kuenje, “wa nõlapo oku tala ohali kumue lomanu va Suku, oku sanjukila asanju akandu, hao asanju a pua pua, hacoko.” (Va Heveru 11:25) Anga hẽ poku nõlapo oku talisiwa ohali, ka sokoluile vali okuti eteke limue wa laikele oku livela? Sio, Embimbiliya li popia hati, Mose ‘wa amamako lepandi ndu o lete una ka muiwa lovaso ositu.’ (Va Heveru 11:27) Eye ka livelele omo lioku nõla onjila yaco.

Mose wa pamisa ekolelo liomanu vakuavo. Konomuisa ovina via pita eci va Isareli va kala pokati kolohoka via Fareo, lo Kalunga Kakusuka. Va Isareli omo liusumba woku kunduiwa, va vilikiya Yehova kuenda Mose. Anga hẽ Mose wa tambulula ndati?

Pamue Mose ka kũlĩhĩle okuti Suku wa laikele oku tepa pokati o kalunga ka kusuka oco va Isareli va puluke. Haimo lumue, Mose wa kolelele okuti, Suku wa ponduile oku linga ocina cimue oco a teyuile omanu Vaye. Mose wa yonguile okuti vangandiaye va Isareli, va kuatavo ekolelo ndeli liaye. Kulandu waco tu tangako ndoco: ‘Mose yu wa popia lomanu hati, Ko ka yokoki. Kolisiko, oco vu moli eyovo lia Yehova lina a ko muisi etaili.’ (Etundilo 14:13) Anga hẽ olondaka via Mose via kuatisa va Isareli oku kuata ekolelo? Ocili okuti, Embimbiliya li popia ovina viatiamẽla ku Mose kuenda ku va Isareli ndoco: “Omo omanu va kala lekolelo, oco va yoka o Kalunga Kakusuka.” (Va Heveru 11:29) Ekolelo lia Mose, li pondola oku kuatisa omanu vosi va setukula ongangu yaye.

ONGANGU YA MOSE YI TU LONGISA NYE? Tu pondola oku setukula Mose poku tiamisila utima wetu koku tẽlisiwa kuolohuminyo via Suku. Vimue pokati kolohuminyo tu sukila oku kolela vievi: Suku wa likuminya oku tu ĩha ovina viosi tu sukila ketimba, nda tu pitisa kovaso efendelo liaye. (Mateo 6:33) Ocili okuti, olonjanja vimue ka ca lelukile oku yuvula oku pitisa kovaso oku sandiliya ovokuasi, momo oco omanu valua va siata oku linga voluali lulo. Pole, tu pondola oku kolela okuti, nda tu likolisilako oku linga ovina via velapo, poku kuata iso liyela kuenda oku tiamisila utima kefendelo lietu, Yehova o tu ĩha ovina viosi tu sukila. Eye wa likuminya hati: “Ame lalimue eteke hu yanduluka ndaño oku ku sia.”—Va Heveru 13:5.

Tu sukilavo oku likolisilako oku kuatisa vamanji oco va pamise ekolelo liavo. Olonjali vina vi kuete olondunge, via limbuka okuti vi sukila oku kuatisa omãla vavo oku kolela ku Suku. Osimbu omãla vavo va kula, va sukila oku kũlĩha okuti, kuli Suku umue wa tumbika olonumbi vi tu kuatisa oku tepisa pokati keci ciwa leci cĩvi. Handi vali, omãla va sukila oku kolela okuti, oku kapako olonumbi viaco, oco ocina ca velapo komuenyo. (Isaya 48:17, 18) Olonjali poku kuatisa omãla oku kolela okuti kuli muẽle Suku una “eca onima kuava vo sanda,” vi eca kokuavo ombanjaile yimue ya posoka.—Va Heveru 11:6.