Helie o ka Popela Omanu Vana Okuti Hasualaliko? —Nye Embimbiliya li popia?

Ulandu umue wolo Nações Unidas wa lombolola ndoco:

• Tunde keteke 7 toke 23 ya Mbalavipembe 2023, vuyaki u kasi oku lingiwa lo Gaza kuenda lo Israel, kua fa eci ci pitãhala 6.400 komanu kuenda 15.200 va lemẽhiwa, valua pokati kavo hasualaliko. Handi vali, omanu valua va kisikiwa oku siapo olonjo viavo.

• Tunde keteke 24 Yenyenye Linene 2023, uyaki u kasi oku lingiwa lo Rusia kuenda o Ukrania, wa ponda eci ci soka 9.701 komanu okuti hasualaliko kuenda 17.748 ko Ukrania, va lemẽhiwa.

Elavoko lipi Embimbiliya li eca ku vana va kasi oku tala ohali omo liuyaki?

Esunga limue lioku kuata elavoko

Embimbiliya li popia okuti Suku o ka “nena esulilo liovoyaki kilu lieve liosi.” (Osamo 46:9) Eye o ka talavaya luviali wokilu oco a nyõle ovosoma osi omanu. (Daniele 2:44) Usoma wa Suku u ka nena ekavuluko komanu.

Tala eci Yesu Kristu a popia okuti oco Usoma wa Suku u ka linga:

• “Momo eye o ka yovola ohukũi yina yi kaluka oku pinga ekuatiso, kuenda o ka yovolavo osuke lomunu wosi ka kuete umue u kuatisa. Eye o ka kuatela ohenda osuke lohukũi, kuenda o ka popela omuenyo wohukũi.  Eye o ka va yovola kohali kuenda kungangala, kuenje osonde yavo yi ka kuata esilivilo lialua kovaso aye.”—Osamo 72:12-14.

Suku pocakati Cusoma waye, o ka malako evalo liosi kuenda esumuo lia siata oku kokiwa lovoyaki kuenda ungangala kuenje, omanu ka va ka tala vali ohali.

• “Eye o ka puenya asuẽlẽla osi vovaso avo, oku fa ka ku ka kalako vali, ndaño oku lila loku liyula levalo ka vi ka kalako vali. Ovina viatete via pita.”—Esituluilo 21:4.

Ndopo Usoma wa Suku, u ka viala ololuali luosi. Embimbiliya lia tukuile ale catiamẽla “kovoyaki kuenda asapulo ovoyaki” tu lete koloneke vilo. (Mateo 24:6) Ovolandu aco kuenda akuavo a lekisa okuti tu kasi “koloneke via sulako” ovoviali omanu palo posi.—2 Timoteo 3:1.