Fulufhelani Yehova “Ene Mudzimu Wa U Kwengweledza Hoṱhe”
“Nga hu rendwe Mudzimu, a re Khotsi-a Murena washu Yesu Kristo, ene Khotsi wa dzikhathutshelo, ene Mudzimu wa u kwengweledza hoṱhe.”—2 VHA-KOR. 1:3.
1. Vhathu vha ṱoḓa mini hu sa londwi miṅwaha yavho?
U BVA musi ri tshi bebwa ri ṱoḓa u kwengweledzwa. Ṅwana u tou lila musi a tshi ṱoḓa u kwengweledzwa. Khamusi u vha a tshi khou ṱoḓa u takulwa kana e na nḓala. Na musi ro no aluwa, kanzhi ri a ṱoḓa u khuthadzwa, zwihuluhulu musi ri tshi ṱangana na zwiimo zwi konḓaho.
2. Ndi khwaṱhisedzo ifhio ye Yehova a i ṋea i sumbedzaho uri u ḓo khuthadza vhane vha mu fulufhela?
2 Kanzhi mashaka na dzikhonani vha nga ri khuthadza. Naho zwo ralo, nga zwiṅwe zwifhinga hu a vha na vhuimo vhu konḓaho vhune muthu a si kone u vhu tandulula. Ndi Mudzimu fhedzi ane a nga ri khuthadza hu sa londwi uri vhuimo hashu vhu konḓa lungafhani. Ipfi ḽawe ḽi ri khwaṱhisedza uri: “Yehova u tsini na vhoṱhe vhané vha mu vhidza, . . . zwililo zwavho u a zwi pfa.” (Ps. 145:18, 19) Vhukuma, “maṱo a Yehova a vhona vho lugaho; nḓevhe dzawe dzi pfa u lila havho.” (Ps. 34:15) Fhedzi arali ri tshi ṱoḓa uri Mudzimu a ri khuthadze na u ri tikedza ri fanela u mu fulufhela. Mupsalme Davida o zwi bvisela khagala musi a tshi imba a ri: “Yehova ndi dzhavhelo ḽa vhaheḓana, dzhavhelo musi vhó khakhelwa. U fulufhelwa nga vha ḓivhaho dzina ḽau, ngauri a U laṱedzi vha U ṱuvhaho.”—Ps. 9:9, 10.
3. Yesu o ṱalusa hani nḓila ine Yehova a funa ngayo vhathu Vhawe?
3 Vhagwadameli vha Yehova ndi vha ndeme khae. Yesu o bvisela zwenezwi khagala musi a tshi ri: “Naa ṱhongola ṱhanu a dzi rengwi nga peni mbili naa? Naho zwó ralo, a huna na nthihi yadzo yo hangwiwaho nga Mudzimu. Na mavhudzi a re dziṱhóhoni dzaṋu o vhalwa oṱhe. Ndi zwiné nda ri: Ni songo ofha; ni fhira ṱhongola nnzhi.” (Luka 12:6, 7) A tshi shumisa muporofita Yeremia, Yehova o vhudza vhathu Vhawe vha misini ya kale uri: “Ndo U funa nga lufuno lwa lini na lini; ndi zwone zwe nda itela zwone ndi tshi fareledza tshilidzi tshanga kha iwe.”—Yer. 31:3.
4. Ndi ngani ri tshi nga fulufhela zwe Yehova a zwi fulufhedzisa?
4 U fulufhela Yehova na uri mafulufhedziso awe a ḓo ḓadzea zwi nga ri khuthadza zwifhingani zwi lemelaho. Ngauralo, ri fanela u fulufhela Mudzimu u fana na Yoshua we a ri: “Oṱhe Mafhungo avhuḓi e a ni amba ngao’; ha ngo sia na ḽithihi; oṱhe o vulea; a huna ḽe ḽa ṱáhela.” (Yosh. 23:14) Zwiṅwe hafhu, ri nga vha na vhungoho ha uri musi ro tsikeledzea lwa tshifhinganyana, ‘Mudzimu u a fulufhedzea’ nahone a nga si vhuye a laṱedza vhashumeli vhawe vha fulufhedzeaho.—Vhalani 1 Vha-Korinta 10:13.
5. Zwi nga konadzea hani uri na riṋe ri khuthadze vhaṅwe?
5 Muapostola Paulo o ri Yehova ndi “Mudzimu wa u kwengweledza hoṱhe.” U “kwengweledza” zwi amba u khuthadza muthu o tsikeledzeaho kana o ṱungufhalaho. Zwenezwi zwi itwa nga u fhumudza muthu o ṱungufhalaho kana ane a khou lila. Vhukuma Yehova u a ri khuthadza. (Vhalani 2 Vha-Korinta 1:3, 4.) A hu na tshithu kana muthu ane a nga thivhela Khotsi ashu wa ṱaḓulu u ita tshiṅwe na tshiṅwe u itela u khuthadza vhane vha mu funa. Nga zwenezwo, na riṋe ri nga kona u khuthadza vhatendi nga riṋe “maṱhuphoni oṱhe.” Ri nga ita zwenezwo “nga u kwengweledza honohuḽa, he ra kwengweledzwa ngaho’ nga Mudzimu.” Zwenezwi zwi sumbedza zwavhuḓi nḓila i sa vhambedzwi na tshithu ine Yehova a khuthadza ngayo vho ṱungufhalaho!
U Sedzana Na Makhaulambilu
6. Ṋeani tsumbo dza zwithu zwine zwa nga ri tsikeledza.
6 Ri ṱoḓa u khuthadzwa kha masia manzhi a vhutshilo. Zwiṅwe zwa zwithu zwine zwa ita uri ri pfe vhuṱungu vhuhulwane ndi u lovhelwa nga muthu ane ra mu funa, zwihuluhulu mufarisi wa mbingano a funwaho kana ṅwana. Muthu a nga kha ḓi ṱoḓa u khuthadzwa nga nṱhani ha tshiṱalula na luvhengelambiluni. Mutakalo u si wavhuḓi, vhulala, vhushai, thaidzo dza mbingano, kana zwiimo zwa shango zwi tsikeledzaho zwi nga ita uri muthu a ṱoḓe u khuthadzwa.
7. (a) Musi ro tsikeledzea, ri ṱoḓa u kwengweledzwa nga nḓila-ḓe? (b) Ndi mini zwine Yehova a nga zwi ita u itela u fhodza mbilu yo ‘ṱhavhiwaho na yo paḓukanywaho’?
7 Musi ro tsikeledzea, ri nga kha ḓi ṱoḓa u kwengweledzwa u itela u rindidza mbilu, muhumbulo, maḓipfele, na u itela mutakalo washu khathihi na vhumuya hashu. Sa tsumbo, kha ri haseledze nga ha mbilu. Ipfi ḽa Mudzimu ḽi amba uri mbilu yashu i nga ‘ṱhavhiwa nahone ya paḓukanywa.’ (Ps. 51:17) Yehova u a kona “u fhodza vha dzimbilu dzo vunḓekanaho, u phupha maṱungu avho.” (Ps. 147:3) Na kha zwiimo zwi konḓaho Mudzimu a nga kona u rudza mbilu dzashu arali ra rabela ri na lutendo nahone ri tshi thetshelesa milayo yawe.—Vhalani 1 Yohane 3:19-22; 5:14, 15.
8. Musi ro tsikeledzea muhumbulo, Yehova a nga ri thusa hani?
8 Kanzhi ri a ṱoḓa u kwengweledzwa musi ri tshi ṱangana na milingo yo fhamba-fhambanaho ine ya nga ita uri ri tsikeledzee vhukuma muhumbuloni. Zwi tou vha khagala uri ri nga si kone u sedzana na yeneyi milingo ya lutendo nga nungo dzashu. Nga zwenezwo, mupsalme o imba a ri: “Kha mbilaelo nnzhi dze dza ndzhena, mbilu yanga yo ḓi takadzwa nga phumudzo dzau.” (Ps. 94:19) Zwiṅwe hafhu, Paulo o ṅwala uri: “Ni songo vhilaela tshithu. Zwoṱhe zwiné na zwi tama ni ḓivhadze Mudzimuni nga thabelo na nga u humbela hu re na u livhuha. Huno mulalo wa Mudzimu, a fhiraho u ṱalukanya hoṱhe, u vhulungele dzimbilu dzaṋu na mihumbulo yaṋu kha Kristo Yesu.” (Vha-Fil. 4:6, 7) U vhala na u elekanya nga Maṅwalo zwi nga ri thusa vhukuma uri ri kone u sedzana na mutsiko wa muhumbulo.—2 Tim. 3:15-17.
9. Ri nga sedzana hani na u tsikeledzea maḓipfele?
9 Nga zwiṅwe zwifhinga ri nga kulea nungo lune ra nga ḓivhea khomboni ya u vha na maḓipfele a si avhuḓi. Zwi nga kha ḓi itea uri ri ḓipfe ri sa fanelei u ita vhuṅwe vhuḓifhinduleli ha Maṅwalo kana ndugelo. Na kha zwiimo zwo raloho, Yehova a nga ri thusa na u ri kwengweledza. Ri tshi tou fanyisa: Musi Yoshua a tshi ṋewa ndaela ya u ranga phanḓa Vhaisiraele vha tshi ya u lwa na maswina avho a re na maanḓa, Mushe o vhudza vhathu a ri: “Itani nga maanḓa nó fulufhela. Ni songo ofha na shuwa ni tshi livhana navho’; ngauri Yehova Mudzimu waṋu u ya na inwi; ha nga ni laṱedzi a ni sia ní noṱhe.” (Doit. 31:6) Nga thuso ya Yehova, Yoshua o kona u ranga phanḓa vhathu vha Mudzimu u swika Shangoni ḽo Fulufhedziswaho na u kunda maswina avho oṱhe. Nga phanḓanyana ha zwenezwo Lwanzheni Lutswuku, na Mushe o tshenzhela thikhedzo ya Mudzimu.—Ek. 14:13, 14, 29-31.
10. Arali mutsiko u tshi kwama mutakalo washu, ndi thuso ifhio ine ra nga i wana?
10 Zwiitea zwi tsikeledzaho zwi nga kwama mutakalo washu nga nḓila i si yavhuḓi. Ndi ngoho uri u ḽa nga nḓila yo teaho, u awela, u ita nyonyoloso na u dzula ro kuna zwi nga ri kwama nga nḓila yavhuḓi. U vha na mavhonele a lwa muya a ṱuṱuwedzwaho nga u vhala Bivhili zwi nga ita uri ri vhe na mutakalo wavhuḓi. Ngauralo, ndi zwavhuḓi uri musi ro sedzana na khaedu ri humbule zwe Paulo a zwi tshenzhela na maipfi awe a ṱuṱuwedzaho ane a ri: “Ri vha pwanyeledzwaho hoṱhe, hone rí sa pwashiwi; ri vha khakhedzwaho, hone rí sa khakhelwi, Ri vha tovholwaho, hone rí sa laṱedzwi; ri vho poswaho fhasi, hone rí sa vhulawi.”—2 Vha-Kor. 4:8, 9.
11. Ri nga sedzana hani na u lwala muyani?
11 Miṅwe milingo i nga kwama mutakalo washu wa lwa muya nga nḓila i si yavhuḓi. Na kha enea mafhungo Yehova a nga ri thusa. Ipfi ḽawe ḽi a ri khwaṱhisedza uri: “Yehova u tika vhoṱhe vha waho; u vusa vhoṱhe vho tsikiwaho.” (Ps. 145:14) U itela uri ri kone u wana thuso ya u sedzana na u lwala muyani, ri fanela u ṱoḓa thuso kha vhahulwane vha Vhakriste. (Yak. 5:14, 15) Zwiṅwe zwine zwa nga ri thusa u sedzana na milingo ya lutendo lwashu ndi u dzula ri tshi elekanya nga fulufhelo ḽi re Maṅwaloni ḽa vhutshilo vhu sa fheli.—Yoh. 17:3.
Tsumbo Dza U Khuthadzwa Nga Mudzimu
12. Ṱalusani nḓila ye Yehova a khuthadza ngayo Abrahamu.
12 Mupsalme o hevhedzwaho o ri: “Elelwa fhungo ḽe wa vhudza mulanda wau, ḽe wa ri [Yehova] ndi fulufhele ḽone. Ndi zwenezwo zwi mphumudzaho tsikuni yanga, ngauri zwe Iwe wa amba ndi zwone zwi mphilisaho.” (Ps. 119:49, 50) Ṋamusi ri na Ipfi ḽa Yehova ḽo ṅwalwaho ḽine ḽa vha na tsumbo nnzhi dza vhathu vhe vha khuthadzwa nga Mudzimu. Sa tsumbo, zwi nga itea uri Abrahamu o ḓipfa o tsikeledzea musi a tshi pfa uri Yehova u ḓo fhelisa miḓi ya Sodoma na Gomora. Onoyo musimulalushaka a fulufhedzeaho o vhudzisa Mudzimu a ri: “Naa U nga lozwa vhavhuya huthihi na vhavhi naa?” Yehova o khuthadza Abrahamu nga u mu khwaṱhisedza uri arali ha wanala vhathu vha 50 vho lugaho, O vha a sa ḓo lozwa muḓi wa Sodoma. Naho zwo ralo, Abrahamu o dovha a vhudzisa Yehova luṱanu lwoṱhe: Arali hu na vhathu vha 45 vho lugaho? Vha 40? Vha 30? Vha 20? Vha 10? Tshifhinga tshoṱhe, Yehova o khwaṱhisedza Abrahamu a sa fheli mbilu na nga vhulenda uri o vha a sa ḓo lozwa muḓi wa Sodoma. Naho ho vha hu si na vhathu vha fumi vho lugaho henefho fhethu, Yehova o tshidza Loto na vhananyana vhawe.—Gen. 18:22-32; 19:15, 16, 26.
13. Hanna o sumbedza hani uri u fulufhela Yehova?
13 Hanna mufumakadzi wa Elikana o vha a tshi ṱoḓa u vha na ṅwana nga maṱo matswuku. Fhedzi o vha e muumba, nahone zwenezwo zwo mu tsikeledza. O rabela Yehova nga ha eneo mafhungo, nahone Eli Tshifhe Muhulu a ri khae: “Mudzimu wa Isiraele u ḓo U ṋea zwe wa mu humbela.” Eneo maipfi o khuthadza Hanna, “tshifhaṱuwo tshawe tshí sa nga zwiḽa kale.” (1 Sam. 1:8, 17, 18) Hanna o fulufhela Yehova, nahone a lindela e na fulufhelo. Naho Hanna o vha a sa ḓivhi uri hu ḓo vha na mvelelo ifhio, o vha na mulalo wa ngelelo. Nga u ya ha tshifhinga, Yehova o fhindula thabelo yawe. O vha muthu wa thovhela nahone a beba murwa we a mu rina uri Samuele.—1 Sam. 1:20.
14. Ndi ngani Davida o vha a tshi ṱoḓa u khuthadzwa, nahone o ya kha nnyi u itela u wana yeneyo khuthadzo?
14 Khosi Davida wa Isiraele ḽa kale ndi iṅwe tsumbo ya muthu we a khuthadzwa nga Mudzimu. Nga nṱhani ha uri Yehova u “vhona zwi re mbiluni,” musi a tshi khetha Davida uri a vhe khosi ya Isiraele, o vha a tshi zwi ḓivha uri Davida o vha a tshi fulufhedzea nahone a tshi ḓikumedzela vhurabeli ha ngoho. (1 Sam. 16:7; 2 Sam. 5:10) Naho zwo ralo, nga murahu Davida o ita vhuṱonḓolo na Batseba nahone a lingedza u dzumba tshenetsho tshivhi nga u ita uri munna wawe a vhulahwe. Musi Davida a tshi vhona uri o ita tshivhi tshihulwane, o rabela Yehova a ri: “U ṱuse zwivhi zwanga nga tshilidzi tshau tshihulu. U nṱanzwe ndi bve vhuvhi hanga, U bvise vhutshinyi hanga kha nṋe. Ngauri zwivhi zwanga ndi khou zwi ḓivha, vhutshinyi hanga a vhu ṱuwi phanḓa ha maṱo anga.” (Ps. 51:1-3) Davida o ḓisola zwa vhukuma, nahone Yehova o mu hangwela. Naho zwo ralo, o vha a tshi fanela u sedzana na mvelelo dza tshivhi tshawe. (2 Sam. 12:9-12) Onoyu mushumeli wa Yehova ane a ḓiṱukufhadza o khuthadzwa nga khathutshelo ya Yehova.
15. Yehova o thusa Yesu nga nḓila-ḓe musi e tsini na u fa?
15 Musi e kha ḽifhasi Yesu o sedzana na milingo minzhi. Mudzimu o tendela yeneyo milingo ya lutendo, nahone Yesu o dzula a tshi fulufhedzea sa muthu o fhelelaho we a vha a tshi fulufhela Yehova na vhuvhusahoṱhe Hawe. Musi e tsini na u ambululwa na u vhulahwa, Yesu o rabela Yehova a ri: “Hu songo itwa zwiné nṋe nda zwi funa, hu itwe zwi funwaho nga iwe.” Nga tshenetsho tshifhinga ho mbo ḓi ḓa muruṅwa a mu khwaṱhisa. (Luka 22:42, 43) Mudzimu o ṋea Yesu khuthadzo, nungo na thikedzo ye a vha a tshi i ṱoḓa nga tshenetsho tshifhinga.
16. Ndi mini zwine Mudzimu a nga zwi ita musi ro sedzana na lufu nga nṱhani ha u fulufhedzea hashu?
16 Naho ri tshi nga sedzana na lufu nga nṱhani ha uri ri ima ro khwaṱha sa Vhakriste, Yehova u ḓo ri thusa uri ri dzule ri tshi fulufhedzea khae. Zwiṅwe hafhu, ri khuthadzwa nga fulufhelo ḽa mvuwo. Nahone ro lavhelela nga maṱo matswuku musi a tshi ḓo kunda swina ḽa u “fhedzisa” ḽine ḽa vha lufu! (1 Vha-Kor. 15:26) Vhashumeli vha Mudzimu vha fulufhedzeaho vho faho khathihi na vhaṅwe vha muhumbuloni wa Yehova wo fhelelaho nahone vha ḓo vuswa. (Yoh. 5:28, 29; Mish. 24:15) U fulufhela fulufhedziso ḽa Yehova ḽa mvuwo zwi a ri khuthadza nahone zwi a ri khwaṱhisa musi ri tshi tovholwa.
17. Yehova a nga ri khuthadza hani musi ro felwa nga ane ra mu funa?
17 Zwi a khuthadza vhukuma u ḓivha uri vhathu vhane ra vha funa vho eḓelaho mavhiḓani vha ḓo dovha vha tshila shangoni ḽiswa ḽavhuḓi ḽi si na zwithu zwine zwa ri tsikeledza ṋamusi! Nahone ndi ndugelo yavhuḓi vhukuma uri “gogo ḽihulu” ḽa vhashumeli vha Yehova vhane vha ḓo ponyoka vhufhelo ha ano maitele a zwithu vha ṱanganedze na u funza vhathu vho vuselwaho u tshila kha ḽifhasi!—Ndzumb. 7:9, 10.
U Khuda Nga Zwanḓa Zwa Mudzimu Wa Lini Na Lini
18, 19. Vhashumeli vha Mudzimu vho khuthadzwa hani musi vha tshi tovholwa?
18 Nga maipfi a luimbo lu re na maanḓa na lu ṱuṱuwedzaho, Mushe o khwaṱhisedza vhathu vha Isiraele a ri: “Vhushavhelo ndi Ene, Mudzimu wa kale na kale, Wó khuda nga zwanḓa zwa wa lini na lini.” (Doit. 33:27) Nga murahu, muporofita Samuele o vhudza Vhaisiraele a ri: “Hone ni songo laṱa Yehova; ni shumele Yehova nga mbilu dzaṋu dzoṱhe. . . . Yehova ha nga laṱi vhathu vhawe, u itela dzina ḽawe ḽihulu.” (1 Sam. 12:20-22) Arali ra nambatela Yehova nga vhurabeli ha ngoho, a nga si vhuye a ri laṱa. U ḓo ri tikedza tshifhinga tshoṱhe.
19 Mudzimu ha kundelwi u thusa na u khuthadza vhathu vhawe maḓuvhani ano a vhufhelo a konḓaho. Hu ṱoḓaho u vha lwa ḓana ḽa miṅwaha, vhatendi nga riṋe vhanzhi shangoni ḽoṱhe vho tovholwa na u valelwa dzhele nga nṱhani ha u shumela Yehova. Zwe vha zwi tshenzhela zwi sumbedza uri musi ri tshi ṱangana na milingo, vhukuma Yehova u a khuthadza vhashumeli vhawe. Sa tsumbo, muṅwe wahashu wa tshinnani wa ngei he ha vha hu Soviet Union o haṱulelwa u dzula dzhele miṅwaha ya 23 nga nṱhani ha lutendo lwawe. Naho zwo ralo, ho waniwa nḓila ya u mu isela zwiḽiwa zwa muya u itela u mu khwaṱhisa na u mu khuthadza. O amba uri: “Nga yeneyo miṅwaha yoṱhe, ndo guda u fulufhela Yehova nahone o nkhwaṱhisa.”—Vhalani 1 Petro 5:6, 7.
20. Ri nga vha hani na vhungoho ha uri Yehova a nga si ri laṱe?
20 Hu sa londwi zwine ra kha ḓi ḓo ṱangana nazwo, zwi ḓo vha zwavhuḓi arali ra dzula ri tshi elekanya nga maipfi a khuthadzaho a mupsalme ane a ri: “Yehova ha laṱedzi vhathu vhawe.” (Ps. 94:14) Naho ri tshi ṱoḓa u khuthadzwa, ri dovha ra vha na ndugelo khulwane ya u khuthadza vhaṅwe. Samusi ri tshi ḓo zwi vhona kha thero i tevhelaho, ri nga khuthadza vhane vha khou pfa vhuṱungu kha ḽino shango ḽivhi.
Ni Ḓo Aravha Hani?
• Ndi zwifhio zwiṅwe zwithu zwine zwa nga ri tsikeledza?
• Yehova u khuthadza vhashumeli vhawe nga nḓila-ḓe?
• Arali ro sedzana na lufu, ndi mini zwine zwa nga ri khuthadza?
[Bogisi/Zwifanyiso kha siaṱari 25]
RI NGA SEDZANA HANI NA ZWITHU ZWINE ZWA NGA KWAMA . . .
▪ mbilu dzashu Ps. 147:3; 1 Yoh. 3:19-22; 5:14, 15
▪ muhumbulo washu Ps. 94:19; Vha-Fil. 4:6, 7
▪ maḓipfele ashu Ek. 14:13, 14; Doit. 31:6
▪ mutakalo washu 2 Vha-Kor. 4:8, 9
▪ vhumuya hashu Ps. 145:14; Yak. 5:14, 15