Iguẹdjọ

20 Ọtiọyena, ihwo rẹ Izrẹl eje vwo nẹ Dan re te Biẹ-shiba kugbe vwo nẹ otọ ri Giliẹd da rhe, ayen de koko vẹ ẹwẹn ọvo* vwẹ obaro ri Jihova vwẹ Mizpa. 2 Isun rẹ ihwo na kugbe ivwiẹ rẹ Izrẹl eje de mudia ẹdia rayen vwẹ ọghwẹgbe rẹ ihwo rẹ Ọghẹnẹ na—isodje re vwẹ owọ yan 400,000 re vwẹ ọlọkọ choma kẹ ofovwin.

3 Ihwo rẹ orua ri Bẹnjamin de nyo nẹ eshare rẹ Izrẹl kpo Mizpa re.

Eshare rẹ Izrẹl da ta: “Vuẹ avwanre, mavọ yen emu ọbrabra nana phia wan?” 4 Ọtiọyena ohwo ri Livae na, ọshare rẹ aye re hweri na da kpahen nẹ: “Mẹ vẹ ọsen mẹ vwẹriẹ Gibia ri Bẹnjamin rere avwanre dia hrọke. 5 Ihwo re dia* Gibia de vrẹn vwọso ovwẹ, ayen da gba riariẹ uwevwin na vwẹ ason. Mẹvwẹ yen ayen guọnọ hwe jovwo, ẹkẹvuọvo ọsen mẹ kọyen ayen gba du, o de ghwu. 6 Ọtiọyena mi de mu orivwin rẹ ọsen mẹ na, me da nyavwọ ibribro, me da reyọ ibro rọyen na kpo kẹbẹre kẹbẹre rẹ otọ rẹ Izrẹl, kidie ayen ru emu rẹ omavovwẹ kugbe ophọphọvwe vwẹ Izrẹl. 7 Asaọkiephana ovwan ihwo rẹ Izrẹl eje gba vwẹ uchebro vẹ iroroẹjẹ vwọ phia vwẹ etinẹ.”

8 Ihwo na eje de vrẹn, ayen da vwẹ unu ọvo* vwọ tanẹ: “O vwo ohwo vuọvo vwẹ usun rẹ avwanre na ro che kpo utughẹ rọyen yẹrẹ rhivwin kpo uwevwin rọyeen. 9 Asaọkiephana ọnana yen oborẹ avwanre che ru vwọ kẹ Gibia: “Avwanre cha yanran re nene họnre womarẹ itẹ. 10 Avwanre cha reyọ eshare 10 vwo nẹ 100, vwo nẹ ivwiẹ rẹ Izrẹl eje, 100 vwo nẹ 1,000 kugbe 1,000 vwo nẹ 10,000 re reyọ emu vwọ kẹ otuofovwin na, rere ayen se vwo nene Gibia ri Bẹnjamin họnre, fikirẹ emu rẹ ophọphọvwe rẹ ayen ruru vwẹ Izrẹl na.” 11 Ọtiọyena eshare rẹ Izrẹl eje de siomakoko vwọso orere na vẹ ẹwẹn ọvo kerẹ ihwo ri biẹcha ohwohwo.

12 Ọyena vwọ wan nu, ivwiẹ rẹ Izrẹl de ji ihwo bru eshare rẹ uvwiẹ ri Bẹnjamin eje ra, tanẹ: “Ọnana emu ọbrabra vọ yen phiare vwẹ ohri rẹ ovwan na? 13 Asaọkiephana ovwan vwẹ eshare re che se vwo ru emuọvoo ri nẹ Gibia rhe na vwọ kpahotọ, rere avwanre sa vwọ teyen ayen hwe ji si emu ọbrabra vwo nẹ Izrẹl.” Ẹkẹvuọvo ihwo rẹ orua ri Bẹnjamin na rhọnvwe kerhọ rẹ ihwo rẹ Izrẹl re dia iniọvo rayen naa.

14 Ọtiọyena ihwo rẹ orua ri Bẹnjamin de siomakoko vwo nẹ irere na kpo Gibia rere ayen re nene eshare rẹ Izrẹl họnre. 15 Vwẹ ẹdẹ yena, ihwo rẹ orua ri Bẹnjamin de koko eshare 26,000 re vwẹ ọlọkọ choma kẹ ofovwin vwo nẹ irere rayen, eshare ri Gibia 700 ra sanere kugbee. 16 Eshare 700 ra sanere re dia ehwẹrobọ hẹ evunrẹ otuofovwin nana. Ọvuọvo rayen sa vwẹ islingi* re phi ubiukuta phiyọ vwọ sa ogẹton, jẹ ọ cha sa chọọ.

17 Eshare rẹ Izrẹl de koko eshare 400,000 re vwẹ ọlọkọ choma kẹ ofovwin, ihwo ri Bẹnjamin kugbee, ọvuọvo rayen ọgba ofovwin rọ tẹn ona. 18 Ayen de vrẹn, ayen de kpo Bẹtẹl ra nọ mie Ọghẹnẹ. Ihwo rẹ Izrẹl da ta: “Ono vwẹ usun rẹ avwanre na yen cha kobaro re nene ihwo rẹ orua ri Bẹnjamin na họnre?” Jihova da kpahen nẹ: “Juda yen cha kobaro.”

19 Ọyena vwọ wan nu, ihwo rẹ Izrẹl de vrẹn vwẹ urhiọke, ayen de wonphiyọ* asan rọ kẹrẹ Gibia rere ayen nene họnre.

20 Asaọkiephana eshare rẹ Izrẹl da yanran re nene orua ri Bẹnjamin họnre; ayen da tẹnrẹn urhiẹ rẹ ofovwin rere ayen vwo nene ayen họnre vwẹ Gibia. 21 Ọtiọyena ihwo rẹ orua ri Bẹnjamin de nẹ Gibia rhe, ayen da teyen eshare rẹ Izrẹl 22,000 hwe vwẹ ẹdẹ yena. 22 Ẹkẹvuọvo otuofovwin rẹ eshare rẹ Izrẹl de djephia nẹ ayen fiudugberi, ayen da rhoma tẹnrẹn urhiẹ rẹ ofovwin vwẹ asan vuọvo na kirobo rẹ ayen ruru vwẹ ẹdẹ rẹsosuọ. 23 Ọtiọyena ihwo rẹ Izrẹl da yanran ra viẹ vwẹ obaro ri Jihova re te ovwọnvwọn, ayen da nọ Jihova nẹ: “Avwanre rhoma yanran re nene iniọvo rẹ avwanre, ihwo rẹ orua ri Bẹnjamin họnre?” Jihova da ta kẹ ayen nẹ: “Ovwan yanran ra vwọso ayen.”

24 Ọtiọyena ihwo rẹ Izrẹl de sikẹrẹ ihwo rẹ orua ri Bẹnjamin vwẹ ẹdẹ rivẹ. 25 Ihwo rẹ orua ri Bẹnjamin de nẹ Gibia rhe rhe vwa ayen vwẹ ẹdẹ rivẹ na, ayen da teyen ihwo rẹ Izrẹl 18,000 efa hwe, ayen eje vwẹ ọlọkọ choma kẹ ofovwin. 26 Ọtiọyena eshare rẹ Izrẹl eje de kpo Bẹtẹl. Ayen da viẹ ji chidia totọ vwẹ etiyin vwẹ obaro ri Jihova, ayen de chiri owẹnvwe vwẹ ẹdẹ yena re te ovwọnvwọn, ayen de ze izobo rẹ ẹtorhẹ kugbe izobo rẹ ọrekugbe vwẹ obaro ri Jihova. 27 Ọyena vwọ wan nu, eshare rẹ Izrẹl da nọ mie Jihova, kidie ekpeti rẹ ọphọ rẹ Ọghẹnẹ rẹ uyota na hẹ etiyin vwẹ ọke yena. 28 Asaọkiephana Finihas ọmọ rẹ Ẹlieza, ọmọ rẹ Erọn yen gbodibo* vwẹ obaro rọyen vwẹ ọke yena. Ayen da nọ: “Avwanre rhoma re nene iniọvo rẹ avwanre, ihwo rẹ orua ri Bẹnjamin họnre, gbanẹ avwanre domaji?” Jihova da kpahen kẹ ayen nẹ: “Ovwan yanran kidie odẹ rọ cha na, mi che phi ayen phiyọ obọ rẹ ovwan.” 29 Ọyena vwọ wan nu, Izrẹl de ji eshare ra hwa riariẹ Gibia phiyọ.

30 Ihwo rẹ Izrẹl da yanran re nene ihwo rẹ orua ri Bẹnjamin họnre vwẹ ẹdẹ rerha, ayen da tẹnrẹn urhiẹ vwọso Gibia kirobo rẹ ayen ruru vwẹ ọke re wanre na. 31 Ọke rẹ ihwo rẹ orua ri Bẹnjamin vwọ yanran ra vwa otuofovwin na, e de si ayen vwo nẹ orere na. Kirobo rẹ ayen ruru vwẹ ọke re wanre na, ayen de nene ayen họnre ji hwe evo vwẹ usun rẹ eshare na vwẹ idjerhe ride na, rẹ ọvo rọyen kpo Bẹtẹl, ọ ro chekọ de rhe kpo Gibia na, ayen de hwe omarẹ eshare rẹ Izrẹl 30 vwẹ otọ ro rhiephiyọ na. 32 Ọtiọyena ihwo rẹ orua ri Bẹnjamin da ta: “Avwanre phiẹ ayen kparobọ kirobo ri jovwo.” Ẹkẹvuọvo ihwo rẹ Izrẹl na da ta: “Avwanre che siomareyọ ji si ayen vwo nẹ orere na ro evunrẹ idjerhe ride na.” 33 Ọtiọyena eshare rẹ Izrẹl eje de vrẹn vwo nẹ asan rẹ ayen hepha, ayen da tẹnrẹn urhiẹ rẹ ofovwin vwẹ Bel-tema, ihwo rẹ Izrẹl re hwa phiyọ na da djẹ nẹ asan rọ kẹrẹ Gibia rẹ ayen hwa phiyọ na rhe. 34 Ọtiọyena eshare 10,000 ra sane vwo nẹ Izrẹl eje da yanrhe obaro ri Gibia, ohọnre na ganre mamọ. Ẹkẹvuọvo ihwo rẹ orua ri Bẹnjamin riẹnre nẹ okpetu te ayen oma ree.

35 Jihova de phi ihwo rẹ orua ri Bẹnjamin kparobọ vwẹ obaro rẹ Izrẹl, ihwo rẹ Izrẹl da teyen eshare rẹ orua ri Bẹnjamin 25,100 hwe vwẹ ẹdẹ yena, ayen eje vwẹ ọlọkọ choma kẹ ofovwin.

36 Ẹkẹvuọvo ihwo rẹ orua ri Bẹnjamin rorori nẹ ayen che phi eshare rẹ Izrẹl kparobọ ọke rẹ ayen vwo siomareyọ vwo nẹ ihwo rẹ orua ri Bẹnjamin, ẹkẹvuọvo ayen siomareyọ kidie ayen vwẹroso ihwo re hwa phiyọ hẹrhẹ Gibia na. 37 Ihwo re hwa phiyọ na de brokpakpa vẹn ro Gibia. Ihwo re hwa phiyọ na da hrabọ, ayen da vwẹ ọlọkọ vwo hwe ihwo rẹ orere na eje.

38 Asaọkiephana eshare rẹ Izrẹl vwo ọrhuẹrẹphiyotọ nẹ eshare re hwa phiyọ hẹrhẹ orere na cha nẹrhẹ ivwirhi bru kpenu vwẹ etiyin kerẹ oka vwọ kẹ ayen.

39 Ọke rẹ ihwo rẹ Izrẹl vwo kuomarhẹriẹ vwẹ ofovwin na, eshare ri Bẹnjamin de nene ayen họnre ji hwe omarẹ eshare rẹ Izrẹl 30, ayen da ta: “O phẹnre nẹ avwanre phiẹ ayen kparobọ kirobo ri jovwo.” 40 Ẹkẹvuọvo ivwirhi rẹ oka na ko guvwie nẹ orere na kpenu. Ọke rẹ eshare rẹ orua ri Bẹnjamin vwo kuomarhẹriẹ rẹ ayen vwo no, ayen da mrẹ erhanre rọ la nẹ orere na eje kpenu. 41 Ọtiọyena eshare rẹ Izrẹl de kuomarhẹriẹ rẹ ayen vwo nene ayen họnre, o de gbe eshare rẹ orua ri Bẹnjamin unu, kidie ayen mrẹrẹ nẹ okpetu she teyen ayen re. 42 Ọtiọyena ayen da djẹ kẹ eshare rẹ Izrẹl kpo obo aton na, ẹkẹvuọvo ihwo rẹ Izrẹl da vwọtua ayen; eshare ri nẹ orere na cha da vwomaba ayen vwọ teyen ayen hwe. 43 Ayen da gba riariẹ ihwo rẹ orua ri Bẹnjamin phiyọ je vwọtua ayen vwọrẹ jẹ obọ ẹdajo. Ayen de chiyin ayen muotọ vwẹ obaro ri Gibia vwẹ ẹbẹre ọnre va nẹcha. 44 Ukuotọ rọyen a da teyen eshare rẹ orua ri Bẹnjamin 18,000 hwe, ayen eje egba ofovwin.

45 Eshare rẹ orua ri Bẹnjamin de kuomarhẹriẹ, ayen da djẹ ro evunrẹ aton na kpo oragha ri Rimọn, ihwo rẹ Izrẹl da teyen* 5,000 hwe vwẹ idjerhe ride na, ayen da je vwọtua ayen rhirin re te Gaidọm; ọtiọyena ayen da teyen eshare 2,000 efa hwe. 46 Ihwo rẹ orua ri Bẹnjamin eje ra teyen hwe vwẹ ẹdẹ yena te eshare 25,000 re vwẹ ọlọkọ choma kẹ ofovwin, ayen eje egba ofovwin. 47 Ẹkẹvuọvo 600 da djẹ ro evunrẹ aton na kpo oragha ri Rimọn, ayen da dia enu rẹ oragha ri Rimọn na emeranvwe ẹne.

48 Eshare rẹ Izrẹl de kuomarhẹriẹ vwọso ihwo rẹ orua ri Bẹnjamin, ayen da vwẹ ọlọkọ hwe ihwo rẹ orere na, vwo nẹ ihworakpọ re te ichuru, erọnvwọn eje ri chekọ. Vwọba, ayen de phi erhanre phiyọ irere eje rẹ ayen wanvrẹ.