Nda komõha calua atambululo Embimbiliya a sunguluka hao ateta onimbu

OMUENYO WANGE KOSIMBU:

Nda citiwila ko Székesfehérvár, kofeka yo Hungria, olupale lumue okuti tunde eci ulandu wawo wa fetika papita ale 1.000 kanyamo. Pole handi ndi ivaluka ovina vimue via nyõleha omo liuyaki wavali wa pita voluali.

Tunde vutila wange, nda tekuiwa la va sekulu yange. Ame ndi va ivaluka ciwa​—ca piãla enene makulu yange Elisabeth. Eye wa ñuatisa oku pamisa ekolelo liange ku Suku. Tunde eci nda kuata anyamo atatu, olonjanja viosi koñolosi tua enda oku pitulula Ohutililo ya Ñala. Pole, ndaño locituwa caco, nda kuata lika elomboloko liolohutililo eci nda tẽlisa 20 kanyamo.

Va sekulu yange va fetika oku nekula tunde vutila, momo olonjali viange via enda oku talavaya utanya luteke, oco va seleke olombongo vioku landa onjo. Vocasapalo cavali kosãi, epata liosi lia enda oku liongolola oco va lie kumosi. Nda solaile calua apuluvi aco oku kala kumosi.

Kunyamo wo 1958, onjongole ya isiange yoku landa onjo ya tẽlisiwa kuenje katatu ketu omo tua yilukila. Nda sanjukile calua eci nda likongela​—lolonjali viange! Pole, noke yolosãi epandu, esanju liange lia sulila. Momo isiange wa fa omo lio kanser.

Ca ndi sumuisa calua. Njivaluka eci nda likutilila hati: “A Suku, ndu ku pinga oco o popele isiange. Ame ndu sukila. Momo lie kua tambuluile olohutililo viange?” Lesumuo lialua nda yonguile oku kũlĩha oku isiange a kasi. Nda enda oku lipula ndoco: ‘Ange hẽ eye wa enda kilu? Ale lalimue eteke a ka kala vali komuenyo?’ Nda endaenda oku kuatela esepa omãla vana okuti handi va kuete isiavo.

Vokuenda kuanyamo, oloneke viosi nda enda oku enda ocipepi lo kalundu. Nda endaenda oku kekama kolongolo keyambo lia isiange loku likutilila ndoco: “A Suku, mange ohenda, ndi yongola oku kũlĩha oku isiange a kasi.” Nda endaendavo oku likutilila oco ndi sange elomboloko liomuenyo.

Eci nda kuata 13 kanyamo, nda nolapo oku lilongisa elimi lio Alemão. Nda simĩle okuti valivulu alua a sonehiwa kelimi lio Alemão, ndi pondola oku sangamo a tambululo apulilo ange. Kunyamo wo 1967, nda fetika oku tangela volupale luo Jena, konepa Yutundilo yofeka yo Alemanya. Nda solaile calua oku tanga alivulu olonoño vioko Alemanya, ca piãla enene ana a lombolola oku kua fetikila omuenyo womunu. Ndaño nda sangamo ovisimĩlo vialua viwa, pole lalimue lia tẽlisile onjongole yange. Omo liaco, nda amamako oku likutilila oco ndi sange a tambululo.

NDOMO EMBIMBILIYA LIA PONGOLOLA OMUENYO WANGE:

Kunyamo 1970, nda tiukila kofeka yo Hungria, kuenje nda lisanga la Rose una ndeya oku kuela laye. Kotembo yaco, ofeka yo Hungria ya kala vemehi liuviali wo komunismo. Noke yoku kuela, ame la Rose tua ilukila kofeka yo Áustria. Tua kuatele ocimaho coku ilukila kolupale luo Sydney, kofeka yo Austrália, kuna kua kala tiu yange.

Noke yokatembo kamue, nda sanga upange kofeka yo Austria. Eteke limue, ulume umue tu talavayela kumosi, wa ndi sapuila okuti Vembimbiliya ndi pondola oku sangamo atambululo apulilo ange osi. Eye wa nyiha alivulu avali a lombolola catiamẽla Kembimbiliya. Nda tanga alivulu aco lonjanga kuenda lesanju, nda yonguile oku amamako oku lilongisa. Noke nda sonehela Olombangi via Yehova via sandeka alivulu aco loku pinga alivulu akuavo.

Eteke limue osimbu tua kala oku linga ocipito cetu catete colohuela, ame la Rose tua nyuliwa lumalẽhe umue Ombangi ya Yehova, wo ko Australia. Eye wa nena alivulu nda pingile loku ndi pulisa nda ndi yongola oku lilongisa Embimbiliya kuenje nda tava. Omo okuti nda kuatele onjongole yalua yoku lilongisa, tua enda oku lilongisa olonjanja vivali​—vosemana kuenda tua enda oku kala olowola vikuãla!

Nda komoha calua ovina Olombangi Via Yehova via kala oku ndi longisa lekuatiso Liembimbiliya. Eci va ndekisa onduko ya Suku, Yehova Vembimbiliya kelimi liange lio Hungaro, nda komoha. Ndaño nda pita ci soka 27 kanyamo loku endaenda konembele, lalimue eteke nda yevele okuti va tukula onduko ya Suku. Nda komoha calua ndomo Embimbiliya lia tambulula apulilo ange lonjila yimue ya sunguluka haiyo ya teta onimbu. Nda lilongisa okuti ava va fa lacimue va kũlĩhile, momo va kasi ndu okuti va pekela otulo tuelume. (Ukundi 9:5, 10; Yoano 11:11-15) Nda lilongisavo catiamẽla kohuminyo Yembimbiliya yoluali luokaliye muna okuti, “olofa ka vi ka kalamo vali.” (Esituluilo 21:3, 4) Ndi lavoka oku mola vali isiange, voluali luokaliye “muna a ka pinduiwa.”​—Ovilinga 24:15.

Rose wa fetikavo oku lilongisa Embimbiliya. Ukũlĩhĩso wetu wamamako oku livokiya kuenje, vokuenda kuolosãi vivali tua mãla elivulu tua kala oku lilongisa! Tua enda oku enda enda kolohongele Violombangi Via Yehova Vonjango Yusoma. Tua komoha calua ocisola Colombangi Via Yehova, ocituwa cavo coku likuatisa pokati kuenda omunga yi kasi pokati kavo.​—Yoano 13:34, 35.

Kunyamo wo 1976, ame la Rose tua ilukila ko Australia. Eci tua pitĩla haico tua sandiliya Olombangi Via Yehova. Olombangi Via Yehova tua sanga via tu tambula lesanju. Kunyamo wo 1978, tua papatisiwa.

NDOMO NDA KUATISIWA:

Cilo nda sanga atambululo apulilo a kala oku ndi sakalaisa vokuenda kuanyamo alua. Poku amẽla ku Yehova Suku, nda sangavo Isia wa velapo. (Tiago 4:8) Kuenje elavoko lioku ka mõla vali isiange voluali luokaliye luna lu kasi oku iya li kuete esilivilo lia velapo kokuange.​—Yoano 5:28, 29.

Kunyamo wo 1989, ame kumue la Rose tua nolapo oku tiukila kofeka yo Hungria oco tu sapuileko akamba vetu, epata, kuenda omanu vakuavo catiamẽla kovina tua kolela. Tu kuete esanju omo lioku longisa Embimbiliya omanu valua. Ci pitahãla 70 komanu va likongela kokuetu koku vumba Yehova oku kongelamo ina yange.

Vokuenda kueci ci soka 17 kanyamo nda enda oku likutilila oco ndi sange atambululo apulilo ange. Kaliye cilo okuti papita ale 39 kanyamo, nda siata oku likutilila loku popia hati: “Nda pandula a Isiange wo kilu ukuacisola, momo wa tambulula olohutililo viange vio vutila.”