Ndima Ya Vhuvhili
Maipfi A Phumudzo A Vhuporofita Ane A Ni Kwama
1. Ndi ngani ri tshi fanela u vha na dzangalelo kha vhuporofita ha Yesaya?
YESAYA o ṅwala bugu ine ya vhidzwa nga dzina ḽawe miṅwaha i ṱoḓaho vha 3 000 yo fhiraho, fhedzi ndi ya ndeme vhukuma kha riṋe ṋamusi. Ri nga guda milayo ya ndeme kha zwiitea zwa ḓivhazwakale zwe a zwi ṅwala. Nahone ri nga fhaṱa lutendo lwashu nga u guda vhuporofita he a vhu ṅwala nga dzina ḽa Yehova. Ee, Yesaya o vha e muporofita wa Mudzimu a tshilaho. Yehova o mu hevhedza uri a ṅwale ḓivhazwakale hu tshee nga phanḓa—uri a ṱaluse zwiitea zwi sa athu itea. Nga zwenezwo Yehova o sumbedza uri a nga amba vhumatshelo hu tshee nga phanḓa nahone a vhu langa. Musi Vhakriste vha ngoho vho no guda bugu ya Yesaya, vha tenda uri Yehova u ḓo ḓadzisa zwe a zwi fulufhedzisa.
2. Ho vha vhu vhufhio vhuimo ngei Yerusalema musi Yesaya a tshi ṅwala bugu yawe ya vhuporofita, nahone ho vha hu tshi ḓo vha na tshanduko ifhio?
2 Musi Yesaya a tshi fhedza u ṅwala vhuporofita hawe, muḓi wa Yerusalema wo vha u tshi kha ḓi tou bva u ponyoka mvutshelo ya Asuri. Thembele yo vha i tshi kha ḓi vha hone, nahone vhathu vho vha vha tshi khou bvela phanḓa na mishumo ya ḓuvha ḽiṅwe na ḽiṅwe, nga nḓila ye vha vha vha tshi zwi ita ngayo maḓanani a miṅwaha. Naho zwo ralo, honoho vhuimo ho vha vhu tshi ḓo shanduka. Ho vha hu tshi ḓo ḓa tshifhinga tshine lupfumo lwa mahosi a Vhayuda lwa dzhiiwa lwa iswa Babele nahone vhaswa vha Vhayuda vha vha vhakoma muḓini wonoyo.a (Yesaya 39:6, 7) Hezwi zwo itea nga murahu ha miṅwaha i fhiraho 100.—2 Dzikhosi 24:12-17; Daniele 1:19.
3. Ndi mulaedza ufhio une wa wanala kha Yesaya ndima ya 41?
3 Naho zwo ralo, mulaedza wa Mudzimu we a u fhirisa nga Yesaya a si mulaedza wa khombo fhedzi. Yes Ndima ya 40 ya yeneyi bugu i thoma nga ipfi “Fhumudzani.”b Vhayuda vho vha vha tshi ḓo fhumudzwa nga khwaṱhisedzo ya uri vhone kana vhana vhavho vho vha vha tshi ḓo kona u vhuyelela shangohaya ḽavho. Yes Ndima ya 41 i bvela phanḓa na mulaedza wa phumudzo nahone i dzula yo amba uri Yehova u ḓo vusa khosi ya maanḓa uri i ḓadzise zwi funwaho nga Mudzimu. I na khwaṱhisedzo nahone i ṋea ṱhuṱhuwedzo ya u fulufhela Mudzimu. I dovha ya bvukulula uri midzimu ya mazwifhi ine vhathu vha dzitshaka vha i fulufhela, a i na maanḓa. Kha zwenezwi zwoṱhe, hu na zwinzhi zwine zwa khwaṱhisa lutendo, misini ya Yesaya na yashu.
Yehova U Itela Dzitshaka Khaedu
4. Yehova u itela dzitshaka khaedu nga maipfi afhio?
4 Yehova nga muporofita wawe u ri: “Hee inwi zwiṱangadzime, fhumulani phanḓa hanga; dzitshakha nga dzi wane maanḓa maswa dzi sendele, ri kone u rovhedzana ri senge.” (Yesaya 41:1) Nga enea maipfi, Yehova u itela khaedu tshaka dzine dza pikisa vhathu vhawe. Kha dzi ime phanḓa hawe nahone dzi ḓiimisele u amba! Samusi ri tshi ḓo zwi vhona nga murahu, u fana na muhaṱuli khothe, Yehova u ṱoḓa uri dzenedzi tshaka dzi ṋee vhuṱanzi ha uri zwifanyiso zwadzo ndi midzimu ngangoho. Naa yeneyi midzimu i nga amba hu tshee nga phanḓa mishumo ya u tshidzwa ya vhashumeli vhayo kana nḓila ine maswina avho a ḓo haṱulwa? Arali zwo ralo, naa dzi nga kona u ḓadzisa vhuporofita ho raloho? Phindulo ndi hai. Ndi Yehova fhedzi ane a nga ita zwenezwo zwithu.
5. Ṱalutshedzani nḓila ye vhuporofita ha Yesaya ha ḓadzea ngayo lu fhiraho luthihi.
5 Musi ri tshi ṱolisisa vhuporofita ha Yesaya, kha ri humbule uri maipfi awe, u fana na vhuporofita vhunzhi ha Bivhili, a ḓadzea nga nḓila nnzhi. Nga 607 B.C.E., lushaka lwa Yuda lu ḓo ya vhuthubwani ngei Babele. Naho zwo ralo, vhuporofita ha Yesaya vhu dzumbulula uri Yehova u ḓo vhofholola Vhaisiraele vhe vha vha vhe vhuthubwani muḓini wonoyo. Hezwi zwi itea nga 537 B.C.E. Honoho u vhofhololwa ho vha hu tshi fana na he ha vha hone mathomoni a ḓana ḽa vhu-20 ḽa miṅwaha. Tshifhingani tsha nndwa ya shango ya u thoma, vhashumeli vha Yehova vho ḓodzwaho kha ḽifhasi vho sedzana na ḽifhinga ḽa maṱungu. Nga 1918 mutsiko u bvaho kha shango ḽa Sathane—u tshi ṱuṱuwedzwa nga ḽa Vhudzhagane sa tshipiḓa tshihulwane tsha Babele Ḽihulu—wo ita uri mushumo wa u huwelela mafhungo maḓifha u ime. (Ndzumbululo 11:5-10) Vhaṅwe vharangaphanḓa vha re na vhuḓifhinduleli vha Watch Tower Society vho iswa khothoni nga milandu ye vha tou pomokedzwa. U ya nga maano na ndivho dzoṱhe, zwo vhonala u nga shango ḽo kunda kha u lwa haḽo na vhashumeli vha Mudzimu. Nga zwenezwo, samusi zwo itea kale nga 537 B.C.E., Yehova o ita uri vha vhofhololwe zwi songo lavhelelwa. Nga 1919 vhenevho vharangaphanḓa vhe vha vha vho valelwa khothoni vha vhofhololwa, nahone milandu ye vha vha vho pomokwa yone ya phumulwa. Buthano ḽa ngei Cedar Point, Ohio, nga September 1919 ḽo khwaṱhisa vhashumeli vha Yehova uri vha bvele phanḓa na u huwelela mafhungo maḓifha a Muvhuso. (Ndzumbululo 11:11, 12) U bva tsheetsho u swika zwino, mushumo wa u huwelela wo bvela phanḓa nga nḓila i swayeaho. Zwiṅwe hafhu, vhunzhi ha maipfi a Yesaya a ḓo ḓadzea nga nḓila i mangadzaho kha ḽifhasi ḽa Paradiso ine ya khou ḓa. Nga zwenezwo, maipfi a kale a Yesaya a kwama tshaka dzoṱhe na vhathu vhoṱhe ṋamusi.
Hu Vhidzwa Muvhofhololi
6. Muporofita u ṱalusa hani mukundi wa tshifhingani tshi ḓaho?
6 A tshi shumisa Yesaya, Yehova u amba hu tshee nga phanḓa mukundi ane a ḓo tshidza vhathu vha Mudzimu Babele na u haṱula maswina avho. Yehova u a vhudzisa: “Ndi nnyi we a vusa uyo a bvaho Vhubvaḓuvha, ane milenzhe yawe ya ṱangana na zwivhuya [“u luga,” NW]? Ndi nnyi we a mu kumedzela dzitshakha, a kunda mahosi; pfumo ḽawe ḽa a ita buse, vhurá hawe ha a ita mungu u balanganaho? A a tovhola, a fhira ó takala, á sa dovhi a ḓa nga gondo ḽe a kanda? Ndi nnyi we a ita zwenezwo a zwi shuma? Ndi Uyo we a vhidza mirafho u rangani. Ndi Nṋe Yehova Murangi; na kha vha ḓaho ndi kha ḓi ḓo vha Onoyo.”—Yesaya 41:2-4.
7. Ndi ufhio mukundi ane a khou ḓa, nahone u khunyeledza mini?
7 Ndi nnyi ane a ḓo vuswa vhubvaḓuvha, zwipiḓani zwa hune ḓuvha ḽa ṱavha hone? Mashango a Meda na Peresia na Elamu a wanala vhubvaḓuvha ha Babele. Korese wa Muperesia u matsha a tshi bva henefho na mmbi dzawe dza maanḓa. (Yesaya 41:25; 44:28; 45:1-4, 13; 46:11) Naho Korese e si mugwadameli wa Yehova, u ita zwithu u tendelana na zwi funwaho nga Yehova, Mudzimu o lugaho. Korese u kunda mahosi, nahone a a balanganya u fana na buse phanḓa hawe. E kha fulo ḽa u ṱoḓa u kunda, u fhira o “takala,” kana o tsireledzea, magondoni a sa anzeli u shumiswa, a tshi kunda zwithivheli zwoṱhe. Nga ṅwaha wa 539 B.C.E., Korese u swika muḓini muhulwane wa Babele nahone a u kunda. Nga ṅwambo wa zwenezwo, vhathu vha Mudzimu vha a vhofhololwa, u itela uri vha vhuyelele Yerusalema u itela u vusulusa vhurabeli ha ngoho.c—Esera 1:1-7.
8. Ndi mini zwine zwa nga itwa nga Yehova fhedzi?
8 Nga zwenezwo, a tshi shumisa Yesaya, Yehova u dzula o amba nga ha u vhusa ha Korese nga phanḓa vhukuma yeneyo khosi i sa athu bebwa. Ndi Mudzimu wa ngoho fhedzi ane a nga porofita nga ho teaho zwithu zwo raloho. Yehova ndi muhulwane kha midzimu ya mazwifhi ya dzitshaka. Nga tshiitisi tshi pfalaho, Yehova u ri: “U khoḓwa hanga a thi hu ṋei muṅwe.” Ndi Yehova fhedzi ane a nga amba zwo fanela uri: “Ndi Nṋe Ṱhanzi, ndi Nṋe Phedzi, a huna Mudzimu á sa vha Nṋe.”—Yesaya 42:8; 44:6, 7.
Vhathu Vho Tshenuwaho Vha Fulufhela Zwifanyiso
9-11. Tshaka dzi aravha hani kha u ḓa ha Korese?
9 Zwino Yesaya u ṱalusa nḓila ine tshaka dza ḓo aravha ngayo onoyu mukundi ane a ḓo ḓa: “Zwiṱangadzime zwi a zwi vhona zwa ofha; shango ḽi dzinginyea hune ḽa guma; vha khou ḓa, vha sendela tsini. Vho farisana nga tshavho, vha vhudzana vha ri: Konḓelela! Muvhaḓi a farisa mufuli, wa nundo a farisa mukulutedzi; vha tshi amba zwe vha ṱanganya vha ri: Zwo naka! Vha mbo khokhomedza nga dzimbambo uri zwi si we.”—Yesaya 41:5-7.
10 Yehova u sedzulusa vhuimo ha shango nga u sedza miṅwaha i ṱoḓaho u vha 200 hu tshee nga phanḓa. Mmbi dza maanḓa dza Korese dzi ḓa dzo tou vhilula, dza kunda vhoṱhe vhane vha pikisa. Vhathu—na vhadzulapo vha zwiṱangadzimeni, vha re mashango-ḓavha—vha a tetemela musi a tshi ḓa. Vha kuvhangana vhoṱhe nga nyofho u itela u pikisa we Yehova a mu vhidza a tshi bva vhubvaḓuvha uri a haṱule. Vha lingedza u ṱuṱuwedzana, vha tshi ri: “Konḓelela!”
11 Vhavhaḓi vha a shumisana musi vha tshi vhaḓa midzimu ya zwifanyiso ine ya ḓo vhofholola vhathu. Muvhaḓi u ita muhanga wa thanda, nga zwenezwo a ṱuṱuwedza mufuli wa musuku uri a tshi mometshedze tsimbi, khamusi musuku. Mukoredzeli u kulutedza tsimbi ye a i fula nahone a tenda uri i ṱanganywe nga tshipaṱekanya tsimbi. Khamusi ndi u hoya musi hu tshi bulwa uri i khokhomedzwa nga dzimbambo uri i sa dzinginyee kana u wa, u fana na tshifanyiso tsha Dagoni tshe tsha wa phanḓa ha mbulungelo ya Yehova.—1 Samuele 5:4.
Ni Songo Ofha!
12. Ndi khwaṱhisedzo ifhio ine Yehova a i ṋea Vhaisiraele?
12 Zwino Yehova u livhisa ṱhogomelo yawe kha vhathu vhawe. U fhambana na tshaka dzine dza fulufhela zwifanyiso zwi sa tshili, vhane vha fulufhela Mudzimu wa ngoho a vho ngo vhuya vha fanela u ofha. Khwaṱhisedzo ya Yehova i thoma nga khumbudzo ya uri Vhaisiraele ndi vhana vha Abrahamu khonani yawe. Yesaya u vhiga maipfi a Yehova kha tshipiḓa tshine tsha sumbedza vhulenda vhuhulwane: “Zwino iwe Isiraele, Yakobo muḓinḓa wanga we nda mu nanga, mbeu ya Abrahamu khonani yanga! Iwe we nda U dzhia hangei migumoni ya shango, nda U vhidza Ú hangei khuḓani dzaḽo, nda ri: U muḓinḓa wanga; ndi nanga iwe; a thi U laṱi. U songo ofha; ngauri a re na iwe ndi Nṋe. U songo tshenuwa; ngauri Mudzimu wau ndi Nṋe. Ndi ḓo U khwaṱhisa, ndi ḓo U farisa, nda ḓi U tika nga tshanḓa tshanga tshiita-zwivhuya.”—Yesaya 41:8-10.
13. Ndi ngani maipfi a Yehova a tshi ḓo fhumudza Vhayuda vha re vhuthubwani?
13 Enea maipfi a ḓo fhumudza lungafhani Vhayuda vha fulufhedzeaho vha re mathubwa shangoni ḽisili! Zwi ḓo ṱuṱuwedza lungafhani u pfa Yehova a tshi vha vhidza “muḓinḓa wanga” nga tshenetsho tshifhinga musi vhe mathubwa, vhe vhaḓinḓa vha khosi ya Babele! (2 Koronika 36:20) Naho Yehova a tshi ḓo vha ṱarafa nga ṅwambo wa u sa fulufhedzea havho, ha nga vha laṱi. Vhaisiraele ndi vhathu vha Yehova, a si vha Babele. Vhaḓinḓa vha Mudzimu a vha na tshiitisi tsha u tetemela musi hu tshi ḓa Korese a kundaho. Yehova u ḓo vha na vhathu vhawe u itela u vha thusa.
14. Maipfi e Yehova a a vhudza Vhaisiraele a nga ri khuthadza hani ṋamusi?
14 Eneo maipfi o khwaṱhisa vhashumeli vha Mudzimu nahone a vha ṋea nungo u swika misini yashu. Kale nga 1918 vho vha vha tshi ṱulutshelwa u ḓivha zwine Yehova a funa vha tshi zwi ita. Vho vha vha tshi tama u vhofhololwa kha vhuimo havho ha vhuthubwa ha muya. Ṋamusi ri ṱulutshelwa u vhofhololwa kha mitsiko ine ra ḓiselwa nga Sathane, shango na u sa fhelela hashu. Fhedzi ri takalela uri Yehova u ḓivha tshifhinga na nḓila ine a ḓo dzhia ngayo vhukando a tshi itela vhathu vhawe. U fana na vhana, ri farelela tshanḓa tshawe tsha maanḓa, ri na fulufhelo ḽa uri u ḓo ri thusa uri ri sedzane na vhuimo. (Psalme ya 63:7, 8) Yehova u funa vhane vha mu shumela. U a ri tikedza ṋamusi samusi o tikedza vhathu vhawe ḽifhingani ḽi konḓaho ḽa 1918-19 nahone samusi o tikedza Vhaisiraele vha fulufhedzeaho kale-kale.
15, 16. (a) Hu ḓo itea mini nga maswina a Vhaisiraele, nahone Vhaisiraele vha fana na mbungu nga nḓila-ḓe? (b) Ndi ifhio mvutshelo i re tsini ine ya ita uri maipfi a Yehova a vhe a ndeme vhukuma ṋamusi?
15 Ṱhogomelani zwine Yehova a bvela phanḓa u zwi amba a tshi shumisa Yesaya: “Ngangoho vhoṱhe vha u U vutshela vha ḓo shona vha nyadzea, vha ḓo nga mahandana vha lovha, vhenevho vhoṱhe vhe vha lwa na iwe. U ḓe’ U tshi vha ṱoḓa wa si tsha vha wana, vhenevho vhe vha U vhénga; vha ḓo lovha tshoṱhe, vha si tsha vha hone, vhenevho vhadzia-u-lwa-na-iwe. Ngauri Nṋe Yehova ndi Mudzimu wau, ndi khwaṱhisa tshanḓa tshau, ndi U vhudza ndi ri: U songo ofha; a U farisaho ndi Nṋe. U songo ofha, iwe Yakobo, une wa nga kubungu, iwe kugwada kwa Isiraele; a ni farisaho ndi Nṋe! U ralo Yehova. Mulamuleli wau ndi Ene Mukhethwa wa Isiraele.”—Yesaya 41:11-14.
16 Maswina a Vhaisiraele ha nga kundi. Vhane vha sinyutshela Vhaisiraele vha ḓo shona. Vhane vha lwa navho vha ḓo lovha. Naho Vhaisiraele vha re vhuthubwani vha tshi vhonala vhe si na nungo nahone vha songo tsireledzea sa mbungu i tshi khou sombolowa buseni, Yehova u ḓo vha thusa. Zwenezwi zwo vha ṱhuṱhuwedzo yavhuḓi lungafhani tshifhingani tshoṱhe tsha “maḓuvhani a vhufhelo” musi Vhakriste vha ngoho vha tshi vhengwa nga maanḓa nga vhathu vhanzhi vhukuma shangoni! (2 Timotheo 3:1) Nahone fulufhedziso ḽa Yehova ḽi khwaṱhisa lungafhani hu tshi vhonwa mvutshelo ya Sathane i re tsini, ane kha vhuporofita a vhidzwa “Gogo kha ḽa Mágogo”! Nga fhasi ha mvutshelo ya tshiṱuhu ya Gogo, vhathu vha Mudzimu vha ḓo vhonala vha songo tsireledzea u fana na mbungu—vhe vhathu vhane vha “dzula vhá si ná mitsheṱo” nahone vha si na “tswinga na mafhoro!” Naho zwo ralo, vhane vha fulufhela Yehova a vho ngo fanela u tetemela nga nyofho. Ramaanḓaoṱhe nga dzawe u ḓo lwa u itela u vha vhofholola.—Hesekiele 38:2, 11, 14-16, 21-23; 2 Vha-Korinta 1:3.
U Fhumudzwa Ha Vhaisiraele
17, 18. Yesaya u ṱalusa hani u ṋewa maanḓa ha Vhaisiraele, nahone ndi mini zwine ra vha na vhungoho nazwo uri zwi ḓo ḓadzea?
17 Yehova u bvela phanḓa u fhumudza vhathu vhawe: “U ḓivhe zwauri ndi U ita tshifhulo tsha vhuhali, tshiswa tsha miṱoḓo yo khwaṱhaho, wa ḓo fhulekanya dzithavha, wa vhibvisa mivhundu, wa i ita vhunga mungu. U ḓo i uludza, muya u ḓo ṱuwa nayo’, ḓumbu ḽa i balanganya. Á vha iwe, U ḓo fhululedzela Yehova; U ḓo takalela Mukhethwa wa Isiraele.”—Yesaya 41:15, 16.
18 Vhaisiraele vha ḓo ṋewa nungo uri vha dzhie vhukando, nahone vha kunde nga lwa muya, maswina avho ane a nga dzithavha. Musi Vhaisiraele vha tshi vhuya vhuthubwani, vha ḓo kunda maswina avho ane a lingedza u thivhela u fhaṱululwa ha thembele na mitsheṱo ya Yerusalema. (Esera 6:12; Nehemia 6:16) Naho zwo ralo, maipfi a Yehova a ḓo ḓadzea nga nḓila khulwane kha “Isiraele wa Mudzimu.” (Vha-Galata 6:16) Yesu u fulufhedzisa Vhakriste vho ḓodzwaho: “Huno ané a kunda a fara mishumo yanga a swikisa lufuni, ndi ḓo mu fha maanḓa a vhusa dzitshakha. U ḓo vha lisa nga mugo wa tsimbi, u ḓo vha pwashekanya sa midzio ya vumba, vhunga na nṋe ndo fhiwa zwenezwo nga Khotsi-anga.” (Ndzumbululo 2:26, 27) Vhukuma hu ḓo ḓa tshifhinga tshine vharathu vha Kristo vho vuselwaho vhugalani ha ṱaḓulu vha ḓo ṱanganela musi hu tshi lozwiwa maswina a Yehova Mudzimu.—2 Vha-Thesalonika 1:7, 8; Ndzumbululo 20:4, 6.
19, 20. Yesaya u ṅwala mini nga ha u vusuluswa ha Isiraele uri ḽi vhe shango ḽo nakaho, nahone zwenezwi zwi ḓadzea hani?
19 Nga luambo lwa pfanyisedzo, zwino Yehova u khwaṱhisa fulufhedziso ḽawe ḽa u ḓisa muthu ane a ḓo thusa vhathu vhawe. Yesaya u a ṅwala: “Vhaheḓana na vhashai vha ṱoḓaho maḓi, a si vhe hone, vhe ndimi dzavho dza oma nga ḓora, vhenevho, Nṋe Yehova ndi ḓo vha pfa; Nṋe Mudzimu wa Isiraele a thi nga vha laṱedzi. Ndi ḓo phula milambo midavhini ya dzithavha, na zwisima miedzini; soga ndi ḓo ḽi ita isha; ḽo omaho ḽi ḓo vha ḽa ṱhavhela dza maḓi. Sogani ndi ḓo melisa ṱhaululo, na miluwa, na miṱhaḽa, na miṱu na mipfure; midavhini hu ḓo mela miṱongola na mivumo na miṱaululo. Zwi ḓo ralo uri vha vhone, vha ḓivhe, vha elekanye, vha ṱalukanye vhoṱhe zwauri ndi tshanḓa tsha Yehova tshe tsha ita zwenezwo; zwo sikwa nga Ene Mukhethwa wa Isiraele.”—Yesaya 41:17-20.
20 Naho Vhaisiraele vha re vhuthubwani vha tshi dzula musanda wa muvhuso wa shango ḽo pfumaho, khavho u nga soga ḽo omaho. Vha ḓipfa u fana na Davida musi a tshi khou shavha Khosi Saulo. Nga 537 B.C.E., Yehova u vha vulela nḓila uri vha vhuyelele kha ḽa Yuda nahone vha fhaṱulule thembele ngei Yerusalema, nga zwenezwo vha vusuluse vhurabeli ha ngoho. Nga zwenezwo, Yehova u a vha fhaṱutshedza. Kha vhuporofita ha nga murahu, Yesaya u amba hu tshee nga phanḓa: “Yehova u fhumudza Tsioni, u fhumudza marubi awo oṱhe. Masoga awo u ḓo a ita vhunga Edeni, maḓaka awo Yehova u ḓo a ita vhunga tsimu ya Yehova.” (Yesaya 51:3) Hezwi zwo itea zwa vhukuma musi Vhayuda vha tshi vhuyelela shangohaya ḽavho.
21. Ndi u vusulusa hufhio ho iteaho musalauno, nahone hu ḓo itea mini tshifhingani tshi ḓaho?
21 Ho itea zwiṅwe zwithu zwi fanaho na zwenezwo musalauno musi Korese Muhulwane, Kristo Yesu, a tshi vhofholola vhatevheli vhawe vho ḓodzwaho vhuthubwani ha muya uri vha kone u vusulusa vhurabeli ho kunaho. Vhenevho vha fulufhedzeaho vho fhaṱutshedzwa nga paradiso yo pfumaho ya muya, tsimu ya pfanyisedzo ya Edeni. (Yesaya 11:6-9; 35:1-7) Zwenezwino, musi Mudzimu a tshi fhelisa maswina awe, ḽifhasi ḽoṱhe ḽi ḓo shandulwa ḽa vha paradiso ya vhukuma, samusi Yesu o fulufhedzisa muitazwivhi we a vha o ombelwa kha danda.—Luka 23:43.
Khaedu kha Maswina a Isiraele
22. Ndi afhio maipfi ane Yehova a itela ngao dzitshaka khaedu?
22 Zwino Yehova u vhuyelela kha khakhathi yawe na dzitshaka na midzimu yavho ya zwifanyiso: “Ḓisani mafhungo aṋu, Yehova u ralo. Vhidzani dziṱhanzi dzaṋu. U ralo Ene Khosi ya Yakobo. Nga vha ri vhudze zwine ra yo’ ṱangana nazwo’. Vha ri hanelele na zwa kale uri ri zwi elekanye dzimbiluni dzashu, ri ḓivhe he zwa isa; kana ri pfe zwine zwa kha ḓi ḓo ḓa. Ri vhudzeni zwine zwa ḓo bvelela matshelo, ri kone u ḓivha zwauri ni midzimu. Itani zwo nakaho, kana ni ite zwo vhifhaho, ri kanuke ri tshi zwi vhona roṱhe. Ngangoho, a ni tshithu, na zwiito zwaṋu ndi mahandana; we a nanga vho-inwi u a nengisa.” (Yesaya 41:21-24) Naa midzimu ya dzitshaka i a kona u porofita nga ho teaho nahone nga zwenezwo ya sumbedza uri i na nḓivho i songo ḓoweleaho? Arali i tshi kona, hu fanela u vha na mvelelo, dzavhuḓi kana mmbi, dzine dza tikedza zwine ya zwi amba. Naho zwo ralo, zwi re zwone ndi uri midzimu ya zwifanyiso a i koni u ita naho tshi tshini nahone zwi sokou fana na musi i siho.
23. Ndi ngani Yehova, nga vhaporofita vhawe, a tshi sasaladza zwifanyiso lunzhi-lunzhi nga u rali?
23 Misini yashu vhaṅwe vha nga ḓivhudzisa uri ndi ngani Yehova, nga Yesaya na vhaporofita vhawe, o fhedza tshifhinga tshinzhi nga u rali a tshi khou sasaladza mahandana a u gwadamela midzimu i sili. Vhathu vhanzhi ṋamusi vha a zwi vhona uri zwifanyiso zwo itwaho nga vhathu a zwi thusi tshithu. Naho zwo ralo, arali ha vhuya ha thewa maitele a pfunzo dza mazwifhi nahone dza ṱanganedzwa nga vhunzhi, zwi a konḓa u dzi bvisa mihumbuloni ya vhane vha dzi tenda. Pfunzo nnzhi dza musalauno dzine dza fana na dzenedzo a dzi thusi tshithu zwi fana na u tenda uri zwifanyiso zwi sa tshili ndi midzimu ngangoho. Naho zwo ralo, vhathu vha nambatela pfunzo dzo raloho naho hu na mafhungo a pfalaho ane a lwisana na pfunzo dzavho. Vhaṅwe vha ṱoḓa u pfa ngoho lunzhi-lunzhi uri vha sudzuluselwe u vhona vhuṱali ha u fulufhedza Yehova.
24, 25. Yehova u dovha a amba mini nga Korese, nahone ndi vhufhio vhuṅwe vhuporofita vhune zwenezwi zwa ri humbudza hone?
24 Yehova u dovha a ambela kha Korese: “Ndi vusa muṅwe ane a ḓa a tshi bva Ḽivhuya u bva thungo ya Vhubvaḓuvha, u rerela dzina ḽanga; vhakoma u ḓo vha kandekanya vhunga thophe, vhunga muvhumbi a tshi kanḓa vumba.” (Yesaya 41:25)d U fhambana na midzimu ya dzitshaka, Yehova a nga khunyeledza zwithu. Musi a tshi ḓisa Korese u bva vhuṱavha-ḓuvha, thungo ya “Vhubvaḓuvha,” Mudzimu u ḓo sumbedza vhukoni hawe ha u bvumba na u langa vhumatshelo u itela u ḓadzisa vhuporofita hawe.
25 Enea maipfi a ri humbudza ṱhaluso ya vhuporofita ya muapostola Yohane malugana na mahosi e a vha a tshi ḓo tumbudzuka a dzhia vhukando misini yashu. Kha Ndzumbululo 16:12, ri vhala uri hu ḓo dzudzanywa nḓila “ya mahosi a Vhubvaḓuvha.” Enea mahosi ndi Yehova Mudzimu na Yesu Kristo. Samusi Korese o vhofholola vhathu vha Mudzimu kale-kale, enea mahosi a re na maanḓa vhukuma a ḓo fhelisa maswina a Yehova nahone a dededza vhathu vhawe vha fhira vhuṱunguni vhuhulu vha dzhena shangoni ḽiswa ḽa u luga.—Psalme ya 2:8, 9; 2 Petro 3:13; Ndzumbululo 7:14-17.
Yehova Ndi Muhulwane U Fhira Vhoṱhe!
26. Ndi mbudziso ifhio ine Yehova a i vhudzisa zwino, nahone naa i a fhindulwa?
26 Yehova u dovha a amba ngoho uri ndi ene fhedzi Mudzimu wa ngoho. U a vhudzisa: “Ndi nnyi we a zwi amba kale ra zwi ḓivha, a zwi amba zwí kha ḓi ḓa, ra kona u ri o amba zwone. Hone, a huna mubvúmbi, a huna we a bula fhungo, a huna we a pfa maambiwa aṋu.” (Yesaya 41:26) A hu na mudzimu wa tshifanyiso we a ḓivhadza u ḓa ha mukundi uri a vhofholole vhane vha mu fulufhela. Yeneyo midzimu yoṱhe a i tshili, ndi zwimuma. A si midzimu na kathihi.
27, 28. Ndi ngoho ifhio ya ndeme ine ya ombedzelwa kha ndimana dza u fhedza dza Yesaya 41, nahone ndi vhafhio vhane vha ḓivhadza zwenezwi?
27 Musi o no vhiga enea maipfi a nyanyulaho a vhuporofita ha Yehova, Yesaya u ombedzela ngoho ya ndeme: “Ndi Nṋe we nda ranga u amba fhano Tsioni nda ri: Vhonani, ngezwiḽaa! muḓi wa Yerusalema nda u ṋea mu-ḓisa-fhungo-ḽivhuya. Ndo lavhelesa nda wana hú si na muthu, kha vhaḽa hú si na mueletshedzi we nda kona u mu vhudzisa a mbudza mafhungo. Ngangoho, vhenevho vhoṱhe, a huna tshine vha vha tshone; zwe vha zwi ita ndi zwa fhedzi; midzimu yavho ya zwifanyiso ndi muya, ndi mahandana.”—Yesaya 41:27-29.
28 Yehova ndi wa u thoma. Ndi muhulwane u fhira vhoṱhe! Ndi Mudzimu wa ngoho, ane a ḓivhadza u vhofhololwa ha vhathu vhawe, ane a vha ḓisela mafhungo maḓifha. Nahone ndi Ṱhanzi dzawe fhedzi dzine dza ḓivhadza vhuhulwane hawe kha dzitshaka. Nga u tou holedza, Yehova u sasaladza vhane vha fulufhela vhurabeli ha zwifanyiso, u amba uri midzimu yavho ndi “muya, ndi mahandana.” Ndi tshiitisi tsho khwaṱhaho lungafhani tsha u nambatela Mudzimu wa ngoho! Ndi Yehova fhedzi ane ra fanela u mu fulufhela nga mbilu dzashu dzoṱhe.
[Ṱhaluso dzi re magumoni a siaṱari]
c Korese Muhulwane, we nga 1919 a vhofholola “Isiraele wa Mudzimu” kha vhuthubwa ha muya, ndi Yesu Kristo, ane a dzula kha khuluṋoni sa Khosi ya Muvhuso wa Mudzimu wa ṱaḓulu u bva nga 1914.—Vha-Galata 6:16.
d Naho shangohaya ḽa Korese ḽo vha ḽi vhubvaḓuvha ha Babele, musi a tshi vutshela wonoyo muḓi lwa u fhedza, o vha a tshi bva devhula, Asia Minor.
[Tshifanyiso kha siaṱari 19]
Naho Korese e muhedeni, u khethiwa uri a ite mushumo wa Mudzimu
[Tshifanyiso kha siaṱari 21]
Tshaka dzi fulufhela zwifanyiso zwi sa tshili
[Tshifanyiso kha siaṱari 27]
Vhaisiraele, u fana na “tshifulo tsha vhuhali,” vha ḓo ‘piḓimula dzithavha’