Dotoronomio

7 “Musi Yehova Mudzimu waṋu a tshi ḓo ni swikisa kha shango ḽine na ya khaḽo, ḽa vha ḽaṋu,+ u ḓo dovha a pandela tshaka khulwane dzi re phanḓa haṋu,+ Vhahethe, Vhagirigasi, Vhaamori,+ Vhakanana, Vhapheresi, Vhahevi na Vhayebusi,+ dzine dza vha tshaka khulwane dza sumbe na dzi re na maanḓa u ni fhira.+ 2 Yehova Mudzimu waṋu u ḓo dzi kumedzela zwanḓani zwaṋu, na dzi kunda.+ Ni ite vhungoho ha uri ni a dzi fhelisa.+ A no ngo tea u vhofha mulanga nadzo kana u dzi takalela.+ 3 A no ngo tea u vhingelana na dzenedzo tshaka. Ni songo tenda vharwa vhavho vha tshi vhinga vhananyana vhaṋu kana vharwa vhaṋu vha tshi vhinga vhananyana vhavho.+ 4 Vha ḓo khelusa vhana vhaṋu vha si tsha ntshumela vha shumela miṅwe midzimu;+ nga zwenezwo Yehova a ni sinyutshela, a ni fhelisa nga u ṱavhanya.+

5 “Zwine na fanela u vha ita ndi hezwi: Ni thuthe aḽeṱare dzavho, phuphu dzavho khethwa ni dzi phusukanye,+ na thanda dzavho khethwa*+ ni dzi reme ni fhise zwifanyiso zwavho zwo vhaḓwaho.+ 6 Ni vhathu vhakhethwa kha Yehova Mudzimu waṋu, Yehova Mudzimu waṋu o ni nanga uri ni vhe vhathu vhawe vho khetheaho kha vhathu vhoṱhe vha re kha ḽifhasi.+

7 “Musi Yehova a tshi ni funa na u ni nanga,+ ho vha hu si nga nṱhani ha uri ni vhanzhi, ngauri no vha ni vhaṱukusa kha vhathu vhoṱhe.+ 8 Nṱhani hazwo, ho vha hu nga nṱhani ha uri Yehova u a ni funa na uri o fhulufhedzea a ita zwe a anela vhomakhulukuku waṋu,+ zwe zwa ita uri Yehova a ni bvise nga tshanḓa tsha ma⁠anḓa, a ni rengulule nḓuni ya vhupuli+ zwanḓani zwa Farao khosi ya Egipita. 9 Ni a zwi ḓivha zwavhuḓi uri Yehova Mudzimu waṋu ndi Mudzimu wa ngoho, Mudzimu a fhulufhedzeaho, ane a sa pfuke mulanga wawe na ane a sumbedza lufuno lu sa shanduki u vhuya u swika kha mirafho ya tshigidi ya vhane vha mu funa, vha tevhedza ndaela dzawe.+ 10 Fhedzi vhane vha mu vhenga u ḓo vha lifhedza nga u vha fhelisa.+ A nga si lenge u lifhedza vhane vha mu vhenga; u ḓo vha lifhedza. 11 Nga zwenezwo, ni ite vhungoho ha uri ni a tevhedza ndaela na maitele na mahaṱulele zwine nda khou ni ṋea zwone ṋamusi.

12 “Arali na bvela phanḓa ni tshi thetshelesa enea mahaṱulele ni tshi a tevhedza, Yehova Mudzimu waṋu u ḓo fhulufhedzea kha mulanga na u sumbedza lufuno lu sa shanduki samusi o anela vhomakhulukuku waṋu. 13 U ḓo ni funa na u ni fhaṱutshedza a ni andisa. U ḓo ni fhaṱutshedza nga vhana vhanzhi,+ na zwibveledzwa zwa mavuni aṋu, goroi yaṋu, waini yaṋu ntswa, mapfura aṋu,+ ṋamana dza kholomo dzaṋu na ngwana dza nngu dzaṋu kha shango ḽe a anela vhomakhulukuku waṋu uri u ḓo vha ṋea ḽone.+ 14 Ni ḓo vha vhathu vho fhaṱutshedzwaho kha vhathu vhoṱhe;+ a hu nga vhi na munna kana mufumakadzi ane a sa ḓo vha na ṅwana kana zwifuwo zwine zwa sa ḓo dzwala.+ 15 Yehova u ḓo thivhela malwadze oṱhe, ha nga ḓo ni ḓisela malwadze a ofhisaho ane na a ḓivha a ngei Egipita.+ Nṱhani hazwo, u ḓo a ḓisela vhoṱhe vhane vha ni vhenga. 16 Ni tea u fhelisa vhathu vhoṱhe vhe Yehova Mudzimu waṋu a ni kumedzela vhone.+ Ni songo vha pfela vhuṱungu,+ a no ngo tea u shumela midzimu yavho,+ ngauri zwenezwo zwi ḓo vha tshikwekwe kha inwi.+

17 “Arali na amba mbiluni dzaṋu na ri: ‘Hedzi tshaka dzo ḓala u ri fhira. Ri nga kona hani u dzi pandela?’+ 18 a no ngo tea u dzi ofha.+ Ni ḓihumbudze zwe Yehova Mudzimu waṋu a zwi ita Farao na Egipita ḽoṱhe,+ 19 khaṱhulo khulwane ye na i vhona, zwiga na vhuṱolo+ na tshanḓa tsha maanḓa tshe Yehova Mudzimu waṋu a ni bvisa ngatsho.+ Ndi zwine Yehova Mudzimu waṋu a ḓo zwi ita kha vhathu vhoṱhe vhane na vha ofha.+ 20 Yehova Mudzimu waṋu u ḓo ita uri vha kulee nungo,* u swika hu tshi fheliswa vho salaho+ na vho dzumbamaho. 21 Ni songo vha ofha ngauri Yehova Mudzimu waṋu u na inwi,+ Mudzimu muhulwane na a ofhisaho.+

22 “Yehova Mudzimu waṋu u ḓo pandela dzenedzi tshaka phanḓa haṋu nga zwiṱuku nga zwiṱuku.+ A ni nga tendelwi uri ni dzi fhelise nga u ṱavhanya, uri phukha dzi sa ḓo anda dza ni huvhadza. 23 Yehova Mudzimu waṋu u ḓo vha kumedzela zwanḓani zwaṋu a vha fhelisa.+ 24 U ḓo kumedzela mahosi avho zwanḓani zwaṋu,+ ni fhelise madzina avho kha ḽifhasi.+ A hu na muthu ane a ḓo ni thivhela,+ u swika ni tshi a fhelisa.+ 25 Ni fhise nga mulilo zwifanyiso zwo vhaḓwaho zwa midzimu yavho.+ Ni songo tama siḽiva na musuku zwi re khazwo kana na zwi dzhia+ uri ni sa ḓo fashwa ngazwo, ngauri ndi zwithu zwi nengisaho kha Yehova Mudzimu waṋu.+ 26 Ni songo ḓisa zwithu zwi nengisaho nḓuni dzaṋu uri ni sa ḓo fheliswa u fana nazwo. Ni zwi nengwe tshoṱhe, ngauri ndi zwithu zwine zwa fanela u fheliswa.