‘Ovwan Gba Jẹ . . . Ohwo rẹ Ovwan Cha Ga’

1. Die yen ofori nẹ e ru e se vwo vwo uvi omavwerhovwẹn, kẹ diesorọ? (Aizaya 48:17, 18)

ỌSẸ avwanre rọhẹ obodjuvwu vwo ẹguọnọ avwanre mamọ, ọ je guọnọ nẹ avwanre riakpọ enẹna kugbe obaro na. (Aghwo. 3:12, 13) Ọ ma avwanre je kẹ avwanre ena rẹ oghẹresan evo, dedena ọ kẹ avwanre ẹgba e vwo sun oma avwanre ẹfẹrọvoo yẹrẹ reyọ iwan rẹ obo re yovwinrin vẹ obo re brare vwo mu kẹ oma rẹ avwanree. (Aghwo. 8:9; Jer. 10:23) Ọ riẹnre nẹ e se vwo vwo uvi rẹ omavwerhovwẹn, ofori nẹ avwanre ga ọyen ji yeren akpọ nene iwan rọyen.—Se Aizaya 48:17, 18.

2. Die yen Eshu guọnọre nẹ e vwo imuẹro rọyen, kẹ mavọ yen Jihova kpahenphiyọ efian yena?

² Eshu guọnọre nẹ e vwo imuẹro nẹ e se vwo uvi rẹ omavwerhovwẹn, nẹ ihworakpọ se sun oma rayen efẹrọvo ababọ ri Jihova. (Jẹn. 3:4, 5) Jihova kpahenphiyọ efian yena womarẹ ọ vwọ vwẹ uphẹn kẹ ihworakpọ nẹ ayen sun oma rayen vwẹ ọmọke. E gbi nẹ sherẹ a ke mrẹ umiovwo ro nẹ obuko usuon rẹ ihworakpọ rhee. Vwọ fẹnẹ ọyena, Baibol na vọnre vẹ idje rẹ eya vẹ eshare ri yeren akpọ rẹ omavwerhovwẹn vwẹ ẹga ri Jihova. Ọ rọ ma kenu yen Jesu Kristi. Ẹsosuọ, e jẹ a fuẹrẹn oboresorọ rọ vwọ jojẹ rọ vwọ ga Jihova. Ọtiọyena, ka cha ta ota kpahen oboresorọ Ọsẹ avwanre rọhẹ obodjuvwu vwo muwan rẹ ẹga avwanre. Ukuotọ rọyen, ka cha fuẹrẹn oboresorọ avwanre vwọ jojẹ ra vwọ ga Jihova.

OBORESORỌ JESU VWỌ JOJẸ RỌ VWỌ GA JIHOVA

3. Die yen Eshu vwọ kẹ Jesu, kẹ die yen o ruru?

³ Rọ vwọ hẹ otọrakpọ na, Jesu jojẹ rẹ ohwo rọ cha vwẹ ẹga kẹ. Jesu ghwe vwo bromaphiyame nu, Eshu da vuẹ nẹ ọ da vwẹ ẹga kẹ ọyen obọvo, nẹ ọyen cha vwẹ ivie rẹ akpọ na eje vwọ kẹ. Jesu da ta kẹ nẹ: “Wan nẹ etinẹ, Eshu! Kidie e siro nẹ: ‘Jihova Ọghẹnẹ wẹn yen wọ vwẹ ẹga kẹ, ọyen ọvo yen wọ vwẹ ẹga ọfuanfon kẹ.’” (Mat. 4:8-10) Diesorọ Jesu vwo brorhiẹn tiọyen? E jẹ a ta ota kpahen oboresorọ.

4-5. Die yen sorọ Jesu vwọ jojẹ rọ vwọ ga Jihova?

⁴ Orọnvwọn ọvo rọ ma ghanre ro mu Jesu vwọ vwẹ ẹga kẹ Jihova yen ẹguọnọ—Jesu vwo uvi rẹ ẹguọnọ ro churu ro vẹ Ọsẹ rọyen kugbe. (Jọn 14:31) Vwọba, Jesu vwẹ ẹga kẹ Jihova kidie ọyen obo ro fori nẹ o ru. (Jọn 8:28, 29; Ẹvwọ. 4:11) Ọ riẹnre nẹ Jihova yen Esiri rẹ arhọ nẹ ọyen jẹ ohwo ra sa vwẹroso rọ je kokẹ. (Une 33:4; 36:9; Jems 1:17) Ọkieje yen Jihova vwọ ta uyota na kẹ Jesu je kẹ kemu kemu eje ro vwori. (Jọn 1:14) Vwọ fẹnẹ Jihova, Eshu yen so ughwu. Ọyen ọvwọrefian, rẹ urhuru kugbe ojevwe romobọ muẹ. (Jọn 8:44) Erọnvwọn nana eje rẹ Jesu mrẹ vwẹ oma rẹ Eshu na, kọyensorọ ọ rha vwẹrokere vwo gbevwọso Jihovaa.—Fil. 2:5-8.

⁵ Emu ọfa rọ sorọ Jesu vwọ jojẹ rọ vwọ ga Jihova yen oborẹ ẹga rọyen cha ghwa rhe vwẹ obaro na. (Hib. 12:2) Ọ riẹnre nẹ siẹrẹ ọyen da fuevun, o che ru odẹ rẹ Ọsẹ rọyen fon je gbẹn idjerhe re vwo phioba phiyọ ojaẹriọ eje rẹ Idẹbono ghwa rhe.

OBORESORỌ JIHOVA VWO MUWAN RẸ ẸGA AVWANRE

6-7. Diesorọ ihwo buebun nonẹna rha vwẹ ẹga kẹ Jihovaa, kẹ diesorọ o vwo fo rẹ avwanre vwọ vwẹ ẹga kẹ?

⁶ Ihwo buebun nonẹna vwẹ ẹga kẹ Jihovaa kidie ayen je rhe riẹn iruemu iyoyovwin rọyen vẹ erọnvwọn eje ro ru kẹ ayen ree. Uyota nẹ ayen pha kerẹ ihwo rẹ ọyinkọn Pọl ghwoghwo ota kẹ vwẹ Atẹns.—Iruo 17:19, 20, 30, 34.

⁷ Pọl vuẹ ihwo rọ ta ota kẹ nẹ Ọghẹnẹ “yen kẹ ihwo eje arhọ kugbe ẹwẹn kugbe erọnvwọn ejobi.” Ọ da je vwọba: “Wan oma rọyen yen avwanre vwo vwo arhọ rẹ avwanre vwọ yan, avwanre ji vwo yerẹn.” Ọghẹnẹ yen ọmemama, rọ “ma ihwo rẹ ẹgborho na eje vwo nẹ oma rẹ ohwo ọvo rhe,” ọtiọyena o muwan rẹ ohwo ra vwẹ ẹga kẹ.—Iruo 17:25, 26, 28.

8. Die yen Jihova che ru kakakaa? Djekpahọn.

⁸ Kerẹ Ọmemama kugbe Osun rẹ akpọ vẹ odjuvwu, Jihova sa gba ihwo nẹ e vwẹ ẹga kẹ ọyen. Jẹ, ọ nama ru ọtiọyeen. Ẹkẹvuọvo, ọ da kẹ avwanre imuẹro nẹ ọyen herọ yerẹn, nẹ ọyen vwo ẹguọnọ avwanre ohwo ọvuovo mamọ. Ọ guọnọ nẹ kohwo kohwo ro wenri eje rhe dia igbeyan rọyen bẹdẹ. (1 Tim. 2:3, 4) Ọtiọyena, Jihova yono avwanre rere e vwo yono ihwo efa kpahen ọhọre rọyen je vuẹ ayen kpahen erọnvwọn iyoyovwin ro che ru kẹ ihworakpọ. (Mat. 10:11-13; 28:19, 20) Ọ rhuẹrẹ avwanre phiyọ ikoko sansan ji ru ọrhuẹrẹphiyotọ rẹ iniruo ri vwo ẹguọnọ rere e sa vwẹrote avwanre.—Iruo 20:28.

9. Idjerhe vọ yen Jihova vwo dje ẹguọnọ rọyen phia?

⁹ A mrẹ vwo dje ẹguọnọ ri Jihova kpahen ihwo ri vwo imuẹro nẹ ọ herọ dedee. Roro kpahen idje nana: Vwẹ ikuegbe rẹ ihworakpọ, iduduru rẹ ihwo buebun yen jojẹ rẹ iwan rẹ obo ri yovwirin vẹ obo re brare rẹ ayen yeren akpọ nene. Dedena, Jihova je kẹ ayen oborẹ ayen guọnọre ayen sa vwọ riavwerhen rẹ akpọ, urhuarhọ rayen ji se vwo te odẹ. (Mat. 5:44, 45; Iruo 14:16, 17) Ọ kẹ avwanre ẹgba e se vwo vwo uvi oyerinkugbe, vwo vwiẹ emọ, je mrẹ erere vwo nẹ owian ọgangan rayen rhe. (Une 127:3; Aghwo. 2:24) O phẹnre dẹn nẹ imuẹro nana djerephia nẹ Ọsẹ avwanre rọhẹ obodjuvwu vwo ẹguọnọ rẹ ihworakpọ eje. (Eyan. 34:6) E gbe jẹ a karophiyọ oma avwanre kpahen oboresorọ avwanre vwọ jojẹ ra vwọ ga Jihova kugbe obo ro che bruba kẹ avwanre wan.

OBORESORỌ AVWANRE VWỌ JOJẸ RA VWỌ GA JIHOVA

10. (a) Die yen emuọvo kiriguo rọ nẹrhẹ avwanre vwẹ ẹga kẹ Jihova? (Matiu 22:37) (b) Idjerhe vọ yen wọ vwọ mrẹ erere vwo nẹ edirin ri Jihova rhe? (Une rẹ Ejiro 103:13, 14)

¹⁰ Kerẹ Jesu, emuọvo kiriguo rọ nẹrhẹ avwanre vwẹ ẹga kẹ Jihova yen ẹguọnọ rẹ avwanre vwo kpahọn. (Se Matiu 22:37.) Avwanre siẹkẹrẹ phiyọ siẹrẹ e de yono kpahen iruemu rọyen. Kerẹ udje, roro kpahen oborẹ Jihova vwo edirin rẹ avwanre. Ọke rẹ ihwo rẹ Izrẹl vwo gbevwọsuọ nu, ọ da rẹ ayen nẹ: “Dohwo didjerhe umwemwu rọye kurhẹriẹ nu.” (Jer. 18:11) Jihova riẹnre nẹ avwanre ihwo re gbaree, nẹ avwanre iwurhie. (Se Une rẹ Ejiro 103:13, 14.) Wo de roro kpahen edirin ri Jihova kugbe iruemu iyoyovwin rọyen efa, wo rhe vwo owenvwe ru wọ vwọ vwẹ ẹga kẹ bẹdẹ?

11. Erhọ yen erọnvwọn efa re nẹrhẹ avwanre jojẹ ra vwọ vwẹ ẹga kẹ Ọsẹ avwanre rọhẹ obodjuvwu?

¹¹ Avwanre je vwẹ ẹga kẹ Jihova kidie ọyen obo ro fori nẹ e ru. (Mat. 4:10) Vwọba, avwanre riẹn erere ro che norhe siẹrẹ avwanre da fuevun ga. Evun-ẹfuọn avwanre ru odẹ ri Jihova fuan, dje Eshu phiyọ ọvwọrofian, ji ruẹ ubiudu Ọsẹ avwanre ghọghọ. Nonẹna, siẹrẹ avwanre da jojẹ ra vwọ vwẹ ẹga kẹ Jihova, iphiẹrophiyọ ra vwọ ga bẹdẹ herọ!—Jọn 17:3.

12-13. Die yen e yono nẹ udje ri Jane ve Pam rhe?

¹² Ọke ra je vwọ hẹ eghene, e se vwo uvi ẹguọnọ kpahen Jihova, ẹguọnọ rọ cha rha rhuaphiyọ rẹ avwanre vwọ ghwanra phiyọ na. Jokaphiyọ udje rẹ iniọvo evun ivẹ re se Jane kugbe Pam.a Ọke ayen ka vwọ ton uyono ri Baibol phiyọ, ọvo ẹgbukpe 11 ọ rọ chekọ ke rha ẹgbukpe 10. Dede nẹ ọsẹ vẹ oni rayen vwo omavwerhovwẹn rẹ ayen vwo yonoo, ayen da rhọnvwe kẹ Jane vẹ Pam nẹ ayen se nene Iseri na yono ọ da dianẹ ayen che rhe nene orua na kpo ishọshi vwẹ oba rẹ udughwrẹn. Jane da ta: “Oborẹ Iseri na yono uvwe vwo nẹ Baibol rhe, vwẹ ukẹcha kẹ vwẹ vwọ sen okeke re me vwọ reyọ ihunvwun egangan ji gbe ọfanrhiẹn.”

¹³ Ikpe evo vwọ wan nu, ayen ihwo ivẹ da rhe dia ighwoghwota. Ọke vwọ yanran na, ayen da ton iruo ọkobaro phiyọ jẹ ayen je vwẹrote ọsẹ vẹ oni rayen re kpakore. Ro vwo ni kpuko, Jane da ta: “Me riẹnre komobọ nẹ Jihova fuevun vwẹrote igbeyan rọyen, jẹ kirobo rẹ 2 Timoti 2:19 tare, ‘Jihova riẹn ihwo re dia erọyen.’ ” Aphro herọọ nẹ Jihova vwẹrote ihwo ri vwo ẹguọnọ re jojẹ re vwọ vwẹ ẹga kẹ!

14. Mavọ yen eta vẹ uruemu avwanre se vwo phoro ekan nẹ odẹ ri Jihova? (Ni uhoho na.)

¹⁴ Avwanre guọnọ phoro ekan eje re mu banre odẹ ri Jihova no kakare. Roro kpahen udje nana: Wo vwo ugbeyan ọvo rọ kẹrẹ owẹ rọ riẹn obo ra kokẹ, vwo ghovwo ji ru emuesiri kẹ ihwo. Ẹdẹ ọvo vwo te, wo de nyo nẹ ohwo ọvo gun efian nyẹ nẹ ọyen ohwo ọghware ro ji vwo ọkon. Die yen wo che ru? Wọ cha chochọn rọyen. Ọtiọyen avwanre ji fiudugberẹ vuẹ ihwo efa uyota na kpahen Jihova je chochọn rẹ odẹ Rọyen siẹrẹ avwanre de nyo kpahen efian rẹ Eshu vẹ ihwo ro suẹn mu banrọ. (Une 34:1; Aiz. 43:10) Avwanre reyọ eta vẹ uruemu vwo djephia nẹ a guọnọ vwẹ ẹga kẹ Jihova vẹ ubiudu avwanre eje.

15. Erere vọ yen ọyinkọn Pọl mrẹ vwo nẹ ewene ro ruru? (Filipae 3:7, 8)

¹⁵ Owenvwe rẹ avwanre vwori yen nẹrhẹ avwanre ru ewene evo vwẹ akpeyeren rere a sa vwọ ga Jihova vọnvọn vwẹ idjerhe ro rhiabọreyọ. Kerẹ udje, ọyinkọn Pọl jojẹ rọ vwọ yanjẹ ẹdia rode ro vwori vwẹ orere rọyen rere o se vwo nene Kristi je vwẹ ẹga kẹ Jihova. (Gal. 1:14) Ọtiọyena, o de yeren uvi rẹ akpọ, uphẹn ro vwo nene Kristi sun vwẹ odjuvwu de ji rhiephiyọ vwọ kẹ. O vwo ọke vuọvo rọ vwọ viẹ diekpọvwẹ kpahen ojẹ rọ vwọ ga Jihovaa, avwanre ji che ru ọtiọyeen.—Se Filipae 3:7, 8.

16. Die yen e yono nẹ obo re phia kẹ Julia rhe? (Ni uhoho na.)

¹⁶ Siẹrẹ a da vwẹ ẹga ri Jihova vwọ kobaro, e ji se yeren omamọ rẹ akpọ enẹna kugbe obaro na. Roro kpahen obo re phia kẹ oniọvo aye ọvo re se Julia. Ọke rọ vwọ hẹ omotete ọ ke rhe mrẹ uyota na, Julia ọyen ọvo usun rẹ ihwo re sune vwẹ ishọshi rayen. Ohwo ọvo rọ riẹn obo re djofu sune mamọ de vwo oniso rẹ okẹ ro rhere ji yono. O rhe krii, a da rhe riẹn Julia phiyọ ohwo ro vwo okẹ une rọ je sune vwẹ eguan re de hworo ihwehworo ri titiri mamọ. Ọke ro vwo kpo isikuru rẹ ihwehworo ra riẹn odẹ mamọ, ọmọ iklasi rọyen da ta ota kẹ kpahen Ọghẹnẹ, je vuẹ nẹ Ọghẹnẹ vwo odẹ, Jihova. O kririi, Julia da ton eyono ri Baibol phiyọ abọ ivẹ udughwrẹn. Ukuotọ rọyen, o de brorhiẹn rọ vwọ reyọ akpeyeren rọyen vwọ ga Jihova ukpe rọ vwọ reyọ vwọ tua ine ẹsuọ. Orhiẹn yena lọhọ vwọ kẹẹ. Ọ da ta, “Ihwo buebun vuẹ vwẹ nẹ wọ riẹn ọghanrovwẹ rẹ okẹ ru wo vworii, jẹ me guọnọ reyọ akpọ mẹ vwọ ga Jihova vọnvọn.” Nonẹna, mavọ yen oma ruo siẹrẹ o de ni kpuko kpahen ojẹ rọ jẹre vwẹ ẹgbukpe 30 re wanre na? “Mi vwo ẹwẹn ri dọe, me je vwẹroso Jihova nẹ ọ cha kẹ vwẹ erọnvwọn eje re me guọnọre vwẹ obaro na.”—Une 145:16.

GA JIHOVA ỌKIEJE

17. Mavọ yen ọke oba ra hepha na vwo shekpahen ihwo ri brorhiẹn re vwọ vwẹ ẹga kẹ Ọghẹnẹ kugbe ihwo ri ji rhi ru ọtiọyeen?

¹⁷ Avwanre yerẹn vwẹ ọke oba na. Ọyinkọn Pọl de si: Kidie ‘ọmọke krẹn,’ yen chekọ ‘ohwo rọ cha na kọ cha rhe, o che hwọkee.’ (Hib. 10:37) Idjerhe vọ yen ọnana vwo shekpahen avwanre? Emuọvo kọna, ọke ro chekọ ihwo vwo brorhiẹn vwọ vwẹ ẹga kẹ Jihova rhe te emuọvoo. (1 Kọr. 7:29) Avwanre riẹnre nẹ fikirẹ orhiẹn re bruru ra vwọ vwẹ ẹga kẹ Ọghẹnẹ, e che chirakon rẹ edavwini, jẹ “ọmọke krẹn” yen e che vwo ru ọtiọyen.

18. Die yen Jesu vẹ Jihova guọnọre nẹ avwanre ru?

¹⁸ Ọ dia Jesu de vuẹ idibo rọyen nẹ ayen rhe dia idibo rọyen ọvoo ẹkẹvuọvo nẹ ayen ji nene ọyen ọkieje. (Mat. 16:24) Ọtiọyena, ọ da dianẹ ikpe buebun yen a ga Jihova cha re, e jẹ ofu dje avwanree. E jẹ a wian gangan vwo ru nene orhiẹn re bruru ra vwọ vwẹ ẹga vwọ kẹ. Ọkiọvo, ọ cha lọhọọ, jẹ a mrẹ vwo dje ebruphiyọ vẹ omavwerhovwẹn ra cha mrẹ enẹna siẹrẹ e de ru ọtiọyeen!—Une 35:27.

19. Die avwanre yono nẹ obo re phia kẹ Gene rhe?

¹⁹ Ihwo evo no nẹ ọ dia ọmọrhiẹ erọnvwọn yen ayen che vwo ze rẹ ayen vwọ vwẹ ẹga kẹ Jihovaa. Wọ da dia eghene, wo no nẹ o vwo emuọvo rọ cha va wẹ abọ wọ da ga Jihova? Oniọvo eghene ọvo re se Gene tare nẹ: “Mi niro nẹ me cha sa riakpọ kuoma kerẹ Oseri ri Jihovaa. Ọ họhọre nẹ imitete buebun re me vẹ ayen gba ghwanre riakpọ kuoma, ayen kpo akpọẹriọ, kọnphiyọ ohwohwo, te igemu rẹ vidio re de gbe ozighi, je me ghwọrọ ọke mẹ vwo kpo uyono vẹ aghwoghwo.” Die yen iroro nana ru vwẹ oma ri Gene? Ọ da ta: “Me da rhe vwẹrokere erharhe erọnvwọn rẹ ayen ruẹ ji yeren akpọ rẹ aro ivẹ. Ẹkẹvuọvo ọ ghwa uvi omavwerhovwẹn rhe vwee. Ẹwẹn mẹ da rhe djẹ kpo iyono eghanghanre ri Baibol re me kpairoro vrẹ jovwo re, ji brorhiẹn re me vwọ ga Jihova vẹ ubiudu mẹ eje. Ọ họhọre nẹ, nẹ ọke yena rhe yen Jihova vwọ kpahanphiyọ kẹrhovwo kẹrhovwo mẹ eje.”

20. Die yen e brorhiẹn re vwo ru?

²⁰ Ọbuine na da so kẹ Jihova nẹ: “Ebruphihọ kẹ ohwo ru wọ jẹreyọ nẹ o si kẹrẹ owẹ, rọ dia ọguan wẹn.” (Une 65:4) E jẹ avwanre vwo owenvwe ro rhe Joshua rọ tare nẹ: “Vwọ kẹ vwẹ vẹ uwevwi mẹ, Ọrovwohwo ọvo ọye avwanre ga.”—Jos. 24:15.