Vwẹrokere Emekashe re Fuevun Na

1-2. (a) Idjerhe vọ yen avwanre vwọ fẹnẹ emekashe na? (b) Ẹdia vọ yen avwanre vẹ emekashe na da họhọ ohwohwo?

KERẸ idibo ri Jihova, avwanre hẹ ẹbẹre ọvo rẹ orua rọyen re vwẹ ẹga kẹ, ọnana orua rẹ iniọvo ri nẹ asan sansan rhe vwẹ akpọ na ji te iduduru rẹ emekashe buebun. (Dan. 7:9, 10) E de roro kpahen emekashe, ẹwẹn rẹ avwanre sa dje kpo oborẹ ayen fẹnẹ avwanre wan. Kerẹ udje, emekashe na herọ ọke grongron tavwen a ke rhe ma avwanre. (Job 38:4, 7) Ayen vwo ẹgba vrẹ avwanre shesheri. Emekashe na evwata, ayen fon vrẹ avwanre dibidibi, a cha sa vwẹ avwanre rẹ ihworakpọ re gbaree vwo dje ayeen.—Luk 9:26.

² Jẹ, vwọ vrẹ ofẹnẹ nana, o ji vwo ẹdia sansan rẹ avwanre vẹ ayen da họhọ ohwohwo. Kerẹ udje, avwanre sa vwẹrokere iruemu ri Jihova kerẹ emekashe na. Avwanre vwo ugbomọphẹ kerẹ emekashe. Kerẹ ayen, avwanre vwo edẹ, iruemu kugbe ewian sansan rẹ avwanre ruẹ vwẹ ẹga ri Jihova. Vwọba, kerẹ emekashe na avwanre ji vwo owenvwe ra vwọ vwẹ ẹga kẹ Ọmemama rẹ avwanre.—1 Pita 1:12.

3. Die yen e se yono vwo mie emekashe re fuevun na?

³ Rọ vwọ dianẹ ẹdia sansan yen avwanre vẹ emekashe na da họhọ ohwohwo na, udje rayen sa vwẹ ọbọngan kẹ avwanre je nẹrhẹ avwanre yono erọnvwọn eghanghanre buebun mie ayen. Vwẹ uyono nana, a cha ta ota kpahen obo ra sa vwọ vwẹrokere akoechiro, omaevwokpotọ, ẹguọnọ rayen kpahen ihwo, kugbe owian rẹ ayen wian vwo ruẹ ukoko na fuan.

EMEKASHE NA VWOMAKPOTỌ

4. (a) Idjerhe vọ yen emekashe na vwo dje omaevwokpotọ phia? (b) Diesorọ emekashe na vwọ vwomakpotọ? (Une rẹ Ejiro 89:7)

⁴ Emekashe na vwomakpotọ. Dede nẹ ayen vwo ẹgba, aghwanre, je riẹn erọnvwọn buebun, ayen nene odjekẹ ri Jihova. (Une 103:20) Siẹrẹ ayen da wiowian ra vwọ kẹ ayen, ayen vwẹ oborẹ ayen ruru vwọ yan oma yẹrẹ djephia nẹ ayen me vwo ẹgbaa. Ayen ruẹ ọhọre rẹ Ọghẹnẹ vẹ omavwerhovwẹn dede nẹ e vughe odẹ rayeen.a (Jẹn. 32:24, 29; 2 Ivie 19:35) Ayen rhọnvwa nẹ a vwẹ ujiri ro fo kẹ Jihova vwọ kẹ ayeen. Diesorọ emekashe na vwọ vwomakpotọ mamọ? Kidie ayen vwo ẹguọnọ ri Jihova, kẹ ayen ji muọghọ ro kodori vwọ kẹ.—Se Une rẹ Ejiro 89:7.

5. Idjerhe vọ yen amakashe ọvo vwo dje omaevwokpotọ phia ọke rọ vwọ vwẹ ọkpọvi vwọ kẹ ọyinkọn Jọn? (Ni uhoho na.)

⁵ Jẹ e roro kpahen orọnvwọn ọvo rọ phiare ro djerephia nẹ emekashe na vwomakpotọ. Vwẹ omarẹ 96 C.E., amakashe ọvo ra riẹn odẹ rọyeen de dje emramrẹ ro gbe unu vwọ kẹ ọyinkọn Jọn. (Ẹvwo. 1:1) Die yen Jọn ruru rọ vwọ mrẹ emramrẹ na? Ọ da nuẹ uyovwin kpotọ kẹ amakashe na rọ vwọ vwẹ ẹga kẹ. Ẹkẹvuọvo, amakashe na de brokpakpa da obọ ji, tanẹ: “Jomaotọ! Wo ruẹ ọtiọye-en! Mẹvwẹ jẹ odibo kirobo rẹ owẹ vẹ iniọvo wẹn . . . hepha. Ga Ọghẹnẹ!” (Ẹvwo. 19:10) Amakashe na vwomakpotọ dẹn! Amakashe na guọnọre nẹ a vwẹ ujiri yẹrẹ ọghọ vwọ kẹ ọyeen. Ọtiọyena, o de brokpakpa vuẹ Jọn nẹ ọ vwẹ ẹga kẹ Jihova Ọghẹnẹ. Vwẹ ọke vuọvo na, amakashe na vwẹ ẹro okueku vwo ni Jọn yẹrẹ no nẹ ọyen yovwin nọọ. Dede nẹ amakashe na ga Jihova ọke grongron re, o ki rhe vwo ẹgba nẹ Jọn, ọ vwomakpotọ vuẹ nẹ mẹvwẹ odibo kerẹ owẹ. Ọ vwọ tobọ vwẹ ọkpọvi vwọ kẹ Jọn, ọ van kuoo. Ukperẹ ọtiọyen, ọ ta ota kẹ bọrọbọrọ. Ọ sa dianẹ amakashe na mrẹvughe nẹ Jọn nuẹ uyovwin kpotọ kẹ ọyen fikirẹ oshọ rẹ obo rọ mrẹre na.

6. Mavọ yen avwanre sa vwọ vwẹrokere omaevwokpotọ rẹ emekashe na?

⁶ Mavọ yen a sa vwọ vwẹrokere omaevwokpotọ rẹ emekashe na? Kerẹ emekashe na, avwanre vwẹ oborẹ avwanre ruẹ vwọ yan oma yẹrẹ vwẹ ujiri kẹ oma rẹ avwanree. (1 Kọr 4:7) Vwọba, ọ da dianẹ e vwo uphẹn rẹ ẹga yẹrẹ ga Jihova ọke grongron cha re, e jẹ e no nẹ avwanre yovwin nọ ihwo efaa. Vwọrẹ uyota, kọke kọke avwanre de vwo owian vwẹ ẹga ri Jihova, yen o de fo nẹ avwanre vwomakpotọ phiyọ. (Luk 9:48) Kerẹ emekashe na, avwanre guọnọ ga ihwo efa, jẹ avwanre guọnọre nẹ ihwo efa ni avwanre gegeregee.

7. Mavọ yen avwanre se vwo djephia nẹ avwanre ihwo re vwomakpotọ siẹrẹ a da vwẹ ọkpọvi vwọphia?

⁷ E se djephia nẹ avwanre ihwo re vwomakpotọ a da vwẹ ọkpọvi yẹrẹ ọghwọku vwọ kẹ ohwo, ọ sa dia oniọvo yẹrẹ ọmọ rẹ avwanre. A da vwẹ ọkpọvi vwọ kẹ ohwo, e jẹ a jẹ ame unu ta otaa. Kerẹ amakashe rọ vwẹ ọkpọvi kẹ Jọn, ofori nẹ avwanre ta ota bọrọbọrọ rere ohwo ra ta ota kẹ na vwo jẹ oma rọyen e no kueku. Siẹrẹ avwanre de no nẹ avwanre yovwin nẹ ihwo efaa, ka sa vwẹ odjekẹ ro nẹ Baibol rhe vwọphia vwẹ idjerhe rẹ ọghọ vẹ ẹguọnọ.—Kọl. 4:6.

EMEKASHE NA VWO ẸGUỌNỌ RẸ IHWO

8. (a) Vwo nene obo rehẹ Luk 15:10, idjerhe vọ yen emekashe na vwo djephia nẹ ayen vwo ẹguọnọ rẹ ihwo? (b) Mavọ yen emekashe na vwọ cha avwanre uko vwẹ iruo rẹ aghwoghwo na? (Ni uhoho rọhẹ na.)

⁸ Emekashe na vwẹ ẹro okueku vwo nẹ ihworakpọ, yẹrẹ kpairoro vrẹ ayeen. Ayen vwo ẹguọnọ rẹ ihwo. Oma vwerhen ayen siẹrẹ orumwemwu de kurhẹriẹ—kọyen, siẹrẹ ogodẹ ro bo ghwru de rhivwin bru Jihova rhe yẹrẹ ohwo de brorhiẹn ro vwo ru ewene vwẹ akpeyeren rọyen je rhe vwẹ ẹga kẹ Jihova. (Se Luk 15:10.) Emekashe na ji biẹcha iruo rẹ aghwoghwo na. (Ẹvwo. 14:6) Dede nẹ ayen ghwoghwo ota kẹ ihwo phiọguun, ayen se sun avwanre vwo bru ohwo rọ guọnọ yono kpahen Jihova ra. Vwọrẹ uyota, avwanre cha sa ta vẹ imuẹro nẹ emekashe na sun avwanre bru ohwo ọvo raa. Kidie Jihova sa vwẹ ẹwẹn ọfuanfon rọyen vẹ idjerhe efa vwọ vwẹ ukẹcha kẹ ihwo yẹrẹ sun idibo rọyen. (Iruo 16:6, 7) Dedena, ọ reyọ emekashe na vwọ cha avwanre uko mamọ vwẹ iruo rẹ aghwoghwo na. Ọtiọyena avwanre de vwobọ vwẹ iruo rẹ aghwoghwo na, e se vwo imuẹro nẹ emekashe na cha vwẹ ukẹcha kẹ avwanre.—Ni ekpeti na “A Kpahenphiyọ Ẹrhovwo Rayen.”b

9. Mavọ yen avwanre sa vwọ vwẹrokere emekashe na vwo dje ẹguọnọ kẹ ihwo?

⁹ Mavọ yen avwanre sa vwọ vwẹrokere emekashe na vwo dje ẹguọnọ kẹ ihwo? Avwanre sa ghọghọ kirobo rẹ emekashe na ruẹ siẹrẹ e de ghwoghwo nẹ a rhoma reyọ oniọvo ọvo rhivwin. E se bru oniọvo na ra ji dede vwo djephia nẹ avwanre vwo ẹguọnọ rọyen. (Luk 15:4-7; 2 Kọr. 2:6-8) Avwanre sa vwẹrokere emekashe na vwo ru oborẹ avwanre se ru eje vwẹ iruo rẹ aghwoghwo na. (Aghwo. 11:6) Kirobo rẹ emekashe na vwẹ ukẹcha kẹ avwanre vwo ghwoghwo iyẹnrẹn esiri na, avwanre je sa gbẹn idjerhe sansan vwọ cha iniọvo avwanre uko vwẹ iruo rẹ aghwoghwo rayen. Kerẹ udje, avwanre se nene oghwoghwota rọ je tẹn onaa wiankugbe vwẹ iruo rẹ aghwoghwo na? Avwanre sa vwẹ ukẹcha kẹ iniọvo re kpakore yẹrẹ e rẹ oma rayen ghwa gan tee vwo vwobọ vwẹ iruo rẹ aghwoghwo na?

10. Die yen e se yono vwo nẹ udje ri Sara?

¹⁰ Kẹ, ọ da rha dianẹ ẹdia rẹ avwanre rha sa nẹrhẹ e ru oborẹ avwanre guọnọ ru te vwẹ ẹga ri Jihovaa vwo? A sa gbẹn idjerhe sansan ra vẹ emekashe na vwọ wian kugbe vwẹ iruo rẹ aghwoghwo na. Roro kpahen udje rẹ oniọvo aye re se Sara,c vwẹ India. Rọ vwọ ga kerẹ ọkobaro vwẹ omarẹ ẹgbukpe 20 re, o de rhi she ro ọga rọ nẹrhẹ o gbi se vrẹn nẹ ehwaa. Ọnana da rhe nẹrhẹ ofu dje hwe. Ẹkẹvuọvo, womarẹ ukẹcha rẹ iniọvo na kugbe isese ri Baibol rẹ ọkieje ro ruẹ, ọ da rhoma rhi vwo aghọghọ. Ọtiọyena, ọ da gbẹn idjerhe ọfa ro vwo ruiruo rẹ aghwoghwo na. Rọ vwọ dianẹ o rhe se vrẹn chidia ro de si iletaa na, aghwoghwo rẹ ifonu ọvo kọyen o ruẹ. Ọtiọyena, ko se ihwo ro nene ta ota ri Baibol na kuẹgbe vwẹ ifonu, ayen me je vuẹ kpahen ihwo efa ri vwo omavwerhovwẹn kpahen uyono ri Baibol. Die kọyen rhe phia? Emeranvwe evo vwọ wan nu, o de rhi vwo iyono ri Baibol ri te 70, re dia obo rọ cha sa yanmuu! Ọtiọyena, ọ da vwẹ evo kẹ iniọvo rẹ ukoko na nẹ i yono ayen. Buebun rẹ ihwo rọ vwẹ Baibol yono cha uyono asaọkiephana. Mavọ yen oma cha vwerhen emekashe na te rẹ ayen vẹ iniọvo re davwẹngba rayen eje kerẹ Sara, vwọ wian kuẹgbe vwẹ iruo rẹ aghwoghwo na!

EMEKASHE NA DJE AKOECHIRO PHIA

11. Idjerhe vọ yen emekashe na vwo dje uvi rẹ akoechiro phia?

¹¹ Emekashe na, ayen uvi rẹ udje rẹ akoechiro. Vwẹ ikpe uriorin buebun re wanre na, yen ayen vwo chirakon rẹ umwemwu vẹ oshenyẹ cha. Ayen mrẹ Eshu kugbe emekashe buebun rẹ ayen vẹ ayen gba ga Jihova jovwo ri gbe vwọsuọ. (Jẹn. 3:1; 6:1, 2; Jud 6) Baibol na tare nẹ amakashe ọvo rọ fuevun nene amakashe rẹ Idẹbono ọvo ro vwo ẹgba họnre ẹdẹ buebun. (Dan. 10:13) Vwẹ ikuegbe rẹ ihworakpọ eje, imihwo krẹn yen emekashe na mrẹ re vwẹ ẹga kẹ Jihova. Dedena, emekashe nana re fuevun na ga Jihova ọkieje vẹ aghọghọ. Ayen riẹnre nẹ Ọghẹnẹ che si oshenyẹ eje no.

12. Die yen sa vwẹ ukẹcha kẹ avwanre vwo chirakon?

¹² Mavọ yen a sa vwọ vwẹrokere akoechiro rẹ emekashe na? Kerẹ emekashe na, avwanre se hirharoku omukpahen yẹrẹ oshenyẹ. Jẹ, avwanre vwo imuẹro nẹ Ọghẹnẹ che si umwemwu eje no vwẹ ọke ro fori. Kerẹ emekashe na, ‘oma rẹ emu esiri eruo je rhọ avwanree.’ (Gal. 6:9) Ọghẹnẹ veri nẹ ọ cha vwẹ ukẹcha kẹ avwanre vwo chirakon. (1 Kọr. 10:13) A sa rẹ Jihova nẹ ọ cha avwanre uko vẹ ẹwẹn ọfuanfon rọyen, rọ cha nẹrhẹ avwanre vwo edirin vẹ aghọghọ. (Gal. 5:22; Kọl. 1:11) Kẹ wo de rhe hirharoku omukpahen vwo? Wo jẹ oshọ mu wee, vwẹroso Jihova kakare. Jihova che bicha wẹ ọkieje je vwẹ ọbọngan kẹ wẹ.—Hib. 13:6.

EMEKASHE NA RUẸ UKOKO NA FUAN ỌKIEJE

13. Owian ọghanghanre vọ yen a vwọ kẹ emekashe na nẹ ayen ru vwẹ ọke rẹ oba na? (Matiu 13:47-49)

¹³ Vwẹ ọke rẹ oba na, Jihova vwẹ owian ọghanghanre vwọ kẹ emekashe na nẹ ayen ru. (Se Matiu 13:47-49.) Ihwo buebun vwẹ asan sansan vwẹ akpọ na vwẹ omavwerhovwẹn kpahen iruo rẹ aghwoghwo na. Evo vwẹ usun rẹ ihwo nana ruẹ ewene vwẹ akpeyeren rayen rere ayen sa vwọ vwẹ ẹga kẹ Jihova vwẹ idjerhe rọ guọnọre jẹ efa rhọnvwe ru ọtiọyeen. Emekashe na vwo owian rẹ ayen vwọ “hẹriẹ irumwemwu na vwo nẹ ohri rẹ evwata na.” Kọyen ayen cha sẹro rẹ ẹfuọn rẹ ukoko na. Ọ dia ọnana mudiaphiyọ nẹ kohwo kohwo rọ dobọ rẹ ẹga rọ vwọ kẹ Jihova ji rhe che se rhivwin rhee; yẹrẹ ko mudiaphiyọ nẹ ebẹnbẹn cha kanre ukoko naa. Dedena, e jẹ o mu avwanre ẹro nẹ emekashe na wian gangan rẹ ayen vwo ru ikoko na fon.

14-15. Mavọ yen avwanre sa vwọ vwẹrokere emekashe ri vwo ọdavwẹ rẹ orufon rẹ ukoko na? (Ni ihoho na.)

¹⁴ Mavọ yen avwanre sa vwọ vwẹrokere emekashe ri vwo ọdavwẹ rẹ orufon rẹ ukoko na? Ọyen re vwo ruẹ ẹkẹn ro te avwanre vwẹ orufon rẹ ukoko na vwọrẹ ẹwẹn vẹ ugboma. E se ru ọtiọyen siẹrẹ a da sẹro rẹ ubiudu rẹ avwanre womarẹ e vwo mu omamọ rẹ igbeyan je kẹnoma kẹ kemu kemu ro se miovwo avwanre. (Une 101:3) Avwanre je sa vwẹ ukẹcha kẹ iniọvo rẹ avwanre vwọ fuevun kẹ Jihova ọkieje. Kerẹ udje, oniọvo avwanre de ru umwemwu ọgangan, die yen ofori nẹ avwanre ru? Fikirẹ ẹguọnọ rẹ avwanre vwo kpahọn, a cha vuẹ nẹ o bru ekpako na ra. Ọ rha rhọnvwee, avwanre cha vuẹ ekpako na kpahọn, kidie avwanre guọnọre nẹ oniọvo avwanre ro miovwo oyerinkugbe rọyen vẹ Jihova na mrẹ ukẹcha kpakpata!—Jems 5:14, 15.

¹⁵ Ọ da ohwo mamọ nẹ, e si ihwo evo ri ru imwemwu egangan nẹ ukoko na. Ọnana da phia, avwanre vẹ ihwo tiọyena rhe ‘ruẹ kuẹgbee.’d (1 Kọr. 5:9-13) Ọrhuẹrẹphiyotọ nana nẹrhẹ e ruẹ ukoko na fuan. Vwọba, a da kẹnoma kẹ ihwo re si nẹ ukoko na, jẹ e dje uruemu esiri kẹ ayen. Avwanre vẹ ayen rhe ruẹ kuẹgbee, ọnana sa nẹrhẹ ayen mrẹ oruchọ rayen na vughe ji rhivwin bru Jihova rhe. Ayen de ru ọtiọyen, avwanre, Jihova vẹ emekashe na ki se dede ayen vẹ aghọghọ.—Luk 15:7.

16. Idjerhe vọ yen avwanre sa vwọ davwẹngba vwọ vwẹrokere emekashe na?

¹⁶ Ọghọ rode yen Jihova bru phiyọ avwanre oma re vwo yono kpahen emekashe na ra vẹ ayen je vwọ wian kugbe! E jẹ avwanre vwẹrokere omamọ iruemu rayen kerẹ: omaevwokpotọ, ẹguọnọ rẹ ayen vwo kpahen ihwo, akoechiro rayen, kugbe ọdavwẹ rẹ ayen vwori rẹ ayen vwo ru ukoko na fon. Avwanre da vwẹrokere emekashe re fuevun na, avwanre je sa dia usun rẹ orua ri Jihova re vwẹ ẹga kẹ bẹdi bẹdẹ.