Ndima ya 25

Ndi Nga Kunda Hani Nḓowelo Ya U Ḓiswoṱa Tshiraḓo Tsha Mbeu?

“Ndo thoma u ḓiswoṱa tshiraḓo tsha mbeu musi ndi na miṅwaha ya malo. Nga murahu ndo mbo ḓi guda nḓila ine Mudzimu a dzhia ngayo zwenezwo zwithu. Zwo vha zwi tshi mmbavha tshifhinga tshoṱhe musi ndi tshi zwi ita. Ndo ḓivhudzisa uri, ‘Mudzimu a nga funa hani muthu ane a fana na nṋe?’”—Luiz.

MUSI ni tshi swika miṅwahani ya vhufumi, lutamo lwa zwa vhudzekani lu vha na maanḓa vhukuma. Nga ṅwambo wa zwenezwo, ni nga kha ḓi vha na nḓowelo ya u ḓiswoṱa tshiraḓo tsha mbeu.a Vhaswa vhanzhi vha nga kha ḓi ri zwenezwo a zwi dini. Vha nga kha ḓi ri, “A zwi vhaisi muthu.” Naho zwo ralo, hu na tshiitisi tshi pfalaho tsha u iledza yeneyo nḓowelo. Muapostola Paulo o ṅwala uri: ‘Vhulahani-ha miraḓo malugana na nyemulo mmbi.’ (Vha-Kolosa 3:5) U ḓiswoṱa tshiraḓo tsha mbeu a zwi vhulahi lutamo lwa zwa vhudzekani, fhedzi zwi tou lu ṋaṋisa. Zwiṅwe hafhu, ṱhogomelani zwi tevhelaho:

● U ḓiswoṱa tshiraḓo tsha mbeu zwi ita uri muthu a vhe na mavhonele a tseḓa. Sa tsumbo, musi muthu a tshi ḓiswoṱa tshiraḓo tsha mbeu u vha o livhisa ṱhogomelo yawe yoṱhe kha nḓila ine zwine a khou zwi ita zwa ita uri a ḓipfe ngayo muvhilini.

● U ḓiswoṱa tshiraḓo tsha mbeu zwi ita uri muthu a dzhie vhathu vha mbeu yo fhambanaho na yawe sa zwithu-vho, kana zwishumiswa zwa u ḓifusha ngazwo.

● Mahumbulele a tseḓa ane a ḓiswa nga u ḓiswoṱa tshiraḓo tsha mbeu a nga ita uri muthu a konḓelwe u fushea nga zwa vhudzekani mbinganoni.

Nṱhani ha u fusha lutamo lwa zwa vhudzekani nga u ḓiswoṱa tshiraḓo tsha mbeu, lwelani u ḓilanga. (1 Vha-Thesalonika 4:4, 5) U itela u ni thusa u ita nga u ralo, Bivhili i amba uri ni fanela u iledza zwiimo zwine zwa nga ita uri ni vutshelwe. (Mirero 5:8, 9) Naho zwo ralo, ni fanela u ita mini arali no no vha na nḓowelo ya u ḓiswoṱa tshiraḓo tsha mbeu? Khamusi no no lingedza u litsha, fhedzi na kundelwa. Zwi nga kha ḓi leluwa u phetha uri ni nga si shanduke, uri ni nga si kone u tshila nga zwilinganyo zwa Mudzimu. Yeneyi ndi nḓila ye muṅwe mutukana ane a pfi Pedro a ḓipfa ngayo. O ri: “Musi ndi tshi dovha nda ḓiswoṱa tshiraḓo tsha mbeu, zwo vha zwi tshi mmbavha. Ndo vha ndi tshi humbula uri ndi nga si vhuye nda hangwelwa zwe nda zwi ita. Zwo vha zwi tshi nkonḓela u rabela.”

Arali ni tshi ḓipfa nga yeneyi nḓila, ni songo kulea nungo. Ni nga wana thuso. Vhaswa vhanzhi—na vhathu vhahulwane—vho kunda dzema ḽa u ḓiswoṱa tshiraḓo tsha mbeu. Na inwi ni nga ḽi kunda!

Ni Nga Ita Mini Arali Ni Tshi Ḓivhona Mulandu?

Samusi ro no zwi ṱhogomela, vhathu vhane vha vha na dzema ḽa u ḓiswoṱa tshiraḓo tsha mbeu vha dzulela u ḓivhona mulandu. A zwi timatimisi uri u ‘ṱungufhadzwa lune Mudzimu a lu funa’ zwi nga ni ita uri ni kunde ḽeneḽo dzema. (2 Vha-Korinta 7:11) Fhedzi u ḓivhona mulandu nga ho kalulaho zwi nga ita uri ni sa kone u kunda ḽeneḽo dzema. Zwi nga ni kula nungo lune na litsha u lwisana naḽo.—Mirero 24:10.

Nga zwenezwo, lwelani u vha na mavhonele o linganyiselwaho nga ha vhuimo haṋu. U ḓiswoṱa tshiraḓo tsha mbeu ndi vhuaḓa. Zwi nga ita uri ni ‘shumele nyemulo na u tama u ḓiphina nga zwa mivhala minzhi,’ nahone zwi ita uri ni vhe na mavhonele a si avhuḓi. (Tito 3:3) Naho zwo ralo, u ḓiswoṱa tshiraḓo tsha mbeu a si mufuda wa u ḓifara luvhi nga zwa vhudzekani ho kalulaho, u fana na vhupombwe. (Yuda 7) Arali ni na vhuleme ha u ḓiswoṱa tshiraḓo tsha mbeu, a no ngo fanela u phetha nga uri no ita tshivhi tshi sa hangwelwi. Tsha ndeme vhukuma ndi u lwisana na lwonolwo lutamo ni sa neti!

Zwi a leluwa uri ni ḓipfe no tsikeledzea arali no dovha na zwi ita. Musi zwenezwo zwi tshi itea, ni fanela u humbula maipfi a re kha Mirero 24:16: “Muvhuya, na̗ u wa kaṱan’una-kavhili, u ḓo ḓi dovha a vuwa. Vhavhi vhone vha wela zwivhini.” U thithisea lwa tshifhinganyana a zwi ambi uri ni muthu muvhi. Nga zwenezwo, ni songo fulufhuwa. Nṱhani hazwo, ṱolisisani zwe zwa ita uri ni dovhe ni wele kha tshenetsho tshivhi nahone ni lingedze u tshi iledza.

Ḓiṋeeni tshifhinga tsha u elekanya nga ha lufuno na khathutshelo ya Mudzimu. Mupsalme Davida we nga zwiṅwe zwifhinga a ita zwivhi nga ṅwambo wa vhushayanungo hawe, o ri: “Vhunga khotsi a tshi khathutshela vhana, u ralo Yehova a tshi khathutshela vhané vha mu ofha. Ngauri ndi Ene a ḓivhaho zwiné ra vha zwone, ha hangwi zwauri ri luruli.” (Psalme ya 103:13, 14) Vhukuma, Yehova u a ṱhogomela uri a ro ngo fhelela nahone “o ḓiimisela u hangwela.” (Psalme ya 86:5, NW) Naho zwo ralo, u ṱoḓa ri tshi ita vhuḓidini ha u sa dovholola tshivhi. Nga zwenezwo, ndi mini zwine na nga zwi ita u itela u kunda dzema ḽaṋu?

Ṱolisisani zwithu zwine na ḓimvumvusa ngazwo. Naa ni a ṱalela dzimuvi, mbekanyamushumo dza thelevishini kana u vula Web site dzine dza karusa maḓipfele a zwa vhudzekani? Mupsalme o rabela Mudzimu a ri: “Funza maṱo anga u tata zwivhi.”b—Psalme ya 119:37.

Ḓikombetshedzeni u humbula nga ha zwiṅwe zwithu. Muṅwe Mukriste ane a pfi William u eletshedza uri: “Musi ni sa athu eḓela, vhalani khandiso dzo thewaho Bivhilini. Ndi zwa ndeme nga maanḓa uri zwithu zwine na fhedzisela u elekanya nga hazwo ḓuvha ḽiṅwe na ḽiṅwe zwi vhe zwa muya.”—Vha-Filipi 4:8.

Vhudzani muṅwe muthu vhuleme haṋu. Zwi nga kha ḓi ni konḓela u amba na muṅwe muthu nga ha enea mafhungo nga ṅwambo wa ṱhoni. Fhedzi u ita nga u ralo zwi nga ni thusa u kunda ḽeneḽo dzema! Zwenezwo ndi zwe muṅwe Mukriste ane a pfi David a zwi ṱhogomela. O ri: “Ndo amba na khotsi anga ri vhavhili fhedzi. Ndi nga si vhuye nda hangwa zwe vha zwi amba. Vha tshi khou mwemwela, vho mbo ḓi ri, ‘Ndi ḓirwa khana nga inwi.’ Vho vha vha tshi zwi ḓivha uri zwi ṱoḓa tshivhindi uri ndi ambe navho nga ha enea mafhungo. Ndo vha ndi tshi ṱoḓa ṱhuṱhuwedzo yo raloho nahone zwenezwo zwo ita uri ndi ḓiimisele u sa tsha ita tshenetsho tshivhi.

“Khotsi anga vho ntsumbedza maṅwalo a si gathi u itela u nthusa u vhona uri a thi tou vha muthu muvhi, nahone nga murahu vha ntsumbedza hafhu maṅwe maṅwalo u itela uri vha vhe na vhungoho ha uri ndo pfesesa uri zwine nda khou zwi ita zwo khakhea vhukuma. Vho mbo ḓi ri u itela uri ndi kone u kunda ḽeneḽo dzema vha ḓo dovha vha haseledza na nṋe nga ha eneo mafhungo tshifhingani tshi ḓaho. Vho mmbudza uri a tho ngo fanela u kulea nungo arali nda dovha nda zwi ita, fhedzi ndi fanela u lwela uri ndi fhedze tshifhinga tshilapfu ndi sa athu zwi ita.” David o phetha nga uri: “U ḓivha uri hu na muthu ane a ḓivha nga ha vhuleme hanga na ane a khou nthusa zwo mmbuyedza vhukuma.”c

[Ṱhaluso dzi re magumoni a siaṱari]

LUṄWALO LWA NDEME

“Shavha dzinyemulo dza hana, tovhola u luga, na lutendo na lufuno na mulalo wa u pfana na havho vha vhidzelelaho Murena zwí tshi bva kha mbilu tshena.”—2 Timotheo 2:22.

TSIVHUDZO

Rabelani nyemulo i sa athu hulela. Humbelani Yehova Mudzimu uri a ni ṋee ‘maanḓa mahulwane’ u itela uri ni kone u sedzana na mulingo.—2 Vha-Korinta 4:7.

NAA NI A ZWI ḒIVHA URI . . . ?

Muthu muṅwe na muṅwe a si na nungo a nga tendela u langiwa nga lutamo lwawe lwa zwa vhudzekani. Fhedzi munna kana musadzi vhukuma u a ḓilanga naho e eṱhe.

ZWINE NDA ḒO ZWI ITA!

Ndi nga dzula ndi tshi elekanya nga ha zwithu zwo kunaho arali nda ․․․․․

Nṱhani ha u tendela u kundwa nga nyemulo ndi ḓo ․․․․․

Zwine nda ṱoḓa u vhudzisa mubebi kana vhabebi vhanga nga ha enea mafhungo ndi ․․․․․

NI HUMBULA MINI?

● Ndi ngani zwi zwa ndeme u humbula uri Yehova “o ḓiimisela u hangwela”?—Psalme ya 86:5, NW.

● Samusi Mudzimu we a sika lutamo lwa zwa vhudzekani a tshi dovha a amba uri ni fanela u ḓilanga, u a zwi ḓivha uri ni nga kona.

[Maipfi o ṱumbulwaho kha siaṱari 182]

“Tshee nda kunda honoho vhuleme, ndi na luvalo lwo kunaho phanḓa ha Yehova, nahone zwenezwo ndi zwithu zwa ndeme vhukuma u fhira zwoṱhe!”—Sarah

[Tshifanyiso kha siaṱari 180]

Arali na wa musi ni tshi khou gidima a zwi ambi uri ni tea u thoma mathomoni—u dovha na ḓiswoṱa tshiraḓo tsha mbeu a zwi fhelisi mvelaphanḓa ye na i ita