Ndima ya 26

Naa Zwo Tea U Ita Zwa Vhudzekani U Songo Ḓivhofha Nga Mafhungo A Lufuno?

“Vhaṅwe vhaswa vha a ṱangana nahone vha ita zwa vhudzekani vha songo ḓivhofha nga mafhungo a lufuno vha tshi ṱoḓa u vhona uri vha nga guma ngafhi na uri vha nga eḓela na vhathu vhangana.”—Penny.

“Vhatukana vha amba nga hazwo vho vhofholowa. Vha zuwa nga uri vha na khomba, fhedzi vha kona u eḓela na vhaṅwe vhasidzana vhanzhi.”—Edward.

VHASWA vhanzhi ṋamusi vha amba uri vha ita zwa vhudzekani vha songo ḓivhofha nga mafhungo a lufuno. Vhaṅwe vha ita na u vha na khonani dzine vha ya khadzo musi vha tshi ṱoḓa u ita zwa vhudzekani nahone vha sa ṱoḓi u ḓivhofha nga mafhungo a lufuno.

Ni songo mangala arali ni tshi lingea u ita zwenezwo zwithu! (Yeremia 17:9) Edward we a bulwa u thomani o ri: “Vhasidzana vhanzhi vho no nkhumbela uri ndi eḓele navho, nahone kha milingo yoṱhe ine nda ṱangana nayo sa Mukriste, hoyu ndi wone mulingo une wa nkonḓela nga maanḓa u lwa nawo. Zwi a konḓa u hana.” Ndi maitele afhio a Bivhili ane na fanela u dzula ni tshi a humbula arali na humbelwa u ita zwa vhudzekani u itela u ḓibvisa vhuludu?

Ndi Ngani Zwo Khakhea U Ita Zwa Vhudzekani U Songo Ḓivhofha Nga Mafhungo A Lufuno?

Vhupombwe ndi tshivhi tshihulwane vhukuma tshine tsha ita uri vhoṱhe vhane vha tshi ita vha sa ḓo ‘ḽa ifa ḽa Muvhuso wa Mudzimu.’ (1 Vha-Korinta 6:9, 10) Vhukuma, hu sa londwi uri vhathu vhavhili vha amba uri vha a funana kana vha khou ita zwa vhudzekani u itela u ḓibvisa vhuludu vha vha vha tshi khou ita vhupombwe. U itela uri ni kone u lwa na mulingo kha honoho vhuimo vhuvhili, ni fanela u dzhia u ita vhupombwe nga nḓila ine Yehova a zwi dzhia ngayo.

“Ndi tenda nga ho khwaṱhaho uri nḓila ya Yehova ndi yone ya khwine-khwine ine muthu a tea u tshila ngayo.”—Karen, Canada.

“Ni fanela u humbula uri ni murwa kana ṅwananyana wa muṅwe muthu, ni khonani ya vhathu vhanzhi, nahone ni muraḓo wa tshivhidzo. Ni ḓo shonisa vhenevho vhathu vhoṱhe arali na wela kha wonoyo mulingo!”—Peter, Britain.

Arali na dzhia vhupombwe nga nḓila ine Yehova a vhu dzhia ngayo, ni ḓo kona u ‘hana vhuvhi,’ naho vhu tshi takadza ṋama.—Psalme ya 97:10.

Zwine na nga zwi vhala: Genesi 39:7-9. Ṱhogomelani nḓila ye Yosefa a ima o khwaṱha ngayo musi o sedzana na mulingo wa u ita zwa vhudzekani, na zwe zwa mu ita uri a kone u lwa na wonoyo mulingo.

Ḓirweni Khana Nga Zwine Na Zwi Tenda

Zwo ḓowelea u vhona vhaswa vha tshi imelela zwine vha zwi tenda. Ni na ndugelo ya u dzhiela nṱha zwilinganyo zwa Mudzimu nga nḓila ine na ḓifara ngayo. Ni songo farwa nga ṱhoni nga mavhonele ane na vha nao a u sa ita zwa vhudzekani ni sa athu vha mbinganoni.

“Vha vhudzeni zwavhuḓi u bva mathomoni uri inwi ni tshila nga nḓila i ṱhonifheaho.”—Allen, Dzheremane.

“Vhatukana vhe nda vha ndi tshi dzhena navho tshikolo tsha sekondari vho vha vha tshi ḓivha uri ndi muthu-ḓe, nahone vho vha vha tshi zwi ḓivha uri u nnyambisa ho vha hu u sokou ḓinetisa.”—Vicky, United States.

U kona u imelela zwine na zwi tenda zwi sumbedza uri ni khou vha Mukriste o vhibvaho.—1 Vha-Korinta 14:20.

Zwine na nga zwi vhala: Mirero 27:11. Vhonani nḓila ine u ita zwo lugaho zwa nga takadza ngayo mbilu ya Yehova!

Imani No Khwaṱha!

Ndi zwa ndeme uri ni ri hai. Fhedzi vhaṅwe vhaswa vha dzhia uri musi ni tshi ri hai, zwi amba uri ni a vha takalela.

“Tshiṅwe na tshiṅwe tshaṋu—u katela na nḓila ine na ambara ngayo, nḓila ine na amba ngayo, vhathu vhane na amba navho, na nḓila ine na konana navho ngayo—i fanela u sumbedza uri a ni ho kha hayo mafhungo.”—Joy, Nigeria.

“Ni fanela u vha vhudza nga nḓila i pfalaho uri inwi ni nga si vhuye na ita zwa vhudzekani navho. Ni songo vhuya na dzhia zwifhiwa zwa vhatukana vhane vha ṱoḓa uri ni ite zwa vhudzekani navho. Vha nga shumisa zwenezwo sa tshiitisi tsha uri ni fanela u eḓela navho nga ṅwambo wa uri no ṱanganedza zwifhiwa zwavho.”—Lara, Britain.

Yehova u ḓo ni thusa arali na ima no khwaṱha. Mupsalme Davida o amba zwi tevhelaho nga Yehova nga ṅwambo wa zwe a zwi tshenzhela: “Muvhuya u mu ita nga zwivhuya.”—Psalme ya 18:25.

Zwine na nga zwi vhala: 2 Koronika 16:9. Zwi ḓivheni uri Yehova o ḓiimisela u thusa vhane vha ṱoḓa u ita zwo lugaho.

Ivhani Na Luvhonela

Bivhili i ri: “Muthanyi u vhona muvhango a khuda.” (Mirero 22:3) Ni nga i shumisa hani yeneyi nyeletshedzo? Nga u vha na luvhonela!

“Ḓifhambanyeni tshoṱhe na vhathu vhane vha dzula vha tshi amba nga zwa vhudzekani.”—Naomi, Dzhapani.

“Ni songo vhudza muthu zwidodombedzwa zwaṋu zwa vhuṋe, sa ḓiresi kana nomboro ya luṱingo.”—Diana, Britain.

Ṱolisisani maambele aṋu, nḓila ine na ḓifara ngayo, khonani dzaṋu na fhethu hune na anzela u ya hone. Nga murahu ha zwenezwo ni ḓivhudzise uri, ‘Naa ndi sa vhuyi nda zwi londa ndi vhonala u nga ndi khou ramba vhaṅwe vhaswa uri vha nkhumbele u ita zwa vhudzekani?’

Zwine na nga zwi vhala: Genesi 34:1, 2. Vhonani nḓila ye u vha fhethu hu songo teaho zwa vha na mvelelo mmbi ngayo kha musidzana ane a pfi Dina.

Humbulani uri u ita zwa vhudzekani u songo ḓivhofha nga mafhungo a lufuno ndi mafhungo o dzikaho kha Yehova Mudzimu; na inwi ni fanela u a dzhia nga nḓila yo dzikaho. Arali na imela ngoho, ni ḓo vha na luvalo lwo kunaho phanḓa ha Mudzimu nahone na dzula ni tshi ḓiṱhonifha. Muṅwe musidzana ane a pfi Carly o zwi ṱalutshedza nga heyi nḓila, “Ndi ngani ni tshi fanela u tenda u shumiselwa u fusha nyemulo dza muṅwe muthu nga nḓila i leluwaho nga u rali? Tsireledzani vhuimo haṋu ho kunaho phanḓa ha Yehova he na ḓidina vhukuma uri ni vhu wane!”

LUṄWALO LWA NDEME

“Fungelelani, uri [Mudzimu] a ni wane ní si na tshika, ní sa solei, ní na mulalo.”—2 Petro 3:14.

TSIVHUDZO

Khwinisani vhumuthu haṋu. (1 Petro 3:3, 4) Arali ni na vhumuthu havhuḓi, ni ḓo takalelwa nga muthu wavhuḓi.

NAA NI A ZWI ḒIVHA URI . . . ?

Yehova u ṱoḓa ni tshi ḓiphina nga zwa vhudzekani nga nḓila ye a zwi sika ngayo—sa nḓila ya u ḓitakadza mbinganoni—ni si na mbilaelo, u ḓipfa ni songo vhofholowa, na u ḓisola hune kanzhi ha ḓiswa nge muthu a ita vhupombwe.

ZWINE NDA ḒO ZWI ITA!

Ndi nga edzisa nḓila ye Yosefa a vha o ḓiimisela ngayo u dzula a tshi ḓifara zwavhuḓi arali nda ․․․․․

Ndi ḓo iledza vhukhakhi he ha itwa nga Dina arali nda ․․․․․

Zwine nda ṱoḓa u vhudzisa mubebi kana vhabebi vhanga nga ha enea mafhungo ndi ․․․․․

NI HUMBULA MINI?

● Naho u ita zwa vhudzekani vhu sa ṱanganedzei zwi tshi kunga vhathu vha songo fhelelaho, ndi ngani zwo khakhea?

● Ni ḓo ita mini arali muṅwe muthu a ni humbela uri ni ite zwa vhudzekani?

[Maipfi o ṱumbulwaho kha siaṱari 185]

“Imani no khwaṱha! Musi muṅwe muṱhannga a tshi nkhumbela uri ndi ite zwithu zwine zwa tshimbidzana na zwa vhudzekani, ndo ri: ‘Ni songo nnḓowela!’ nahone nda ṱuwa ndo dinalea.”—Ellen

[Tshifanyiso kha siaṱari 187]

Arali ni tshi ita zwa vhudzekani u itela u ḓibvisa vhuludu, ni vha ni tshi khou ḓitsitsela fhasi