Ceci o Liyaka Luveyi Umue Okuti ka u Kuete Ovihemba Vioku u Sakula

“Eci nda limbuka okuti nda kuatiwa luveyi wo kanser vapuvi kuenda voviongo, nda simĩle okuti ndi fa. Pole, eci nda tunda kondotolo oku enda konjo, nda sokolola ndoco: ‘CIWA, eci hacoko nda lavokaile pole, ndi sukila oku sanga onjila yimue yi ñuatisa oku pandikisa.’” —Linda o kuete 71 kanyamo.

“Ñasi luveyi umue u koka evalo vowoño konẽle yepĩli kocipala. Olonjanja vimue ndi kuata evalo lialua li ndi kokela esumuo. Pamue ndi liyeva ulika kuenda ndi sima oku liponda.” —Elise, o kuete 49 kanyamo.

Ulume umue wa tumãla pomangu yalola, wa ñualiwa lavangandiaye

NDA OVE ale umue ngadiove o kasi luveyi umue okuti ka u kuete ovihemba vioku u sakula, wa kũlĩha ndomo ci sakalaisa. Handi vali, o sukila oku liyaka lovisimĩlo ka via sungulukile. Usumba u pondola oku livokiya poku kũlĩhĩsa olondotolo, ovitangi vioku sanga ovihemba ale ovitangi vikuavo viya omo lioku nyua ovihemba viaco. Esakalalo omunu a kuete omo liuveyi waco, li sumuisa calua.

Pi tu pondola oku sanga ekuatiso? Valua va siata oku sanga elembeleko poku likutilila ku Suku kuenda oku tanga Vembimbiliya ovinimbu vi lembeleka. Ekuatiso likuavo, li tunda kocisola kuenda kekuatiso epata kuenda akamba va pondola oku eca.

CECI CA SIATA OKU KUATISA VAMUE OKU PANDIKISA

Robert o kuete 58 kanyamo wa popia okuti: “Nda wa kolela ku Suku, eye o ka ku kuatisa oku pandikisa kuveyi wove. Likutilila ku Yehova. Situlula kokuaye ovisimĩlo viove. Pinga espiritu sandu liaye. U pingavo oco a ku kuatise oku kuata ovisimĩlo via sunguluka, oku pamisa epata liove kuenda oku tula utima osimbu o pandikisa kuveyi wove.

Ey wa popiavo hati: “Ciwa eci epata liove li ku kuatisa poku sapela love. Omunu umosi ale vavali va ndi telefonalela loku ndi pula hati, ‘O kasi ciwa?’ Ndi pamisiwavo lakamba va kasi kovitumãlo via litepa. Ovo va ñuatisa oku liyeva ciwa loku pandikisa.”

Nda ove o kasi oku nyula omunu umue ovela, kũlĩhĩsa eci Linda a popia: “Omunu o vela o yongola oku amamako oku linga ovina a sole kuenda citava okuti ka vangula catiamẽla kuveyi waye. Omo liaco, vangula ovina wa siati oku vangula ale.”

Lekuatiso lia Suku, elembeleko li tunda Vovisonehua kuenda ekuatiso liepata kumue lakamba, tu pondola oku kolela okuti omuenyo u kuete esilivilo, ndaño ceci tu liyaka luveyi umue okuti, ka u kuete ovihemba vioku u sakula.

Ovinimbu Viembimbiliya vi Kuatisa

Kolela Kekuatiso Li Tunda ku Suku.

“Nda sanda Yehova kuenje wa nambulula, wa mopela kovinjoko viange viosi. Ohukui eyi ya vilikiya, Yehova wa yi yeva, wa yi popela kovitangi viayo viosi.”—Osamo 34:4, 6.

Linda wa tukuiwa ale wa popia hati: “Si likutila poku popia hati, ‘Ñaise.’ Pole, ndi likutilila ndoco: ‘Ñuatise oco ñuate ongusu yoku liyaka luveyi wange.’”

Tanga Ondaka ya Suku oco yi ku kuatise oku pandikisa.

“Layimue onungi yi popia yiti: ‘Ndi vela.’” —Isaya 33:24.

Oku sokolola kolohuminyo via Suku ci ku ĩha elavoko kuenda ongusu yoku pandikisa.

Sanda ekuatiso kepata kuenda kakamba vove.

“Ekamba li sola olonjanja viosi, kuenje li linga manjove koloneke viohali.”—Olosapo 17:17.

Elise wa tukuiwa ale wa popia hati: “Ku ka liamuhe lavakuene. Ecelela okuti akamba vove va ku kuatisa. Vepuluvi limue o liyeva okuti o kasi ulika kuenda o sima okuti Suku ka ku yevite, pole ku ka liamũhe lavakuene.”