ENỌ RẸ IGHENE NỌ
Mavọ Yen Baibol na sa Vwọ Vwẹ Ukẹcha kẹ Vwẹ?—Ẹbẹre 3: Mrẹ Erere Vwo nẹ Isese ri Baibol Wẹn Rhe
Wo de ni Baibol na, wọ cha mrẹ nẹ eta buebun vọn evun rọyen. Wo jẹ ọyena kuọrọn ẹwẹn wẹn wo vwo jẹ Baibol na e se-e! Ukperẹ ọtiọyen, mrẹ Baibol na kerẹ emẹjẹ rọ vọnre vẹ udemu ri vwo avwerhen sansan ru wọ sa re. Wọ cha sa re emu na eje re mu phiyọ otọ na re-e. Ẹkẹvuọvo, wọ sa re uche ri je we, je re evun vọn.
Wọ sa vwọ mrẹ erere vọnvọn vwo nẹ isese ri Baibol na rhe, ofori nẹ wo mu ẹwẹn phiyọ obo ru wo se. Uyovwinrota nana cha chọn wẹ uko vwo ru ọtiọyen.
Vwẹ uyovwinrota nana
Diesorọ wo vwo mu ẹwẹn phiyọ obo ru wo se vwẹ Baibol na?
Erere ru wọ cha mrẹ nẹ isese ri Baibol wẹn rhe che bunphiyọ siẹrẹ wo de mu oma phiyọ. Roro kpahen udje nana: Wo de duvwu iliptọnti phiyọ ame ọrhorhorho vwẹ ọmọke, ọ cha phoriẹ mu ame na emerha. Ẹkẹvuọvo, ọ cha phoriẹ muo vrẹ ọtiọyen siẹrẹ wọ da vwẹ uphẹn kẹ nẹ ọ dia ame na kri ọmọke.
Ọtiọyen isese ri Baibol je hepha. Ukperẹ wo vwo se Baibol na kpakpata, reyọ ọmọke vwo roro kpahen oborẹ wo se na. Ọna yen obo rẹ ohwo ro si Une rẹ Ejiro 119 na ruru. Vwọ kpahen urhi rẹ Ọghẹnẹ, ọ da ta: “Ọye mi roro vwẹ ẹdẹ na ejobi.”—Une rẹ Ejiro 119:97.
Vwọrẹ uyota, ọ dia ọyena ko mudiaphiyọ nẹ ọsoso rẹ ẹdẹ na eje yen wo che vwo se ji roro kpahen Baibol na-a. Ẹkpo rẹ ota na kọna: Ọbuine na ghwọrọ ọke vwo roro kpahen Ota rẹ Ọghẹnẹ. Ọyena ro ruru na chọn rọ uko vwo bru omamọ rẹ erhiẹn.—Une rẹ Ejiro 119:98-100.
“O vwo ẹdẹ ọvo rẹ oni mẹ vwọ vuẹ vwẹ nẹ, ‘Ọsoso ẹdẹ ighwrẹn yen wo vwori vwẹ udughwrẹn na, wọ je reyọ vwo ruẹ erọnvwọn buebun kẹ oma wẹn. Diesorọ wọ rha vwẹ ọke evo vwọ kẹ Jihova-a? Ọyen obo ro fori nẹ e ru!’ ”—Melanie.
Wo se bru omamọ rẹ erhiẹn siẹrẹ wo de roro kpahan uchebro ri Baibol na—kerẹ udje, wo che bru orhiẹn ro shephiyọ siẹrẹ wọ da cha sane igbeyan yẹrẹ vwẹ ọke wo de hirharoku ọdavwini ru wo vwo ru obo re brare.
Mavọ yen wọ sa vwọ mrẹ erere vọnvọn vwo nẹ isese ri Baibol na rhe?
Muegbe oborẹ wo che ru. Emeghene ọvo re se Julia vwẹ iroroẹjẹ nana phia: “Vwo ọrhuẹrẹphiyotọ rẹ isese ri Baibol, riẹn obo ru wo che se, ọke wo che vwo se vẹ asan wo de che se.”
Guọnọ asan ro shephiyọ. Eghene aye ọvo re se Gianna vwẹ iroroẹjẹ nana phia: “Guọnọ asan rọ fọre, vwọba, jẹ ihwo orua wẹn riẹn kpahen ọrhuẹrẹphiyotọ rẹ isese ri Baibol wẹn, rere ayen vwo jẹ owọ e gbe phiyọ.”
Ọ da dianẹ ifonu, itablẹti yẹrẹ ikọmputa yen wọ reyọ vwo ruiruo, gbe fun kemu kemu ro se gbowọphiyọ isese na. Wọ sa tobọ reyọ Baibol ra teyenphia vwo ruiruo. Ehiahiẹ tobọ djephia nẹ wo de se ọbe ra teyenphia, ọ sa lọhọ wo vwo vwo ẹruọ rẹ obo ru wo se. Vwọ fẹnẹ ọyena, ọ sa bẹn wọ vwọ nabọ mu ẹwẹn phiyọ obo wo se ọ da dianẹ ifonu, itablẹti yẹrẹ ikọmputa yen wo vwo ruiruo.
“Me vwọ reyọ ifonu, itablẹti yẹrẹ ikọmputa vwo ruiruo gbowọphiyọ isese na. Evuẹ sa ro ifonu mẹ, ifonu na ji se fun yẹrẹ nẹtwọku se jẹ dia. Ẹkẹvuọvo ọ da dia ọbe ra teyenphia, urhukpẹ ọvo kọyen mi brudu kpahan.”—Elena.
Ka nẹrhovwo. Vuẹ Jihova nẹ ọ chọn wẹ uko vwo vwo ẹruọ, karophiyọ je mrẹ erere vwo nẹ ẹkpo ri Baibol wọ guọnọ se na.—Jems 1:5.
Wo se vwo ru nene ẹrhovwo wẹn, gbe ru ehiahiẹ kpahen oborẹ wo se na. Mavọ yen wo se vwo ru ọtiọyen? Ọ da dianẹ wo se Baibol na vwẹ aplikeshọni ri JW Library yẹrẹ vwẹ intanẹti, wo se djobọte owọrota ọvo vwo ru ehiahiẹ je mrẹ iyovwinreta efa ri shekpahọn.
Nọ enọ. Kerẹ udje: ‘Die yen ẹkpo nana yono uvwe kpahen Jihova? Ọ kanrunumu uwan ri Jihova ọvo re me sa vwẹrokeri?’ (Ẹfesọs 5:1) ‘Die yen mi yono vwo nẹ ẹkpo nana rhe ri mi se vwo ruiruo vwẹ akpeyeren mẹ?’ (Une rẹ Ejiro 119:105) ‘O vwo idjerhe evo re me sa vwọ reyọ oborẹ mi seri na vwọ vwẹ ukẹcha kẹ ihwo efa?’—Rom 1:11.
Je nọ oma wẹn, ‘Mavọ yen obo ri mi seri na vwo churobọ si evuẹ rehẹ Baibol na?’ Onọ yena ghene ghanre mamọ. Diesorọ? Kidie kemu kemu rehẹ Baibol na, vwo nẹ Jẹnẹsis re te Ẹvwọphia vwẹ idjerhe evo vwo churobọ si uyovwinrota ọghanghanre ọvo: Obo ri Jihova che vwo ru odẹ rọyen fon womarẹ Uvie rọyen rọhẹ odjuvwu, ji djephia nẹ ọyen yen vwo uturhi ro vwo sun, nẹ obo ro suẹ wan yen ji me yovwin kparobọ.