Ukeri

28 Oyena vwọ wan nu, Jihova da ta kẹ Mosis: 2 “Ji iji kẹ ihwo rẹ Izrẹl rere wọ vuẹ ayen nẹ, ‘E jẹ o mu ovwan ẹro nẹ ovwan vwẹ izobo mẹ, ibrẹdi mẹ vwọ kpahotọ kẹ vwẹ. Ayen me vwẹ izobo mẹ ra vwẹ erhanre torhẹ kerẹ ọnrhe ọvwevwerhen vwọ kpahotọ kẹ vwẹ vwẹ ọke re bruphiyọ kẹ ayen.’

3 “Wọ me ta kẹ ayen nẹ, ‘Ọnana yen izobo ra vwẹ erhanre torhẹ rẹ ovwan cha vwọ kpahotọ kẹ Jihova: imigodẹ eshare ivẹ rẹ ẹgbukpe ọvo rẹ oma rayen gbare kẹdi kẹdẹ, kerẹ izobo rẹ ẹtorhẹ ri kọke kọke. 4 Ovwan me vwẹ omogodẹ ọshare ọvo vwo ze izobo vwẹ urhiọke, ovwan me rha vwẹ omogodẹ ọshare ro chekọ na vwo ze izobo vwẹ ovwọnvwọn,* 5 vẹ ẹkẹn ọvo rẹ ẹkẹn ihwe rẹ ifah* rẹ omamọ rẹ iflawa re ku kugbe vẹ ẹkẹn ọvo rẹ ẹkẹn ẹne ri hin* rẹ omamọ rẹ evwri kerẹ izobo rẹ eka. 6 Ọyen izobo rẹ ẹtorhẹ re ze kọke kọke, ra tonphiyọ vwẹ Ugbenu ri Sainai kerẹ ọnrhe ọvwevwerhen, izobo ra vwẹ erhanre torhẹ kẹ Jihova, 7 ọ vẹ izobo rẹ udi rọyen, ẹkẹn ọvo rẹ ẹkẹn ẹne ri hin vwọ kẹ omogodẹ ọshare ọvuọvo. Wo mi ku udi ro muẹ ohwo na phiyọ asan ọfuanfon na kerẹ izobo rẹ udi vwọ kẹ Jihova. 8 Wọ cha vwẹ omogodẹ ọshare ro chekọ na vwo ze izobo vwẹ ovwọnvwọn.* Ọ vẹ izobo rẹ eka vuọvo kerẹ ọ ru wo ruru vwẹ urhiọke na kugbe izobo rẹ udi vuọvo na, wọ cha vwọ kpahotọ kerẹ izobo ra vwẹ erhanre torhẹ, kerẹ ọnrhe ọvwevwerhen kẹ Jihova.

9 “‘Ẹkẹvuọvo vwẹ ẹdẹ Urovwoma na, izobo na me dia imigode ivẹ rẹ ẹgbukpe ọvo rẹ oma rayen gbare vẹ ẹkẹn ivẹ rẹ ẹkẹn ihwe rẹ ovwanvwọ rẹ ifah rẹ omamọ rẹ iflawa re ku kugbe vẹ evwri kerẹ izobo rẹ eka, ọ vẹ izobo rẹ udi rọyen. 10 Ọnana yen izobo rẹ ẹtorhẹ rẹ Ẹdẹ Urovwoma na vẹ izobo rẹ ẹtorhẹ ri kọke kọke na kugbe izobo rẹ udi rọyen.

11 “‘Vwẹ ọtonphiyọ rẹ emeranvwe ọvuọvo,* ovwan cha vwẹ erhuẹn itete ivẹ, egbon ọvo, kugbe imigodẹ eshare ighwrẹn rẹ oma rayen gbare, rẹ ọvuọvo rayen hẹ ẹgbukpe ọvo vwo ze izobo rẹ ẹtorhẹ kẹ Jihova, 12 vẹ ẹkẹn erha rẹ ẹkẹn ihwe rẹ ovwanvwọ rẹ omamọ rẹ iflawa re ku kugbe vẹ evwri kerẹ izobo rẹ eka vwọ kẹ erhuẹn ọvuọvo kugbe ẹkẹn ivẹ rẹ ẹkẹn ihwe rẹ ovwanvwọ rẹ omamọ rẹ iflawa re ku kugbe vẹ evwri kerẹ izobo rẹ eka vwọ kẹ egbon ọvo, 13 vẹ ẹkẹn ọvo rẹ ẹkẹn ihwe rẹ ovwanvwọ rẹ omamọ rẹ iflawa re ku kugbe vẹ evwri kerẹ izobo rẹ eka vwọ kẹ omogodẹ ọshare ọvuọvo, izobo rẹ ẹtorhẹ, ọnrhe ọvwevwerhen, izobo ra vwẹ erhanre torhẹ kẹ Jihova. 14 Izobo rẹ udi rayen me dia ubro ri hin rẹ iwaini vwọ kẹ erhuẹn ọvo vẹ ẹkẹn ọvo rẹ ẹkẹn erha ri hin vwọ kẹ egbon na kugbe ẹkẹn ọvo rẹ ẹkẹn ẹne ri hin vwọ kẹ omogodẹ ọshare ọvo. Ọnana yen izobo rẹ ẹtorhẹ ri kemeranvwe kemeranvwe vwẹ ọsoso rẹ ukpe na. 15 Vwọba, a me vwẹ ẹmẹvwe ọvo vwo ze izobo rẹ umwemwu kẹ Jihova vwọ ba izobo rẹ ẹtorhẹ ri kọke kọke na kugbe izobo rẹ udi rọyen.

16 “‘Vwẹ emeranvwe rẹsosuọ na, ẹdẹ 14 rẹ emeranvwe na cha dia Ọwanvrẹ ri Jihova. 17 A cha re orẹ vwẹ ẹdẹ 15 rẹ emeranvwe nana, a cha re ibrẹdi ro jephuo vwẹ ẹdẹ ighwrẹn. 18 Ọghwẹkoko ọfuanfon cha dia vwẹ ẹdẹ rẹsosuọ na. Ovwan ruiruo ọgangan vuọvoo. 19 Ovwan me vwẹ erhuẹn itete ivẹ, egbon ọvo, kugbe imigodẹ eshare ighwrẹn rẹ ọvuọvo rayen hẹ ẹgbukpe ọvo vwo ze izobo rẹ ẹtorhẹ ra vwẹ erhanre torhẹ kẹ Jihova. Eranvwe rẹ oma rayen gbare yen ovwan che vwo ze izobo. 20 Ovwan me vwẹ ayen vwọ kpahotọ vẹ izobo rẹ eka rayen rẹ omamọ rẹ iflawa re ku kugbe vẹ evwri, ovwanvwọ rẹ ẹkẹn erha rẹ ẹkẹn ihwe vwọ kẹ erhuẹn ọvo kugbe ovwanvwọ rẹ ẹkẹn ivẹ rẹ ẹkẹn ihwe vwọ kẹ egbon na. 21 Ovwan me vwẹ ovwanvwọ rẹ ẹkẹn ọvo rẹ ẹkẹn ihwe vwọ kpahotọ vwọ kẹ omogodẹ ọshare ọvuọvo vwẹ usun rẹ imigodẹ eshare ighwrẹn na, 22 ọtiọyen ji te ẹvwe ọvo kerẹ izobo rẹ umwemwu re vwo ru arhuẹrẹ vwọ kẹ ovwan. 23 Vwọ vrẹ izobo rẹ urhiọke rẹ ovwan ze, rọ dia izobo rẹ ẹtorhẹ ri kọke kọke na, ovwan ji che ze izobo nana. 24 Idjerhe vuọvo yen ovwan che vwo ze izobo nana kẹdi kẹdẹ vwẹ ẹdẹ ighwrẹn kerẹ emuọre,* izobo ra vwẹ erhanre torhẹ kerẹ ọnrhe ọvwevwerhen kẹ Jihova. Ovwan mi ze izobo na vẹ izobo rẹ ẹtorhẹ ri kọke kọke na kugbe izobo rẹ udi rọyen. 25 Ovwan mi ru ọghwẹkoko ọfuanfon vwẹ ẹdẹ righwrẹn na. Ovwan ruiruo ọgangan vuọvoo.

26 “‘Vwẹ ẹdẹ rẹ emamọ rẹsosuọ na, ovwan da vwẹ izobo rẹ eka kpokpọ vwọ kpahotọ kẹ Jihova, ovwan mi ru ọghwẹkoko ọfuanfon vwẹ orẹ rẹ idughwrẹn rẹ ovwan. Ovwan ruiruo ọgangan vuọvoo. 27 Ovwan me vwẹ erhuẹn itete ivẹ, egbon ọvo, kugbe imigodẹ eshare ighwrẹn rẹ ọvuọvo rayen hẹ ẹgbukpe ọvo vwo ze izobo ro gbon ọnrhe ọvwevwerhen kẹ Jihova, 28 vwọ kẹ izobo rẹ eka rayen rẹ omamọ rẹ iflawa re ku kugbe vẹ evwri, ovwanvwọ rẹ ẹkẹn erha rẹ ẹkẹn ihwe vwọ kẹ erhuẹn ọvuọvo, ovwanvwọ rẹ ẹkẹn ivẹ rẹ ẹkẹn ihwe vwọ kẹ egbon na, 29 ovwanvwọ rẹ ẹkẹn ọvo rẹ ẹkẹn ihwe vwọ kẹ omogodẹ ọshare ọvuọvo vwẹ usun rẹ imigodẹ eshare ighwrẹn na, 30 ọtiọyen ji te ẹmẹvwe ọvo re che vwo ru arhuẹrẹ kẹ wẹ. 31 Ovwan me vwẹ ayen ba izobo rẹ ẹtorhẹ ri kọke kọke na kugbe izobo rẹ eka rọyen. Ayen me dia eranvwe rẹ oma rayen gbare vẹ izobo rẹ udi rayen.