Ekpako​—Ovwan Yono nẹ Udje ri Gidiọn

1. Vwo nene obo rehẹ 1 Pita 5:​2, owian ọghanghanre vọ yen ekpako vwori?

INENIKRISTI re dia ekpako ji vwo oghwa ayen vwọ vwẹrote igegede ri Jihova. Eshare nana re fuevun na ni uphẹn rẹ ayen vwọ ga iniọvo rayen ghanghanre, ayen ghene wian gangan ayen vwọ dia uvi rẹ “isuigegede . . . re vwẹ ẹro te.” (Jer 23:4; se 1 Pita 5:2.) Mavọ yen ọ vwerhen oma te re vwo vwo eshare tiọyena vwevunrẹ ikoko sansan!

2. Ebẹnbẹn vọ yen ekpako evo hirharokuẹ?

² Ekpako hirharokuẹ ebẹnbẹn sansan siẹrẹ ayen da vwẹrote owian ra vwọ kẹ ayen. Noso nẹ ekpako wian gangan ayen sa vwọ vwẹrote ukoko na. Ọkpako ọvo vwẹ United States re se Tony, rhe mrẹvughe nẹ ofori ọyen vwọ riẹn asan rẹ ẹgba rọyen teri siẹrẹ o de rhiabọreyọ ewian ra vwọ kẹ ọyen. Ọ da ta: “Ọke rẹ ọga ri COVID-19 ka vwọ tonphiyọ, me davwẹngba mi vwo ruiruo buebun vwo ru ọrhuẹrẹphiyotọ rẹ iyono vẹ iruo aghwoghwo na. Ọ dia ọmọrhiẹ owian me wianre-e, dedena ewian efa je von otọ. Ọtiọyena ewian de rhi bun vwe abọ, me rha mrẹ ọke vwo ruẹ isese ri Baibol, uyono romobọ, kugbe ẹrhovwo ẹnẹ-ẹ.” Ọkpako ọvo vwẹ Kosovo re se Ilir, vwo obẹnbẹn ọfa. Ọke rọ vwọ hẹ ubrakpọ ọvo re de phi ofovwin, ọ mrẹ bẹnbẹn ro vwo nene odjekẹ rẹ ukoko na. Ọ da ta: “A davwen uduefiogbere mẹ ni ọke rẹ oghọn ukoko vwọ vuẹ vwẹ nẹ me vwẹ ukẹcha kẹ iniọvo rehẹ asan ro muoshọ. Oshọ mu vwe kidie mi niro nẹ ọhọ ghwa hẹ odjekẹ na-a.” Tim, ro ruiruo rẹ imishọnare vwẹ Asia, mrẹ bẹnbẹn ro vwo ru erọnvwọn ra guọnọre nẹ ẹdẹ ra ruẹdẹ. Ọ da ta: “Ọkievo, oma ko ghwe bru vwe kuẹ, me rha mrẹ ẹgba vwọ vwẹ ukẹcha kẹ iniọvo na-a.” Die yen sa vwẹ ukẹcha kẹ ekpako ri hirharokuẹ ọkpọ rẹ ebẹnbẹn ọtiọyena?

3. Mavọ yen avwanre eje sa vwọ mrẹ erere vwo nẹ udje ri Gidiọn rhe?

³ Ekpako se yono vwo nẹ udje rẹ Oguẹdjọ Gidiọn. (Hib 6:12; 11:32) Ọ chochọ ihwo rẹ Ọghẹnẹ je vwẹrote ayen. (Igu 2:16; 1Ik 17:6) Kerẹ Gidiọn, a vwẹ ekpako mu rere ayen vwẹrote idibo rẹ Ọghẹnẹ vwẹ ọke ọgangan nana. (Iru 20:28; 2Ti 3:1) Avwanre se yono vwo nẹ uruemu ra vwọ riẹn asan rẹ ẹgba rẹ ohwo teri, omaevwokpotọ, kugbe ẹmienyo ri Gidiọn rhe. A davwen akoechiro rọyen ni ọke ro vwo ruiruo ra vwọ kẹ. Ọ da dianẹ a ga kerẹ ọkpako yẹrẹ e ru ọtiọye-en, e se dje ọdavwaro kpahen oborẹ ayen ruẹ. Avwanre se bicha ekpako nana re wian gangan na.​—Hib 13:17.

ỌKE WỌ DA MRẸ BẸNBẸN WỌ VWỌ VWOMAKPOTỌ

4. Idjerhe vọ yen Gidiọn vwo djephia nẹ ọyen ohwo rọ vwomakpotọ rọ je riẹn asan rẹ ẹgba rọyen teri?

⁴ Gidiọn ọyen ohwo rọ vwomakpotọ rọ je riẹn asan rẹ ẹgba rọyen teri.b Ọke rẹ amakashe ri Jihova vwọ vuẹ Gidiọn nẹ a jẹrẹ o vwo sivwin Izrẹl nẹ obọ rẹ ituofovwin rẹ ihwo ri Midian, ọ da vwomakpotọ ta kẹ nẹ: “Orua mẹ re me dia ọvwiẹrẹ vwi Manasse na, mẹvwẹ re je ka obuko vwẹ uvwiẹ mẹ.” (Igu 6:15) O niro nẹ ọyen muwan rẹ owian na-a, ẹkẹvuọvo Jihova riẹnre nẹ o se ruo. Womarẹ ukẹcha ri Jihova, Gidiọn da wian owian na re efẹrọvo.

5. Ọke vọ yen ọ ma vwọ bẹn kẹ ọkpako rọ vwọ vwomakpotọ?

⁵ Ekpako davwẹngba rayen eje vwo djephia nẹ ayen ihwo re vwomakpotọ vwẹ kemu kemu, ayen ji ruẹ vrẹ oma-a. (Mai 6:8; Iru 20:​18, 19) Ayen reyọ oborẹ ayen se ru yẹrẹ oborẹ ayen ru re vwọ yan oma-a; ayen ji ni oma rayen kueku fikirẹ oruchọ raye-en. Ọkiọvo ọkpako sa mrẹ bẹnbẹn rọ vwọ vwomakpotọ. Kerẹ udje, o se rhiabọreyọ ewian buebun je mrẹ bẹnbẹn ro vwo ru ayen re. A sa reyọ vwo guẹdjọ fikirẹ obo rọ wian owian ra vwọ kẹ yẹrẹ jiro fikirẹ obo ro ruẹ erọnvwọn wan. Die yen ekpako se yono vwo nẹ udje ri Gidiọn re sa chọn ayen uko vwẹ ẹdia ọtiọyena?

6. Die yen ekpako se yono vwo nẹ uruemu ra vwọ riẹn asan rẹ ẹgba ohwo teri ro rhe Gidiọn? (Ni uhoho na.)

⁶ Nokpẹn rẹ ukẹcha. Ohwo rọ riẹn asan rẹ ẹgba rọyen teri riẹnre nẹ ọ dia erọnvwọn eje yen ọyen che se ru-u. Gidiọn djerephia nẹ ọyen riẹn asan rẹ ẹgba rọyen teri, kọyensorọ ọ vwọ nokpẹn rẹ ukẹcha vwo mie ihwo efa. (Igu 6:​27, 35; 7:24) Ekpako ri vwo aghwanre ji se ru ọtiọyen. Tony, re djunute siẹvure na da ta: “Fikirẹ asan me dia ghwanre, mi rhiabọreyọ ewian buebun re vrẹ vwẹ oma. Ọtiọyena, me da vwẹ uyovwinrota ra vwọ riẹn asan ẹgba rẹ ohwo teri vwọba ẹga rẹ orua rẹ avwanre je nọ aye mẹ kpahen obo ro rorori. Mi ji ni ividio na Yono Ihwo, Vwẹ Owian kẹ Ayen, Je Vwẹroso Ayen Kirobo rẹ Jesu Ruru” vwẹ jw.org. Ọtiọyena, Tony da vuẹ ihwo efa nẹ e vwẹ ukẹcha kẹ ọyen vwẹ iruo rọyen na. Die yen nẹ obuko ọnana rhe? Ọ da ta: “Ọnana da nẹrhẹ a sa vwẹrote iruo rẹ ukoko na, me da je mrẹ ọke vwo ru oyerinkugbe mẹ vẹ ọ ri Jihova ganphiyọ.”

7. Mavọ yen ekpako sa vwọ vwẹrokere udje ri Gidiọn siẹrẹ a da vwẹ ayen vwo guẹdjọ? (Jems 3:13)

⁷ Ta ota bọrọbọrọ a da reyọ owẹ vwo guẹdjọ. Orọnvwọn ọfa rọ nẹrhẹ ekpako mrẹ bẹnbẹn ayen vwọ vwomakpotọ yen a da reyọ ayen vwo guẹdjọ. Udje ri Gidiọn sa chọn ayen uko. Aphro herọ-ọ, kidie nẹ ọ riẹnre nẹ ọyen ohwo rọ gbare-e, ọ da fọ gbiẹi ọke ihwo rẹ Ifrem na vwọ reyọ vwo guẹdjọ. (Igu 8:​1-3) Gidiọn reyọ ophu vwọ kpahen ota kẹ aye-en. Ọ vwomakpotọ vwọ kerhọ kẹ ọdavwẹ rayen, je ta ota bọrọbọrọ kẹ ayen, ọnana da nẹrhẹ ophu rayen kpotọ. Ekpako ri vwo aghwanre vwẹrokere udje ri Gidiọn womarẹ ayen vwọ nabọ kerhọ je ta ota re bọrọbọrọ siẹrẹ a da vwẹ ayen vwo guẹdjọ. (Se Jems 3:13.) Vwẹ idjerhe ọtiọyena, kẹ ayen toroba ufuoma rọhẹ ukoko na.

8. Die yen ofori nẹ ekpako ru siẹrẹ ihwo de jiri ayen? Djudje ọvo.

⁸ Vwo ujiri eje vwo rhe Jihova. Ọke rẹ ihwo vwo jiri Gidiọn kidie nẹ o phi ihwo ri Midian kparobọ, ọ da vwẹ ujiri na vwo rhe Jihova. (Igu 8:​22, 23) Mavọ yen ekpako sa vwọ vwẹrokere Gidiọn? Ofori nẹ ayen vwẹ ujiri rẹ oborẹ ayen ruru eje vwo rhe Jihova. (1Kọ 4:​6, 7) Kerẹ udje, e de jiri ọkpako kidie nẹ ọ tẹn ona rẹ uyono, ọ sa tanẹ Baibol na yen ota na nurhe yẹrẹ ukoko ri Jihova yen reyerọ vwọphia. Ọkiọvo ofori nẹ ekpako nomaso rere ihwo vwo jẹ ayen e no gegerege. Roro kpahen udje rẹ ọkpako ọvo re se Timothy. O vwo omavwerhovwẹn rọ vwo ta eta rotu ọke ra ghwa vwọ reyọ vwo mu ọkpako nu obọ. Ọ da ta: “Eta egangan re je pha grongron yen me vwọ tuẹn eta vẹ idje phiyọ. Ọnana kọ nẹrhẹ ihwo jiri uvwe. Ọ da ohwo mamọ nẹ mẹvwẹ kọyen ihwo tẹnroviẹ ukperẹ Baibol na yẹrẹ Jihova.” Ọke vwọ yanran na, Timothy kọ rhe mrẹvughe nẹ ofori nẹ ọyen wene ena rẹ uyono rọyen rere ihwo vwo jẹ ọyen e tẹnroviẹ gan nọ. (Isẹ 27:21) Kẹ, die yen nẹ obuko ọnana rhe? Ọ da ta: “Ihwo sansan ke vuẹ vwẹ oborẹ ota mẹ chọn ayen uko vwo yerin ghene ebẹnbẹn, chirakon rẹ ọdavwini, ji sikẹrẹ Jihova phiyọ. Oma vwerhen ovwẹ mi de nyo oborẹ ihwo ta enẹna vrẹ ujiri rẹ ayen vwọ kẹ vwẹ obuko re.”

ỌKE WỌ DA MRẸ BẸNBẸN WO VWO NYUPHO YẸRẸ FIUDUGBERI

9. Idjerhe vọ yen a vwọ davwen uduefiogbere vẹ ẹmienyo ri Gidiọni ni? (Ni uhoho rọhẹ opharo ọbe na.)

⁹ A davwen uduefiogbere vẹ ẹmienyo ri Gidiọn ni ọke ra ghwa vwọ reyọ vwo mu kerẹ oguẹdjọ nu. A vuẹ rẹ nẹ ọ guọghọ agbada rẹ ọsẹ rọyen da vwẹ ẹga kẹ Baal. (Igu 6:​25, 26) Ọke vwọ yanran na, o vwo koko ituofovwin buebun nu, Jihova da vuẹ nẹ o si unu rayen kpotọ abọ ivẹ soso. (Igu 7:​2-7) Ukuotọ rọyen, a da vuẹ nẹ ọ gba kpare ohọnre bru ivwighwrẹn rọyen ra vwẹ uherevie rẹ ason.​—Igu 7:​9-11.

10. Ọke vọ yen ọ ma vwọ bẹn kẹ ọkpako ro vwo nyẹme?

¹⁰ Ofori nẹ ekpako dia ihwo re “fobọ nyẹme, NW.” (Jem 3:17) Ọkieje yen ọkpako ro nyẹme vwọ vwomakpotọ vwọ reyọ obo ri Baibol na tare vwo ruiruo ji nene odjekẹ rẹ ukoko Ọghẹnẹ vwọphia. Vwẹ idjerhe ọtiọyena ko se phi omamọ udje phiyotọ vwọ kẹ ihwo efa. Jẹ, ọ je sa mrẹ bẹnbẹn ro vwo nyẹme. Kerẹ udje, ọ sa mrẹ bẹnbẹn ro vwo nene odjekẹ ra vwọ kẹ. Vwẹ ẹdia evo, o se no nẹ ọhọ yẹrẹ aghwanre hẹ odjekẹ na-a. Yẹrẹ a sa vuẹ nẹ o ruiruo ro che phi ugbomọphẹ rọyen phiyọ ẹdia rẹ imuoshọ. Mavọ yen ekpako sa vwẹrokere ẹmienyo ri Gidiọn vwẹ ẹdia tiọyena?

11. Die yen sa vwẹ ukẹcha kẹ ekpako vwo dia ihwo ri nyẹme?

¹¹ Nabọ kerhọ kẹ odjekẹ wọ je reyọ vwo ruiruo. Ọghẹnẹ vuẹ Gidiọn obo rọ cha ghwọrọ agbada rẹ ọsẹ rọyen wan, asan rọ cha bọn agbada ọkpokpọ ri Jihova phiyọ kugbe oka rẹ eranvwe re che vwo ze izobo. Gidiọn nama vwo ẹwẹn ivivẹ kpahen odjekẹ na-a​—o ru nene oborẹ a vuẹ rẹ. Nonẹna ukoko ri Jihova vwẹ odjekẹ kẹ ekpako na womarẹ ileta, aghwoghwo, kugbe uchebro efa re sa chọn avwanre uko vwọ sẹro oma avwanre ji sikẹrẹ Jihova. Avwanre vwo ẹguọnọ rẹ ekpako nana re fuevun nene odjekẹ ro nẹ obọ rẹ Ọghẹnẹ rhe. Ukoko na eje mrẹ erere no cha.​—Un 119:112.

12. Mavọ yen ekpako sa vwọ reyọ obo rehẹ Hibru 13:17 vwo ruiruo, ọ da dianẹ ukoko ri Jihova vwẹ ewene vwọphia?

¹² Vwo owenvwe wo vwo ru ewene. Karophiyọ nẹ Jihova vuẹ Gidiọn nẹ o si unu rẹ isodje na kpotọ. (Igu 7:8) O se roro nẹ: ‘Ewene nana ọyen obo ra ghene guọnọ? Ọ cha wian?’ Dedena, Gidiọn nyupho. Nonẹna, ekpako vwẹrokere Gidiọn vwo nene odjekẹ kpokpọ rẹ ukoko na vwọphia. (Se Hibru 13:17.) Kerẹ udje vwẹ 2014, Ẹko Rọvwẹrote na ru ewene phiyọ ona rẹ utoro ra vwọ bọn Ọguan Ruvie vẹ Ọguan Romẹvwa. (2Kọ 8:​12-14) A rha guọnọ nẹ ikoko rhan igho ra vwọ bọn Ọguan Ruvie yẹrẹ Ọguan Romẹvwa kẹ aye-en. Ukperẹ ọtiọyen ikoko rehẹ akpọeje ki che ru itetoro ra vwọ bọn Ọguan Ruvie yẹrẹ Ọguan Romẹvwa vwẹ asan ra da guọnọ ayen, ọ da tobọ dianẹ igho rẹ ukoko ọvuọvo torori te emuọvo-o. José vwo ẹwẹn ivivẹ kpahen ewene nana nẹ ọ cha wia-an, o niro nẹ: ‘A cha sa bọn Ọguan Ruvie vuọvo-o. Ọ dia enẹ yen e ruẹ erọnvwọn wan vwẹ ubrakpọ nana-a.’ Die chọn José uko vwo nene odjekẹ na? Ọ da ta: “Eta rehẹ Isẹ 3:​5, 6 nẹrhẹ me vwẹroso Jihova. Obo re phiare gbe vwe unu mamọ! Vwọ vrẹ Eguan Ruvie avwanre bọn, avwanre ji ruẹ itetoro vwẹ idjerhe sansan rere emu eje sa vwọ dia abavo.”

13. (a) Imuẹro vọ yen Gidiọn vwori? (b) Mavọ yen ekpako sa vwọ vwẹrokere Gidiọn? (Ni uhoho na.)

¹³ Fiudugberi ru ọhọre ri Jihova. Dede nẹ imuoshọ hẹ evunrẹ owian ra vwọ kẹ Gidiọn nẹ o ru na, o nyupho ri Jihova. (Igu 9:17) Kidie nẹ Jihova vẹ Gidiọn herọ, ọnana da nẹrhẹ o vwo imuẹro nẹ Jihova che bicha ọyen vwọ chochọ rẹ ihwo rọyen. Ekpako re dia ẹkuotọ ra da dobọ rẹ owian rẹ avwanre ji vwẹrokere Gidiọn. Dede nẹ oshọ rẹ ozighi, e vwo mu ayen phiyọ uwodi, nọ ayen enọ, yẹrẹ iruo rayen vwọ va ayen abọ herọ, jẹ iniọvo na fiudugberẹ vwo ru emẹvwa ji vwobọ vwẹ iruo aghwoghwo na.c Vwẹ ukpokpogho rode na, ekpako guọnọ uduefiogbere ayen vwo nene odjekẹ ra cha wọ kẹ ayen​—o toro imuoshọ re herọ-ọ. Odjekẹ na se churobọsi ovuẹ rẹ ẹdjọeguo re vwo djẹ imicho kugbe oborẹ avwanre che ru e se vwo sivwin vrabọ rẹ ẹvwọsuọ ri Gọg ri Magọg.​—Izi 38:18; Ẹvw 16:21.

ỌKE WỌ DA MRẸ BẸNBẸN WO VWO CHIRAKON

14. Diesorọ ọ vwọ bẹn kẹ Gidiọn o vwo chirakon?

¹⁴ Owian ri Gidiọn kerẹ oguẹdjọ pha gangan. Ọke rẹ ihwo ri Midian vwọ djẹ ason rẹ ẹdẹ ayen phi ofovwin na, Gidiọn da vwọ tua ayen vwo nẹ Ugbenu ri Jẹzril re te Urhie ri Jọdan, rọ sa dia asan rẹ irhe buebun vọnre. (Igu 7:22) Gidiọn domaji vwẹ urhie ri Jọdan? Ẹjo! Dede nẹ oma bru ayen ku, Gidiọn vẹ eshare 300 na je vwọ tua ayen wanvrẹ urhie ri Jọdan. Ukuotọ rọyen, ayen da djẹ ihwo ri Midian mu ji phi ayen kparobọ.​—Igu 8:​4-12.

15. Diesorọ ọ vwọ bẹn ọkievo ọkpako vwo chirakon?

¹⁵ Ọkiọvo oma se bru ọkpako ku fikirẹ owian rẹ ukoko vẹ orua rọyen rọ vwẹrote. Vwẹ ẹdia ọtiọyena, mavọ yen ekpako sa vwọ vwẹrokere Gidiọn?

16-17. Die yen vwẹ ukẹcha kẹ Gidiọn vwo chirakon, kẹ imuẹro vọ yen ekpako se vwo? (Aizaya 40:​28-31) (Ni uhoho na.)

¹⁶ Vwẹroso Jihova nẹ ọ cha kẹ wẹ ẹgba. Gidiọn vwẹroso Jihova nẹ ọ cha kẹ ọyen ẹgba, Jihova ku ro phiyotọ-ọ. (Igu 6:​14, 34) Ẹdẹ ọvo, Gidiọn vẹ ihwo rọyen da reyọ owọ vwọ tua ivie ri Midian ivẹ, jẹ ivie na hẹ enu rehẹ ekẹkẹtẹ djẹ. (Igu 8:​12, 21) Womarẹ ukẹcha ri Jihova, ihwo rẹ Izrẹl de phi kparobọ. O ji fo nẹ ekpako vwẹroso Jihova, rọ dia ohwo rẹ “oma rhọ-ọ eyẹ oma ghwọrọ-ọ.” Ọ cha kẹ ayen ẹgba ọke rẹ ayen vwọ guọnọ.​—Se Aizaya 40:​28-31.

¹⁷ Roro kpahen udje ri Matthew, rọ ga vwẹ Umẹ Rọvwẹrote Omaesivwo. Die yen chọn rọ uko vwo chirakon? Ọ da ta: “Me nabọ rhe mrẹ orugba rẹ eta rehẹ Filipae 4:13 re. Ọke buebun oma da ghwọrọ ovwẹ, ẹgba rha herọ-ọ, ke me nabọ nẹrhovwo, je rẹ Ọghẹnẹ nẹ ọ kẹ vwẹ ẹgba re me guọnọre rere mi se vwo bicha iniọvo na. Ugege yena, me mrẹ ẹgba ri Jihova vwẹ oma mẹ, rọ vwọ vwẹ ukẹcha kẹ vwẹ mi se vwo chirakon.” Kerẹ Gidiọn, ekpako re wian gangan na ji se hirharoku ebẹnbẹn rẹ ayen vwọ vwẹrote uchuru na. Vwọrẹ uyota, ofori nẹ ekpako na riẹn asan ẹgba rayen teri, ayen rha wian vrẹ oma-a. Ayen je sa vwẹroso Jihova nẹ o che nyo orẹ rayen je kẹ ayen ẹgba ayen ji se vwo chirakon.​—Un 116:1; Fil 2:13.

18. Ra vwọ djẹ koko, mavọ yen ekpako sa vwọ vwẹrokere Gidiọn?

¹⁸ O vwo erọnvwọn buebun rẹ ekpako se yono nẹ udje ri Gidiọn rhe. Ofori nẹ ekpako riẹn asan rẹ ẹgba rẹ ayen teri ji dje uruemu rẹ omaevwokpotọ phia siẹrẹ ayen de rhiabọreyọ ewian kugbe ọke rẹ ihwo de jiri ayen yẹrẹ vwẹ ayen guẹdjọ. Ofori nẹ ayen fiudugberi ji nyẹme, marho ọ vwọ dianẹ oba rẹ eyeren na siẹkẹrẹ phiyọ na. O ji fo nẹ ayen vwẹroso Jihova nẹ ọ cha kẹ ayen ẹgba o toro ebẹnbẹn ayen hirharokuẹ-ẹ. Vwọrẹ uyota, avwanre “mu ọghọ kẹ oghẹre rẹ ohwo ọtiọye” je vwẹ ẹro ọghanghanre vwo no ekpako nana re wian gangan na.​—Fil 2:29.