Iguẹdjọ
19 Vwẹ ọke yena, rẹ Izrẹl vwo jẹ ovie evwo na, ohwo ri Livae rọ dia ọko ọvo vwẹ ekogho rẹ igbenu rẹ Ifrem ọke yena, da reyọ ọsen ọvo vwo nẹ Bẹtlẹhẹm vwẹ Juda kerẹ aye. 2 Ẹkẹvuọvo ọsen rọyen na fuevun kẹẹ, ọsen na da yan jovwo kpo uwevwin rẹ ọsẹ rọyen vwẹ Bẹtlẹhẹm vwẹ Juda. Ọ da dia oboyin emeranvwe ẹne. 3 Ọtiọyena ọshare rọyen da yan bro ra rere o wene ẹwẹn rẹ ọsen na ro vwo rhivwin rhe; ọshare na reyọ odibo rọyen ọshare kugbe ekẹkẹtẹ ivẹ nene oma. Ọsen na da reyọ ọshare na ro uwevwin rẹ ọsẹ rọyen. Ọke rẹ ọsẹ rọyen vwọ mrẹ, oma da vwerhọn mamọ. 4 Ọtiọyena ọgọ rọyen, ọsẹ rẹ eghene ọmọtẹ na da nẹrhẹ ọshare na nene dia ẹdẹ erha; ayen ria, ayen da, etiyin kọyen ọshare na vwerhẹn.
5 Vwẹ ẹdẹ rẹne, rẹ ayen vwo vrẹn vwẹ edegburhiọke rẹ ayen vwo kpo, ọsẹ rẹ eghene ọmọtẹ na da ta kẹ ọgọ rọyen nẹ: “Riemu rere ọ kẹ wẹ ẹgba,* ọke yena ku wọ sa yanran.” 6 Ọtiọyena ayen de chidia totọ, ayen da re je da kugbe; ọyena vwọ wan nu, ọsẹ rẹ eghene ọmọtẹ na da ta kẹ ọshare na nẹ: “Biko, vwerhẹn etinẹ hrọke rere wọ riakpọ kuoma.”* 7 Ọke rẹ ọshare na vwo vrẹn nẹ ọyen kpo, ọgọ rọyen kọ rẹ, ọtiọyena ọ da rhoma vwerhẹn etiyin hrọke.
8 Ọke ro vwo vrẹn vwẹ edegburhiọke rẹ ẹdẹ riyorin ro vwo kpo, ọsẹ rẹ eghene ọmọtẹ na da ta: “Biko, riemu rere ọ kẹ wẹ ẹgba.”* Ayen de gbeghẹrẹ rhirin bẹsiẹ ọke vwọ yanran, jẹ ayen ihwo ivẹ rha ria. 9 Ọke rẹ ọshare na, ọsen rọyen vẹ odibo rọyen vwo vrẹn nẹ ayen kpo, ọgọ rọyen, ọsẹ rẹ eghene ọmọtẹ na da ta kẹ nẹ: “Nighere, asaọkiephana ọke joma she re. Biko, dia etinẹ hrọke. No, ọke na kpo re. Dia etinẹ hrọke rere wọ riakpọ kuoma. Odẹ rọ cha na wo se vrẹn vwẹ edegburhiọke vwọ kẹ oyan wẹn na ji rhivwin kpo uwevwin* wẹn.” 10 Ẹkẹvuọvo ọshare na guọnọ vwerhẹn etiyin hrọke ọfaa, ọtiọyena o de vrẹn, o de mu oyan phiyọ rhirin re te Jẹbus, kọyen Jerusalẹm. Ọ vẹ ekẹkẹtẹ ivẹ, ọsen rọyen, vẹ odibo rọyen yen gba yan usun.
11 Ọke rẹ ayen vwo sikẹrẹ Jẹbus, jẹ ọke joma she re. Ọtiọyena odibo na da ta kẹ onini rọyen nẹ: “Avwanre domaji vwẹ orere rẹ ihwo ri Jẹbus nana rere a vwerhẹn etinẹ hrọke?” 12 Ẹkẹvuọvo onini rọyen da ta kẹ nẹ: “Avwanre cha domaji vwẹ orere rẹ erhorha ri jẹ ihwo rẹ Izrẹl ẹdiaa. Avwanre cha yan rhirin re te Gibia.” 13 Ọtiọyena ọ da ta kẹ odibo rọyen nẹ: “Yanrhe rere a davwẹngba vwo te ọvo vwẹ usun rẹ asan yena; avwanre cha dia Gibia yẹrẹ Rema hrọke.” 14 Ọtiọyena ayen da yanran, ayen vwo sikẹrẹ Gibia, rọ dia ọ ri Bẹnjamin re, jẹ ọnre na tuẹn eshe phiyọ re.
15 Ọtiọyena ayen da domaji vwẹ etiyin je ro evunrẹ Gibia ra dia hrọke. Ayen vwọ ruọ nu, ayen de chidia totọ vwẹ ọsuorere rẹ orere na, ẹkẹvuọvo ohwo vuọvo reyọ ayen ro uwevwin nẹ ayen rhe dia asan rọyen hrọkee. 16 Ọke vwọ yan obaro vwẹ ovwọnvwọn rẹ ẹdẹ yena, ọshare ọvo rọ ghwore de nẹ iruo rọ rare vwẹ obo udju rhe. Ọyen ohwo ro nẹ ekogho rẹ igbenu rẹ Ifrem rhe, Gibia yen ọ dia ọke yena; ẹkẹvuọvo orua ri Bẹnjamin yen dia orere na. 17 Ọke rọ vwọ kpare opharo je mrẹ ọshare rọhẹ oyan na vwẹ ọsuorere rẹ orere na, ọshare rọ ghwore na da nọ nẹ: “Tivọ yen wọ ra, tivọ yen wo nurhe?” 18 Ọ da kpahen nẹ: “Avwanre nẹ Bẹtlẹhẹm vwẹ Juda kpo ọko ọvo vwẹ ekogho rẹ igbenu rẹ Ifrem, asan ri mi nurhe. Mi kpo Bẹtlẹhẹm vwẹ Juda jovwo, asaọkiephana mi kpo uwevwin ri Jihova,* ẹkẹvuọvo ohwo vuọvo reyọ ovwẹ phiyọ uwevwin rọyeen. 19 Avwanre vwo odin vẹ emuọre ro te vwọ kẹ ekẹkẹtẹ rẹ avwanre, kugbe ibrẹdi vẹ iwaini vwọ kẹ vwẹ, aye na, kugbe odibo rẹ avwanre. Emu vuọvo kanre avwanree.” 20 Ẹkẹvuọvo ọshare rọ ghwore na da tanẹ: “E jẹ ufuoma nene uwe dia! Je me vwẹrote kemu kemu ru wọ guọnọre. Takpe nẹ wọ dia ọsuorere na hrọkee.” 21 Ọtiọyena ọ da reyọ phiyọ uwevwin rọyen, ọ da vwẹ emuọre* kẹ ekẹkẹtẹ na. Ọyena vwọ wan nu, ayen da hworhẹ awọ rayen, ayen da re je da.
22 Ayen je vwọ riakpọ kuoma na, eshare evo vwẹ orere na re che se vwo ru emuọvoo da riariẹ uwevwin na phiyọ, jẹ ayen teyan ẹchẹ na, ayen ke ta kẹ ọshare rọ ghwore ro vwo uwevwin na nẹ: “Reyọ ọshare rọ rhe uwevwin wẹn na phia rere avwanre nene bru ehware.” 23 Ọtiọyena ohwo ro vwo uwevwin na da yan phia, ọ da ta kẹ ayen nẹ: “Ẹjo, iniọvo mẹ, ovwan ruẹ obo re braree. Biko, ọshare nana ọrhorha vwẹ uwevwin mẹ. Ovwan ruẹ emu rẹ ophọphọvwe nanaa. 24 Ọmọtẹ mẹ rọ je chọghọọ kugbe ọsen rẹ ọshare nana hẹ etinẹ. Je me reyọ ayen phia, ovwan se gbe ayen ẹgua siẹrẹ ovwan da guọnọ.* Ẹkẹvuọvo ovwan ruẹ emu rẹ ophọphọvwe nana kẹ ọshare nanaa.”
25 Ẹkẹvuọvo eshare na rhọnvwe kerhọ rọyeen, ọtiọyena ọshare na de shabọ phiyọ ọsen rọyen, o de genre ro otafe kẹ ayen. Ayen da gba du ji gbe ẹgua vwẹ ason na eje rhirin re te urhiọke. Ọke vwo rhie, ayen de siobọno yanran. 26 Vwẹ edegburhiọke, aye na da rhe, o de she teyen otọ vwẹ asan anurhoro rẹ uwevwin rẹ ọshare na rẹ onini* rọyen hepha na, o de sherhẹn etiyin bẹsiẹ ọke vwo rhie muotọ. 27 Ọke rẹ ọshare* rẹ aye na vwo vrẹn vwẹ urhiọke ji rhie ẹchẹ rẹ uwevwin na rere ọ ro otafe je ton oyan rọyen phiyọ, ọ da mrẹ aye na, ọsen rọyen, ro sherhẹn anurhoro rẹ uwevwin na, jẹ o mu abọ kpahen urhe rẹ anurhoro na. 28 Ọtiọyena ọ da ta kẹ aye na: “Vrẹn; jẹ a yanran.” Ẹkẹvuọvo ọ kpahen ota vuọvoo. Ọshare na de muo phiyọ enu rẹ ekẹkẹtẹ na, ọ da yan kpo uwevwin rọyen.
29 Ọke ro vwo te uwevwin rọyen, ọ da reyọ amaphia ra vwọ va eranvwe, ọ da yọnrọn ọsen rọyen na, o de bru abọ vẹ awọ rọyen kpo ẹkẹn 12, ọ da vwẹ ọvuọvo rọyen vwo kpo ekogho rẹ Izrẹl ọvuọvo. 30 Ihwo eje re mrẹrẹ da ta: “Emu tiọna je rhe phia dẹvoo yẹrẹ a je rhe mrẹ emu tiọna vwo nẹ ọke rẹ ihwo rẹ Izrẹl vwo nẹ otọ rẹ Ijipt rhe rhi te ọke naa. Ovwan nabọ fuẹrẹn ota nana, ovwan jiroro, rere ovwan vuẹ avwanre oborẹ avwanre ru.”