Mbudziso Dzi Bvaho Kha Vhavhali
Ndi ngani Phisalema 12:7 i tshi ri “u ḓo vha linda” i tshi khou ambela kha “vha tambulaho” (kha vese 5), i sa ri “u ḓo zwi linda” i tshi khou ambela kha “zwine Yehova a amba” (kha vese 6)?
Musi ri tshi sedza mafhungo oṱhe a yeneyi ndima, ri wana uri i khou ambela kha vhathu.
Kha Phisalema 12:1-4, ri vhala uri “vhathu vha fhulufhedzeaho a vha tsheeho vhathuni.” Ṱhogomelani zwine Phisalema 12:5-7 ya zwi amba, i ri:
“Yehova u ri: ‘Ndi ḓo takuwa nda dzhia vhukando
Ngauri vha tambulaho vha khou tsikeledzwa,
Ndi pfa vhashai vha tshi fhihamelwa.’
‘Ndi ḓo vha lamulela kha vhane vha vha nyadza.’
Zwine Yehova a amba zwo kuna;
Zwi nga siḽiva yo kunakiswaho ṋanḓoni lwa sumbe.
Iwe Yehova, u ḓo vha linda;
U ḓo tsireledza muṅwe na muṅwe wavho kha wonoyu murafho nga hu sa fheli.”
Vese ya 5 i amba nga ha zwine Mudzimu a ḓo zwi itela “vha tambulaho.” U ḓo vha tshidza.
Vese ya 6 i ri “zwine Yehova a amba zwo kuna” sa “siḽiva yo kunakiswaho.” Enea maipfi a ṱalusa nḓila ine ra ḓipfa ngayo nga ha Ipfi ḽa Yehova.—Ps. 18:30; 119:140.
Zwino ṱhogomelani zwine Phisalema 12:7 ya zwi amba, i ri: “Iwe Yehova, u ḓo vha linda; u ḓo tsireledza muṅwe na muṅwe wavho kha wonoyu murafho nga hu sa fheli.” Yeneyi vese i khou ambela kha mini?
Vhaṅwe vha nga humbula uri vese ya 7 i khou ambela kha “zwine Yehova a amba” zwi re kha vese ya 6. Ri a zwi ḓivha uri Mudzimu o linda Ipfi ḽawe Bivhili kha vhatovholi vhanzhi vhe vha vha vha tshi khou ṱoḓa u ḽi fhelisa.—Yes. 40:8; 1 Pet. 1:25.
Naho zwo ralo, zwo ambiwaho kha vese ya 5 na zwone ndi ngoho. Yehova o linda “vha tambulaho” na vhane vha khou “tsikeledzwa” nahone u ḓo bvela phanḓa a tshi vha thusa na u vha tshidza.—Yobo 36:15; Ps. 6:4; 31:1, 2; 54:7; 145:20.
Nga zwenezwo, yeneyi ndimana i khou ambela kha mini?
Mafhungo a re kha yeneyi Phisalema a sumbedza uri i khou ambela kha vhathu vha tambulaho na vha tsikeledzwaho.
Phisalema 12:1, 2 i amba nga ha “vhathu vha fhulufhedzeaho” vhe vha zwifhelwa nga vhavhi. Nga murahu ha zwenezwo, ri pfa hu tshi ambiwa uri Yehova u ḓo dzhiela vhukando vhane vha khou amba zwenezwo zwithu zwivhi. Yeneyi Phisalema i ri khwaṱhisedza uri Mudzimu u ḓo tsireledza vhathu vhawe ngauri zwine a amba zwo luga.
Ngauralo, vese 7 i khou amba uri Yehova u ḓo linda na u tsireledza vhathu vhawe vha tsikeledzwaho na vha tambudzwaho nga vhavhi.
Maipfi o shumiswaho henefho o wanala kha kopi dza Maṅwalo a Tshihevheru dzi fhulufhelwaho. Maṅwalo a Tshigerika a Septuagint o shumisa ipfi “riṋe” luvhili kha vese 7 ḽine ḽa ambela kha vhathu vha fhulufhedzeaho vhane vha khou tambudzwa na u tsikeledzwa. Tsha u fhedzisela, vese 7 i amba uri “muṅwe na muṅwe” wa vha fhulufhedzeaho u ḓo tsireledzwa kha “wonoyu murafho” wa vhathu vhane vha ṱuṱuwedza u ḓifara luvhi. (Ps. 12:7, 8) Kha ṱhalutshedzelo ya Maṅwalo a Tshihevheru ya Tshiaramiki, kha Phisalema 12:7 ho shumiswa ipfi “vha.” I ri: “Iwe Murena, u ḓo tsireledza vho lugaho, u ḓo vha linda kha wonoyu murafho muvhi lwa tshoṱhe.” Honovhu ndi vhuṱanzi ha uri Phisalema 12:7 a i khou ambela kha uri Yehova u ḓo tsireledza Ipfi ḽawe kana zwine a amba.
Nga nṱhani ha zwenezwo, yeneyi vese i ṋea “vhathu vha fhulufhedzeaho” fhulufhelo ḽa uri Mudzimu u ḓo vha tsireledza.