“Mudia Gan, Ovwan Yeghe-e”

1-2. Idjerhe vọ yen Onenikristi vwọ họhọ uwevwin rọ pha gogorogo? (1 Kọrẹnt 15:58)

VWẸ ukpe ri 1978, a da bọn egenege gogorogo ro vwo iwevwin 60 vwẹ Tokyo, Japan. Ihwo buebun roro nẹ o vwo obo re cha yọnrọn uwevwin na-a, kidie etọ muẹ bẹrẹ vwẹ orere na. Die yen nẹrhẹ uwevwin nana se mudia vi gogorogo? Ihwo re tẹn ona rẹ ebanbọn sa uwevwin na vi otọ kokoroko ji ruo rọ sa vwọ nuẹ siẹrẹ otọ de kpogho. Inenikristi pha kerẹ uwevwin yena. Vwẹ idjerhe vọ?

² O fori nẹ Onenikristi riẹn ẹdia rọ da sa nuẹ vẹ ẹdia ro de jẹ nuẹ. Siẹrẹ a da ta ota kpahen irhi vẹ iwan ri Jihova, o fori nẹ Onenikristi mudia gan, o yeghe-e. (Se 1 Kọrẹnt 15:58.) Ọ dia ohwo rọ “fobọ nyẹmẹ” o chukoku irhi ri Jihova-a. Ẹkẹvuọvo, o fori nẹ ọ “nuẹ,” siẹrẹ uphẹn na da herọ yẹrẹ a da guọnọ nẹ o ru ọtiọyen. (Jem 3:17) Onenikristi ro vwo ẹro abavo cha kẹnoma kẹ uruemu re vwo si ọrhan yẹrẹ rhọvwan phiyọ emueje. Vwẹ uyono nana, a cha ta ota kpahen oboresorọ e vwo je yeghe. A je cha ta ota kpahen ena iyorin Eshu reyọ vwo ruiruo rọ sa nẹrhẹ ọ bẹn kẹ avwanre re vwo ru ọtiọyen ji yono kpahen obo ra sa vwọ kẹnoma kẹ ena rẹ Eshu na.

IDJERHE VỌ YEN AVWANRE SE VWO MUDIA GAN?

3. Erhọ yen irhi evo rẹ Ojurhi ro me kpenu na vwọ kẹ avwanre vwẹ Iruo rẹ Iyinkọn Na 15:28, 29?

³ Kerẹ Ojurhi ro me Kpenu, ọkieje yen Jihova vwọ vwẹ irhi rẹ ihwo rọyen se vwo ẹruọ rayen vwọ kẹ ayen. (Aiz 33:22) Kerẹ udje, ekpako rẹ ẹgbukpe ujorin rẹsosuọ ta ota kpahen erọnvwọn erha re sa nẹrhẹ Inenikristi mudia gan: (1) ayen kẹnoma kẹ edjọẹgọ, ayen vwẹ ẹga kẹ Jihova ọvo, (2) ayen ni ọbara ghanghanre, kugbe (3) ayen nene iwan ri Jihova rehẹ Baibol na. (Se Iruo rẹ Iyinkọn Na 15:28, 29.) Nonẹna, mavọ yen Inenikristi se vwo mudia gan vwẹ ẹdia erha nana re djunute na?

4. Mavọ yen a sa vwọ vwẹ ẹga ro nẹ otọ rẹ ubiudu rhe vwọ kẹ Jihova? (Ẹvwọphia 4:11)

⁴ Avwanre kẹnoma kẹ edjọẹgọ, je vwẹ ẹga kẹ Jihova ọvo. Ọ vuẹ ihwo rẹ Izrẹl nẹ ọyen ọvo yen ayen vwẹ ẹga kẹ. (Urh 5:6-10) Ọke rẹ Idẹbono vwọ davwen Jesu ni, ọ da ta kẹ nẹ: Jihova ọvo yen wọ vwẹ ẹga kẹ. (Mt 4:8-10) Ọtiọyena, avwanre vwẹ ẹga kẹ ema-a. Avwanre je vwẹ ẹga kẹ ihworakpọ-ọ—ọ dianẹ ayen ilori rẹ ẹga, ihwo ri suẹn, ihwo ri fa ibọrọ yẹrẹ ihwo re nyo odẹ re ayen vwẹ ifimu—e ji ni ayen kerẹ eghẹnẹ-ẹ. E djephia nẹ avwanre ka ẹbẹre ri Jihova womarẹ a vwọ vwẹ ẹga kẹ ọ rọ “ma erọnvwọn eje.”—Se Ẹvwọphia 4:11.

5. Diesorọ e vwo nene urhi ri Jihova rọ tare nẹ e ni ọbara vẹ arhọ ghanghanre?

⁵ Avwanre nene urhi ri Jihova rọ tare nẹ e ni arhọ vẹ ọbara ghanghanre. Diesorọ? Kidie Jihova tare nẹ ọbara na mudiaphiyọ arhọ, okẹ ọghanghanre ro nẹ obọ rọyen rhe. (Li 17:14) Ẹsosuọ, Jihova vwọ vwẹ uphẹn kẹ ihworakpọ nẹ ayen re eranvwe, ọ vuẹ ayen nẹ ayen re ọbara-a. (Jẹ 9:4) Ọ rhoma vwanriẹn urhi nana kẹ ihwo rẹ Izrẹl womarẹ Urhi ri Mosis. (Li 17:10) Ọ je vuẹ ekpako rẹ ẹgbukpe ujorin rẹsosuọ nẹ ayen vuẹ Inenikristi eje nẹ ayen “kẹnoma kẹ . . . ọbara.” (Iru 15:28, 29) Avwanre nene urhi nana siẹrẹ e de brorhiẹn ro shekpahen omaesivwo.b

6. Ẹgbaẹdavwọn vọ yen a guọnọ mie avwanre e ki se nene iwan ri Jihova ri shekpahen ẹfuọn?

⁶ Nene iwan ri Jihova ri shekpahen ẹfuọn kpẹkpẹkpẹ. (Hib 13:4) Ọyinkọn Pọl vwẹ eta rẹ udje ri ji fiotọ vwo dje phẹphẹn nẹ e “hwe” ẹbẹre sansan rẹ ugboma rẹ avwanre—kọyen, ọnana mudiaphiyọ nẹ a cha davwẹngba vwo si koka koka rẹ orharhe urhurusivwe vwo nẹ oma rẹ avwanre. Ọtiọyena e rhe che ni ughe yẹrẹ ru orọnvwọn vuọvo rọ cha nẹrhẹ e gbe ọfanrhiẹ-ẹn. (Kọl 3:5; Job 31:1) Siẹrẹ iroro re vwo ru obo re chọre da kọn ro avwanre ẹwẹn, e ja sen iroro tiọyẹna kpakpata kidie o se miovwin oyerinkugbe rẹ avwanre vẹ ọ rẹ Ọghẹnẹ.

7. Die yen avwanre brorhiẹn re vwo ru, kẹ diesorọ?

⁷ Jihova guọnọre nẹ a vwẹ “ubiudu” avwanre eje vwo nene irhi rọyen. (Ro 6:17) Ọkieje yen irhi rọyen vwo fi erere kẹ avwanre, e ji che se wene aye-en. (Aiz 48:17, 18; 1Kọ 6:9, 10) Avwanre davwẹngba vwo ru obo re vwerhen Jihova oma je vwẹrokere uruemu rẹ ọbuine na rọ tare nẹ: “Me vwẹ udu mẹ kpahen iji wẹn re mi ru ayen rhiri bẹdẹ, re te oba.” (Un 119:112) Ẹkẹvuọvo, Eshu cha davwẹngba rere avwanre vwo jẹ irhi ri Jihova e nene. Ena vọ yen o vwo ruiruo?

DIE YEN ESHU RUẸ RỌ NẸRHẸ Ọ BẸN KẸ AVWANRE E VWO MUDIA GAN?

8. Mavọ yen Eshu vwọ reyọ omukpahen vwo phi ovwiẹrẹ phiyọ avwanre oma?

⁸ Omukpahen. Idẹbono reyọ ozighi vẹ okeke vwo phi ovwiẹrẹ phiyọ avwanre oma, ọnana kọ nẹrhẹ ọ bẹn e se vwo mudia gan. O ruẹ ọnana rere o se vwo “mu” avwanre rọ, ji miovwin oyerinkugbe avwanre vẹ Jihova vwori. (1Pi 5:8) Kidie nẹ Inenikristi rẹ ẹgbukpe ujorin rẹsosuọ brorhiẹn ayen vwo mudia gan, a da djẹ uguegue mu ayen, hwe ayen ehwe rẹ ugbobọ, ji hwe evo ghwu dede. (Iru 5:27, 28, 40; 7:54-60) Nonẹna, Eshu je reyọ omukpahen vwo ruiruo. A mrẹ ọnana vughe womarẹ oja ọgangan rẹ ihwo re vwọsua gbe kẹ iniọvo rẹ avwanre rehẹ Russia vẹ ẹkuotọ efa, kugbe ẹvwọsuọ rẹ iniọvo avwanre vwẹ idjerhe ọvo yẹrẹ ọfa.

9. Djudje rẹ oboresorọ o vwo fo nẹ a kẹnoma kẹ okeke ra fobọ nẹ sua-a.

⁹ Okeke ra fobọ nẹ sua-a. Vwọ vrẹ omukpahen, Eshu je reyọ “ena rẹ ophiẹnvwe” vwo ruiruo. (Ẹf 6:11) Je roro kpahen obo re phia kẹ oniọvo ọshare ọvo re se Bob, re mu kpo họsipito fikirẹ oma ẹbẹrẹ. Ọ vuẹ idọktọ na eje nẹ ọyen cha reyọ ọbara-a, o toro oborẹ ẹdia na gan te-e. Idọktọ rọ cha bẹrẹ na da rhọnvwe phiyọ obo rọ tare na. Ẹkẹvuọvo, ọke rhie tavwen e ki ru ebabẹrẹ na, rẹ ihwo rẹ orua rọyen vwo kpo re, idọktọ ro che hwe oma na de bro Bob rhe. Ọ da vuẹ nẹ ọkiọvo a cha guọnọ ọbara vwẹ ebabẹrẹ na-a, e di che phio phiyọ etiyin. Idọktọ na rorori nẹ Bob che wene ẹwẹn rọyen rọ vwọ dianẹ orua rọyen etiyi-in na. Ẹkẹvuọvo Bob de fiudugberi ta nẹ, o toro obo re phiare-e ọyen cha reyọ ọbara-a.

10. Diesorọ iroro rẹ ohworakpọ vwọ vọn vẹ imuoshọ? (1 Kọrẹnt 3:19, 20)

¹⁰ Iroro rẹ ihworakpọ. Siẹrẹ a da vwẹ ẹro rẹ ihworakpọ vwo ni emu vwo no, avwanre se gbobọnyẹ Jihova vẹ iwan rọyen. (Se 1 Kọrẹnt 3:19, 20.) “Aghwanre rẹ akpọ nana” yen nẹrhẹ ihwo vwo urhurusivwe rẹ ugboma. Inenikristi evo vwẹ Pẹgamọm kugbe Tayataira je vwẹrokere edjọẹgọ vẹ iruemu ọfanrhiẹn rẹ ihwo re riariẹ ayen phiyọ. Jesu vwẹ orhọesio ọgangan vwọ kẹ ikoko ivẹ na kidie ayen vwẹ uphẹn kẹ ọfanrhiẹn vwẹ ohri rayen. (Ẹvw 2:14, 20) Nonẹna, avwanre ji hirharoku okeke a vwọ vwẹrokere erharhe rẹ iruemu ọtiọyena. Irivẹ yẹre ihwo rẹ orua sa vuẹ avwanre nẹ irhi rẹ avwanre gan nọ, ọnana me nẹrhẹ e gbevwọso irhi rẹ Ọghẹnẹ. Kerẹ udje, ayen sa tanẹ wo de nene ojevwe romobọ ọ chọre-e, kidie irhi rehẹ Baibol na kpo awanre re.

11. Die yen a cha kẹnoma kẹ, e se vwo mudia gan?

¹¹ Ọkievo, e se roro nẹ odjekẹ ri Jihova vwọ kẹ avwanre ghwe fiotọ te-e. Ọnana me nẹrhẹ e ru vrẹ “obo re si phiyotọ.” (1Kọ 4:6) Ilori rẹ ẹga rẹ ọke ri Jesu riabe rẹ umwemwu nana. Ayen vwẹ irhi romobọ rayen vwọba Urhi ri Mosis na, ayen de krun eghwa ehọhọhọ nyẹ ihwo ghevweghe. (Mt 23:4) Jihova vwẹ odjekẹ ro phẹnre vwọ kẹ avwanre womarẹ Baibol na kugbe ukoko rọyen. O rhe fo nẹ a vwọba odjekẹ rọyen na-a. (Isẹ 3:5-7) Ọtiọyena, avwanre rhe che ru vrẹ obo re si phiyọ Baibol na yẹrẹ si irhi kẹ iniọvo rẹ avwanre kpahen oborẹ ayen che ru-u.

12. Mavọ yen Eshu reyọ “ophiẹnvwe ofefe” vwo ruiruo wan?

¹² Ophiẹnvwe. Eshu reyọ “ophiẹnvwe ofefe” kugbe “iroro rẹ akpọ na” vwo sun ihwo ghwrẹ je reyọ vwọ hẹriẹ ihwo. (Kọl 2:8) Vwẹ ẹgbukpe ujorin rẹsosuọ, ọ reyọ iyono re mu kpahen erianriẹn rẹ ihworakpọ, iyono rẹ ihwo ri Ju ri nẹ Baibol rhe-e, kugbe uyono rọ tare nẹ Inenikristi eje nene Urhi ri Mosis. Enana eje ophiẹnvwe kidie ọ nẹrhẹ ihwo kpairoro vrẹ Jihova rọ dia Esiri rẹ aghwanre. Nonẹna, Eshu reyọ ekuakua re ghwa iyẹnrẹn vẹ intanẹti vwọ hrahra evuẹ kugbe iyẹnrẹn rẹ efian rẹ ihwo ri suẹn titẹ. A mrẹ evuẹ tiọyena vwẹ ọke rẹ ọga ri COVID-19 na.c Iseri ri Jihova ri nene odjekẹ rẹ ukoko na vwọ phia, vrabọ rẹ ẹnwan rẹ ihwo ri nene evuẹ efian tiọyena rhiẹromrẹ.—Mt 24:45.

13. Diesorọ o vwo fo nẹ a kẹnoma kẹ erọnvwọn ri mu ẹwẹn rẹ ohwo reyọ?

¹³ Erọnvwọn ri mu ẹwẹn rẹ ohwo reyọ. O fori nẹ a tẹnrovi “erọnvwọn re ma ghanre.” (Fil 1:9, 10) Erọnvwọn buebun herọ re sa reyọ ọke vẹ ẹgba rẹ avwanre e me nẹrhẹ a kpairoro vrẹ obo re ma ghanre. Erọnvwọn re ruẹ kẹdẹ kẹdẹ—kerẹ emuẹriọ, udi ẹda, omaerovwon, kugbe iruo se mu ẹwẹn rẹ avwanre reyọ ọ da dianẹ e yẹn obo re ma ghanre kẹ avwanre vwẹ akpeyeren. (Lu 21:34, 35) Vwọba, kẹdẹ kẹdẹ yen e vwo nyo ji se evuẹ ri shekpahen usuon vẹ ihwo ri nudje. E jẹ evuẹ nana mu avwanre rọ-ọ. Kidie a rha jomaotọ-ọ, ọnana cha nẹrhẹ a ka ẹbẹre ọvo yẹrẹ ọfa. Eshu reyọ ena nana re djunute obenu na vwo ruiruo rere owenvwe rẹ avwanre vwo ru obo ri yovwinrin vwo shekpotọ. E jẹ ta ota kpahen obo ra sa vwọ kẹnoma kẹ ena rọyen ji mudia gan.

MAVỌ YEN AVWANRE SE VWO MUDIA GAN?

14. Ọrhọ yen orọnvwọn ọvo rọ sa cha avwanre uko vwo mudia gan je ka ẹbẹre ri Jihova?

¹⁴ Roro kpahen omaẹvwọkpahotọ vẹ omaebrophiyame wẹn. Wọ jowọ yena kidie wọ guọnọ ka ẹbẹre ri Jihova. Kperan rẹ obo re kẹ wẹ imuẹro nẹ wọ mrẹ uyota na vughe re. Wo yonori ji vwo erianriẹn ọgbagba ri Jihova, ọnana da nẹrhẹ wo vwo ẹguọnọ rọyen ji muọghọ kẹ kerẹ Ọsẹ wẹn rọhẹ odjuvwu. Wo de rhi vwo esegbuyota rọ nẹrhẹ wo kurhẹriẹ. Ọ da nẹrhẹ wọ kpairoro vrẹ erharhe iruemu ji ru obo re vwerhen Ọghẹnẹ oma. Ẹwẹn wẹn de rhi totọ wọ vwọ riẹn nẹ Ọghẹnẹ vwẹ imwemwu wẹn vwo ghovwo uwe. (Un 32:1, 2) Wọ da ton uyono ẹra phiyọ je vuẹ ihwo efa kpahen obo wo yonori. Kerẹ Onenikristi rọ vwomakpahotọ ji bromaphiyame re, wọ ra yan vwẹ idjerhe ro sun ohwo kpo arhọ na, vẹ owenvwe wọ vwọ dia evun rọyen.—Mt 7:13, 14.

15. Erere vọ yen che norhe siẹrẹ e de yono ji roro kokodo kpahen Ota rẹ Ọghẹnẹ?

¹⁵ Yono Ota rẹ Ọghẹnẹ wo ji roro kpahọn. Kirobo urhe rẹ awọ rọyen nabọ ro otọ muẹdia gan ye, e ji se mudia gan siẹrẹ esegbuyota avwanre kpahen Ota rẹ Ọghẹnẹ da nabọ ghwotọ. Siẹrẹ urhe da rhua, kọ nabọ tan awọ ro otọ, awọ rọyen ke je hraphiyọ. E de yono Ota rẹ Ọghẹnẹ ji roro kokodo kpahọn, esegbuyota rẹ avwanre kọ cha ganphiyọ ji nẹrhẹ e vwo imuẹro nẹ idjerhe rẹ Ọghẹnẹ yen me yovwin. (Kọl 2:6, 7) Roro kpahen oborẹ irhi, odjekẹ, kugbe ochọnvwe ri Jihova vwẹ ukẹcha kẹ idibo rọyen vwẹ ọke re wanre. Kerẹ udje, Izikiẹl nabọ frẹkotọ kerhọ ji ni ọke rẹ amakashe ọvo vwọ ma uwevwin rẹ ẹga rọ mrẹre vwẹ evunrẹ emramrẹ. Emramrẹ nana bọn Izikiẹl gan, je nẹrhẹ avwanre mrẹ iyono eghanghanre re sa nẹrhẹ e nene iwan ri Jihova ri shekpahen ẹga rẹ uyota.d (Izi 40:1-4; 43:10-12) Avwanre cha mrẹ erere siẹrẹ a da ghwọrọ ọke vwo yono ji roro kpahen erọnvwọn ikokodo rehẹ Ota rẹ Ọghẹnẹ.

16. Diesorọ udu vwo jẹ Bob e yeghe? (Une rẹ Ejiro 112:7)

¹⁶ Vwo udu rọ ganre. Ovie Devid dje ẹguọnọ ro jẹ rhẹriẹ kẹ Jihova rọ vwọ so: “Udu mẹ pha gbae, E Ọghẹnẹ.” (Un 57:7) Avwanre ji se vwo udu rọ ganre, a da vwẹroso Jihova kare kare. (Se Une rẹ Ejiro 112:7.) Roro kpahen oborẹ ọnana vwẹ ukẹcha kẹ Bob, ra ta ota kpahen siẹvure. Ra vwọ vuẹ nẹ ayen cha vwẹ ọbara choma siẹrẹ ayen da guọnọ, ọ da kpahen nẹ ọ da dianẹ e che se ọbara phiyọ ọyen oma, ọyen che vrẹ nẹ họsipito na kpakpata. Bob da je ta “Mi vwo ẹwẹn ivivẹ kpahen obo mi che ru-u, oshọ rẹ obo re cha phia ji mu vwe-e.”

17. Die yen e se yono nẹ obo re phia kẹ Bob rhe? (Ni uhoho na.)

¹⁷ Udu ri Bob ganre kidie o brorhiẹn nẹ ọyen che mudia gan ọke grongron tavwen ọ ke tobọ kpo họsipito na. Ẹsosuọ, o vwo owenvwe ro vwo ru obo ri vwerhen Jihova oma. Ọrivẹ, ọ nabọ frẹkotọ ru ehiahiẹ kpahen obo ri Baibol na vẹ ẹbe rẹ ukoko na ta kpahen ọghanrovwẹ rẹ arhọ vẹ ọbara. Ọrerha, o vwo imuẹro nẹ Jihova cha hwosa kẹ ọyen siẹrẹ o de nene odjekẹ rọyen. Avwanre ji se vwo udu rọ ganre o toro ebẹnbẹn re hirharokuẹ-ẹ.

18. Die yen udje ri Barak yono avwanre kpahen obo ra sa vwọ vwẹroso Jihova? (Ni uhoho rọhẹ opharo ọbe na.)

¹⁸ Vwẹroso Jihova. Je roro kpahen oborẹ ẹroẹvwọsuọ ri Barak vwo kpahen Jihova nẹrhẹ o se phikparobọ. Dede nẹ a mrẹ ekuakua ofovwin vuọvo vwẹ otọ rẹ Izrẹl eje-e, Jihova da vuẹ nẹ ọ kpare ofovwin bru onotu rẹ ofovwin Sisira vẹ ituofovwin rọyen re tẹn ona ji vwo ekuakua ofovwin buebun. (Igu 5:8) Ọmraro aye Dẹbora da vuẹ Barak nẹ o bru Sisira vẹ ituofovwin rọyen re gua ekpẹrẹ ri bun te 900 ra vwẹ otọ rọ pha riẹriẹriẹ. Dede nẹ oka rẹ asan ọtiọyena yen me yovwin kẹ ituofovwin ri Sisira, Barak de ru nene obo ra vuẹrẹ. Isodje na vwo nẹ Ugbenu ri Tabọr cha, Jihova de siobọnu osio ọgangan nẹ odjuvwu rhe. Ekpẹrẹ ri Sisira de shu fikirẹ ibehre, ọnana da nẹrhẹ Barak phikparobọ womarẹ ukẹcha ri Jihova. (Igu 4:1-7, 10, 13-16) Vwẹ idjerhe vuọvo na, Jihova je cha nẹrhẹ avwanre phikparobọ siẹrẹ a da vwerosuọ ji nene odjekẹ rọ vwọ kẹ avwanre womarẹ ukoko rọyen.—Urh 31:6.

BRORHIẸN WO VWO MUDIA GAN ỌKIEJE

19. Diesorọ wọ vwọ guọnọ mudia gan?

¹⁹ Rọ vwọ dianẹ akpọ Eshu yen e de yerẹn na a cha davwẹngba e vwo mudia gan ọkieje. (1Ti 6:11, 12; 2Pi 3:17) E jẹ avwanre eje vwo owenvwe re vwo mudia gan, ọ da tobọ dianẹ e hirharoku odju rẹ omukpahen, okeke ra fobọ nẹsua-a, iroro rẹ ihworakpọ, ophiẹnvwe, kugbe erọnvwọn ri mu ẹwẹn rẹ ohwo reyọ. (Ẹf 4:14) Ọtiọyena, e jẹ e mudia gan, vwẹ ẹga rẹ avwanre vwọ kẹ Jihova ji nene irhi rọyen. O ji fo nẹ a dia ihwo re nuẹ. Vwẹ uyono rọ cha na, a cha ta ota kpahen obo ri Jihova vẹ Jesu vwo dia uvi rẹ udje rẹ ihwo re nuẹ.