Jẹnẹsis

26 Asaọkiephana owẹnvwe de fi vwevunrẹ otọ na kirobo rẹ owẹnvwe ji fi vwẹ ọke rẹ Ebraham, ọtiọyena Aizik de bru Abimẹlẹk ovie rẹ ihwo ri Filistia ra vwẹ Gira. 2 Jihova da vwomaphia kẹ, ọ da ta: “Wo kpo Ijiptii. Dia evunrẹ otọ re me vwọ kẹ wẹ na. 3 Dia evunrẹ otọ nana kerẹ ọrhorha, ki mi che nene uwe dia ọkieje ji bruba kẹ wẹ, kidie me cha vwẹ etọ nana eje vwọ kẹ wẹ vẹ emọ* wẹn, ki mi che ru nene iyorin ri mi duvwun kẹ ọsẹ wẹn Ebraham: 4 ‘Me cha nẹrhẹ emọ* wẹn dia buebun kerẹ isio rẹ idjuvwu na; ke me cha vwẹ etọ nana eje vwọ kẹ emọ* wẹn; womarẹ emọ* wẹn kọyen ẹgborho rehẹ akpọ na eje che vwo vwo ebruphiyọ kẹ oma rayen,’ 5 kidie Ebraham kerhọ rẹ urhuru mẹ, o ru obo re me guọnọre ọkieje je yọnrọn iji mẹ kugbe irhi mẹ.” 6 Ọtiọyena Aizik da daji Gira.

7 Eshare rẹ asan na vwo dje ẹnẹnọ kpahen aye rọyen, kọ vuẹ ayen: “Ọyen oniọvo mẹ rẹ aye.” Kidie oshọ muo rọ vwọ tanẹ, “Ọyen aye mẹ,” kidie ọ tare nẹ, “Eshare rẹ asan na sa teyen ovwẹ hwe fikirẹ Rebeka,” kidie o vwo erhuvwu. 8 Ọke evo vwọ wan nu, Abimẹlẹk ovie rẹ ihwo ri Filistia kọ wan ovakpo vwo nẹ otafe, ọ da mrẹ Aizik vẹ aye rọyen Rebeka re bẹnẹ.* 9 Ugege yena Abimẹlẹk de se Aizik, ọ da ta: “Aye wẹn yen o ghini ruẹ! Diesorọ wọ vwọ tanẹ, ‘Oniọvo mẹ rẹ aye’?” Ọtiọyena Aizik da ta kẹ: “Me ta ọtiọyen fikirẹ oshọ nẹ mi che ghwu fiki rọyen.” 10 Abimẹlẹk da ta: “Die yen wo ru avwanre na? Mane jẹ ọvo vwẹ usun rẹ ihwo na nene aye wẹn vwerhẹn, ku wọ rha nẹrhẹ avwanre riabe!” 11 Ọtiọyena Abimẹlẹk de jurhi kẹ ihwo na eje nẹ: “Kohwo kohwo ro djobọte ọshare nana vẹ aye rọyen, ka teyọn hwe!”

12 Aizik kọ kọn ekankọn vwẹ otọ yena, vwẹ ukpe yena o de vun obo rọ kọnre abọ 100, kidie Jihova brẹba kẹ. 13 Ọshare na da rhe dia ọdafe, ekuakua ki yovwẹn kẹ, rhirin bẹsiẹ ro rhi vwo fe gangan. 14 O de vwo igodẹ buebun vẹ ekrun rẹ erhuẹn kugbe idibo buebun, ihwo ri Filistia ke rioma kpahọn gangan.

15 Ọtiọyena ihwo ri Filistia da ghwẹ ekpẹn vwo gbe erhare na eje rẹ idibo rẹ ọsẹ rọyen tọnre vwẹ ọke rẹ Ebraham. 16 Abimẹlẹk da ta kẹ Aizik: “Kua nẹ ekogho rẹ avwanre na, kidie wọ rhe gan vrẹ avwanre mamọ re.” 17 Ọtiọyena Aizik da kua nẹ etiyin, o de wonphiyọ* iyara* ri Gira, kọ dia etiyin. 18 Aizik da rhoma tọn erhare ra tọnre vwẹ ọke rẹ ọsẹ rọyen Ebraham, rẹ ihwo ri Filistia na gberi ọke rẹ Ebraham vwo ghwu nu, o de se ayen edẹ rẹ ọsẹ rọyen vwo se ayen jovwo.

19 Ọke rẹ idibo rẹ Aizik vwọ tọn otọ vwẹ iyara* na, ayen da mrẹ orhare ro vwo omamọ rẹ ame. 20 Isuigodẹ ri Gira ki nene isuigodẹ rẹ Aizik kunu nẹ, “Ame na ọ rẹ avwanre!” Ọtiọyena o de se orhare na Isẹk,* kidie ayen nenire kunu. 21 Kẹ ayen tọn orhare ọfa, ayen da je kunu fiki rọyen. Ọtiọyena o de se Sitna.* 22 Ọke vwọ yanran, o de vrẹn nẹ etiyin, ọ da tọn orhare ọfa, ẹkẹvuọvo ayen kunu fiki rọyeen. Ọtiọyena o de se Rẹhobọt,* ọ da ta: “Kidie asaọkiephana Jihova kẹ avwanre asan ophephẹn re, ọ je nẹrhẹ avwanre dia buebun vwevunrẹ otọ na.”

23 Ọtiọyena ọ da kua nẹ etiyin kpo Biẹ-shiba. 24 Vwẹ ason yena Jihova da vwomaphia kẹ, ọ da ta: “Mẹvwẹ Ọghẹnẹ rẹ ọsẹ wẹn Ebraham. Wọ djoshọọ kidie me vẹ owẹ herọ, mi che bruba kẹ wẹ je nẹrhẹ emọ* wẹn dia buebun fikirẹ odibo mẹ Ebraham.” 25 Ọ da so agbada ọvo vwẹ etiyin ji se odẹ ri Jihova. Aizik de chiyin utughẹ rọyen phiyọ etiyin, idibo rọyen da tọn orhare ọvo vwẹ etiyin.

26 Ọke vwọ yanran, Abimẹlẹk de nẹ Gira bro rhe, ọ vẹ obruche romobọ rọyen Ahọzat kugbe Faikọl rọ dia onotu rẹ isodje rọyen. 27 Ọtiọyena Aizik da ta kẹ ayen: “Diesorọ ovwan vwo bru vwe rhe, rọ vwọ dianẹ ovwan vwo utuoma kpahen ovwẹ, je djẹ vwẹ nẹ ekogho rẹ ovwan?” 28 Ọtiọyena ayen da ta: “Avwanre mrẹrẹ phephẹn nẹ Jihova vẹ owẹ herọ. Ọtiọyena avwanre da ta, ‘Biko, e jẹ avwanre vẹ owẹ duvwun iyorin, rere avwanre nene uwe re ọphọ 29 nẹ wo che ru avwanre emu vuọvo rọ braree, kirobo rẹ avwanre juwe oma ẹwan na, rọ vwọ dianẹ erhuvwu ọvo yen avwanre ru kẹ wẹ, rẹ avwanre vwo siobọnẹ uwe yanran vwọrẹ ufuoma. Asaọkiephana Jihova bruba kẹ wẹ re.’” 30 Ọtiọyena o de muegbe rẹ udemu kẹ ayen, ayen da re je da. 31 Ọke vwo rhie, ayen de vrẹn vwẹ edegburhiọke, ayen de duvwun iyorin kẹ ohwohwo. Ayen vwo ru ọtiọyen nu, Aizik de siobọnẹ ayen yanran, ayen da yan jovwo yanran vwọrẹ ufuoma.

32 Ẹdẹ yena idibo rẹ Aizik da rhe rhe niyẹnrẹn kẹ kpahen orhare rẹ ayen tọnre, ayen da ta kẹ: “Avwanre mrẹ ame re!” 33 Ọtiọyena o de se Shaiba. Kọyensorọ odẹ rẹ orere na vwọ dia Biẹ-shiba rhi te nonẹna.

34 Ọke rẹ Isọ vwọ hẹ ẹgbukpe 40, ọ da reyọ Judit ọmọtẹ ri Bihirai ohwo ri Hẹt vwo ru aye, ọtiọyen ji te Basimat ọmọtẹ rẹ Ilọn ohwo ri Hẹt. 35 Ayen da rhe dia obo re sua omaemuomaphiyọ gangan* vwọ kẹ Aizik vẹ Rebeka.